1. Әм чь дьхԝазьн бежьн, чахе хәбәра «рʹасти» дьдьнә хәбате?

ДЬБӘКӘ кәсәки пьрсед ӧса дайә тә, йан жи тә әԝ пьрс дайә кәсәки, мәсәлә: «Тә рʹасти ча дит? Тӧ нава рʹастийеда мәзьн буйи? Чьԛас ԝәʹдә йә тӧ нава рʹастийеда ни?» Әм чь дьхԝазьн бежьн, чахе хәбәра «рʹасти» дьдьнә хәбате? Әм әве хәбәре дьдьнә хәбате, чахе дәрһәԛа баԝәрийа хԝә, һʹәбандьна хԝә Хԝәдерʹа, у дәрһәԛа щурʹе жийина хԝә дьбежьн. Мәрьвед кӧ «нава рʹастийеда ньн», заньн Кʹьтеба Пироз чь һин дькә у принсипед ԝе әʹмьре хԝәда дьдьнә хәбате. Әԝана ида баԝәрийа хԝә һинкьрьнед религийед ԛәлп найньн, чьмки жь ве йәке аза бунә, у әʹмьре хԝәйи иройинрʹа ша дьбьн (Йуһʹн. 8:32).

2. Ль гора Йуһʹәнна 13:34, 35, серида чь дькарә мәрьва һелан кә, ԝәки бенә нава рʹастийе?

² Дәстпекеда чь тә һелан кьр, кӧ тә рʹасти ԛәбул кьр? Дьбәкә рʹабун-рʹуньштьна щьмәʹта Йаһоԝа тә хԝәш һат (1 Пәт. 2:12). Йан жи дьбәкә һʹьзкьрьна ԝан һьндава мәрьва, тӧ һелан кьри. Гәләк мәрьв чахе щара пешьн тенә сәр щьвате әве һʹьзкьрьне дьвиньн, у әԝ йәк дьһа бира ԝанда дьминә, нә кӧ әԝ чь ԝедәре бьһистьн. Әԝ йәк әʹщебмайи нинә, чьмки Иса гот кӧ шагьртед ԝи ԝе пе һʹьзкьрьне бенә наскьрьне. (Бьхунә Йуһʹәнна 13:34, 35.) Ле сәва кӧ баԝәрийа мә ԛәԝи бә, диса һьнә тьшт лазьм ьн.

3. Чь дькарә бьԛәԝьмә һәрге баԝәрийа мә тʹәне сәр һʹиме һʹьзкьрьна хушк-бьра бә?

³ Баԝәрийа мә гәрәке нә тʹәне сәр һʹиме һʹьзкьрьна һьндава щьмәʹта Хԝәде бә. Чьрʹа? Чьмки һәрге баԝәрийа мә тʹәне сәр һʹиме ве һʹьзкьрьне бә, әм дькарьн һеса баԝәрийа хԝә ӧнда кьн. Мәсәлә, дьбәкә әм бьлькʹӧмьн у хьзмәтийа хԝә Йаһоԝарʹа бьдьнә сәкьнандьне һәрге хушкәк  йан бьрак, йан жи һәла һе рʹуспи йан пешәнг, гӧнәки гьран бькә. Әм ӧса жи дьбәкә бьлькʹӧмьн, һәрге кәсәк дьле мә бешинә йан жи бьбә рʹабәр у бежә кӧ баԝәрийа мә нә рʹаст ә. Ләма жи һәрге һун дьхԝазьн баԝәрийа ԝә ԛәԝи бә, әԝ гәрәке сәр һʹиме һәләԛәтийа ԝәйә баш тʹәви Йаһоԝа бә. Ле һәрге ԝә баԝәрийа хԝә сәр һʹиме кьред мәрьва ава кьрийә, ԝи чахи баԝәрийа ԝә ԝе сьст бә. Бәле, баԝәрийа мә гәрәке нә кӧ тʹәне сәр һʹиме һәст у емосийа бә, ле ӧса жи сәр һʹиме избаткьрьнед һʹимгьрти. Һун гәрәке сәд сәләфи баԝәр бьн, ԝәки Кʹьтеба Пироз рʹастийе дәрһәԛа Йаһоԝа һин дькә (Рʹом. 12:2).

4. Ль гора Мәтта 13:3-6, 20, 21, чәтьнайи ча дькарьн сәр баԝәрийа һьнә мәрьва һʹӧкӧм бьн?

⁴ Иса гот кӧ һьнә мәрьв ԝе «бь әшԛ у ша» рʹастийе ԛәбул кьн, ле гава әԝана рʹасти чәтьнайа бен, баԝәрийа ԝан ԝе сьст бә. (Бьхунә Мәтта 13:3-6, 20, 21.) Мәсәлә, дьбәкә әԝ мәрьв нә жи дьфькьрьн, кӧ һәрге бьбьнә шагьртед Мәсиһ, ԝе рʹасти чәтьнайа бен (Мәт. 16:24). Йан жи дьбәкә әԝана дьфькьрьн, кӧ һәрге бьбьнә Мәсиһи, проблемед ԝан ԝе тʹӧнә бьн, демәк ԝе бь әʹмьрәки пе кʹәрәмәта у бе чәтьнайи бьжин. Ле әм заньн ԝәки ве дьнйа гӧнәкʹарда проблем ԝе һәбьн. Әʹмьре мәда дькарә тьштәк бе гӧһастьне у әм ԝәʹдәлу шабуна хԝә ӧнда кьн (Зәб. 6:6; Ԝаиз 9:11).

5. Һʹәчʹи зәʹф хушк-бьред мә ча дьдьнә кʹьфше, ԝәки ԝана рʹасти дитийә?

⁵ Һʹәчʹи зәʹф хушк-бьред мә дьдьнә кʹьфше, ԝәки әԝана дӧдьли ниньн, кӧ ԝана рʹасти дитийә. Чьрʹа әм дькарьн ӧса бежьн? Баԝәрийа ԝан сьст набә һәла һе һьнге жи, гава щьватеда кәсәк дьле ԝан дешинә, йан жи хԝә нәщайиз дьдә кʹьфше (Зәб. 119:165). Гава әԝана рʹасти чәтьнайа тен, баԝәрийа ԝан дьһа ԛәԝи дьбә, нә кӧ сьст дьбә (Аԛуб 1:2-4). Ле һун чь дькарьн бькьн, ԝәки баԝәрийа ԝә жи ӧса ԛәԝи бә?

6. Һʹиме баԝәрийа Мәсиһийед ԛьрʹна йәке чь бу?

⁶ Баԝәрийа шагьртед ԛьрʹна йәке, сәр һʹиме занәбуна Ньвисара у һинкьрьнед Иса Мәсиһ бу, кӧ «рʹастийа Мьзгинийе» бу (Галт. 2:5). Рʹасти әԝ һәйә әв һʹәму тьшт, чь кӧ Мәсиһи баԝәр дькьн, ӧса жи избаткьрьнед дәрһәԛа ԛӧрбанбуна Иса у сахкьрьна ԝи. Паԝлосе шанди баԝәр бу, ԝәки әԝ һинкьрьн рʹаст ьн. Ле чьрʹа әԝ баԝәр бу? Чьмки әԝи Ньвисар дьданә хәбате у «ԝанрʹа избат дькьр, кӧ гәрәке Мәсиһ щәфа бькʹьшанда у жь мьрьне рʹабуйа» (Кʹар. Шанд. 17:2, 3). Мәсиһийед ԛьрʹна йәке әԝ һинкьрьн ԛәбул кьрьн у баԝәр дькьрьн, кӧ рʹӧһʹе пироз ԝе али ԝан бькә, ԝәки Хәбәра Хԝәде фәʹм кьн. Бь сайа леколинкьрьне әԝана баԝәр бун, ԝәки әԝ һинкьрьн сәр һʹиме Ньвисара бун (Кʹар. Шанд. 17:11, 12; Ибрн. 5:14). Баԝәрийа ԝан тʹәне сәр һʹиме һәст у емосийед ԝан нибу. Ӧса жи ԝана нә тʹәне бона ԝе йәке Йаһоԝарʹа хьзмәт дькьрьн, кӧ ԝанрʹа һʹәԝас бу тʹәви хушк-бьра бьн. Ле дәԝсе баԝәрийа ԝан сәр һʹиме «занәбуна Хԝәде» бу (Колс. 1:9, 10).

7. Баԝәрийа мә һьндава рʹастийед Кʹьтеба Пироз, чь кʹаре мәрʹа тинә?

⁷ Рʹастийед Хәбәра Хԝәде найенә гӧһастьне (Зәб. 119:160). Мәсәлә, әԝ рʹасти найенә гӧһастьне һәрге хушк йан бьра, мә дьдьнә хәйдандьне йан жи гӧне гьран дькьн. У әԝ ӧса жи найенә гӧһастьне чахе әм рʹасти чәтьнайа тен. Ләма жи әм гәрәке һинкьрьнед Кʹьтеба Пироз рʹьнд бьзаньбьн у баԝәр бьн, ԝәки әԝ һинкьрьн рʹаст ьн. Баԝәрийа мәйә сәр  һʹиме рʹастийед Кʹьтеба Пироз, ԝәʹде чәтьнайа ԝе мә ԛәԝи кә, чаԝа кӧ ләнгәр ԝәʹде фьртоне гәмийе хԝәй дькә. Ча тӧ дькари избат би, ԝәки баԝәрийа тә рʹаст ә?

8. Ча 2 Тимотʹейо 3:14, 15 дьдә кʹьфше, ԝәки Тимотʹейо избат бу ве йәкеда, кӧ рʹастийе занә?

⁸ Тимотʹейо баԝәр бу, кӧ әԝи рʹасти дитийә. Ле әԝ ча ве йәкеда избат бу? (Бьхунә 2 Тимотʹейо 3:14, 15.) Дийа ԝи у пирька ԝи жь зарʹотийе «ньвисаре пироз» ԝирʹа шьровәдькьрьн. Ле бешьк әԝи хԝәха жи ԝәʹдә у ԛәԝат хәрщ дькьр, ԝәки ԝан ньвисара леколин кә. Ахьрийеда Тимотʹейо «избат» бу, кӧ ԝан ньвисарада рʹасти йә. Ԝәʹдә шунда Тимотʹейо, дийа ԝи у пирька ԝи дәрһәԛа һинкьрьнед Мәсиһити пеһʹәсийан. Бешьк, һʹьзкьрьна нава шагьртед Исада гәләк дьле Тимотʹейо гьрт, у әԝи дьхԝәст ԝәʹде хԝә тʹәви хушк-бьред хԝәйә щьватеда дәрбаз кә у али ԝан бькә (Фили. 2:19, 20). Ле баԝәрийа ԝи тʹәне сәр һʹиме ве йәке нибу, ле сәр һʹиме избаткьрьна бу, йед кӧ ԝи незики Йаһоԝа кьрьн. Һун жи гәрәке Кʹьтеба Пироз леколин кьн у избат бьн ве йәкеда, чь кӧ дәрһәԛа Йаһоԝа педьһʹәсьн.

9. Кʹижан се һинкьрьнед сәрәкәда һун гәрәке дӧдьли нәбьн?

⁹ Йа лапә кем, һун гәрәке дӧдьли нәбьн се тьштада. Йа пешьн, һун гәрәке баԝәр бьн, ԝәки Әʹфьрандаре һʹәму тьшти Йаһоԝа йә (Дәркʹ. 3:14, 15; Ибрн. 3:4; Әʹйан. 4:11). Йа дӧда, һун гәрәке избат бьн, кӧ Кʹьтеба Пироз әԝ һәйә ньвисара жь бина бәр Хԝәде, кӧ бона һʹәму мәрьва йә (2 Тимтʹ. 3:16, 17). У йа сьсийа, әм гәрәке баԝәр бьн, кӧ сәр әʹрде щьмәʹта Йаһоԝа һәйә, йа кӧ бьн рʹебәрийа Исада Ԝирʹа хьзмәт дькә, у әԝ щьмәʹт Шәʹдед Йаһоԝа нә (Иша. 43:10-12; Йуһʹн. 14:6; Кʹар. Шанд. 15:14). Сәва кӧ ԝан һинкьрьнед сәрәкәда избат бьн, әʹсәйи нинә һур бь һур Кʹьтеба Пироз бьзаньбьн. Нета ԝә гәрәке әԝ бә, кӧ һʹьш-аԛьле хԝә бьдьнә хәбате, ԝәки дӧдьли нәбьн, кӧ ԝә рʹасти дитийә (Рʹом. 12:1).

10. Чахе әм рʹастийед жь Кʹьтеба Пироз педьһʹәсьн, әм гәрәке чь бькьн?

¹⁰ Чахе һун ван се һинкьрьнед сәрәкәда избат бьн, демәк дәрһәԛа Хԝәде, Кʹьтеба Пироз у щьмәʹта Хԝәде, һун гәрәке бькарьбьн Ньвисаред Пироз бьдьнә хәбате, ԝәки әве йәке мәрьвед дьнрʹа жи шьровәкьн у ԝанрʹа избат кьн кӧ әԝ рʹасти йә. Ле чьрʹа? Чьмки әм чаԝа Мәсиһи, борщдар ьн, ԝәки дәрһәԛа ԝан рʹастийа кʹижан кӧ әм пеһʹәсийанә, мәрьва һин кьн * (1 Тимтʹ. 4:16). Чахе әм мәрьва рʹастийед жь Кʹьтеба Пироз һин дькьн у ԝанрʹа шьровәдькьн, әм хԝәха жи баԝәрийеда дьшьдьн.

11. Паԝлосе шанди ча дәрсдар чь мәсәлә мәрʹа һишт?

¹¹ Чахе Паԝлосе шанди мәрьв һин дькьрьн, әԝи «дәрһәԛа Исада жи бь Ԛануна Муса у ньвисаред пʹехәмбәра әԝ дьданә баԝәркьрьне» (Кʹар. Шанд. 28:23). Әм ча дькарьн чʹәʹв бьдьнә Паԝлос, чахе мәрьва һин дькьн? Әм гәрәке ԝанарʹа нә кӧ тʹәне бежьн, кӧ Кʹьтеба Пирозда чь те готьне, ле һе зедә тьшт бькьн. Демәк гәрәке али ԝан бькьн, кӧ һин бьн хԝәха жи Кʹьтеба Пироз кʹур леколин кьн. Әм дьхԝазьн ԝәки әԝана рʹастийе ԛәбул кьн, нә кӧ жь бо хатьре мә, ле хԝәха избат бьн у фәʹм кьн, ԝәки әԝ һәйә рʹастийа дәрһәԛа Хԝәдейе мәйи һʹьзкьри.

12-13. Де-бав ча дькарьн али зарʹед хԝә бькьн, ԝәки нава рʹастийеда бьминьн?

¹² Де-бавно, бешьк һун дьхԝазьн, ԝәки зарʹед ԝә нава рʹастийеда бьминьн. Дьбәкә һун дьфькьрьн, кӧ һәрге щьватеда һәвалед зарʹед ԝә һәбьн, әԝана ԝе рʹӧһʹанида пешда һәрʹьн. Ле бона ве йәке, ԝанрʹа нә кӧ тʹәне һәвалед баш лазьм ьн, ле диса тьштәки фәрз. Гәрәке һәләԛәтийа ԝанә шәхси тʹәви Йаһоԝа һәбә, у хԝәха баԝәр бьн, ԝәки һинкьрьнед Кʹьтеба Пироз рʹаст ьн.

¹³ Һәрге де-бав дьхԝазьн зарʹед хԝә дәрһәԛа Хԝәде һин кьн, әԝана гәрәке леколинкьрьна Кʹьтеба Пирозда мәсәләкә баш бьн бона ԝан. Әԝана гәрәке ԝәʹдә кʹьфш кьн бона ве йәке, кӧ кʹур бьфькьрьн дәрһәԛа чь жи педьһʹәсьн. Һьнге ԝе бькарьбьн зарʹед хԝә жи һин кьн кӧ ӧса бькьн. Де-бав чаԝа кӧ ԝан мәрьва һин дькьн, тʹәви кʹе һинбуне дәрбаз дькьн, ӧса жи гәрәке зарʹед хԝә һин кьн, кӧ һащәтед сәва һинбуне бьдьнә хәбате. Һәрге де-бав ӧса бькьн, ԝе зарʹед хԝә һин кьн, ԝәки Йаһоԝа у ӧса жи хӧламе амьн, жь кʹижани хԝарьна рʹӧһʹани дьстиньн, ԛимәт кьн (Мәт. 24:45-47). Де-бавно дәрһәԛа «нет-мәрәмед Хԝәдейә кʹур»  зарʹед хԝә һин кьн һаԛас, чьԛас әԝана дькарьн фәʹм кьн. Ӧса һуне али ԝан бькьн, кӧ баԝәрийа ԝан ԛәԝи бә (1 Корн. 2:10).

14. Чьрʹа әм гәрәке пʹехәмбәртийед Кʹьтеба Пироз леколин кьн? (Бьньһерʹә чаргошә « Һун Дькарьн Ԝан Пʹехәмбәртийа Шьровәкьн?»)

¹⁴ Пʹехәмбәртийед Кʹьтеба Пироз гәләк фәрз ьн, сәва баԝәрийа хԝә һьндава Йаһоԝа ԛәԝи кьн. Ле кʹижан пʹехәмбәртийа хут баԝәрийа ԝә ԛәԝи кьрьнә? Дьбәкә һун бежьн пʹехәмбәртийед дәрһәԛа «рʹожед ахьрийе» (2 Тимтʹ. 3:1-5; Мәт. 24:3, 7). Ле кʹижан пʹехәмбәртийед кӧ ида һатьнә сери, дькарьн ԝә ԛәԝи кьн? Мәсәлә, һун дькарьн шьровәкьн кӧ ча пʹехәмбәртийед жь Данийел сәре 2 йан жи сәре 11 ида һатьнә сери, у һʹәта иро жи тенә сери? * Һәрге баԝәрийа ԝә сәр һʹиме Кʹьтеба Пироз бә, әԝ ԝе сьст нәбә. Ԝәрә әм шеԝьр кьн мәсәлед бьред мә, йед кӧ ԝәʹде Шәрʹе Һʹәмдьнйайе II, һатьнә зерандьне. Рʹаст ә әԝана һʹәта хьлазийе пʹехәмбәртийед дәрһәԛа рʹожед ахьрийе фәʹм нәдькьрьн, ле йәкә баԝәрийа ԝан һьндава Хәбәра Хԝәде гәләк ԛәԝи бу.

15-17. Леколинкьрьна Кʹьтеба Пироз ча баԝәрийа хушк-бьред мә ԛәԝи кьр, йед кӧ ԝәʹде Натсиста дьһатьнә зерандьне?

¹⁵ Ԝәʹде һʹӧкӧмтийа Натсиста Алманйайе, бь һʹәзара хушк-бьред мә шандьбун гьртигәһе. Һитлер у Һенрих Һимлер сәрок, Шәʹдед Йаһоԝа гәләк нәфрʹәт дькьрьн. Хушкәкә мә гьли кьрийә, ԝәки Һимлер кʹомәкә хушкед мәрʹа кӧ гьртигәһеда бун, готьбу: «Хԝәдайе ԝә Йаһоԝа дькарә сәр әʹзмана сәрԝертийе бькә, ле вьра сәр әʹрде, әм сәрԝертийе дькьн! Әме бьвиньн кʹе жь мә ԝе сах бьминә, һун йан әм!» Ле чь али щьмәʹта Йаһоԝа кьр, ԝәки амьн бьминьн?

¹⁶ Әԝ хушк-бьра заньбун, ԝәки Пʹадшатийа Хԝәде жь сала 1914 сәрԝертийе дькә. Ләма жи әԝана әʹщебмайи нибун кӧ ӧса дьһатьнә зерандьне. Ле йәкә щьмәʹта  Хԝәде баԝәр бу, ԝәки тʹӧ сәрԝере дьнйайе ԝе нькарьбә тьштәк бькә, кӧ Хԝәде нета хԝә нәйнә сери. Ле Һитлер нькарьбу һʹәбандьна рʹаст кʹӧта кьра, йан жи сәрԝертийа ӧса саз кьра, кʹижан кӧ жь Пʹадшатийа Хԝәде ԛәԝаттьр буйа. Хушк-бьред мә баԝәр бун, ԝәки ахьрийеда сәрԝертийа Һитлер ԝе кʹӧта бә.

¹⁷ Әԝ хушк-бьра баԝәрийа хԝә чь жи дьанин, әԝ рʹасти бу. Чәнд сала шунда сәрԝертийа Натсиста һатә кʹӧтакьрьне. У Һенрих Һимлер, йе кӧ гот, «вьра сәр әʹрде, әм сәрԝертийе дькьн», рʹәви, кӧ әʹмьре хԝә хьлаз кә. Чахе әԝ дьрʹәвийа, әԝ рʹасти бьре мә бь наве Лӧбки һат у ԝи нас кьр, чьмки әԝ бьра ԝәхтәки кәледа бу. Һимлер гәләк мәʹдәкьри бу у жь бьре мә пьрси: «Леколинкʹаре Кʹьтеба Пироз, дә бежә ле ньһа ԝе чь бьԛәԝьмә?» Лӧбки бьра ԝирʹа гот, кӧ Шәʹдед Йаһоԝа тʹьме заньбун, ԝәки сәрԝертийа Натсиста ԝе кʹӧта бә, у әԝана ԝе бенә аза кьрьне. Һимлер пешийа ве йәке гәләк тьштед нәбаш у хьраб дьгот дәрһәԛа Шәʹдед Йаһоԝа, ле һьнге әԝи ида ньзаньбу чь бьгота. Паши ве йәке ԝәʹдә шунда, әԝи хԝә кӧшт. Әм чь дәрсе жь ԝе йәке һин дьбьн? Леколинкьрьна Кʹьтеба Пироз у пʹехәмбәртийед теда, дькарә баԝәрийа мә һьндава Хԝәде гәләк ԛәԝи кә, у ԝәʹде чәтьнайа мә бьшьдинә (2 Пәт. 1:19-21).

18. Чаԝа кӧ Йуһʹәнна 6:67, 68-да те готьне, чьрʹа мәрʹа «занәбун у сәрԝахтийа гьһишти» лазьм ә?

¹⁸ Һәр кәс жь мә гәрәке һʹьзкьрьне бьдә кʹьфше, чьмки әԝ йәк Мәсиһийед рʹаст әʹйан дькә. Ле мәрʹа ӧса жи лазьм ә «занәбун у сәрԝахтийа гьһишти» нав хԝәда зедә кьн (Фили. 1:9). Һәрге әм ӧса нәкьн, әме «бь дәрәԝед мәрьва бәр байе һәр һинкьрьнәке» кʹәвьн (Әфәс. 4:14). Чахе ԛьрʹна йәкеда гәләк шагьрт ида пәй Иса нәдьчун, Пәтрусе шанди бь баԝәрийе гот, кӧ «готьнед жийина һʹәта-һʹәтайе» щәм Иса нә. (Бьхунә Йуһʹәнна 6:67, 68.) Рʹаст ә һьнге Пәтрус бь тʹәмами фәʹм нәдькьр, кӧ әԝ готьнед Иса чь дьһатьнә һʹәсабе, ле йәкә әԝ амьн ма, чьмки әԝи рʹастийа дәрһәԛа Иса фәʹм дькьр. Һун жи дькарьн баԝәрийа хԝә һьндава һинкьрьнед Кʹьтеба Пироз ӧса ԛәԝи кьн. Һун һәрге ӧса бькьн, чь жи бьԛәԝьмә йәкә баԝәрийа ԝә ԝе ԛәԝи бьминә, у һуне али мәрьвед дьн жи бькьн, ԝәки әԝана баԝәрийа хԝә бьшьдиньн (2 Йуһʹн. 1, 2).