1. Сәр щьвата һәрсали йа 2023, әм чь пеһʹәсийан?

 СӘР щьвата һәрсали йа сала 2023 a, фәʹмкьрьна мә дәрһәԛа һьнә һинкьрьна һатьнә зәлалкьрьне, у мә дәрһәԛа хьзмәтийе һьнә әʹламәтийед һʹәԝас станд. Мәсәлә, әм пеһʹәсийан ԝәки паши кʹӧтакьрьна Бабилона Мәзьн жи, дьбәкә мәщала һьнә мәрьва һәбә, кӧ алийе хьзмәткʹаред Йаһоԝа бьгьрьн. Ӧса жи әм пеһʹәсийан, ԝәки жь мәһа Мьждаре, сала 2023, ида нәлазьмә, кӧ мьзгинван һʹәсабед хьзмәтийа хԝә тʹәсмил кьн. Гәло әв йәк те һʹәсабе, ԝәки хьзмәтийа мә ида нә ӧса фәрз ә? Һәмьки на!

2. Хьзмәтийа мә чьрʹа рʹож бь рʹож дьһа фәрз дьбә? (Маркос 13:10)

² Ԝәхт һьндьк майә, ләма жи хьзмәтийа мә чьԛас дьчә дьһа фәрз дьбә. Ԝәрә әм шеԝьр кьн, кӧ Иса дәрһәԛа шьхӧле хьзмәтийе, йа рʹожед мәда, чь пʹехәмбәрти кьр (Бьхунә Маркос 13:10). Ль гора кʹьтеба Мәтта, Иса гот, ԝәки пешийа кӧ «хьлзаи» бе, мьзгини ԝе сәр тʹәмамийа дьнйайе бе бәлакьрьне (Мәтта 24:14). Ве рʹезеда, «хьлзаи» те һʹәсабе хьлазийа ве дьнйа хьраб, у Йаһоԝа ‹рʹож у сьһʹәта› ве хьлазийе кʹьфш кьрийә (Мәтта 24:36; 25:13; Кʹаред Шандийа 1:7). Рʹож бь рʹож, әм дьһа незики хьлазийе дьбьн (Рʹомайи 13:11). У һʹәта һьнге, әм гәрәке мьзгинийе бәла кьн.

3. Әм чьрʹа мьзгинийе бәла дькьн?

³ Әм гәрәке сәр ве пьрса фәрз бьфькьрьн: Гәло әм  чьрʹа мьзгинийе бәла дькьн? Чьмки әм мьзгинийе у мәрьва һʹәз дькьн у йа лапә фәрз әв ә, кӧ әм Йаһоԝа у наве ԝи һʹәз дькьн. Ԝәрә әм ве йәке шеԝьр кьн.

ӘМ МЬЗГИНИЙЕ ҺʹӘЗ ДЬКЬН

4. Гава әм әʹламәтийа баш дьстиньн, әм ча хԝә тʹәхмин дькьн?

⁴ Биньн бира хԝә ԝә чь тʹәхмин кьр, гава тьштәки гәләк баш әʹмьре ԝәда ԛәԝьми. Мәсәлә, чахе ԝә бьһист, кӧ малбәта ԝәда ԝе зарʹ бе буйине, йан жи ԝә хәбатәкә ӧса дит, кӧ ԝәрʹа гәләк лазьм бу. Һʹәчʹи зәʹф мәрьв, мьзгинийа ӧса баш, зу дьгьһиньн һʹәму һәвал у мәрьвед хԝә. Гәло тә жи ӧса нәкьр, гава тӧ дәрһәԛа мьзгинийа лапә баш пеһʹәсийайи, демәк дәрһәԛа Пʹадшатийа Хԝәде?

5. Гава тә щара пешьн дәрһәԛа рʹастийа Кʹьтеба Пироз бьһист, тә чь сәр хԝә тʹәхмин кьр? (Бьньһерʹә ӧса жи шькьл.)

⁵ Бинә бира хԝә кӧ гава тә щара пешьн дәрһәԛа рʹастийа Кʹьтеба Пироз бьһист, тә чь тʹәхмин кьр. Мәсәлә, тә фәʹм кьр, кӧ Баве тәйи әʹзмана тә һʹәз дькә у дьхԝазә ԝәки тӧ нав хьзмәткʹаред ԝида би. Ӧса жи тӧ пеһʹәсийайи, ԝәки әԝи соз дайә, кӧ ԝе кӧл-дәрда бь тʹәмами бьдә һьлдане у дьнйа тʹәзәда мәрьвед тәйи һʹәзкьри жь мьрьне рʹакә (Маркос 10:29, 30; Йуһʹәнна 5:28, 29; Рʹомайи 8:38, 39; Әʹйанти 21:3, 4). Әв рʹастийед Кʹьтеба Пироз шабунәкә мәзьн кьрьнә дьле тә, ӧса нинә? (Луԛа 24:32) Чь тӧ пеһʹәсийайи, гәләк тә хԝәш һат у тә дәстпекьр дәрһәԛа ве йәке һәр кәсирʹа гьли ки (Бәрамбәр кә Йерәмйа 20:9).

6. Әм жь сәрһатийа Ернест у Роуз чь һин дьбьн?

⁶ Гава бьраки мәйи бь наве Ернест b ԝәкә 10 сали бу, баве ԝи мьр.  Әԝ дьбежә: «Әз дьфькьрим, гәло әԝ чуйә сәр әʹзмана, йан сәр һʹәта-һʹәтайе бәтавәбуйә. Мьн һʹәвсудийа ԝан зарʹа дькьр, баве кʹижана һәбу». Ернест тʹьме дьчу сәр мәзәле баве хԝә у сәр чока ӧса дӧа дькьр: «Хԝәде рʹәща дькьм, әз дьхԝазьм бьзаньбьм баве мьн кʹидәре йә». Ԝәкә 17 сал паши мьрьна баве ԝи, жерʹа дәрһәԛа һинбуна Кʹьтеба Пироз готьн, у әԝи бь дьл у щан ԛәбул кьр. Гава әԝ пеһʹәсийа кӧ ль гора Кʹьтеба Пироз, мьри хәԝәкә кʹурда ньн, һаш тьштәки тʹӧнә нә у рʹожәке ԝе бенә сахкьрьне, әԝ гәләк ша бу (Ԝаиз 9:5, 10; Кʹаред Шандийа 24:15). Ахьрийеда әԝи щаба һʹәму пьрсед хԝә станд, кʹижан кӧ бь сала ле дьчәрчьрандьн! Рʹастийед Кʹьтеба Пироз, йед кӧ Ернест педьһʹәсийа, дьле ԝи ша дькьрьн. Кʹӧлфәта ԝи Роуз жи һинбуна Кʹьтеба Пироз бь дьл у щан ԛәбул кьр у мьзгинийа дәрһәԛа Пʹадшатийа Хԝәде шабунәкә мәзьн дькьрә дьле ԝе жи. Сала 1978-да, һәрд жи һатьнә ньхӧмандьне. Ԝана бь дьл у щан малбәта хԝәрʹа, һәвал у мәрьвед дьнрʹа дәрһәԛа рʹастийед ԛимәт гьли дькьрьн, у ԝәʹдә шунда, бь сайа хирәта ԝан, 70 мәрьви зедәтьр һатьнә ньхӧмандьне.

7. Гава һʹәзкьрьна дәрһәԛа рʹастийа Кʹьтеба Пироз дькʹәвә дьле мә, чь дьԛәԝьмә? (Луԛа 6:45)

⁷ Бәле, гава һʹәзкьрьна дәрһәԛа рʹастийа Кʹьтеба Пироз дькʹәвә дьле мә, әм дьхԝазьн һʹәму мәрьварʹа дәрһәԛа ве йәке гьли кьн (Бьхунә Луԛа 6:45). Ԛьрʹна йәкеда шагьртед Иса ӧса готьбун: «Әм нькарьн бона ԝан тьштед кӧ мә хԝәха дитьн у бьһистьн нәкьнә дәнги» (Кʹаред Шандийа 4:20). Мина ԝан, әм жи рʹастийа Кʹьтеба Пироз гәләк һʹәз дькьн у дьхԝазьн һʹәму мәрьварʹа гьли кьн.

ӘМ МӘРЬВА ҺʹӘЗ ДЬКЬН

8. Әм чьрʹа дьхԝазьн мьзгинийе һʹәму мәрьварʹа гьли кьн? (Бьньһерʹә чаргошә « Мәрьва Һʹәз кьн—Шагьрта Һазьр кьн».) (Бьньһерʹә ӧса жи шькьл.)

⁸ Әм жи мина Йаһоԝа у Кӧрʹе ԝи Иса, мәрьва һʹәз дькьн (Мәтʹәлок 8:31; Йуһʹәнна 3:16). Дьле мә сәр мәрьвед кӧ «бе гӧман у бе Хԝәде» нә, гәләк дьшәԝьтә (Әфәси 2:12). Әԝана проблемед хԝәда дьхәньԛьн, ле бал мә дәрмане ван дәрда һәйә, әв һәйә мьзгинийа дәрһәԛа Пʹадшатийа Хԝәде. Әм мәрьва һʹәз дькьн у дьле мә дешә чахе әм чʹәʹв һʹале ԝан дькʹәвьн, ләма жи әм хирәт дькьн ԝәки мьзгинийе бьгьһиньн ԝан. Мьзгинийа хере гӧмане дьдә мәрьва, али ԝан дькә кӧ әʹмьре ԝан дьһа баш бә у мәщале дьдә ԝан, ԝәки дьнйа тʹәзәда  «жийина кӧ рʹасти жийин ә» бьстиньн (1 Тимотʹейо 6:19).

9. Әм дәрһәԛа ахьрийе чь әʹлам дькьн у чьрʹа? (Һәзәԛел 33:7, 8)

⁹ Әм мәрьва һʹәз дькьн, ләма жи әм дьхԝазьн ԝәки әԝана бьзаньбьн, кӧ хьлазийа ве дьнйа хьраб ида незик ә (Бьхунә Һәзәԛел 33:7, 8). Дьле мә сәр һʹәму мәрьва дьшәԝьтә, чьмки әԝана Йаһоԝа нас накьн у ньзаньн кӧ дәмәкә незикда «тәнгасикә ӧса мәзьн ԝе бьбә, кӧ жь дәстпебуна дьнйайе һʹәта ньһа мина ԝе нәбуйә у нә жи ԝе бьбә» (Мәтта 24:21). Әм дьхԝазьн, ԝәки әԝана бьзаньбьн, кӧ ԝәʹде диԝане чь ԝе бьԛәԝьмә: Религийа ԛәлп ԝе бе ԝеранкьрьне у Һармәгәдонеда, дьнйа хьраб ԝе бь тʹәмами бе ԛьрʹкьрьне (Әʹйанти 16:14, 16; 17:16, 17; 19:11, 19, 20). Әм баԝәр ьн, ԝәки гәләк мәрьв ԝе гӧһ бьдьнә мә у сафи кьн тʹәви мә Йаһоԝарʹа хьзмәт кьн. Ле гәло һʹале мәрьвед мә у кәсед дьн, йед кӧ ньһа гӧһ надьнә мә, ԝе чаԝа бә?

10. Чьрʹа фәрз ә, ԝәки әм бәрдәԝам кьн мәрьварʹа бежьн, кӧ зутьрәке ԝе чь бьԛәԝьмә?

¹⁰ Ча мә готара пешийа веда шеԝьр кьр, дьԛәԝьмә Йаһоԝа мәщала хьлазбуне бьдә ԝан мәрьва, йед кӧ паши кʹӧтакьрьна Бабилона Мәзьн, ньһерʹандьна хԝә бьгӧһезьн. Һәрге ӧса бә, рʹасти жи гәләк фәрз ә, ԝәки әм бь хирәт хәбәра Хԝәде бьгьһиньнә мәрьва, чьмки тьштед кӧ әм ньһа ԝанрʹа дьбежьн ԝи чахи дькарә бькʹәвә бира ԝан (Бәрамбәр кә Һәзәԛел 33:33). Дьбәкә гьлийед кӧ мә ԝанрʹа готьбу, дьле ԝан бьгьрә у пешийа ԝеранкьрьна ве дьнйа хьраб, әԝана сафи кьн тʹәви мә Йаһоԝарʹа хьзмәт кьн. Чаԝа кӧ сәрԝере кәле жь бажаре Филипйайе, паши әʹрдһʹәжәкә мәзьн ньһерʹандьна хԝә гӧһаст, дьбәкә һьнә мәрьвед, кӧ иро гӧһ надьнә мә, паши ԝеранкьрьна Бабилона Мәзьн ньһерʹандьна хԝә бьгӧһезьн (Кʹаред Шандийа 16:25-34).

ӘМ ЙАҺОԜА У НАВЕ ԜИ ҺʹӘЗ ДЬКЬН

11. Әм чь щурʹәйи һӧрмәт, рʹумәте у ԛәԝате дьдьн Йаһоԝа? (Әʹйанти 4:11) (Бьньһерʹә ӧса жи шькьл.)

¹¹ Ӧса жи, әм мьзгинийе бәла дькьн, чьмки әм Йаһоԝа Хԝәде у наве ԝийи пироз гәләк һʹәз дькьн, у әв йәк мәʹнийа лапә фәрз ә. Бь сайа хьзмәтийе, әм дькарьн пәсьне Хԝәде бьдьн (Бьхунә Әʹйанти 4:11). Йаһоԝа бь рʹасти жи һежайи һӧрмәт, рʹумәте у ԛәԝате йә. Бь ве йәке кӧ әм мәрьварʹа избат дькьн, ԝәки канийа жийине Йаһоԝа йә, әм пәсьне ԝи дьдьн. Гава әм чь жь дәсте мә те дькьн, ԝәки ԝәʹдә, енержийа у  чь кӧ щәм мә һәйә, бона хьзмәтийе хәрщ кьн, бь ве йәке әм ԛәԝата хԝә дьдьнә Йаһоԝа (Мәтта 6:33; Луԛа 13:24; Колоси 3:23). Әм Хԝәде һʹәз дькьн, ләма жи әм дәрһәԛа ԝи гьли дькьн. Ӧса жи, әм дьхԝазьн кәсед дьнрʹа дәрһәԛа нав у хәйсәт-һʹӧнӧред ԝи гьли кьн. Гәло чьрʹа?

12. Хьзмәтийеда әм ча наве Йаһоԝа пироз дькьн?

¹² Бәле, әм Йаһоԝа һʹәз дькьн, ләма жи әм дьхԝазьн наве ԝи пироз кьн (Мәтта 6:9). Мире-щьна дәрһәԛа Йаһоԝа тьштед дәрәԝ готийә, у әм дьхԝазьн ԝәки мәрьв һаш ве йәке һәбьн (Дәстпебун 3:1-5; Ибо 2:4; Йуһʹәнна 8:44). Хьзмәтийеда әм пьштгьрийа Йаһоԝа дькьн у кәсед дьлсахрʹа дәрһәԛа рʹастийа Ԝи гьли дькьн. Әм дьхԝазьн, ԝәки һәр кәс бьзаньбә, кӧ Хԝәде һʹәзкьрьн ә, сәрԝертийа ԝи рʹаст у һәԛ ә, кӧ Пʹадшатийа ԝи ԝе зутьрәке һʹәму кӧл-дәрда бьдә һьлдане у ӧса жи шабун у әʹдьлайе бинә сәр әʹрде (Зәбур 37:10, 11, 29; 1 Йуһʹәнна 4:8). Гава әм хьзмәтийеда дәрһәԛа ван тьшта хәбәр дьдьн, әм наве Йаһоԝа бьльнд у пироз дькьн. Ӧса жи әм фьрнаԛ дьбьн, кӧ әм Шәʹдед Йаһоԝа нә, у хирәт дькьн, ԝәки лайиԛи ви нави бьжин. Гәло чь щурʹәйи?

13. Әм чьрʹа фьрнаԛ дьбьн, кӧ әм тенә навкьрьне Шәʹдед Йаһоԝа? (Ишайа 43:10-12)

¹³ Йаһоԝа мә ча шәʹдед хԝә нав дькә (Бьхунә Ишайа 43:10-12). Чәнд сал пешда, нәʹмәкеда, кӧ жь Кʹома Рʹебәрийе бу, дьһатә готьне: «Әм гәләк фьрнаԛ дьбьн, кӧ әм тенә навкьрьне Шәʹдед Йаһоԝа c». Гәло чьрʹа? Бьдә бәр чʹәʹве хԝә, ԝәки тӧ бәр диԝане  сәкьни йи у дьхԝази кӧ кәсәк дәрһәԛа тә шәʹдәтийе бьдә. Гәло тӧйе кәсәки ча бьжбери? Һәмьки тӧйе бона ве йәке кәсәки бь итʹбар у һәԛ бьжбери. Һәма бь ви щурʹәйи, Йаһоԝа мә ча Шәʹдед хԝә бьжартийә. Әԝ мә рʹьнд нас дькә у итʹбарийа хԝә мә тинә, әԝ изьне дьдә кӧ әм бәр мәрьва Шәʹдәтийе бьдьн, ԝәки Хԝәдайе рʹаст тʹәне әԝ ә. Әм ве йәке ча щабдарикә мәзьн һʹәсаб дькьн, ләма жи әм һʹәму мәщала дьдьнә хәбате, ԝәки наве ԝи бьдьнә наскьрьне, дәрәԝед кӧ авитьн сәр ԝи әшкәрә кьн у наве Ԝийи рʹаст һәԛ дәрхьн. Бь ви щурʹәйи, әм ль гора наве кӧ сәр мә йә, һәрәкʹәт дькьн у бона Йаһоԝа Шәʹдәтийе дьдьн (Зәбур 83:18; Рʹомайи 10:13-15).

ӘМЕ ҺʹӘТА ХЬЛАЗИЙЕ МЬЗГИНИЙЕ БӘЛА КЬН

14. Әм чьда баԝәр ьн?

¹⁴ Әм гәләк һивийа ван ԛәԝьмандьна нә, йед кӧ ԝе зутьрәке бьԛәԝьмьн! Әм баԝәр ьн, кӧ бь аликʹарийа Йаһоԝа, гәләк мәрьв пешийа дәстпека тәнгасийа мәзьн ԝе бенә сәр рʹийа рʹастийе. Ӧса жи, әм баԝәр ьн, кӧ ԝәʹде тәнгасийа мәзьн жи, һьнә мәрьв ԝе жь дьнйа Мире-щьна дәркʹәвьн у тʹәви мә пәсьне Йаһоԝа бьдьн (Кʹаред Шандийа 13:48).

15-16. Әм гәрәке чь бькьн у һʹәта кʹәнге?

¹⁵ Шьхӧле мә бь рʹасти жи гәләк ә. Әм гәрәке мьзгинийа дәрһәԛа Пʹадшатийа Хԝәде сәр тʹәмамийа дьнйайе бәла кьн. Ӧса жи, әм гәрәке мәрьварʹа бежьн, ԝәки хьлазийа ве дьнйа хьраб гәләк незик ә. Бь сайа шьхӧле кӧ әм иро дькьн, әԝана ԝе ԝәʹде диԝанкьрьне бьзаньбьн, ԝәки гьлийед кӧ мә әʹлам дькьр жь Йаһоԝа Хԝәде бун (Һәзәԛел 38:23).

¹⁶ Әм һазьр ьн чь бькьн? Һʹәта кӧ Йаһоԝа мәрʹа бежә, ԝәки шьхӧле бәлакьрьна мьзгинийе ида тʹәмам буйә, ԝәрә әм мьзгинийе, мәрьва у йа лапә фәрз Йаһоԝа у наве ԝи һʹәз бькьн у мьзгинийе бь дьл у щан бәла кьн!