1-2. Кʹьрʹин чь йә, у әм чьрʹа һʹәԝщәйи кʹьрʹине нә?

ГАВА мәрьве пешьн Адәм гӧнә кьр, әԝи һьм хԝә һьм жи зарʹед хԝә тʹәсмили мьрьне кьрьн. Әԝи бь һʹәмде хԝә гӧнә кьр, ле әв йәк нә суще зарʹед ԝи бу. Диса жи, ԝана гӧнә у мьрьн жь Адәм стандьн (Рʹомайи 5:12, 14). Гәло чь дькарьбу әԝана жь мьрьне хьлаз бькьрана? Дәмәкә кьн паши гӧне Адәм, Йаһоԝа гав бь гав әшкәрә дькьр кӧ әԝе бь милйона зарʹед Адәм чаԝа жь гӧнә у мьрьне бьфьльтинә (Дәстпебун 3:15). Йаһоԝа сафи кьр ԝәки Кӧрʹе хԝә жь әʹзмана бьшинә дьнйайе, ԝәки әԝ бона инсана «әʹмьре хԝә бьдә, кӧ гәләка бькʹьрʹә» (Марԛос 10:45; Йуһʹәнна 6:51).

² Гәло кʹьрʹин чь йә? Ль Ньвисаред Пироз йед бь зьмане Йунани, хәбәра кʹьрʹин те һʹәсабе һәԛе кӧ Иса Мәсиһ да, сәва кӧ вәгәрʹинә ве йәке чь кӧ Адәм ӧнда кьрьбу (1 Корьнтʹи 15:22). Гәло әм чьрʹа һʹәԝщәйи кʹьрʹине нә? Ча Ԛануна Мусада һатьбу готьн, ль гора принсипа Йаһоԝа дәрһәԛа һәԛийе, лазьм бу кӧ «әʹмьр жь бәр әʹмьрва» бьһата дайин (Дәркʹәтьн 21:23, 24). Адәм жийина беԛьсур ӧнда кьрьбу. Ләма сәва кӧ һәԛийа Хԝәде бьһата сери, Иса Мәсиһ жийана хԝәйә беԛьсур ԛӧрбан кьр (Рʹомайи 5:17). Бь ви щурʹәйи Иса бона һʹәму кәсед кӧ баԝәрийа хԝә ԛӧрбане тиньн, дьбә «Баве Һʹәта-Һʹәтайе» (Ишайа 9:6, ДТʹ; Рʹомайи 3:23, 24).

3. Ль гора Йуһʹәнна 14:31 у 15:13, Иса Мәсиһ чьма һазьр бу кӧ жийина хԝә йа беԛьсур ԛӧрбан бькә?

³ Иса Мәсиһ Баве хԝә у мә һаԛас һʹьз дькә кӧ әԝ һазьр бу жийина хԝә ԛӧрбан бькә (Йуһʹәнна 14:31; 15:13 бьхунә). Бь сайа ве һʹьзкьрьне, Иса Мәсиһ хԝәстьна Баве хԝә ани сери у һʹәта мьрьне амьн ма. Ахьрийеда, нета Хԝәде йа пешьн бона инсана у бона әʹрде ԝе бе сери. Ве готареда, әме бьвиньн кӧ Йаһоԝа чьма изьн да, ԝәки Иса Мәсиһ пешийа  мьрьна хԝә һаԛас еше бькʹьшинә. Ӧса жи, әме кьн ль сәрһатийа ньвискʹарәки Кʹьтеба Пироз бьньһерʹьн, йе кӧ кʹьрʹине гәләк ԛимәт дькьр. Паше, әме бьвиньн кӧ әм чаԝа дькарьн нишан бькьн кӧ әм бона кʹьрʹине рʹази нә у ча дькарьн дьһа зедә ве ԛӧрбане кӧ Йаһоԝа у Иса бона мә дан, бьшекьриньн.

4. Иса Мәсиһ чаԝа мьр?

⁴ Рʹожа хьлазийейә пешийа мьрьна Иса Мәсиһ бинә бәр чʹәʹве хԝә. Әԝи дькарьбу гази бь һʹәзара мәләка бькьра кӧ әԝана али ԝи бькьн, ле әԝи изьн да ԝәки әскәред Рʹомайи ԝи гьредьн у бьдьн бәр ԛамчийа (Мәтта 26:52-54; Йуһʹәнна 18:3; 19:1). Әскәра гоште бәдәна ԝи бь ԛамчийа рʹакьрьн. Паше, ԝана стуна гьран ль сәр пьшта ԝийә бьриндар бар кьр. Иса Мәсиһ һеди-һеди бәрбь щийе дардакьрьна хԝә дьмәшийа, ле паше, Рʹомайа гази мерәки дьн кьр у әʹмьр дан, ԝәки әԝ ве стуна щәфайе дәԝса Иса һьлгьрә бьвә (Мәтта 27:32). Гава Иса Мәсиһ гьһишт ви щийи, әскәра дәст у пʹийед ԝи ль сәр стуна щәфайе мьх кьрьн. Гава стун һьлбьрандьн, гьранийа бәдәна Иса бьринед ԝи дьһа зедә дешандьн. Достед Иса сәва һʹале ԝи гәләк хәмгин бун у дийа ԝи дьгьрийа, ле сәрԝеред Щьһуйа ԛәрфед хԝә бь ԝи дькьрьн (Луԛа 23:32-38; Йуһʹәнна 19:25). Чәрчьрандьна Иса чәнд сьһʹәта бәрдәԝам кьр. Дьле ԝи чьԛас дьчу тәнг дьбу, у жерʹа ида гәләк зор бу кӧ бина хԝә бькʹьшинә. Иса заньбу кӧ әԝ амьн ма у пешийа мьрьна хԝә дӧайе пашьн гот. Паше, әԝи сәре хԝә бәржер кьр у мьр (Марԛос 15:37; Луԛа 23:46; Йуһʹәнна 10:17, 18; 19:30). Бәле, мьрьна Иса Мәсиһ гәләк бь еш у щәфа бу!

5. Бона Иса тьште һәри зор чь бу?

⁵ Бона Иса Мәсиһ, тьште һәри зор нә әв бу кӧ әԝе чаԝа бьһата кӧштьн, ле әв бу кӧ әԝе бь чь сәбәбе бьһата кӧштьн. Әԝ ԝе ча кәсәки кӧ кʹьфьр кьр у наве Хԝәде беһӧрмәт кьр, һат сущдаркьрьн (Мәтта 26:64-66). Ләма, дьле Иса һаԛас дәрд у кʹәдәр бу кӧ жь Баве хԝә ӧса лава кьр: «Һәгәр дьбә, бьра әв кʹаса щәфе сәр мьнрʹа дәрбаз бә» (Мәтта 26:38, 39, 42). Гәло Йаһоԝа чьма изьн да ԝәки Кӧрʹе ԝийә дәлал һаԛас еше бькʹьшинә у бьмьрә? Кʹа әм дина хԝә бьдьн се сәбәба.

6. Чьма лазьм бу кӧ Иса Мәсиһ ль сәр стуне бе дардакьрьне?

⁶ Йа йәке, лазьм бу кӧ Иса сәр стуне бьһата дардакьрьн, сәва кӧ Щьһуйа жь ньфьрʹе хьлаз бькә (Галати 3:10, 13). Мьләте Исраел соз дабу кӧ әԝана ԝе гӧһ бьдьн Ԛануна Хԝәде, ле ԝана созе хԝә нәанибу сери у ләма жи ньфьрʹ ль ԝан һат кьрьн. Демәк, әԝана нә тʹәне сәва гӧне Адәм һежайи мьрьне бун, ле чьмки әв ньфьрʹ жи сәр ԝан бу (Рʹомайи 5:12). Ль гора Ԛануна кӧ Хԝәде дабу мьләте Исраел, бәдәна мәрьвәки кӧ сәва гӧнәки гьран һатьбу нәһәԛкьрьне, гәрәке ль сәр стуне бьһата дардакьрьне * (Ԛануна Дӧщари 21:22, 23; 27:26). Ләма жи, гава Иса Мәсиһ ль сәр стуна щәфайе һат мьхкьрьн, әԝи рʹе вәкьр ԝәки әв мьләте кӧ әԝ ԛәбул нәкьрьбу жь ԛӧрбанбуна ԝи кʹаре бьстинә.

7. Хԝәде жь бо кʹижан мәʹнийа дьн изьн да ԝәки Кӧрʹе ԝи еше бькʹьшинә?

⁷ Йа дӧда, Хԝәде Кӧрʹе хԝә Иса Мәсиһ һазьр дькьр кӧ әԝ бьбә Сәрәккʹаһине мә. Иса Мәсиһ хԝәха дит кӧ чьԛас зор ә кӧ мәрьв ԝәʹде щерʹьбандьна гьран гӧрʹа  Хԝәде бькә. Гава әԝ һат щерʹьбандьн, әԝи бь «кʹәсәр у бь һесьра» жь Хԝәде лава у рʹәща дькьр кӧ али ԝи бькә. Иса «щәфа кʹьшанд, һатә щерʹьбандьне», ләма жи «дькарә аликʹарийа ԝан бькә, йед кӧ дькʹәвьнә нава щерʹьбандьне». Әм Йаһоԝарʹа чьԛас шькьрдар ьн кӧ әԝи Сәрәккʹаһинәки дьлрʹәʹм кʹьфш кьрийә, йе кӧ кемасийед мә рʹьнд фәʹм дькә! (Ибрани 2:17, 18; 4:14-16; 5:7-10).

8. Мәʹнийа сьсийа чь йә кӧ Хԝәде изьн да ԝәки Кӧрʹе ԝи бь щурʹәки һаԛас гьран бе щерʹьбандьн?

⁸ Йа сьсийа, Йаһоԝа изьн да ԝәки Иса һаԛас еше бькʹьшинә, сәва кӧ щаба ве пьрсәкә фәрз бе дайин: Гәло инсан дькарә ль һьмбәри тәнгасийед гьран амьн бьминә? Шәйтʹан дьбежә кӧ әв йәк набә. Әԝ дьбежә кӧ мәрьв тʹәне бона кʹара хԝә Хԝәдерʹа хьзмәт дькьн, у әԝ дьфькьрә кӧ мина Адәм, тʹӧ кәс бь рʹасти Йаһоԝа һʹьз накә (Ибо 1:9-11; 2:4, 5). Ле Йаһоԝа баԝәр бу кӧ Кӧрʹе ԝи ԝе амьн бьминә, ләма жи әԝи изьн да ԝәки әԝ һʹәта мьрьне бе щерʹьбандьн. Бь рʹасти жи Иса амьн ма у избат кьр кӧ Мире-щьна дәрәԝин ә.

9. Йуһʹәннайе шанди мәрʹа мәсәләкә чаԝа һишт?

⁹ Баԝәрийа һьндава кʹьрʹине али гәләк шагьртед Иса Мәсиһ кьрийә кӧ нава зерандьна у тәнгасийед дьнда мьзгине бәла кьн у һʹәта мьрьне амьн бьминьн. Мәсәлә, сәрһатийа Йуһʹәннайе шанди бинә бәр чʹәʹве хԝә. Ча те кʹьфше, әԝи бь зедәтьри 60 сали мьзгина дәрһәԛа Иса у ԛӧрбана ԝи, бь амьни бәла дькьр. Гава әԝ незики 100 сали бу, дәԝләта Рʹомайи әԝ ль гьрава Патмосе сьргун кьр, чьмки ԝи ча мәрьвәки хоф һʹәсаб дькьрьн. Гәло чьма? Чьмки әԝи дәрһәԛа Хԝәде у Иса Мәсиһ шәʹдәти дьда (Әʹйанти 1:9). Бәле, Йуһʹәнна жь алийе сәбьр у амьнийева мәсәләкә гәләк баш ә!

10. Ньвисаред Йуһʹәнна чаԝа нишан дькьн кӧ әԝи ԛӧрбане ԛимәт дькьр?

¹⁰ Жь кʹьтеб у нәʹмед кӧ Йуһʹәнна бь рʹебәрийа рʹӧһʹе Хԝәдейи пироз ньвисин, әшкәрә йә кӧ әԝи Иса гәләк һʹьз дькьр у кʹьрʹине ԛимәт дькьр. Дь ван ньвисарада, әԝи зедәтьри 100 щари бәʹса кʹьрʹине у кʹара ве кьр. Мәсәлә, Йуһʹәнна ӧса ньвиси: «Һәгәр йәк гӧнә бькә, ль щәм Баве пьштгьре мә, Иса Мәсиһ, Йе Һәԛ һәйә» (1 Йуһʹәнна 2:1, 2). Ӧса жи, ньвисаред Йуһʹәнна дина мә дькʹьшиньн сәр ве йәке кӧ чьԛас фәрз ә ԝәки әм дәрһәԛа Иса шәʹдәтийе бьдьн (Әʹйанти 19:10). Те кʹьфше кӧ Йуһʹәнна ԛӧрбана Иса гәләк ԛимәт дькьр. Гәло әм чаԝа дькарьн нишан бькьн кӧ әм жи ԛӧрбане ԛимәт дькьн?

11. Чь дькарә али мә бькә кӧ әм гӧна нәкьн?

¹¹ Хԝә жь гӧнәкьрьне дур бьгьрә. Кәсәки кӧ жь дьл ԛимәте дьдә кʹьрʹине ԝе тʹӧ щар нәбежә: «Һәгәр әз бем щерʹьбандьн, нә лазьм ә кӧ әз бәрхԝә кʹәвьн ԝәки гӧнә нәкьм, чьмки һәгәр әз гӧнә бькьм жи, ижа чь, әз дькарьм жь Хԝәде бахшандьне бьхԝазьм». Дәԝсе, гава әм бен щерʹьбандьн ԝәки тьштәки нәрʹаст бькьн, әме ӧса бежьн: «На! Әзе ча ви гӧнәйи бькьм, һәгәр Йаһоԝа у Иса Мәсиһ бона мьн ԛӧрбанәкә ӧса ԛимәт дан?» Ӧса жи, ча Иса Мәсиһ готьбу, әм ԝәʹде щерʹьбандьна дькарьн жь Йаһоԝа ԛәԝате бьхԝазьн у ӧса дӧа бькьн: ‹Нәһелә әз бькʹәвьмә щерʹьбандьне› (Мәтта 6:13).

12. Әм чаԝа дькарьн ширәта ль 1 Йуһʹәнна 3:16-18 бьдьнә хәбате?

¹² Хушк-бьра һʹьз бькә. Гава әм нишан  дькьн кӧ әм хушк-бьра һʹьз дькьн, әм нишан дькьн кӧ әм кʹьрʹине ԛимәт дькьн. Гәло чьма? Чьмки Иса Мәсиһ әʹмьре хԝә нә тʹәне бона мә бәрва да, ле бона хушк-бьред мә жи. Әв йәк кӧ әԝ һазьр бу ԝәки бона ԝан бьмьрә, избат дькә кӧ әԝана бона ԝи гәләк ԛимәт ьн (1 Йуһʹәнна 3:16-18 бьхунә). Һʹал у һәрәкʹәтед мә нишан дькьн кӧ әм хушк-бьра чьԛас һʹьз дькьн (Әфәси 4:29, 31–5:2). Мәсәлә, ԝәхта кӧ әԝана нәхԝәш дькʹәвьн, ԝәʹде тʹәшԛәла тʹәбийәте зьраре дьвиньн йан рʹасти тәнгасийед дьн тен, әм али ԝан дькьн. Ле һәгәр хушк йан бьраки дьле мә бь готьн йан кьрьнед хԝә ешандийә, гәрәке әм чь бькьн?

13. Чьрʹа лазьм ә кӧ әм бьбахшиньн һәвдӧ?

¹³ Гәло тӧ щарна хушк йан бьракирʹа кʹине дажойи? (Ԛануна Кʹаһинтийе 19:18). Һәгәр әре гӧһ бьдә ве ширәте: «Ль һәв сәбьр кьн у ль һәв бьбахшиньн, һәгәр газьне йәки ль һьндава йәкида һәбә. Чаԝа Хӧдан бахшандә ԝә, һун жи ӧса бьбахшиньнә һәв» (Колоси 3:13). Чьԛас зедә әм дьбахшиньн хушк у бьра, һаԛас зедә әм Баве хԝәйи әʹзманирʹа избат дькьн кӧ әм бь дьл у щан кʹьрʹине ԛимәте дькьн. Гәло әм чаԝа дькарьн рʹазибуна хԝә бона ве пʹешкʹеша жь Хԝәде зедә бькьн?

14. Әм чаԝа дькарьн рʹазибуна хԝә бона кʹьрʹине нишан бькьн?

¹⁴ Йаһоԝарʹа рʹазибуна хԝә бона кʹьрʹине әʹйан кә. Хушкәкә 83 сали бь наве Щоанна, йа кӧ ль Һьндьстане дьжи, ӧса дьбежә: «Әз дьфькьрьм кӧ гәләк фәрз ә ԝәки әз һәр рʹож дӧайед хԝәда бәʹса ԛӧрбане бькьм у Йаһоԝарʹа шькьрдар бьм, чьмки әԝи бона мә Кӧрʹе хԝә бәрва да». Дь дӧайед хԝәйә шәхсида, бинә бира хԝә кӧ тә ԝе рʹожеда чь шаши кьрьнә, у жь Йаһоԝа бахшандьне бьхԝазә. Һәгәр тә гӧнәки гьран кьрьбә, һьлбәт лазьм ә кӧ тӧ аликʹарийа рʹуспийа жи бьхԝази. Әԝана ԝе гӧһ бьдьн тә у бь дьловани жь Кʹьтеба Пироз ширәте бьдьн тә. Әԝана ԝе тʹәви тә дӧа бькьн у жь Йаһоԝа рʹәща бькьн кӧ әԝ ль сәр һʹиме кʹьрʹине бьбахшинә тә, ԝәки тӧ жь алийе рʹӧһʹанива ԛәнщ бьби (Аԛуб 5:14-16).

15. Ԝе чьма баш бә кӧ әм дәрһәԛа кʹьрʹине бьхуньн у кʹур бьфькьрьн?

¹⁵ Ль сәр кʹьрʹине кʹур бьфькьрә. Хушкәкә 73 сали бь наве Ращамани ӧса дьбежә:  «Гава әз дьхуньм кӧ Иса Мәсиһ чьԛас еш кʹьшанд, чʹәʹвед мьн тʹьжи һесьр дьбьн». Бәлки ль тә жи зор те кӧ тӧ еш у щәфайа Иса Мәсиһ бини бәр чʹәʹве хԝә. Ле чьԛас кӧ тӧ сәр ԛӧрбана Иса Мәсиһ кʹур бьфькьри, һаԛас зедә тӧйе ԝи у Баве ԝи һʹьз бьки. Сәва кӧ тӧ ԛимәта кʹьрʹине дьһа баш фәʹм бьки, тӧ дькари дәрһәԛа тʹемайе дьһа зедә леколина бьки.

16. Әв йәк кӧ әм кәсед дьн дәрһәԛа кʹьрʹине һин дькьн, чьрʹа бона мә керһати йә? (Бьньһерʹә шькле рʹуйе журнале.)

¹⁶ Кәсед дьн дәрһәԛа кʹьрʹине һин бькә. Чьԛас кӧ әм кәсед дьнрʹа бәʹса кʹьрʹине бькьн, рʹазибуна мә бона кʹьрʹине ԝе дьһа зедә бьбә. Дәсте мәда һащәтед керһати һәнә, йед кӧ али мә дькьн ԝәки әм мәʹнийа кʹьрʹине мәрьварʹа зәлал бькьн. Мәсәлә, әм дькарьн дәрса 4 бь наве «Кʹи йә Иса Мәсиһ?» жь брошура «Мьзгинийа Хԝәде», бьдьнә хәбате. Йан жи, әм дькарьн сәре 5 бь наве «Хьлазкьрьн Пʹешкʹешәкә Гәләк Мәзьн ә жь Хԝәде», жь кʹьтеба «Чь Һин Дькә Кʹьтеба Пироз? бьдьнә хәбате. Ӧса жи, әм һәр сал дьчьн сәр Биранина Мьрьна Иса Мәсиһ, у әм кәсед дьн жи тʹәглиф дькьн кӧ әԝана жи бен сәр Биранине. Бь ви щурʹәйи, әм рʹазибуна хԝә бона ԛӧрбане дьһа зедә дькьн. Бәле, әв йәк кӧ Йаһоԝа изне дьдә ԝәки әм кәсед дьн дәрһәԛа кʹьрʹине һин бькьн, ԛәдьрәки гәләк мәзьн ә!

17. Кʹьрʹин чьрʹа пʹешкʹеша һәри мәзьн йа жь Хԝәде йә?

¹⁷ Кʹьрʹин бь рʹасти жи пʹешкʹешәкә гәләк ԛимәт ә, у ԝе баш бә кӧ әм рʹазибуна хԝә бона ве пʹешкʹеше һәр кӧ дьчә дьһа зедә бькьн. Әм чьԛас гӧнәкʹар бьн жи, ԛӧрбана Иса рʹе вәкьрийә кӧ әм бьбьн достед Йаһоԝа. Бь сайа ве ԛӧрбане, кьред Мире-щьна ԝе бь тʹәмами бен хьрабкьрьн (1 Йуһʹәнна 3:8). Бь сайа кʹьрʹине, Йаһоԝа ԝе нета хԝә йа бона дьнйайе бинә сери. Рʹожәке, тʹәмамийа дьнйайе ԝе бьбә щьнәт. Ль ԝе дәме, һәр кәс ԝе ида Йаһоԝа һʹьз бькә у ԝирʹа хьзмәт бькә. Ләма, бьра әм һәр рʹож кʹьрʹине ԛимәт бькьн у нишан бькьн кӧ әм бона ве пʹешкʹеша мәхсус рʹази нә!