1. Мәʹник чь бу кӧ Иса шагьртед хԝә бәрамбәри пез кьр?

ИСА һәләԛәтийа хԝә тʹәви шагьртед хԝә бәрамбәри һәләԛәтийа шьван тʹәви пез кьр (Йуһʹәнна 10:14). Әв мәсәлә бь рʹасти жи рʹьнд ә. Пәз шьване хԝә нас дькьн у гӧһ дьдьнә дәнге ԝи. Рʹеԝики әв йәк бь чʹәʹве хԝә дитьбу. Әԝи гот: «Мә дьхԝәст чәнд пәз бь видео бькʹьшанда, у мә дьхԝәст кӧ әԝ незики мә бьн. Ле ԝана гӧһ нәда мә, чьмки ԝана дәнге мә нас нәдькьр. Паше, шьванәки щаһьл һат, гази пез кьр у әԝана һатьн».

2-3. (а) Шагьртед Иса чаԝа дькарьн гӧһ бьдьн дәнге ԝи? (б) Ве готареда у готара дьнда, әме дина хԝә бьдьнә чь?

² Мәсәла ви рʹеԝи тинә бира мә кӧ Иса Мәсиһ дәрһәԛа пәзед хԝә – демәк дәрһәԛа шагьртед хԝә – чь готьбу: «Әԝе дәнге мьн бьбьһен» (Йуһʹәнна 10:16). Ле Иса ида ль әʹзмана йә. Гәло әм ча дькарьн дәнге ԝи бьбьһен? Гава әм ль гора готьнед ԝи дьжин, әм нишан дькьн кӧ әм гӧһ дьдьнә дәнге Ахайе хԝә (Мәтта 7:24, 25).

³ Ве готареда у готара дьнда, әме дина хԝә бьдьн һьнә готьнед Иса Мәсиһ. Әме бьвиньн кӧ Иса дьхԝазә, ԝәки әм чь гәрәке бькьн у чь гәрәке нәкьн. Пешийе әме дӧ тьшта шеԝьр кьн, йед кӧ шьване ԛәнщ готьбу ԝәки әм гәрәке нәкьн.

4. Ль гора Луԛа 12:29, чь дькарә бьбә сәбәб кӧ әм бәрхԝә кʹәвьн?

⁴ Луԛа 12:29 бьхунә. Иса шагьртед хԝәрʹа готьбу ԝәки әԝана дәрһәԛа һʹәԝщед хԝә «бәр хԝә нәкʹәвьн». Әм заньн ԝәки ширәта Иса һәртʹьм рʹаст ә у билани йә. Ләма әм дьхԝазьн ль гора ширәта ԝи бьжин. Ле щарна мә зор те ве йәке бькьн. Гәло чьрʹа?

5. Һьнә кәс чьрʹа бәрхԝә дькʹәвьн?

  ⁵ Һьнә кәс дәрһәԛа һʹәԝщед хԝә, демәк дәрһәԛа щи-сьтʹар йан кʹьнщ у хԝарьне хәма дькьн. Ԝәлатед кʹәсибда щарна зор ә, ԝәки мәрьв әʹбура мала хԝә бькә. Йан жи дьбәкә малхе мале мьрийә у кәс тʹӧнә кӧ малбәте хԝәй кә. Йан жи, һьнә кәса хәбата хԝә сәва пандәмийа COVID-19 ӧнда кьрийә (Ԝаиз 9:11). Һәгәр тьштед ӧса һатьнә сәре мә, гәло әм чаԝа дькарьн гӧһ бьдьн рʹебәрийа Иса Мәсиһ у «бәр хԝә нәкʹәвьн»?

6. Щарәке чь һатьбу сәре Пәтрусе шанди?

⁶ Щарәке, Пәтрусе шанди у шандийед дьн ԝәʹде фьртонәке бь ԛәйьке дьчун. Ньшкева, ԝана дит Иса сәр аверʹа дьчә. Һьнге Пәтрус гот: «Хӧдан, һәгәр тӧ йи, әʹмьр кә кӧ әз сәр аверʹа бемә щәм тә». Гава Иса ԝирʹа гот «Ԝәрә!», Пәтрус «жь ԛәйьке пәйа бу, сәр аверʹа чу, кӧ һәрʹә щәм Иса». Ле паше, гава Пәтрус «байе ԛайим дит тьрсийа у иди ԝе нӧԛ буйа, кьрә ԛирʹин: ‹Хӧдан, мьн хьлаз кә!›» Иса дәсте хԝә дьрежи ԝи кьр у әԝ хьлаз кьр. Һʹәԝас әԝ ә кӧ һʹәта Пәтрус дина хԝә дьда Иса, әԝи дькарьбу ль сәр аверʹа һәрʹә. Ле гава Пәтрус дина хԝә да фьртоне, тьрс у шьк кʹәтьнә дьле ԝи, у әԝи дәстпекьр нӧԛ бә (Мәтта 14:24-31).

7. Әм дькарьн жь сәрһатийа Пәтрус чь һин бьн?

⁷ Әм дькарьн жь сәрһатийа Пәтрус һьнә дәрса һин бьн. Гава Пәтрус жь ԛәйьке пәйа бу у ль сәр аверʹа чу, әԝ нәдьфькьри кӧ әԝе жь бо фьртоне бькʹәвә панике у нӧԛ бә. Әԝ дьфькьри, ԝәки әԝ дькарә ль сәр аверʹа һәрʹә бал  Ахайе хԝә. Ле әԝи һʹәта хьлазийе дина хԝә нәда ве нете. Әм һьлбәт нькарьн ль сәр аверʹа һәрʹьн, ле баԝәрийа мә бь щурʹәки дьн те щерʹьбандьне. Һәгәр әм дина хԝә нәдьн Йаһоԝа у созед ԝи, әм дькарьн жь алийе рʹӧһʹанива «нӧԛ бьн». Жийина мәда багәр у фьртонә чьԛас мәзьн бьн жи, гәрәке әм һәртʹьм дина хԝә бьдьнә Йаһоԝа у баԝәр бьн, ԝәки әԝ дькарә али мә бькә. Гәло әм чаԝа дькарьн ве йәке бькьн?

8. Чь дькарә али мә бькә кӧ әм дәрһәԛа һʹәԝщед хԝә хәма нәкьн?

⁸ Дәԝса кӧ әм хәма бькьн, гәрәке әм баԝәрийа хԝә дьһа ԛәԝи кьн. Бир нәкә, Йаһоԝа соз дайә, ԝәки ԝе бона һʹәԝщед мә хәм бькә, һәгәр әм «бәре пешьн ль Пʹадшатийа Хԝәде бьгәрʹьн у бькьн кӧ рʹастийа ԝи бьԛәдиньн (Мәтта 6:32, 33). Әԝ ви созе хԝә һәртʹьм тинә сери! (Ԛануна Дӧщари 8:4, 15, 16; Зәбур 37:25) Һәгәр Йаһоԝа гӧл у чʹьвика хԝәй дькә, ида нә лазьм ә әм бона кʹьнщ у хԝарьне хәма бькьн (Мәтта 6:26-30; Филипи 4:6, 7). Чаԝа де-бав бона һʹәԝщед зарʹед хԝә хәм дькьн, чьмки ԝана һʹьз дькьн, Баве мәйи әʹзмана жи бона һʹәԝщед физики йед зарʹед хԝә хәм дькә, чьмки ԝана һʹьз дькә. Бәле, әм гәрәке дӧдьли нәбьн, ԝәки Йаһоԝа ԝе мә хԝәй бькә!

9. Әм дькарьн жь сәрһатийа щотәке чь дәрса һин бьн?

⁹ Ԝәрә дина хԝә бьдьн сәрһатикә кӧ нишан дькә, ԝәки Йаһоԝа чаԝа дькарә бона һʹәԝщед мә хәм бькә. Жьн у мерәки пешәнг бь әʹрәба хԝәйә кәвьн сьһʹәтәке зедәтьр рʹе чун, ԝәки хушкед кӧ зома рʹәвийада дьжитьн, бьвьн щьвате. Әв бьра ӧса дьбежә: «Паши щьвине, мә әԝ бона хԝарьне гази мала хԝә кьрьн, ле паше кʹәтә бира мә, ԝәки малда хԝарьн тʹӧнә йә». Гәло паше чь ԛәԝьми? Бьра дьбежә: «Гава әм гьһиштьн мале, ль бәр дәри дӧ тʹорбә тʹьжә хԝарьн һәбун. Мә ньзаньбу кӧ кʹе әԝ анибу. Йаһоԝа бона мә хәм кьр!» Ԝәʹдә шунда әʹрәба ԝан хьраб бу. Әʹрәбә бона хьзмәте гәләк лазьм бу, ле пʹәре ԝан тʹӧнә бу сәва чекьн. Гава ԝана әʹрәба хԝә бьрьнә щийе чекьрьне, мерәк һат у пьрси: «Әва әʹрәба кʹе йә?» Бьре мә гот, ԝәки әв әʹрәба ԝи йә у әԝ хьраб буйә у лазьм ә чекьн. Әԝи мерьки гот: «Тьшт набә! Жьна мьн ве моделе у ви рʹәнги дьхԝазә. Тӧйе ве чь бьһа бьфьроши?» Ахьрийеда, бьре мә әʹрәба хԝә фьротә ԝи у пʹәре кӧ әԝи станд тʹера ԝи кьр, ԝәки әʹрәбәкә дьн бькʹьрʹә. Әԝ дьбежә: «Һун нькарьн бьдьнә бәр чʹәʹве хԝә, ԝәки ԝе рʹоже мә хԝә ча тʹәхмин дькьр. Мә заньбу кӧ әв дәрәщә хԝәха ньшкева ченәбу. Әв йәк сәд сәләфи дәсте Йаһоԝа бу!»

10. Ль гора Зәбур 37:5, чьрʹа нә лазьм ә кӧ әм бона һʹәԝщед хԝәйә физики хәм бькьн?

¹⁰ Һәгәр әм гӧһ бьдьн шьване ԛәнщ у дәрһәԛа һʹәԝщед хԝә зедә хәма нәкьн, әм дькарьн баԝәр бьн ԝәки Йаһоԝа ԝе хԝәха бона һʹәԝщед мә хәм бькә (Зәбур 37:5 бьхунә; 1 Пәтрус 5:7). Биньн бира хԝә дәрәща кӧ мә  абзаса 5-да бәʹса ве кьр. Дьбәкә Йаһоԝа бона һʹәԝщед мә бь сайа малхе мале йан жи хәбатәке хәм кьрийә. Ле һәгәр сәре малбәте ида нькарә мә хԝәй кә йан жи һәгәр мә хәбата хԝә ӧнда кьрийә, Йаһоԝа дькарә бона һʹәԝщед мә бь щурʹәки дьн хәм бькә. Әм дькарьн сәд сәләфи баԝәр бьн кӧ Йаһоԝа ԝе тʹӧ щар мә нәһелә. Ньһа әме дина хԝә  бьдьн диса тьштәки дьн, йе кӧ шьване ԛәнщ дьхԝазә кӧ әм нәкьн.

11. Ль гора Мәтта 7:1, 2, гәрәке әм чь нәкьн у әв йәк щарна чьма чәтьн ә?

¹¹ Мәтта 7:1, 2 бьхунә. Иса заньбу, ԝәки гӧһдаред ԝи гӧнәкʹар ьн, ләма щарна әԝана лома кәсед дьн дькьн. Ләма жи, әԝи гот: «Лома нәкьн». Дьԛәԝьмә әм гәләк сәр хԝә дьхәбьтьн, ԝәки хушк-бьра сущдар нәкьн, ле әм гӧнәкʹар ьн, у дьбәкә щарна әм диса жи кәсед дьн сущдар кьн. Ԝи чахи гәрәке әм чь бькьн? Гәрәке әм гӧһ бьдьн Иса у сәр хԝә бьхәбьтьн, ԝәки ида лома тʹӧ кәси нәкьн.

12-13. Ньһерʹандьна Йаһоԝа сәр Даԝьд Пʹадша, ча дькарә али мә бькә мәрьва сущдар нәкьн?

¹² Ԝе баш бә әм чʹәʹв бьдьнә Йаһоԝа, йе кӧ дина хԝә дьдә хәйсәт-һʹӧнӧред мәрьвайә баш. Әв йәк зәлал те кʹьфше жь ве йәке кӧ әԝи ча сәр Даԝьд Пʹадша дьньһерʹи, кʹижан кӧ чәнд щара гӧнед гьран кьрьн. Мәсәлә, Даԝьд тʹәви Бат-Шәбайе бенамуси кьр у сәрда жи әԝи мере ԝе да кӧштьне (2 Самуйел 11:2-4, 14, 15, 24). Ӧса Даԝьд бәла ани сәр хԝә у малбәта хԝә (2 Самуйел 12:10, 11). Щарәкә дьн, Даԝьд хԝә бь тʹәмами нәспартә Йаһоԝа у фәрман да, ԝәки ордийа Исраеле бе жьмартьн. Дьбәкә сәбәбе ве фәрмане әв бу, кӧ ԛӧрʹәти кʹәтьбу дьле Даԝьд жь бо ԝе йәке кӧ ордийа ԝи мәзьн бу у әԝи хԝә дьспарт ԛәԝата ордийа хԝә. Әве йәке чь ахьри ани? Ԝәкә 70 000 Исраели жь бо нәхԝәшикә гьран мьрьн (2 Самуйел 24:1-4, 10-15).

¹³ Һәгәр тә һьнге Исраеледа бьжита, тәйе сәр Даԝьд ча бьньһерʹийа? Гәло тӧйе бьфькьрийайи кӧ әԝ һежайи рʹәʹма Йаһоԝа нинә? Йаһоԝа ӧса нәдьфькьри. Әԝи дина хԝә да амьни у тʹобәкьрьна Даԝьд. Ахьрийеда Йаһоԝа гӧнед Даԝьдә гьран, бахшанд. Йаһоԝа заньбу, ԝәки Даԝьд гәләк ԝи һʹьз дькә у дьхԝазә тьштед рʹаст бькә. Гәло тӧ шекьрдар нини, ԝәки Хԝәде дина хԝә дьдә хәйсәт-һʹӧнӧред мәйә баш? (1 Пʹадшати 9:4; 1 Дирок 29:10, 17)

14. Чь али мә дькә кӧ әм мәрьва сущдар нәкьн?

¹⁴ Һәгәр Йаһоԝа дькарә чʹәʹве хԝә ль сәр шашийед мәрьвед гӧнәкʹар бьгьрә, гәло нә лазьм ә әм жи чʹәʹве хԝә сәр шашийед мәрьва бьгьрьн у дина хԝә бьдьн хәйсәт-һʹӧнӧред ԝанә баш? Дьбәкә мәрʹа һеса йә кемасийед мәрьва бьвиньн у ԝана сущдар кьн. Ле һәгәр әм чʹәʹв бьдьнә Йаһоԝа, әме диса жи бькарьбьн тʹәви ԝан һеса һәвкʹарийе бькьн. Дина хԝә бьдә ве мәсәле: Пешийа кӧ алмаз бьбьрьԛә, ԛимәте ԝе әшкәрә найе кʹьфше, ле кәсе билан занә кӧ ԛимәта ԝе чьԛас мәзьн дьбә гава тʹәмьз дькьн у дьбьрьԛиньн. Әм жи гәрәке мина Йаһоԝа у Иса, дина хԝә нәдьн ве йәке кӧ мәрьв рʹува ча тенә кʹьфше, ле ве йәке кӧ чь һʹӧнӧред ԝанә баш һәнә.

15. Сәва кӧ әм мәрьва сәрт сущдар нәкьн, чьма ԝе баш бә кӧ әм дәрһәԛа һʹале ԝан бьфькьрьн?

¹⁵ Хенщи кӧ әм гәрәке дина хԝә бьдьн һʹӧнӧред мәрьвайә баш, гәло диса чь дькарә али мә бькә ԝана сәрт сущдар нәкьн? Бьфькьрә һәла әԝана чь һʹалида ньн. Ве мәсәле бьдә бәр чʹәʹве хԝә. Рʹожәке, гава Иса пʹарьстгәһеда рʹуньшти бу, әԝи дит ԝәки жьнәбикә кʹәсиб дӧ полед бьчʹук авитә пʹәрәданке. Иса нәгот: «Әԝе чьма һаԛас һьндьк авит?» Дәԝса кӧ дина хԝә бьдә ве  йәке кӧ жьнәбийе чьԛас авит, әԝи дина хԝә да нета дьле ԝе у һʹале ԝе. Сәрда жи, Иса пʹайе ԝе да, чьмки чьԛас дәсте ԝеда һәбу, әԝе ԛӧрбан кьр (Луԛа 21:1-4).

16. Әм жь сәрһатийа Вероникайе чь һин дьбьн?

¹⁶ Сәрһатийа хушкәкә бь наве Вероника нишани мә дькә, ԝәки чьма фәрз ә дәрәщед әʹмьре мәрьва һьлдьн һʹәсаб. Щьвата ԝеда хушкәке кӧрʹе хԝә тʹәне мәзьн дькьр. Вероника дьбежә: «Мьнрʹа ӧса дьһатә кʹьфше, ԝәки әԝана шьхӧлед рʹӧһʹанида хирәт ниньн. Ләма жи ньһерʹандьна мьн сәр ԝан нәбаш бу. Ле рʹожәке, әз тʹәви ве хушке чумә хьзмәте. Әԝе мьнрʹа гот, ԝәки нәхԝәшийа кӧрʹе ԝейә психики һәйә у мәзьнкьрьна ԝи һеса нинә. Әԝе чь жь дәсте ԝе дьһат, дькьр ԝәки әʹбура хԝә у кӧрʹе хԝә бькә, у һьм жи хәм бькә, ԝәки рʹӧһʹанида сьст нәбьн. Жь бо нәхԝәшийа кӧрʹе ԝе щарна жерʹа лазьм дьбу кӧ әԝ һәрʹә щьватәкә дьн. Вероника дьбежә: «Мьн ньзаньбу кӧ һʹале ԝе чьԛас зор ә. Ньһа әз ԝе ԛимәт дькьм у ԛәдре ԝе дьгьрьм, чьмки әԝ һаԛас щәфа дькʹьшинә, ԝәки Йаһоԝарʹа хьзмәт кә».

17. Ль гора Аԛуб 2:8, гәрәке әм чь бькьн, у әм ча дькарьн ве йәке бькьн?

¹⁷ Һәгәр әм тедәрхьн ԝәки мә хушк йан бьрак сущдар кьрийә, ԝе баш бә  кӧ әм чь бькьн? Бир нәкә ԝәки әм гәрәке хушк-бьра һʹьз бькьн (Аԛуб 2:8 бьхунә). Ӧса жи, гәрәке әм жь дьл дӧа бькьн, ԝәки Йаһоԝа али мә бькә, әм лома мәрьва нәкьн. Ԝе баш бә ль гора дӧайед хԝә һәр тьшти бькьн у тʹәви кәсед кӧ әм сущдар дькьн, ԝәхт дәрбаз кьн. Бь ви щурʹәйи әм дькарьн ԝана дьһа баш нас бькьн. Әм дьбәкә дькарьн тʹәви ԝана һәрʹьн хьзмәте, йан жи ԝана тʹәглифи мала хԝә бькьн у тʹәвайи нан бьхԝьн. Чьԛас дьһа незик әм ԝана нас кьн, һаԛас әме бькарьбьн мина Йаһоԝа у Иса дина хԝә бьдьн хәйсәт-һʹӧнӧред ԝанә ԛәнщ. Ӧса әме нишан кьн, ԝәки әм гӧһ дьдьн тʹәмийа шьване ԛәнщ у лома тʹӧ кәси накьн.

18. Әм ча дькарьн нишан кьн, ԝәки әм гӧһ дьдьн дәнге шьване хԝәйи ԛәнщ?

¹⁸ Чаԝа кӧ пәз гӧһ дьдьн дәнге шьване хԝә, шагьртед Иса жи гӧһ дьдьн дәнге ԝи. Һәгәр әм бона һʹәԝщед хԝә бь зедәйи хәма нәкьн у лома мәрьва нәкьн, Йаһоԝа у Иса ԝе бона ве йәке мә кʹәрәм кьн. Һевийа мә чь бә жи – жийина ль сәр әʹзмана йан ль сәр әʹрде – ԝәрә әм бәрдәԝам кьн гӧһ бьдьн дәнге шьване хԝәйи ԛәнщ (Луԛа 12:32; Йуһʹәнна 10:11, 14, 16). Готара дьнда, әме дина хԝә бьдьн һьнә ширәтед Исайә дьн.