1-2. (а) Се шандийед Исарʹа чь һатьбу готьне, у ԝана чь кьр? (б) Ве готареда, әме дәрһәԛа чь шеԝьр кьн?

ПАШИ Щәжна Дәрбазбуне йа сала 32 Д.М., Пәтрус, Аԛуб у Йуһʹәнна хәԝн-хәйала һʹәԝас дитьн. Ль сәр чʹийаки бьльнд, рʹуйе Иса бәр чʹәʹве ԝан һатә гӧһастьне: «Рʹуйе ԝи мина тәʹве бьрьԛи у кʹьнщед ԝи жи мина нуре чил-ԛәрԛаш бун» (Мәтта 17:1-4). Хьлазийа ве хәԝн-хәйале, ԝана дәнге Хԝәде бьһист: «Әв ә Кӧрʹе мьни дәлал, кӧ әз же рʹази мә. Гӧһдарийа ԝи бькьн!» (Мәтта 17:5) Әв йәк кӧ ԝана паше чь щурʹәйи дьжитьн, нишан дькә ԝәки ԝана бь рʹасти жи гӧһдарийа Иса дькьрьн. Әм жи дьхԝазьн чʹәʹв бьдьнә ԝан.

² Готара пешийа веда, мә дитьбу кӧ гӧһ бьдьнә дәнге Иса те һʹәсабе кӧ әм гәрәке һьнә тьшта нәкьн. Ле ве готареда, әме дина хԝә бьдьнә дӧ тьшта, кʹижан кӧ бь готьна Иса әм гәрәке бькьн.

3. Ль гора Мәтта 7:13, 14, гәрәке әм чь бькьн?

³ Мәтта 7:13, 14 бьхунә. Иса бәʹса дӧ дәрийа кьр, йед кӧ бәр дӧ щурʹә рʹе вәдьбьн, рʹийа «фьрә» у рʹийа «тәнг». Рʹийа сьсийа тʹӧнә! Гәрәке әм сафи бькьн кӧ әме кʹижан рʹерʹа һәрʹьн. Әв сафикьрьнәкә гәләк фәрз ә, чьмки жийина мәйә һʹәта-һʹәтайе ве йәкева гьредайи йә.

4. Рʹийа «фьрә» рʹекә чаԝа йә?

⁴ Гәрәке әм бир нәкьн кӧ фьрԛийа нав ван дӧ рʹийада  чь йә. Сәд һʹәйф ԝәки һʹәчʹи зәʹф мәрьв рʹийа «фьрә» дьжберьн, чьмки әв рʹекә һеса йә. Әԝана фәʹм накьн кӧ әв рʹе, рʹийа Мире-щьна йә, йа кӧ «дьбә бәрбь ӧндабуне» (1 Корьнтʹи 6:9, 10; 1 Йуһʹәнна 5:19).

5. Һьнә мәрьва чь кьрьнә ԝәки рʹийа «тәнг» бьвиньн у бькʹәвьн ве рʹе?

⁵ Рʹийа дьн рʹийа «тәнг» ә, у ча Иса готьбу, «һьндьк ьн әԝед кӧ ԝе рʹейе дьбиньн». Гәло чьрʹа? Рʹеза дьнда, Иса шагьртед хԝәрʹа гот, ԝәки әԝана хԝә «жь пʹехәмбәред дәрәԝ» дур бьгьрьн (Мәтта 7:15). Ль гора һьнә һʹәсаба, бь һʹәзара религийа у баԝәри һәнә, у гәләк жь ԝан дьбежьн ԝәки дине ԝан рʹаст ә. Бь милйона мәрьва сәва ве тʹәвльһәвийа религи һаԛас әʹщьз дьбьн, ԝәки әԝ ида рʹийа рʹаст нагәрʹьн. Ле мәрьв дькарә ве рʹе бьвинә! Иса гот: «Һәгәр һун сәр һинкьрьна мьн бьминьн, һуне рʹаст шагьртед мьн бьн. Һуне рʹастийе нас кьн у рʹастийе ԝә аза кә» (Йуһʹәнна 8:31, 32). Чьԛас баш ә кӧ тӧ нәкʹәти бәр байе гәләка, ле тӧ рʹастийе гәрʹийайи. Тә Хәбәра Хԝәде һур у кʹур леколин кьрийә, ԝәки хԝәстьна Хԝәде пебьһʹәси, у тә гӧһдарийа Иса Мәсиһ кьрийә. Мәсәлә, тӧ һин буйи кӧ Йаһоԝа дьхԝазә ԝәки әм хԝә жь дине ԛәлп у жь әʹрф-әʹдәтед пʹутпʹарьстийе дур бьгьрьн. Ӧса жи, тә фәʹм кьрийә ԝәки һеса нинә мәрьв хԝәстьна Йаһоԝа бинә сери у хԝә жь әʹдәтед кӧ әԝ ԛәбул накә, дур бьгьрә (Мәтта 10:34-36). Дьԛәԝьмә тәрʹа һеса нибу кӧ тӧ жийина хԝә бьгӧһези. Ле чьмки тӧ Йаһоԝа һʹьз дьки у дьхԝази кӧ әԝ жь тә рʹази бә, тә хирәта хԝә бәрʹнәдайә. Хирәта тә бешьк Йаһоԝа гәләк хԝәш те! (Мәтʹәлок 27:11)

6. Ль гора Зәбур 119:9, 10, 45, 133, чь дькарә али мә бькә ԝәки сәр рʹийа тәнг бьминьн?

⁶ Гәло чь дькарә али мә бькә ԝәки әм сәр рʹийа тәнг бьминьн? Ве мәсәле бинә бәр чʹәʹве хԝә: Ԛәрахед гәләк рʹейед тәнг йед сәр чʹийа, суркьри нә, ԝәки әʹрәбә жь рʹе дәрнәкʹәвьн. Гәло кʹижан ажован ԝе бежә ԝәки әв сур ԝи әʹщьз дькә? Чаԝа кӧ сур ажована дьпарезә, ԛанунед Йаһоԝа жи мә дьпарезьн у али мә дькьн кӧ әм жь рʹийа тәнг дәрнәкʹәвьн (Зәбур 119:9, 10, 45, 133 бьхунә).

7. Гәрәке кәсед щаһьл сәр рʹийа тәнг ча бьньһерʹьн?

⁷ Щаһьлно, гәло һун щарна дьфькьрьн кӧ ԛанунед Йаһоԝа бь зедәйи сәрт ьн? Мире-щьна дьхԝазә ԝәки һун ӧса бьфькьрьн. Әԝ дьхԝазә кӧ һун һʹьш-аԛьле хԝә бьдьн сәр мәрьвед кӧ сәр рʹийа фьрә нә у хԝәзийа хԝә ԝан биньн. Әԝ дьхԝазә ԝәки һун дина хԝә бьдьне кӧ ча һәвалдәрсханед ԝә кʹефе дьстиньн, йан жи ԝәки Интернетеда тьштед ӧса бьвиньн, кӧ бьфькьрьн йанчь һун жийина баш дәсте хԝә дькьн у жь бо ԝан фькьра хԝә һесир тʹәхмин кьн. Мире-щьна дьхԝазә ԝә бьдә баԝәркьрьне кӧ ԛанунед Йаһоԝа рʹийа ԝә дьгьрьн жь жийине ләзәте бьстиньн. * Ле бир нәкьн, Мире-щьна нахԝазә ԝәки мәрьвед кӧ рʹийа фьрәда дьчьн, фәʹм кьн кӧ әв рʹе бәрбь кʹидәре дьбә. Жь алийе дьнва, Йаһоԝа зәлал  нишани ԝә дькә, ԝәки ахьрийа кәсед кӧ жь рʹийа жийине дәрнайен, ԝе чаԝа бә (Зәбур 37:29; Ишайа 35:5, 6; 65:21-23).

8. Кәсед щаһьл дькарьн жь сәрһатийа Олаф чь һин бьн?

⁸ Дина хԝә бьдә сәрһатийа бьраки щаһьл бь наве Олаф. * Һәвалдәрсханед ԝи һелан дьданә ԝи кӧ әԝ бенамусийе бькә. Гава әԝи ԝанрʹа гот кӧ Шәʹдед Йаһоԝа ль гора ԛанунед намусийейә Кʹьтеба Пироз дьжин, һьнә кәчʹькед жь дәрсхана ԝи һе зедә тьшт дькьрьн, ԝәки әԝ сәре хԝә ԝанрʹа дайнә. Ле Олаф тʹәглифа ԝан ԛәбул нәкьр. Хенщи ве йәке, Олаф рʹасти тәнгасийед дьн жи дьһат. Әԝ дьбежә: «Дәрсдаред мьн гәләк тʹәви мьн хәбәр дьдан, ԝәки әз әʹсә һәрʹьм занингәһе, сәва мәрьв ԛәдре мьн бьгьрьн. Ԝана гот кӧ һәгәр әз нәчьм занингәһе, әзе нькарьбьм жийина хԝәда пешдачуйи бьм». Гәло  чь али Олаф дькьр кӧ әԝ нәкʹәвә бәр байе ԝан? Әԝ дьбежә: «Мьн тʹәви хушк-бьред жь щьвата хԝә һәвалти дькьр. Әԝана бона мьн бунә ча малбәта мьн. Ӧса жи, мьн Кʹьтеба Пироз дьһа зедә леколин дькьр. Чьԛас мьн дьһа кʹур әԝ леколин дькьр, һаԛас әз дьһа баԝәр дьбум кӧ әва йә рʹийа рʹаст. Ахьрийеда, мьн сафи кьр дьһа ԛәԝи хԝә ль Йаһоԝа бьгьрьм у ԝирʹа хьзмәт бькьм».

9. Сәва кӧ әм сәр рʹийа тәнг бьминьн, гәрәке әм чь бькьн?

⁹ Мире-щьна дьхԝазә ԝәки тӧ жь рʹийа кӧ дьбә бәрбь жийине, дәркʹәви. Әԝ дьхԝазә тӧ мина гәләк мәрьва бькʹәви сәр рʹийа фьрә, «кӧ дьбә бәрбь ӧндабуне» (Мәтта 7:13). Ле һәгәр әм бәрдәԝам кьн гӧһдарийа Иса бькьн у баԝәр бьн кӧ рʹийа тәнг рʹийа һәри баш ә, әме сәр ве рʹе бьминьн. Ньһа әме дина хԝә бьдьн тьштәки дьн, чь кӧ әм гәрәке бькьн.

10. Ль гора Мәтта 5:23, 24, Иса Мәсиһ готьбу кӧ гәрәке әм чь бькьн?

¹⁰ Мәтта 5:23, 24 бьхунә. Ван рʹезада Иса дина Щьһуйа кʹьшандә сәр тьштәки фәрз кӧ һʹәбандьна ԝанва гьредайи бу. Бинә бәр чʹәʹве хԝә кӧ пʹарьстгәһеда, кәсәк ида һьндьк майә ԛӧрбана хԝә бьдә дәсте кʹаһин. Ле ньшкева дькʹәвә бира ԝи ԝәки дьле бьре ԝи ль ԝи майә. Иса готьбу кӧ һәгәр тьштәки ӧса бьԛәԝьмә, гәрәке әԝ ԛӧрбана хԝә ԝедәре бьһелә у «һәрʹә». Гәло чьрʹа? Гәло Йаһоԝарʹа жь ԛӧрбане чь дьһа фәрз ә? Иса ӧса гот: «Пешийе һәрʹә бьре хԝәрʹа ль һәв ԝәрә».

11. Аԛуб чаԝа бьре хԝәрʹа ль һәв һат?

¹¹ Сәрһатийа Аԛуб пʹехәмбәр нишани мә дькә, ԝәки әм гәрәке чь бькьн сәва тʹәви мәрьва ль һәв бен. Гава 20 сал дәрбаз бу кӧ Аԛуб жь мала хԝә чу у щики дур дьжит, Хԝәде бь сайа мәләкәки ԝирʹа гот, ԝәки әԝ вәгәрʹә мала хԝә (Дәстпебун 31:11, 13, 38). Ле проблемәк һәбу. Бьре ԝи Әсаԝ дьхԝәст ԝи бькӧшта (Дәстпебун 27:41). Аԛуб «гәләки тьрсийа у тʹәвиһәв бу», чьмки дьфькьри кӧ Әсаԝ һе сәр ԝи һерс ә (Дәстпебун 32:7). Гәло Аԛуб чь кьр ԝәки бьре хԝәрʹа ль һәв бе? Пешийе, әԝи дәрһәԛа ве проблеме бь дьл Йаһоԝарʹа дӧа кьр. Паше, әԝи гәләк пʹешкʹеш Әсаԝрʹа шандьн (Дәстпебун 32:9-15). Хьлазийеда, гава әԝана рʹасти һәв һатьн, Аԛуб нә щарәке, нә жи дӧ щара, ле һʹәфт щара ль бәр Әсаԝ кʹәтә сәр чока! Бәле, Аԛуб бь ԛәдьр у мьлукти бьре хԝәрʹа ль һәв һат (Дәстпебун 33:3, 4).

12. Әм дькарьн жь мәсәла Аԛуб чь һин бьн?

¹² Гәло әм дькарьн жь ве сәрһатийе чь һин бьн? Пешийа кӧ Аԛуб чу бал Әсаԝ, әԝи бь мьлукти жь Йаһоԝа аликʹари хԝәст. Паше, әԝи ль гора дӧайе хԝә чь жь дәсте ԝи һат кьр, ԝәки бьре хԝәрʹа ль һәв бе. Гава Аԛуб у Әсаԝ рʹасти һәв һатьн, Аԛуб шәрʹ нәкьр кӧ кʹе рʹаст ә, кʹе нәһәԛ ә. Нета Аԛуб тʹәне әв бу кӧ бьре хԝәрʹа ль һәв бе. Гәло әм ча дькарьн чʹәʹв бьдьнә Аԛуб?

13-14. Һәгәр мә дьле хушк йан бьраки ешандийә, гәрәке әм чь бькьн?

¹³ Әм сәр рʹийа жийине нә, у әм дьхԝазьн тʹәви хушк-бьра әʹдьлайеда бьн  (Рʹомайи 12:18). Һәгәр мә дьле хушк йан бьраки ешандийә, гәрәке әм чь бькьн? Мина Аԛуб, гәрәке әм бь дьл Йаһоԝарʹа дӧа бькьн, ԝәки әԝ хирәта мә кʹәрәм кә, сәва әм хушк йан бьре хԝәрʹа ль һәв бен.

¹⁴ Ӧса жи, ԝе баш бә кӧ әм хԝә бьщерʹьбиньн. Мәсәлә, әм дькарьн жь хԝә бьпьрсьн: «Гәло әз һазьр ьм кӧ шашийа хԝә ԛәбул бькьм, бь мьлукти бахшандьне бьхԝазьм у хушк йан бьре хԝәрʹа ль һәв бем? Һәгәр әз гава пешьн бавежьм ԝәки хушк йан бьре хԝәрʹа ль һәв бем, Йаһоԝа у Иса ԝе сәр мьн чаԝа бьньһерʹьн?» Щабед ван пьрса дькарьн хԝәстьна мә зедә бькьн ԝәки әм гӧһ бьдьн Иса у бь мьлукти хушк йан бьре хԝәрʹа ль һәв бен. Ве йәкеда ԝе баш бә әм чʹәʹв бьдьнә Аԛуб.

15. Сәва кӧ әм хушк йан бьраки хԝәрʹа ль һәв бен, ԝе чьма баш бә кӧ гӧһ бьдьнә принсипа жь Әфәси 4:2, 3?

¹⁵ Һәгәр Аԛуб тʹәви Әсаԝ шәрʹ кьра, ԝәки избат кә кӧ кʹе рʹаст ә у  кʹе нәһәԛ ә, гәло әԝи ԝе бькарьбуйа әʹдьлайи чекьра? Дькарьн бежьн, ахьрийа хәбәрдана ӧса ԝе хьраб буйа. Ләма жи гава әм дьчьн бал кәсәки ԝәки проблемәке сафи бькьн, лазьм ә кӧ әм мьлук бьн (Әфәси 4:2, 3 бьхунә). Мәтʹәлок 18:19 ӧса дьбежә: «Бьраки хәйиди мина бажарәки суркьри йә у шәрʹ-дәʹԝ мина зәрʹза ԛәсьре йә». Сәва кӧ әм хушк йан бьре хԝә ԛазанщ бькьн, ԝе баш бә әм бь мьлукти бахшандьне бьхԝазьн.

16. Ԝе баш бә кӧ әм пешда сәр чь бьфькьрьн, у чьрʹа?

¹⁶ Ӧса жи, гәрәке әм пешда рʹьнд бьфькьрьн кӧ әме чь у ча бежьн. Паше, гава әм дьчьн бал кәсе хәйиди, гәрәке нета мә әв бә кӧ әм дьле ԝи бькʹьрʹьн. Һәгәр әм һерс кʹәвьн йан хԝә рʹаст дәрхьн, гәло әме бькарьбьн әʹдьлайе чекьн? На! Бир нәкә кӧ тьште һәри фәрз нә әв ә кӧ кʹе рʹаст ә, кʹе нәһәԛ ә, ле әв ә кӧ нав мәда әʹдьлайи һәбә (1 Корьнтʹи 6:7).

17. Әм дькарьн жь мәсәла Гилберт чь һин бьн?

¹⁷ Бьраки бь наве Гилберт гәләк хирәт дькьр ԝәки әʹдьлайе чекә. Әԝ дьбежә: «Ортʹа мьн у ԛиза мьнда проблемәкә мәзьн һәбу. Дӧ сала зедәтьр, мьн хирәт дькьр ԝәки тʹәви ԝе дәрһәԛа  ве проблеме бь нәрми хәбәр дьм, сәва әм ль һәв бен». Гилберт диса чь кьр? Әԝ ӧса дьбежә: «Пешийа кӧ мьн тʹәви ԛиза хԝә хәбәр да, мьн дӧа дькьр у мьн хԝә һазьр дькьр ԝәки һәгәр әԝ тьштәки сәрт бежә, әз һерс нәкʹәвьм. Гәрәке әз һазьр бума бьбахшиньмә ԝе. Әз һин бум кӧ гәрәке әз бона рʹастийа хԝә шәрʹ нәкьм, у мьн фәʹм кьр ԝәки тьште һәри фәрз әв ә кӧ әз әʹдьлайе хԝәй кьм». Ахьри чь бу? Гилберт дьбежә: «Дьле мьн ньһа рʹьһʹәт ә, чьмки әз тʹәви һʹәму нәфәред хԝә әʹдьлайеда мә».

18-19. Һәгәр мә дьле кәсәки ешандийә, гәрәке әм чь бькьн у чьрʹа?

¹⁸ Һәгәр тә дьле хушк йан бьраки ешандийә, гәрәке тӧ чь бьки? Гӧһ бьдә ширәтед Иса. Дьле хԝә Йаһоԝарʹа вәкә, у итʹбарийа хԝә рʹӧһʹе пироз бинә, ԝәки әʹдьлайи чебә. Һәгәр тӧ ӧса бьки, тӧйе ша би у тӧйе нишан ки, ԝәки бь рʹасти жи гӧһ дьди Иса (Мәтта 5:9).

¹⁹ Әм гәләк рʹази нә кӧ Йаһоԝа бь сайа Иса Мәсиһ, йе кӧ сәре щьвате йә, бь һʹьзкьрьн рʹебәрийа мә дькә (Әфәси 5:23). Ԝәрә тʹьме мина Пәтрус, Аԛуб у Йуһʹәнна «гӧһдарийа ԝи бькьн» (Мәтта 17:5). Әм пеһʹәсийан кӧ һәгәр мә дьле кәсәки ешандийә, әм ча дькарьн ԝирʹа ль һәв бен. Бь ви щурʹәйи, әме ль сәр рʹийа кӧ дьчә бәрбь жийине, бьминьн у һьм ньһа һьм жи ахьрийеда кʹәрәмед мәзьн у шабуна һʹәта-һʹәтайе бьстиньн!