1-2. Готьнед Ишайа 65:16, 17 чаԝа дьле мә ԛәԝи дькьн кӧ әм сәбьр бькьн?

САЛА 2017-да, Шәʹдед Йаһоԝа сәр тʹәмамийа дьнйайе щьвинед мәзьн йа бь наве «Ԛәԝи бьн у Сәбьр кьн!» дәрбаз кьрьн. Бәрнама ве щьвине нишан кьр кӧ әм чаԝа дькарьн бәр тәнгасийа сәбьр кьн. Һьнгева чар сал дәрбаз бунә, у әм һе бәр чәтьнайед ве дьнйайе сәбьр дькьн.

² Бәле, чәтьнайед жийине гәләк ьн. Мәсәлә, һьнә кәс сәва мьрьна мәрьв йан һәваләки хԝә хәмгин ьн. Һьнә кәс бәр нәхԝәшикә гьран тәйах дькьн йан жи ида кал у пир бунә. Зӧлми, зордари йан тʹәшԛәлед тʹәбийәте тен сәре гәләк кәса. Ӧса жи, нәхԝәшийед ча COVID-19 сәр тʹәмамийа дьнйайе һʹӧкӧм дькьн. Гәло тӧ һʹьзрәта ԝе рʹоже нини гава һʹәму кӧл-дәрд ԝе һʹәта-һʹәтайе хьлаз бьн? (Ишайа 65:16, 17 бьхунә, ИМ).

3. Гәрәке әм чь бькьн, у чьма?

³ Жийин чьԛас чәтьн бә жи, әм заньн кӧ тәнгасийед дьһа гьран дькарьн бен сәре мә (Мәтта 24:21). Ләма жи, гәләк фәрз ә кӧ әм сәбра хԝә чьԛас дьчә дьһа зедә бькьн. Иса Мәсиһ ӧса готьбу: «Бь сәбьра хԝә һуне рʹӧһʹе хԝә хьлаз кьн» (Луԛа 21:19). Сәва кӧ сәбра мә зедә бьбә, ԝе баш бә кӧ әм биньн бәр чʹәʹве хԝә, ԝәки кәсед дьн чаԝа чәтьнайед мина йед мә сәбьр дькьн.

4. Жь алийе сәбрева, Йаһоԝа чьма мәсәла һәри баш ә?

⁴ Жь алийе сәбрева, мәсәла һәри баш, Йаһоԝа йә. Һәла бьфькьрә: Дьнйа бьн контрола Мире-щьнада йә, у кӧл-дәрд гәләк ьн. Йаһоԝа дькарьбу һʹәму проблем дәрберʹа сафи кьра, ле әԝ сәбьр дькә у һивийа ԝәхта рʹаст ә (Рʹомайи 9:22). Ньһа әме дина хԝә бьдьн 9 тьшта, йед кӧ Йаһоԝа сәбьр дькә.

5. Наве Хԝәде чаԝа те рʹәшкьрьне, у тӧ дәрһәԛа ве йәке чь дьфькьри?

⁵ Беһӧрмәткьрьна наве хԝә. Йаһоԝа наве хԝә һʹьз дькә, у әԝ дьхԝазә кӧ һәр кәс ԛәдре ви нави бьгьрә (Ишайа 42:8). Ле ида 6 000 сал ә кӧ наве ԝи те рʹәшкьрьне (Зәбур 74:10, 18, 23). Әв йәк бахче Еденеда дәстпебу. Ԝе дәме, Мире-щьна (демәк «Бӧхданбеж») гот кӧ Хԝәде тьштед баш жь Адәм у Һеԝайе вәдьшерә (Дәстпебун 3:1-5). Жь ԝе дәмева дәстпебуйи, гәләк кәс дьбежьн кӧ Йаһоԝа жь мәрьва тьштед кӧ ԝанрʹа лазьм ьн вәдьшерә. Ве дәрәԝе дьле Иса гәләк дешанд. Ләма жи, әԝи шагьртед хԝәрʹа гот кӧ әԝана ӧса дӧа бькьн: «Баве мәйи әʹзмана! Наве тә пироз бә» (Мәтта 6:9).

6. Йаһоԝа чьма изьн дайә кӧ һаԛас ԝәхт дәрбаз бьбә һʹәта кӧ пьрса сәрԝертийа ԝи сафи бә?

⁶ Мьԛабьлибуна һьмбәри сәрԝертийа хԝә. Изна Йаһоԝа һәйә кӧ ль сәр әʹрд у әʹзмана һʹӧкӧм бькә, у сәрԝертийа ԝи, сәрԝертийа һәри баш ә (Әʹйанти 4:11). Ле Мире-щьна гәләк мәләк у инсан данә баԝәркьрьн, ԝәки изна Хԝәде тʹӧнә кӧ сәрԝертийе бькә. Сәва кӧ пьрса дәрһәԛа изна сәрԝертийа Йаһоԝа бьһата сафикьрьне, ԝәхт лазьм бу. Ләма, Йаһоԝа мәщал дайә кӧ мәрьв фәʹм бькьн, ԝәки сәрԝертийа мәрьва бе рʹебәрийа ԝи ԝе тʹӧ щар пешдачуйи нибә (Йерәмйа 10:23). Бь сайа сәбра Хԝәде, әв пьрс ԝе бь тʹәмами сафи бә. Һәр кәс ԝе бьзаньбә кӧ тʹәне Пʹадшатийа ԝи дькарә әʹдьлайе у бехофийе бинә сәр әʹрде.

7. Кʹе мьԛабьли Йаһоԝа рʹабуйә, у Йаһоԝа ԝе чь бькә?

⁷ Рʹабәрибуна һьнә зарʹед хԝә. Гава мәләк у инсан һатьн әʹфьрандьн, әԝ кʹамьл у беԛьсур бун. Ле паше, мәләкәк һьмбәри Йаһоԝа дәркʹәт у бу Шәйтʹан (демәк «Мьԛабьл»). Ӧса жи, әԝи инсанед кʹамьл Адәм у Һеԝа дәʹф дан кӧ әԝана жи мьԛабьли Йаһоԝа рʹабьн. Ԝәʹдә шунда, мәләк у мәрьвед дьн жи мьԛабьли Йаһоԝа рʹабун (Щьһуда 6). Паше, һьнә Исраелийа, демәк щьмәʹта ԝийә бьжарти, һʹәбандьна рʹаст һиштьн у дәстпекьрьн сәре хԝә бәр пʹута дайньн (Ишайа 63:8, 10). Ве йәке дьле Йаһоԝа гәләк дешанд. Йаһоԝа һʹәта ньһа сәбьр кьрийә, у әԝе диса бь сәбьр һивийе бьсәкьнә, һʹәта кӧ ԝәхта кʹьфшкьри бе гава әԝ һʹәму дьжмьнед хԝә ԛьрʹ бькә у хьзмәткʹаред хԝә йед амьн жь ве дьнйа хьраб хьлаз кә!

8-9. Дәрһәԛа Йаһоԝа чь дәрәԝ тенә бәлакьрьне, у әм чаԝа дькарьн пьштгьрийа Йаһоԝа бькьн?

⁸ Дәрәԝед Мире-щьна. Гава Мире-щьна хьзмәткʹаре Йаһоԝа Ибо сущдар дькьр, әԝи бь рʹасти дьгот кӧ һʹәму хьзмәткʹаред Йаһоԝа тʹәне бона кʹара хԝә Хԝәдерʹа хьзмәт дькьн (Ибо 1:8-11; 2:3-5). Һʹәта иро жи, Мире-щьна дәрәԝа бәла дькә у бӧхдана давежә сәр хьзмәткʹаред ԝи (Әʹйанти 12:10). Гава әм һьмбәри тәнгасийа сәбьр дькьн у Йаһоԝарʹа амьн дьминьн, чьмки әм ԝи һʹьз дькьн, әм избат дькьн кӧ готьнед Мире-щьна дәрәԝ ьн. Мина Ибо, әме жи сәва сәбра хԝә гәләк кʹәрәма бьстиньн (Аԛуб 5:11).

⁹ Мире-щьна бь дәсте сәрԝеред религи дьбежә кӧ Йаһоԝа берʹәʹм ә у кӧ сәбәбе һʹәму кӧл у дәрда әԝ ә. Һәла һе һьнә кәс дьбежьн жи кӧ гава зарʹ дьмьрьн, әԝ ԛьрара Хԝәде йә, чьмки жерʹа сәр әʹзмана һе зедә мәләк лазьм ьн. Бӧхданәкә чьԛас мәзьн ә! Әм рʹьнд  заньн кӧ гава әм гьран нәхԝәш дькʹәвьн йан гава мәрьвәки мәйи дәлал дьмьрә, әв йәк суще Хԝәде нинә. Әм баԝәр ьн кӧ рʹожәке, Хԝәде ԝе һәр тьшти рʹаст кә. У әм гәрәке дьнйа-әʹламрʹа бежьн кӧ Йаһоԝа чьԛас дьлован у бь һʹьзкьрьн ә. Хԝәде мәрʹа ӧса дьбежә: «Кӧрʹе мьн, сәрԝахт бә у дьле мьн ша кә, кӧ әз бькарьбьм щаба ԛардаред хԝә бьдьм» (Мәтʹәлок 27:11).

10. Зәбур 22:23, 24 дәрһәԛа Йаһоԝа чь дьбежә?

¹⁰ Еш у кӧл-дәрдед хьзмәткʹаред хԝә. Йаһоԝа дьлрʹәʹм ә. Гава әм сәва зерандьн, нәхԝәши йан ԛьсуред хԝә дьнальн, дьле ԝи сәр мә дьшәԝьтә (Зәбур 22:23, 24 бьхунә). Йаһоԝа еш у дәрдед мә дьвинә, у әԝ дьхԝазә мә жь ви һʹали хьлаз кә (Дәркʹәтьн 3:7, 8; Ишайа 63:9 жи бьньһерʹә). Дәмәкә незикда, әв созе Кʹьтеба Пироз ԝе бе сери: «[Хԝәде] жь чʹәʹвед ԝан һʹәму һесьред ԝан паԛьж кә у иди мьрьне тʹӧнәбә, нә шин, нә гьри, нә еш-ешук, чьмки тьштед бәре дәрбаз бун» (Әʹйанти 21:4).

11. Йаһоԝа һьндава хьзмәткʹаред хԝә йед мьри чь тʹәхмин дькә?

¹¹ Бира достед хԝә йед мьри дькә. Йаһоԝа һʹьзрәта хьзмәткʹаред хԝә  йед мьри йә, у әԝ дьхԝазә ԝана диса бьвинә (Ибо 14:15). Мәсәлә, бинә бәр чʹәʹве хԝә кӧ Йаһоԝа чьԛас бира досте хԝә Бьраһим кьрийә (Аԛуб 2:23). Йан жи, бьфькьрә кӧ әԝ чьԛас дьхԝазә хьзмәткʹаре хԝә Муса диса бьвинә, тʹәви кʹижани әԝи «рʹу бь рʹу» хәбәр дьда (Дәркʹәтьн 33:11). Ӧса жи, Хԝәде бешьк гәләк дьхԝазә странед Даԝьд у зәбурбежед дьн диса бьбьһе (Зәбур 104:33). Әв достед Хԝәде ньһа хәԝа мьрьнеда ньн, ле Йаһоԝа әԝана бир нәкьрьнә (Ишайа 49:15). Һʹәму хәйсәт-һʹӧнӧред ԝан һур  бь һур бира ԝида ньн. Ләма жи, Кʹьтеба Пироз дьбежә кӧ «бона ԝи һʹәму жи сах ьн» (Луԛа 20:38). Рʹожәке, Хԝәде ԝе ԝана жь мьрьне рʹакә. Ԝе рʹоже, дәнге дӧайед ԝан ԝе диса бькʹәвә гӧһе ԝи, у дьле ԝи ԝе диса ша бә кӧ әԝана жерʹа хьзмәт кьн. Һәгәр тә жи мәрьвәки хԝәйи незик ӧнда кьрийә, бьра һевийа рʹабуна мьрийа дьле тә рʹьһʹәт бькә у дьлбинийе бьдә тә.

12. Ван рʹожед хьрабда, Йаһоԝа илаһи сәва чь әʹщьз дьбә?

¹² Зӧлми у зордари. Гава рʹабәрибуна бахче Еденеда дәстпебу, Йаһоԝа заньбу ԝәки пешийа кӧ әԝ һʹале дьнйайе рʹаст кә, һʹале дьнйайе ԝе дьһа хьраб бә. Йаһоԝа хьраби, нәһәԛи у зордарийа кӧ дьнйайеда тʹьжә йә, нәфрʹәт дькә. Илаһи дьле Йаһоԝа сәр бәләнгаз, етʹим у жьнәбийа дьшәԝьтә (Зәкәрйа 7:9, 10). Гава хьзмәткʹаред Йаһоԝа тенә зерандьне у дькʹәвьн кәле, Йаһоԝа гәләк әʹщьз дьбә. Баԝәр бә ԝәки әԝ һʹәму кәсед кӧ мина ԝи сәбьр дькьн, һʹьз дькә.

13. Инсанәт ча кʹәтә нава һʹәрʹамийе, у Хԝәде ча сәр ве йәке дьньһерʹә?

¹³ Зедәбуна бенамусийе. Инсан сурәте Хԝәдеда һатьнә әʹфьрандьне, ләма жи әԝана гәрәке чʹәʹв бьдьнә хәйсәт-һʹӧнӧред Йаһоԝа. Ле Мире-щьна һәр тьшти дькә кӧ мәрьва жь рʹе дәрхә, ԝәки әԝана хьрабийе у зьнекʹарийе бькьн. Рʹожед Нӧһда, Йаһоԝа «дит кӧ хьрабийа мәрьва ль сәр әʹрде зедә дьбә», әԝ «бәр хԝә кʹәт кӧ ль сәр әʹрде мәри хӧльԛандийә у гәләки дьлтәнг бу» (Дәстпебун 6:5, 6, 11). Гәло иро һʹале дьнйайе чаԝа йә? Мире-щьна бешьк ша дьбә кӧ зьнекʹари, һомосексуали у һʹәрʹамийед дьн гәләк бәлабуйи нә (Әфәси 4:18, 19). Әԝ илаһи дьхԝазә хьзмәткʹаред Йаһоԝа бькә тʹәлькед хԝә. Дәмәкә незикда, Йаһоԝа ԝе нишан кә ԝәки әԝ һәр щурʹә бенамусийе чьԛас нәфрʹәт дькә.

14. Мәрьв чь тиньн сәре тʹәбийәте?

¹⁴ Хьрабкьрьна тʹәбийәте. Һʹӧкӧмдарийа инсана зьраре дьдә һьм мәрьвед дьн һьм жи тʹәбийәте, йа кӧ Йаһоԝа да мәрьва ԝәки әԝана ле бьбьнә хԝәйи (Ԝаиз 8:9; Дәстпебун 1:28). Һьнә зандар дьбежьн кӧ рʹийе кьред мәрьвада, нава чәнд салада милйонәк зедәтьр щьснед шинкайи у һʹәйԝана дькарьн ӧнда бьн. Бәле, һʹале дьнйайе бь рʹасти жи гәләк хьраб ә! Әм ша нә ԝәки Йаһоԝа соз дайә кӧ ԝе ԛьрʹа ԝан бинә, «йед кӧ дьне хьраб дькьн», у тʹәмамийа әʹрде ԝе бькә щьнәт (Әʹйанти 11:18; Ишайа 35:1).

15-16. Чь дькарә али мә бькә ԝәки әм мина Йаһоԝа сәбьр бькьн? Мәсәле биньн.

¹⁵ Бәле, Баве мәйи әʹзмана бь һʹәзара сала бәр проблемед мәзьн сәбьр дькә (Чаргошә « Йаһоԝа бәр Чь Сәбьр Дькә?» бьньһерʹә). Йаһоԝа дькарьбу зудава ԛьрʹа ве система хьраб бьанийа. Ле жь сәбра ԝи әм гәләк кʹаре дьстиньн. Ве мәсәле бинә бәр чʹәʹве хԝә: Жьнькәкә һʹәмлә педьһʹәсә кӧ зарʹа зьке ԝеда нәхԝәш ә у ԝе паши буйине гәләк бьчәрчьрә у бьмьрә. Де у бав чьԛас бечʹарә нә жи, әԝ ша нә кӧ зарʹ ԝе ԝанрʹа бе буйине. Ле әԝана зарʹа хԝә һʹьз дькьн, ләма жи һазьр ьн кӧ бәр тәнгасийа сәбьр кьн у чьԛас жь дәсте ԝан те жийина зарʹа хԝә хԝәш бькьн.

¹⁶ Мина зарʹа жь ве мәсәле, һʹәму зарʹед Адәм у Һеԝайе ԛьсурдар ьн. Диса жи, Йаһоԝа ԝана һʹьз дькә у бона  ԝана хәм дькә (1 Йуһʹәнна 4:19). Ле Йаһоԝа мина де у баве жь ве мәсәле, бечʹарә  нинә. Әԝи рʹожәк кʹьфш кьрийә кӧ һʹәму кӧл-дәрдед мәрьва кʹокева бьдә һьлдане (Мәтта 24:36). Һәгәр Йаһоԝа мә ӧса ԛайим һʹьз дькә у сәбьр дькә, гәло нә лазьм ә кӧ әм жи сәбьр бькьн?

17. Ль гора Ибрани 12:2, 3, мәсәла Иса чаԝа дькарә али мә бькә кӧ әм сәбра хԝә ӧнда нәкьн?

¹⁷ Йаһоԝа жь алийе сәбрева мәсәла һәри баш ә. Иса чʹәʹв дьда сәбра Баве хԝә. Гава Иса сәр әʹрде бу, әԝи беһӧрмәти, шәрми у мьрьне сәр стуна щәфе, сәбьр кьр (Ибрани 12:2, 3 бьхунә). Сәбра Йаһоԝа бешьк али Иса дькьр кӧ әԝ сәбьр бькә, у сәбра Йаһоԝа дькарә али мә бькә кӧ әм жи сәбьр кьн.

18. 2 Пәтрус 3:9 чаԝа али мә дькә кӧ әм кʹара сәбра Йаһоԝа фәʹм бькьн?

¹⁸ 2 Пәтрус 3:9 бьхунә. Йаһоԝа бона ԛьрʹкьрьна ве система хьраб рʹож кʹьфш кьрийә. Бь сайа сәбра ԝи, бь милйона мәрьвед дьлпʹак һатьнә тʹопкьрьн. Әԝана ша нә кӧ Йаһоԝа сәбьр кьрийә у мәщал дайә ԝан кӧ бенә буйине, ԝи нас бькьн у жийина хԝә бьдьнә дәсте ԝи. Гава бь милйона мәрьв кӧ һʹәта хьлазийе сәбьр кьрьнә бен хьлазкьрьн, һьнге әме бьвиньн ԝәки чьԛас баш бу кӧ Йаһоԝа сәбьр дькьр.

19. Гәрәке әм чь бькьн, у әме чь хәлате бьстиньн?

¹⁹ Йаһоԝа мә һин дькә кӧ чаԝа бь шабуне сәбьр бькьн. Мире-щьна чьԛас еш у дәрд ани жи, йәкә Йаһоԝа шабуна хԝә ӧнда накә, чьмки әԝ «Хԝәдейе хԝәзьли» йә (1 Тимотʹейо 1:11). Әм жи дькарьн бь шабуне сәбьр бькьн һʹәта кӧ Йаһоԝа наве хԝә пироз кә, изна сәрԝертийа хԝә избат кә, хьрабийе кʹокева рʹакә у дәрдед мә кʹӧта кә. Бьра әм сәбра хԝә тʹӧ щара ӧнда нәкьн, ле биньн бира хԝә кӧ Баве мәйи әʹзмана жи сәбьр дькә. Кʹьтеба Пироз ӧса дьбежә: «Хԝәзи ль ԝи мәрьви, кӧ щерʹьбандьнада тәйах дькә, чьмки гава бь щерʹьбандьне рʹуспи дәре, әԝе кʹофийа жийине бьстинә, кʹижан кӧ Хԝәде ԝанрʹа соз дайә, йед кӧ ԝи һʹьз дькьн» (Аԛуб 1:12).