1. Ише бәлакьрьна мьзгине чьма пʹьрʹ фәрз ә?

ИШЕ бәлакьрьна мьзгине пʹьрʹ фәрз ә. Иса Мәсиһ ӧса готьбу: «Ньһа һәрʹьн һʹәму мьләта һин кьн у ԝана . . . бьньхӧминьн» (Мәт. 28:19, 20). Бона кӧ инсан хьлаз бьбьн у жийана һʹәта-һʹәтайе бьстиньн, ньхӧмандьн әʹсәйи ә. Кәсе кӧ дьхԝазә бе ньхӧмандьне гәрәке баԝәрийа хԝә бинә кӧ ԛӧрбанбун у рʹабуна Иса Мәсиһ рʹийа хьлазбуне вәкьрийә. Ләма, Пәтрусе шанди гот кӧ ньхӧмандьн инсана бь сайа рʹабуна Иса Мәсиһ «хьлаз дькә» (1 Пәт. 3:21). Демәк, гава шагьртәки ну те ньхӧмандьне, әԝ дькʹәвә рʹийа хьлазбуне.

2. Ль гора 2 Тимотʹейо 4:1, 2, гәрәке әм чь бькьн?

² Бона кӧ әм мәрьва бькьн шагьртед Иса Мәсиһ, гәрәке әм «һинкьрьнеда» бьбьнә һостә (2 Тимотʹейо 4:1, 2 бьхунә). Гәло чьма? Дь Мәтта 28:19, 20-да, Иса Мәсиһ готьбу кӧ гәрәке әм мәрьва «һин бькьн». Паԝлосе шанди жи ӧса гот: «Һәр гав нава ԝанда бьминә, чьмки бь ви тьһәри те хԝә жи хьлаз ки у ԝан жи, кʹижанед гӧһдарийа тә дькьн». Ләма, ԝи гот: «Һаш жь хԝә у һинкьрьна хԝә һәбә» (1 Тимтʹ. 4:16). Әԝ йәк кӧ һинкьрьн шьхӧле бәлакьрьна мьзгинева гьредайи йә, гәрәке әм бьбьн дәрсдаред һостә.

3. Ве готареда, әме дәрһәԛа чь хәбәр дьн?

³ Ль тʹәмамийа дьнйайе, Шәʹдед Йаһоԝа бь милйона һинбунед Кʹьтеба Пироз дәрбаз дькьн. Ләма, чаԝа готара пешийа веда һатә готьне, әм дьхԝазьн бьзаньбьн кʹа әм чаԝа дькарьн али һе зедә инсана бькьн кӧ әԝана бенә ньхӧмандьне. Ве готареда, әме дина хԝә бьдьн пенщ тьштед дьн, йед кӧ гәрәке әм бькьн ԝәки хԝәндәкʹаред мә бәрбь ньхӧмандьне пешда һәрʹьн.

4. Гава әм һинбуна Кʹьтеба Пироз дәрбаз дькьн, чьма фәрз ә кӧ әм бь зедәйи хәбәр нәдьн? (Бьньһерʹә спартьн.)

⁴ Әм рʹастийа Кʹьтеба Пироз пʹьрʹ һʹьз дькьн. Ләма тʹәльк әв ә кӧ әм бь зедәйи дәрһәԛа тьштед кӧ әм һʹьз дькьн, хәбәр дьн. Ле бәле, әм заньн кӧ гәрәке әԝе кӧ Һинбуна «Бьрща Ԛәрәԝьлийе», Һинбуна Кʹьтеба Пироз йа Щьвате йан һинбуна Кʹьтеба Пироз дәрбаз дькә, бь зедәйи хәбәр нәдә. Һәгәр әм дьхԝазьн кӧ Кʹьтеба Пироз мәрьва һин бькә, гәрәке әм хԝә бьгьрьн. Нә лазьм ә кӧ әм һәр тьште кӧ әм дәрһәԛа рʹез йан тʹемәке заньн, хәбәр дьн * (Йуһʹн. 16:12). Бинә бира хԝә кӧ гава тӧ һати ньхӧмандьне, занина тә чьԛас бу. Фәʹмдари йә, тә ль ԝе дәме дьбәкә тʹәне рʹастийед сәрәкә заньбу (Ибрн. 6:1). Гәләк сал дәрбаз бун һʹәта кӧ тӧ һәр тьшти һин буйи. Ләма, ԝе баш бә кӧ әм хԝәндәкʹара пе информасийа нәһʹәԝщә баргьран нәкьн.

5. (а) Ль гора 1 Тʹесалоники 2:13, әм дьхԝазьн кӧ хԝәндәкʹаред мә чь фәʹм бькьн? (б) Әм чаԝа дькарьн хԝәндәкʹаред хԝә һелан бькьн кӧ әԝ бәʹса тьштед кӧ әԝ һин дьбьн, бькьн?

⁵ Әм дьхԝазьн кӧ хԝәндәкʹаре мә фәʹм бькә кӧ тьштед кӧ әԝ ԝәʹде һинбуне һин дьбә, жь Кʹьтеба Пироз ьн (1 Тʹесалоники 2:13 бьхунә). Әм чаԝа дькарьн бьгьһижьн ве нете? Хԝәндәкʹаре хԝә һелан бькә кӧ әԝ бәʹса тьштед кӧ әԝ һин дьбә, бькә. Дәԝса кӧ тӧ һʹәму рʹеза ԝирʹа зәлал бьки, бежә кӧ бьра әԝ һьнә рʹеза тәрʹа зәлал бькә. Али хԝәндәкʹар бькә ԝәки әԝ бьвинә кӧ готьнед Кʹьтеба Пироз чьма бона ԝи керһати нә. Паши хԝәндьна рʹезәке, бьпьрсә кʹа әԝ ль сәр ве рʹезе чь дьфькьрә (Луԛа 10:25-28). Мәсәлә, пьрсед ӧса бьпьрсә: «Әв рʹез дина тә дькʹьшинә сәр кʹижан һʹӧнӧре Йаһоԝа? Тӧ чаԝа дькари жь ве рʹезе кʹаре бьстини? Гәло фькра ве рʹезе ль тә хԝәш һат?» (Мәтʹлк. 20:5) Тьште һәри фәрз нә әв ә кӧ занәбуна хԝәндәкʹар чьԛас гәләк бә, ле әв ә кӧ әԝ тьштед кӧ әԝ занә чьԛас һʹьз дькә у ван тьшта дь жийана хԝәда чьԛас пек тинә.

6. Ԝе чьма баш бә кӧ әм дәрсдарәки щерʹьбанди тʹәви хԝә бьбьн сәр һинбуна Кʹьтеба Пироз?

⁶ Гава тӧ һинбуна Кʹьтеба Пироз дәрбаз дьки, гәло тӧ мьзгинванед щерʹьбанди щарьна тʹәви хԝә дьби? Мәсәлә, тӧ дькари жь ԝана бьпьрси һәла дәрбазкьрьна тә чаԝа йә у тӧ бь рʹасти изне дьди кӧ Кʹьтеба Пироз дәԝса тә хәбәр бьдә. Һәгәр тӧ дьхԝази бьби дәрсдарәки баш, гәрәке тӧ мьлук би (Кʹаред Шандийа  18:24-26 бьньһерʹә). Ӧса жи, жь мьзгинване щерʹьбанди бьпьрсә кӧ бь дитьна ԝи, хԝәндәкʹар рʹастийе фәʹм дькә йан на. Һәгәр тӧ чәнд һʹәфтийа нькарьби һинбуне дәрбаз бьки, тӧ дькари жь ви мьзгинвани рʹәща бьки кӧ бьра әԝ һинбуне дәрбаз бькә. Бь ви аԝайи, һинбун ԝе бь щурʹәки тʹәрбәт бәрдәԝам бьбә, у хԝәндәкʹар ԝе дьһа баш фәʹм бькә кӧ һинбуна Кʹьтеба Пироз чьԛас фәрз ә. Тʹӧ щара нәфькьрә кӧ хԝәндәкʹар тʹәне пʹара тә йә, у тʹӧ кәсе дьн нькарә һинбуне дәрбаз бькә. Һәртʹьм бьфькьрә кӧ чь ԝе бона хԝәндәкʹар баш бә, ԝәки әԝ рʹийа рʹастийеда пешда һәрʹә.

7. Чь дькарә али хԝәндәкʹар бькә кӧ рʹастийа Кʹьтеба Пироз дьле ԝи бьгьрә?

⁷ Гава тӧ бәʹса рʹастийе дьки, гәләк фәрз ә кӧ хԝәндәкʹар хирәт у баԝәрийа тә бьвинә (1 Тʹеслн. 1:5). Әв йәк ԝе али ԝи бькә кӧ рʹастийа Кʹьтеба Пироз дьле ԝи бьгьрә. Һәгәр дьбә, ԝирʹа бежә кӧ хәбьтандьна принсипед Кʹьтеба Пироз жийана тә чаԝа дьһа баш кьрийә. Бь ви аԝайи, хԝәндәкʹар ԝе фәʹм бькә кӧ рʹебәрийа Кʹьтеба Пироз ԝе ԝирʹа жи кʹаре бинә.

8. Тӧ чаԝа дькари али хԝәндәкʹаре хԝә бьки кӧ әԝ алийе рʹӧһʹанива пешда һәрʹә?

⁸ Һәгәр һьнә проблемед хԝәндәкʹаре тә һәнә, ԝирʹа бәʹса сәрһатийед һьнә мәрьва бькә, йед кӧ рʹасти ԝи щурʹәйи проблема һатьбун у әԝ проблем сафи кьрьнә. Хенщи ве йәке, тӧ дькари мьзгинванәки дьн тʹәви хԝә бьви сәр һинбуне, ԝәки хԝәндәкʹаре тә жь щерʹьбандьна ԝи кʹаре бьстинә. Ӧса жи, ль сәр jw.org, дь рʹеза «Кʹьтеба Пироз Жийина Мәрьва Дьгӧһезә»  * сәрһатийед хԝәш һәнә. Готар у видеойед ӧса дькарьн али хԝәндәкʹаре тә бькьн кӧ әԝ кʹара хәбьтандьна принсипед Кʹьтеба Пироз фәʹм бькә.

9. Тӧ чаԝа дькари хԝәндәкʹаре хԝә һелан бьки кӧ әԝ мәрьв у һәвалед хԝәрʹа бәʹса мьзгине бькә?

⁹ Һәгәр хԝәндәкʹаре тә зәԝьщи йә, жьна ԝи (йан мере ԝе) тʹәглиф бькә кӧ әԝ жи ԝәʹде һинбуне тʹәви ԝә бә. Хԝәндәкʹаре хԝә һелан бькә кӧ әԝ нәфәр у һәвалед хԝәрʹа бәʹса мьзгине бькә (Йуһʹн. 1:40-45). Тӧ чаԝа дькари али хԝәндәкʹаре хԝә бьки кӧ әԝ ве йәке бькә? Мәсәлә, жь ԝи бьпьрсә: «Тәйе  әв рʹасти нәфәред хԝәрʹа чаԝа шьровәкьра?» Йан жи: «Тәйе әв йәк бь аликʹарийа кʹижан рʹезе һәваләки хԝәрʹа избат бькьра?» Бь ви щурʹәйи, тӧ дькари хԝәндәкʹаре хԝә һазьр бьки кӧ рʹожәке әԝ жи бьбә дәрсдар. Паше, гава әԝ һазьр ә, әԝ дькарә бьбә мьзгинванәки нәньхӧманди. Тӧ дькари хԝәндәкʹаре хԝә бьпьрси кʹа һьнә насед ԝи һәнә, йед кӧ бәлки дьхԝазьн һинбуна Кʹьтеба Пироз бьстиньн. Һәгәр кәсед ӧса һәнә, бежә ԝана кӧ әԝ дькарьн һинбуна Кʹьтеба Пироз дәстпекьн у видеойа «Ча Дәрбаз Дьбә Һинбуна Кʹьтеба Пироз?» * нишани ԝан бькә.

10. Ль гора 1 Тʹесалоники 2:7, 8, әм чаԝа дькарьн Паԝлос хԝәрʹа бькьн мәсәлә?

¹⁰ Гәләк фәрз ә кӧ әм жь дьл бькʹәвьнә һʹәйра хԝәндәкʹаред хԝә у ԝана ԝәк хушк у бьред хԝәйә рʹӧһʹани бьвиньн (1 Тʹесалоники 2:7, 8 бьхунә). Бона ԝан бәлки һеса нинә кӧ әԝ һәләԛәтийа хԝә тʹәви һәвалед хԝә йед бәре бьԛәтиньн у жийана хԝә бь тʹәмами бьгӧһериньн, ԝәки әԝ бькарьбьн Йаһоԝарʹа хьзмәт бькьн. Ләма, гәрәке әм али ԝан бькьн кӧ әԝ щьватеда хԝәрʹа һәвалед баш бьвиньн. Лазьм ә кӧ әм нә тʹәне ль дәма һинбуне, ле ль дәмед дьн жи тʹәви ԝан ԝәʹдә дәрбаз бькьн. Ԝе баш бә кӧ әм ль рʹожед дьн жи щарна ԝанрʹа тʹелехьн, смсәке бьшиньн йан сәрики ԝан хьн. Бь ви аԝайи, әԝе фәʹм бькьн кӧ әм бь рʹасти бона ԝан хәм дькьн.

11. Әм чаԝа дькарьн али хԝәндәкʹаред хԝә бькьн кӧ әԝ хԝәрʹа һәвалед ну бьвиньн, у әв йәк чьма фәрз ә?

¹¹ Готьнәкә ӧса һәйә кӧ дьбежә: «Меване йәки, меване гӧндәки». Әм жи дькарьн ӧса бежьн: «Хԝәндәкʹаре йәки, хԝәндәкʹаре щьватәке». Ләма, дәрсдаред щерʹьбанди хԝәндәкʹаред хԝә хушк у бьред дьн жи дьдьн нас кьрьн. Кәсед ӧса дькарьн али хԝәндәкʹара бькьн кӧ әԝ дьһа незики Йаһоԝа бьбьн у мерхасийе бьдьн ԝан. Әм дьхԝазьн кӧ хԝәндәкʹаред мә хԝә ԝәк пʹара щьвате у пʹара малбәта мә йа рʹӧһʹани һʹәсаб кьн у хушк-бьра һʹьз бькьн. Әв йәк ԝе али ԝан бькә кӧ әԝ һәләԛәтийа хԝә тʹәви һәвалед нәбаш бьԛәтиньн, йед кӧ али ԝан накьн кӧ әԝ Йаһоԝа һʹьз бькьн (Мәтʹлк. 13:20). Һьнге, һәгәр һәвалед ԝан йед бәре ԝан бьһельн жи, әԝе хәмгин нәбьн, чьмки әԝе бьзаньбьн кӧ дь тʹәшкиләта Йаһоԝада хԝәрʹа достед баш бьвиньн (Марԛ. 10:29, 30; 1 Пәт. 4:4).

12. Чьма лазьм ә кӧ әм хԝәндәкʹаред хԝәрʹа бәʹса сонда тʹәсмилбуйине у ньхӧмандьне бькьн?

¹² Әм дьхԝазьн кӧ хԝәндәкʹаред мә ахьрийеда бенә ньхӧмандьне у бьбьн шагьртед Иса Мәсиһ. Ләма, гәрәке әм хԝәндәкʹаред хԝәрʹа бәʹса сонда тʹәсмилбуйине у ньхӧмандьне бькьн. Паши кӧ хԝәндәкʹаред мә бь чәнд мәһа һинбуна Кʹьтеба Пироз дәрбаз бунә у илаһи һәгәр әԝ ида тен щьвина, гәрәке әԝана фәʹм бькьн кӧ нета һинбуна Кʹьтеба Пироз әв ә кӧ әԝ бьбьн Шәʹдед Йаһоԝа.

13. Хԝәндәкʹар чаԝа гав бь гав бәрбь ньхӧмандьне дьчә?

¹³ Гав бь гав, хԝәндәкʹарәки дьлпʹак дькарә бона ньхӧмандьне һазьр бьбә. Гава пешьн әв ә кӧ хԝәндәкʹар Йаһоԝа нас бькә, ԝи һʹьз бькә у баԝәрийа хԝә ԝи бинә (Йуһʹн. 3:16; 17:3). Бь ви щурʹәйи, хԝәндәкʹар ԝе һеди-һеди һе незики Йаһоԝа у щьвате бьбә (Ибрн. 10:24, 25; Аԛуб 4:8). Ԝәʹдә шунда, әԝе тʹәрка әʹдәтед хьраб бьдә у гӧнед хԝә тʹобә бькә (Кʹар. Шанд. 3:19). Чьԛас баԝәрийа ԝи ԛәԝи бьбә, һаԛас әԝе бьхԝазә кәсед дьнрʹа рʹастийе гьли кә (2 Корн. 4:13). Паше, әԝе жийана хԝә бьдә дәсте Йаһоԝа у ԝе бе ньхӧмандьне (1 Пәт. 3:21; 4:2). Гава хԝәндәкʹарәк те ньхӧмандьне, һәр кәс гәләк ша дьбә! Гава хԝәндәкʹар һеди-һеди бәрбь ве нете дьчә, пʹайе ԝи бьдә у ԝи һелан бькә, ԝәки әԝ ль сәр рʹийа рʹастийе бьминә у пешда һәрʹә.

14. Әм чаԝа дькарьн фәʹм бькьн кʹа хԝәндәкʹаред мә бь рʹасти пешда дьчьн йан на?

¹⁴ Һʹәта кӧ хԝәндәкʹаред мә һазьр бьн кӧ жийана хԝә бьдьн дәсте Йаһоԝа у бенә ньхӧмандьне, һьлбәт лазьм ә кӧ әм сәбьр бькьн. Диса жи, гәрәке әм зу йан дәрәнг тедәрхьн кʹа әԝ бь рʹасти дьхԝазә Йаһоԝарʹа хьзмәт бькә йан на. Мәсәлә, жь хԝә ӧса бьпьрсә: «Гәло хԝәндәкʹаре мьн жь алийе хԝәда тьштәки дькә кӧ гӧһ бьдә ԛанунед Иса Мәсиһ? Йан жерʹа тʹәне хәбәрдана мьн һʹәԝас ә?»

15. Пешдачуйина хԝәндәкʹарәки чаԝа әʹйан дьбә?

¹⁵ Хԝәндәкʹар чаԝа пешда дьчә? Гәло әԝ дьбежә кӧ әԝ Йаһоԝа һʹьз дькә? Гәло әԝ ԝирʹа дӧа дькә? (Зәб. 116:1, 2) Гәло әԝ жь хԝәндьна Кʹьтеба Пироз шабуне дьстинә? (Зәб. 119:97) Гәло әԝ дьчә һʹәму щьвина? (Зәб. 22:22) Гәло әԝи  жийана хԝә гӧһәрандийә? (Зәб. 119:112) Гәло әԝ малбәт у һәвалед хԝәрʹа бәʹса мьзгине дькә? (Зәб. 9:1) Йа һәри фәрз, гәло әԝ дьхԝазә бьбә Шәʹде Йаһоԝа? (Зәб. 40:8) Һәгәр хԝәндәкʹар ван алийада ԛәт пешда начә, бь нәрми жь ԝи пебьһʹәсә кӧ мәʹни чь йә, у паше ԝирʹа бь ԛәдьр ле рʹастә-рʹаст дәрһәԛа ве проблеме хәбәр дә. *

16. Әм чаԝа дькарьн тедәрхьн кʹа гәрәке әм һинбунәкә Кʹьтеба Пироз бьдьнә сәкьнандьне йан на?

¹⁶ Щар щара бьфькьрә дьбәкә ԝе баш бә кӧ тӧ һинбуне бьди сәкьнандьне. Мәсәлә, һәгәр хԝәндәкʹар бона һинбуне һазьр набә, нахԝазә бе щьвина, тʹәрка хәйсәтед хԝәйә хьраб нәдайә, жь дине ԛәлп дәрнәкʹәтийә, бәлки тӧ бадиһәԝа ԝәʹде хԝә сәр ԝи хәрщ дьки. Һәгәр хԝәндәкʹар ԛимәт накә тьштед кӧ әԝ һин дьбә у нахԝазә хԝә рʹаст бькә, ԛә кʹара бәрдәԝамкьрьна ве һинбуне һәйә?

17. Ль гора 1 Тимотʹейо 4:16, гәрәке һʹәму дәрсдаред Кʹьтеба Пироз чь бькьн?

¹⁷ Гәләк фәрз ә кӧ әм мәрьва бькьн шагьртед Иса Мәсиһ, у әм дьхԝазьн али хԝәндәкʹаред хԝә бькьн кӧ әԝ бәрбь ньхӧмандьне пешда һәрʹьн. Ләма, гәрәке әм изне бьдьн кӧ Кʹьтеба Пироз дәԝса мә хәбәр дә, у гәрәке әм бь хирәт у бь баԝәри һин бькьн. Ӧса жи, гәрәке әм хԝәндәкʹаре хԝә һелан бькьн кӧ әԝ ль щьвате хԝәрʹа һәвала бьвинә. Хенщи ве йәке, гәрәке әм бәʹса сонда тʹәсмилбуйине у ньхӧмандьне бькьн у пешдачуйина хԝәндәкʹар щар щара бьщерʹьбиньн (Чаргошә бь наве « Дәрсдар Гәрәке Чь Бькә?» бьньһерʹә). Әм пʹьрʹ ша нә кӧ дь ви ише фәрзда пʹара мә жи һәйә! Бьра әм чь жь дәсте мә те бькьн кӧ әм һинбунед Кʹьтеба Пироз бь аԝайәки баш дәрбаз бькьн, ԝәки хԝәндәкʹаред мә бәрбь ньхӧмандьне һәрʹьн!