1. Йаһоԝа чьма жийин әʹфьранд?

СӘРИДА, Йаһоԝа бь тʹәне сәре хԝә бу. Ле бәле, әв йәк найе һʹәсабе кӧ ԝи хԝә тʹәне у бекәс тʹәхмин дькьр. Жь бо кӧ Йаһоԝа дьлша бә, әԝ һʹәԝще кәсед дьн нинә. Диса жи, Йаһоԝа дьхԝәст жийине бьдә кәсед дьн жи. Жь һʹьзкьрьне, Йаһоԝа дәст бь ише әʹфьрандьне кьр (Зәб. 36:9; 1 Йуһʹн. 4:19).

2. Ише әʹфьрандьне сәр Иса у мәләка чаԝа һʹӧкӧм дькьр?

² Сәрида, Йаһоԝа Кӧрʹе хԝә Иса әʹфьранд кӧ тʹәви ԝи кʹар бькә. Паше, әԝи бь дәсте ви Кӧрʹе пешьн бь милйона мәләк у һʹәму тьштед дьн әʹфьрандьн (Колс. 1:16). Иса жь кʹаркьрьна тʹәви Баве хԝә шабун дьстанд (Мәтʹлк. 8:30). Мәләк жи пʹьрʹ кʹефхԝәш бун. Гава ԝана дит кӧ Йаһоԝа у Иса әʹрд у әʹзман чаԝа чекьрьн, ԝана «бь кʹефхԝәшийева банг дькьр». Ӧса жи, гава Йаһоԝа тьштед дьн әʹфьрандьн – илаһи гава ԝи инсан әʹфьрандьн – мәләк пʹьрʹ ша бун (Иб. 38:7; Мәтʹлк. 8:31). Һʹәму тьштед әʹфьранди һʹьзкьрьн у биланийа Йаһоԝа әʹйан дькьн (Зәб. 104:24; Рʹом. 1:20).

3. Ль гора 1 Корьнтʹи 15:21, 22, ԛӧрбана Иса Мәсиһ жь бо чь рʹе вәдькә?

³ Йаһоԝа дьхԝәст кӧ инсан һʹәта һʹәтайе щьнәтеда сәр рʹуйе әʹрде бьжин. Ле бәле, сәд һʹәйф кӧ Адәм у Һәԝайе һьмбәри Хԝәде сәри һьлда, у сәва ве йәке гӧнә у мьрьн кʹәтьн дьнйайе (Рʹом. 5:12). Гәло Йаһоԝа сафи  кьр кӧ чь бькә? Ԝи дәрберʹа гот кӧ әԝе инсана чаԝа хьлаз бькә (Дәстп. 3:15) Йаһоԝа соз да кӧ бь сайа ԛӧрбанәке, әԝе мәщале бьдә зарʹокед Адәм у Һәԝайе кӧ әԝ жь гӧнә у мьрьне бьфьльтьн. Бь сайа ԛӧрбане, кәсед кӧ гӧһ дьдьн Хԝәде дькарьн жийина бедаԝи бьстиньн (Йуһʹн. 3:16; Рʹом. 6:23; 1 Корьнтʹи 15:21, 22 бьхунә).

4. Ве готареда, әме дәрһәԛа чь хәбәр дьн?

⁴ Йаһоԝа соз дайә кӧ әԝе мьрийа рʹакә. Ле бәле дәрһәԛа рʹабуна мьрийа, чәнд пьрс пешда тен. Мәсәлә, рʹабуна мьрийа ԝе чаԝа бьбә? Гава һʹьзкьрийед мә ԝе жь мьрьне рʹабьн, гәло әме ԝана нас бькьн? Рʹабуна мьрийа ԝе дьле мә чаԝа ша бькә? Гава әм ль сәр рʹабуна мьрийа кʹур дьфькьрьн, әв йәк чаԝа дькарә али мә бькә кӧ әм жь бо һʹьзкьрьн, билани у сәбра Йаһоԝа һе зедә шекьрдар бьн? Ньһа әме дәрһәԛа ван пьрса хәбәр дьн.

5. Ча те кʹьфше мәрьв ԝе чаԝа жь мьрьне рʹабьн, у чьма?

⁵ Ча те кʹьфше, Йаһоԝа ԝе бь дәсте Кӧрʹе хԝә Иса Мәсиһ, бь милйона кәса нә әʹйни дәмеда, ле дор бь дор жь мьрьне рʹакә. Гәло чьма? Жь бо кӧ кʹаос ченәбә! Йаһоԝа һәр тьшти бь аԝайәки рʹек у пек дькә, чьмки әԝ «нә Хԝәдайе тʹәвльһәвийе йә, ле йе аштийе йә» (1 Корн. 14:33, ИМ). Мәсәлә, пешийа кӧ Йаһоԝа инсан әʹфьранд, әԝи билани у сәбра хԝә бь ве йәке әʹйан кьр, кӧ әԝи дьнйа гав бь гав жь бо ԝан һазьр дькьр. Ль дәма Һʹӧкӧмдарийа Һʹәзарсали, Иса Мәсиһ жи ԝе бь билани у сәбьр тʹәви кәсед кӧ Һармәгәдонеда  сах бьминьн, дьнйайе жь бо кәсед кӧ ԝе жь мьрьне рʹабьн, һазьр бькә.

6. Ль гора Кʹаред Шандийа 24:15, кʹи ԝе бен рʹакьрьн?

⁶ Ӧса жи, ԝе лазьм бә кӧ кәсед кӧ ль Һармәгәдоне сах бьминьн, әʹламәтийа дәрһәԛа Пʹадшатийа Хԝәде у ԛанунед Йаһоԝа кәсед кӧ жь мьрьне ԝе бен рʹакьрьн, һин бькьн. Гәло чьма? Чьмки бь милйона кәсед кӧ ԝе бен рʹакьрьн, кәсед «нәрʹаст» ьн, йед кӧ Йаһоԝа һе нас накьн (Кʹаред Шандийа 24:15 бьхунә). Сәва кӧ кәсед ӧса жь ԛӧрбана Иса Мәсиһ фәйдәйе бьстиньн, гәрәке әԝ гӧһастьнед мәзьн бькьн. Кʹа бьфькьрә кӧ ише һинкьрьне ԝе чьԛас мәзьн бә! Гәло һәр кәс ԝе һинбуна шәхси бьстинә, чаԝа кӧ әм иро һинбуна Кʹьтеба Пироз дәрбаз дькьн? Гәло кәсед ну ԝе бьбьн пʹара щьвата у һинбуне бьстиньн, ԝәки әԝ жи бькарьбьн кәсед дьн һин бькьн? Әм вейа ньзаньн, гәрәке һивийе бьн кӧ бьбиньн. Ле бәле, әм сәд сәләфи заньн кӧ даԝийа Һʹӧкӧмдарийа Һʹәзарсалида, дьнйа ԝе «бь занина Хӧданва тʹьжи бьбә» (Иша. 11:9). Бәле, ль ԝе дәме әме һьм пʹьрʹ шьхӧл бькьн һьм жи пʹьрʹ шабуне бьстиньн!

7. Хьзмәткʹаред Йаһоԝа ԝе һʹале кәсед рʹакьри чьма рʹьнд фәʹм бькьн?

⁷ Дәма Һʹӧкӧмдарийа Һʹәзарсалида, ԝе лазьм бә кӧ һʹәму хьзмәткʹаред Йаһоԝа хԝә сәррʹаст бькьн. Ләма, әԝе рʹьнд фәʹм бькьн кӧ жь бо кәсед рʹакьри нә һеса йә кӧ фькьр у хԝәстьнед нәрʹаст жь дьле хԝә дәрхьн у ль гора ԛанунед Хԝәде бьжин (1 Пәт. 3:8). Кәсед рʹакьри ԝе бьвиньн кӧ хьзмәткʹаред Йаһоԝа мьлук ьн у хирәт дькьн кӧ хԝә рʹаст бькьн, ԝәки «хьлазийа хԝә пек биньн», у әԝе жи бьхԝазьн бешьк тʹәви ԝан Йаһоԝа бьһʹәбиньн (Фили. 2:12, ИМ).

8. Әм чьма дьфькьрьн кӧ әме бькарьбьн кәсед рʹакьри нас бькьн?

⁸ Әм чьма дьфькьрьн кӧ әме кәсед рʹакьри нас бькьн? Мәсәлә, дәмед бәреда, гава Йаһоԝа кәсәк жь мьрьне рʹадькьр, ви кәси әʹйни хӧйа дькьр, хәбәр дьда у дьфькьри. Ча те кʹьфше, Йаһоԝа ԝе диса ӧса бькә. Ӧса жи, Иса Мәсиһ мьрьн бәрамбәри хәԝе дькьр, ләма рʹабуна жь мьрьне ԝәкә һʹьшйарбуна жь хәԝе йә (Мәт. 9:18, 24; Йуһʹн. 11:11-13). Гава кәсәк жь хәԝе һʹьшйар дьбә, шькьл у шәмал, дәнг у бира ԝи диса әʹйни нә. Кʹа сәрһатийа досте Иса Лазар бинә бәр чʹәʹве хԝә. Әԝ чар рʹож мьри бу, ләма бәдәна ԝи ида дьрʹьзи. Ле бәле, гава Иса әԝ жь мьрьне рʹакьр, Мәрйәм у Мәртʹайе әԝ нас кьр, у кʹьфш ә кӧ Лазар жи әԝ нас кьрьн (Йуһʹн. 11:38-44; 12:1, 2).

9. Гәло кәсед мьри ԝе бь һʹьш у бәдәнәкә беԛьсур бен рʹакьрьн?

⁹ Сәбәба дӧда жи әв ә: Йаһоԝа соз дайә кӧ бьн һʹӧкӧмдарийа Иса Мәсиһда, тʹӧ кәс ԝе нәбежә: «Әз нәхԝәш ьм» (Иша. 33:24; Рʹом. 6:7). Ләма, мьри ԝе һьлбәт бь бәдәнәкә сахләм бен рʹакьрьн. Ле бәле, әв йәк найе һʹәсабе кӧ әԝе дәрберʹа беԛьсур бьн. Ӧса те кʹьфше кӧ һʹәму инсан ԝе гав бь гав бьгьһижьн беԛьсурийе. Хьлазийа Һʹӧкӧмдарийа Һʹәзарсалида, Иса Мәсиһ ԝе Пʹадшатийе вәгәрʹинә Баве хԝә. Һʹәта ԝе дәме, Пʹадшати ԝе ише хԝә хьлаз бькә у һәр кәси бьгьһинә беԛьсурийе (1 Корн. 15:24-28; Әʹйан. 20:1-3).

10. Рʹабуна мьрийа ԝе ль сәр тә чаԝа һʹӧкӧм бькә?

¹⁰ Бинә бәр чʹәʹве хԝә кӧ гава һʹьзкьрийед тә ԝе рʹабьн, тӧйе чьԛас ша би. Ԝе дәме, ма чʹәʹвед тә ԝе бь һесьред шабуне тʹьжә нәбьн? Ма тӧйе жь бо пәсне Йаһоԝа страна нәвежи? Бәле, тӧйе гәләк дьлша би, у тӧйе Йаһоԝа у Иса Мәсиһ жь дьл шекьрдар би!

11. Ль гора Йуһʹәнна 5:28, 29, һʹале кәсед кӧ ль гора ԛанунед Хԝәде дьжин ԝе чь бә?

¹¹ Гава кәсед рʹакьри ԝе хәйсәтед хԝә йед кәвьн бьһельн у ль гора ԛанунед Хԝәде бьжин, әԝе жи пʹьрʹ дьлша бьбьн. Кәсед кӧ һазьр ьн кӧ жийина хԝә бьгӧһәрʹиньн ԝе жийина бедаԝи бьстиньн. Бь ви аԝайи, рʹабуна ԝан ԝе бьбә рʹабуна «жь бо жийине». Ле бәле, һәрге кәсәк хԝә сәррʹаст нәкә, Йаһоԝа ԝе изне нәдә кӧ әԝ әʹдьлайа Щьнәте хьраб бькә (Иша. 65:20; Йуһʹәнна 5:28, 29 бьхунә).

12. Йаһоԝа ԝе чь бәрәкʹәтед мәзьн бьдә хьзмәткʹаред хԝә?

¹² Мәтʹәлок 10:22 ӧса дьбежә: «Дӧайе Хӧдан һәбуке дьдә у к›әдәре сәрда зедә накә». Бьн һʹӧкӧмдарийа Пʹадшатийа Хԝәдеда, һʹәму хьзмәткʹаред Хԝәде ԝе бәрәкʹәтед мәзьн бьстиньн. Бь аликʹарийа рʹӧһʹе Йаһоԝа, әԝе жь алийе рʹӧһʹанива дәԝләмәнд бьн, йани әԝе һәр кӧ дьчә бьбьн мина Иса Мәсиһ у бьгьһижьн беԛьсурийе (Йуһʹн. 13:15-17; Әфәс. 4:23, 24). Рʹож бь рʹож, сьһʹәта ԝан ԝе баштьр бьбә, у әԝе бьбьн мәрьвед ԛәнщтьр. Ль ԝе дәме, жийин ԝе чьԛас хԝәш бә! (Иб. 33:25) Ле бәле, ԝе чьма баш бә кӧ әм ньһада сәр рʹабуна мьрийа кʹур бьфькьрьн?

13. Ль гора Зәбур 139:1-4, Йаһоԝа мә чьԛас нас дькә, у рʹабуна мьрийа ве йәке чаԝа избат дькә?

¹³ Чаԝа мә дитьбу, Йаһоԝа ԝе хәйсәт-һʹӧнӧр у бира кәсед рʹакьри вәгәрʹинә. Әв йәк те һʹәсабе кӧ Йаһоԝа мәрьва һаԛас һʹәз дькә кӧ әԝ һʹәму фькьр, һәст, готьн у кьрьнед ԝан дьвинә у бира хԝәда хԝәйи дькә. Ләма, әԝ һеса дькарә ньһерʹандьн, бир у хәйсәт-һʹӧнӧред кәсед рʹакьри жь нува бьдә ԝан. Даԝьд Пʹадша заньбу кӧ Йаһоԝа бона һәр йәк жь мә чьԛас хәм дькә (Зәбур 139:1-4 бьхунә). Гәло әв йәк кӧ Йаһоԝа дәрһәԛа мә һәр тьшти занә, сәр мә чаԝа һʹӧкӧм дькә?

14. Әв йәк кӧ Йаһоԝа дәрһәԛа мә һәр тьшти дьзанә, сәр мә чаԝа һʹӧкӧм дькә?

¹⁴ Әв йәк кӧ Йаһоԝа дәрһәԛа мә һәр тьшти занә, мә әʹщьз накә. Гәло чьма? Чьмки Йаһоԝа мә пʹьрʹ һʹьз дькә. Әԝ ԛимәте дьдә һәр йәк жь мә. Әԝ һәр тьште кӧ сәр мә һʹӧкӧм дькә, бира хԝәда хԝәйи дькә. Әв фькьр бь рʹасти жи мерхасийе дьдә мә. Тʹӧ щар нә лазьм ә кӧ әм хԝә тʹәне тʹәхмин бькьн. Йаһоԝа һәр тʹьм кʹеләка мә йә у әԝ һәр тʹьм һазьр ә кӧ али мә бькә (2 Дир. 16:9).

15. Рʹабуна мьрийа биланийа Йаһоԝа чаԝа әʹйан дькә?

¹⁵ Тьрса мьрьне чʹәкәкә гәләк ԛәԝи йә. Мәрьвед кӧ бьн контрола Мире-щьнда нә, тьрса мьрьне дьдьнә хәбате кӧ зоре кәсед дьн бькьн, ԝәки әԝ нәмамийа достед хԝә бькьн йан жи баԝәрийа хԝә бьһельн. Ле бәле, тьрса мьрьне нькарә мә бьшкенә. Әм заньн кӧ һәрге әм бен кӧштьн жи, Йаһоԝа  ԝе мә жь мьрьне рʹакә (Әʹйан. 2:10). Әм баԝәр ьн кӧ тʹӧ тьшт нькарә мә жь Йаһоԝа у жь һʹьзкьрьна ԝи вәԛәтинә (Рʹом. 8:35-39). Әв йәк кӧ Йаһоԝа һевийа рʹабуне дайә мә, нишан дькә кӧ биланийа ԝи чьԛас мәзьн ә! Бь сайа ве һевийе, Йаһоԝа мә жь тьрса мьрьне дьфьльтинә у мерхасийа мәзьн дьдә мә.

16. Ԝе баш бә кӧ әм жь хԝә чь бьпьрсьн, у щабед мә ԝе чь нишан бькьн?

¹⁶ Һәрге дьжмьнед Йаһоԝа тә бьтьрсиньн у бежьн кӧ әԝе тә бькӧжьн, гәло тӧйе хԝә бьспери Йаһоԝа? Тӧ чаԝа дькари бьзаньби кӧ баԝәрийа тә чьԛас ԛәԝи йә? Мәсәлә, жь хԝә бьпьрсә: «Гәло ԛьраред бьчʹук, йед кӧ әз һәр рʹож дьдьм, нишан дькьн кӧ әз хԝә дьсперьм Йаһоԝа?» (Луԛа 16:10) Пьрсәкә дьн жи әв ә: «Гәло ԛьраред мьн избат дькьн кӧ әз баԝәрийа хԝә бь созе Йаһоԝа тиньм кӧ һәрге әз һәри зедә Пʹадшатийа ԝи бьгәрʹьм, Йаһоԝа ԝе бона һʹәму һʹәԝщед мьн хәм бькә?» (Мәт. 6:31-33) Һәрге щаба тә «Әре» йә, әв йәк нишан дькә кӧ тӧ хԝә дьспери Йаһоԝа, у тӧ жь бо һʹәму тәнгасийа һазьр и (Мәтʹлк. 3:5, 6).

17. (а) Рʹабуна мьрийа сәбра Йаһоԝа чаԝа әʹйан дькә? (б) Әм чаԝа дькарьн нишан кьн кӧ әм жь бо сәбра Йаһоԝа шекьрдар ьн?

¹⁷ Йаһоԝа рʹож у сьһʹәта ԛьрʹа ве дьнйайе кʹьфш кьрийә (Мәт. 24:36). Әԝ сәбра хԝә ӧнда накә, у әԝе бәри ви ԝәхти, тьштәки нәкә. Хԝәде һьлбәт бира кәсед мьри дькә у дьхԝазә ԝан рʹакә, ле әԝ диса жи сәбьр дькә (Иб. 14:14, 15). Ԝәхте рʹастда, әԝе ԝана жь мьрьне рʹакә (Йуһʹн. 5:28). Гәрәк әм жь бо сәбра Йаһоԝа шькьрдар бьн. Жь бәр кӧ Йаһоԝа сәбьр кьрийә, мәщал кʹәтийә дәсте мә у дәстед гәләк кәсед дьн кӧ тʹобә бькьн (2 Пәт. 3:9). Йаһоԝа мәщале дьдә һәр кәси кӧ жийина һәрһәйи бьстинә. Гәло әм чаԝа дькарьн нишан кьн кӧ әм жь бо сәбра ԝи шекьрдар ьн? Гәрәк әм бь дьл у щан ԝан кәса бьгәрʹьн, «йед кӧ дьле ԝан жь бо жийина һәрһәйи һазьр» ә, у али ԝан бькьн кӧ әԝ Йаһоԝа һʹьз бькьн у ԝирʹа хьзмәт кьн (Кʹар. Шанд. 13:48, ДТʹ). Бь ви аԝайи, әԝе жи жь сәбра Йаһоԝа кʹаре бьвиньн.

18. Гәрәке әм чьма кәсед дьн сәбьр бькьн?

¹⁸ Йаһоԝа ԝе һʹәта хьлазийа Һʹӧкӧмдарийа  Һʹәзарсали сәбьр бькә кӧ әм бьбьн мәрьвед беԛьсур. Һʹәта ԝе дәме, Йаһоԝа һазьр ә кӧ шаши у гӧнед мә афу бькә. Ма нә лазьм ә кӧ әм жи дина хԝә бьдьн һʹӧнӧред баш йед мәрьвед дьн у ль ԝан сәбьр бькьн? Мәсәлә, ве сәрһатийа хушкәке бинә бәр чʹәʹве хԝә. Мере ԝе сәва нәхԝәшикә псиколожи нәдьчу щьвина. Хушка мә ӧса дьбежә: «Әз пʹьрʹ хәмгин бум. Планед малбәта мә гьшк тʹәвһәв бун.» Диса жи, хушка мә ль мере хԝә сәбьр кьр. Ԝе хԝә дьспарт Йаһоԝа, у ԝе тʹӧ щара мерхасийа хԝә ӧнда нәкьр. Әԝ ӧса дьбежә: «Мере мьн мәрьвәки пʹьрʹ баш ә, у әԝ хирәт дькә кӧ һеди һеди ԛәнщ бьбә». Бәле, пʹьрʹ фәрз ә кӧ әм хушк у бьрайед хԝә у мәрьвед хԝә, йед кӧ рʹасти тәнгасийа тен, сәбьр бькьн.

19. Ԝе баш бә кӧ әм чь бькьн?

¹⁹ Гава әʹрд һат әʹфьрандьн, Иса у мәләк пʹьрʹ ша бун. Гава дьнйа бь мәрьвед беԛьсурва тʹьжә бә, йед кӧ Йаһоԝа һʹьз дькьн у ԝирʹа хьзмәт дькьн, әԝе диса чьԛас ша бьн! Ӧса жи, гава 144 000 һәмпʹадшайед Иса ԝе бьвиньн кӧ инсан жь ише ԝан чаԝа фәйдәйе дьстиньн, әԝе чьԛас ша бьн! (Әʹйан. 4:4, 9-11; 5:9, 10). Бинә бәр чʹәʹве хԝә кӧ гава еш, кӧл у дәрд, нәхԝәши у мьрьн ԝе һʹәта һʹәтайе тʹӧнә бьн, әме жи чьԛас ша бьн! (Әʹйан. 21:4) Һʹәта ԝе рʹоже, бьра әм һʹьзкьрьн, билани у сәбра Йаһоԝа хԝәрʹа бькьн мәсәлә. Һәрге әм ӧса бькьн, әме нава тәнгасийада жи дьлхԝәшийа хԝә тʹӧ щар ӧнда нәкьн (Аԛуб 1:2-4). Ма әм бона һевийа рʹабуна мьрийа жь Йаһоԝарʹа шькьрдар ниньн? (Кʹар. Шанд. 24:15)