1-2. (а) Һьнә сәрԝеред дәԝләте сәр Шәʹдед Йаһоԝа чаԝа дьньһерʹьн, ле хьзмәткʹаред Хԝәде чь дькьн? (б) Мәрьв чаԝа дькарә нава пәйкʹәтьнада шабуна хԝә ӧнда нәкә? (Шькьле рʹуйе журнале жи шьровәкә.)

 ИРО шьхӧле бәлакьрьна мьзгинийе зедәтьри 30 ԝәлатада йан бь тʹәмами йан жи һьнә тьштада ԛәдәхәкьри йә. Һьнә ԝәлатада хушк-бьред мә кьрьнә кәле. Гәло гӧнед ԝан чь йә? Бь дитьна Йаһоԝа, әԝана ԛә гӧнәкʹар ниньн. Әԝана тʹәне Кʹьтеба Пироз дьхуньн у леколин дькьн, кәсед дьнрʹа бәʹса баԝәрийа хԝә дькьн у тʹәви хушк-бьра дьчьн щьвина. Ӧса жи, әԝана хԝә жь политике дур дьгьрьн. Нава зӧлмийеда, әв хьзмәткʹаред Йаһоԝа ԝирʹа амьн у беԛьсур манә, у әԝана бь ве йәке бәхтәԝар ьн!

² Гава тӧ шькьлед Шәʹдед Йаһоԝайә мерхас дьньһерʹи, йед кӧ нава щерʹьбандьнада амьн манә, гәло дина тә начә сәр ве йәке кӧ әԝана чьԛас ша у сәрбьльнд ьн? Бәле, әԝана бәхтәԝар ьн, чьмки заньн кӧ Йаһоԝа бона амьнийа ԝан жь ԝан рʹази йә (1 Дирок 29:17а). Иса ӧса готьбу: «Хԝәзи ль ԝан, кӧ бона рʹастиԛәдандьне тенә зерандьне, . . . Әшԛ у ша бьн, чьмки һәԛе ԝә ль әʹзмана гәләк ә» (Мәтта 5:10-12).

3. Ль гора Кʹаред Шандийа 4:19, 20, гава пәйкʹәтьн дәстпебун, шандийа чь кьр у чьрʹа?

³ Мина хушк-бьред мәйә иройин, Мәсиһийед ԛьрʹна йәкеда жи рʹасти пәйкʹәтьна дьһатьн, чьмки ԝана мьзгинийа дәрһәԛа Иса бәла дькьр. Һʹакьмед диԝана  бьльнд йа Щьһуйа чәнд щара «тʹәми данә ԝан, кӧ тʹӧ щар бь наве Иса хәбәр нәдьн» (Кʹаред Шандийа 4:18; 5:27, 28, 40). Ле шандийа чь кьр? (Кʹаред Шандийа 4:19, 20 бьхунә) Ԝана заньбу кӧ йе һәри Бьльнд тʹәми дабу ԝан, ԝәки әԝана мьзгинийе бәла кьн у дәрһәԛа Мәсиһ шәʹдәтийе бьдьн (Кʹаред Шандийа 10:42). Ләма жи, Пәтрус у Йуһʹәнна бь мерхаси готьн, кӧ гәрәке әԝана дьһа гӧрʹа Хԝәде бькьн нә кӧ гӧрʹа һʹакьма, у ԝана әшкәрә кьр, ԝәки ԝе тʹәрка бәлакьрьна мьзгинийа дәрһәԛа Иса Мәсиһ нәдьн. Дьбәкә ԝана һʹакьмарʹа ӧса дьгот: «Һун дьфькьрьн, ԝәки тʹәмийед ԝә жь йед Хԝәде бьльндтьр ьн»?

4. Ль гора Кʹаред Шандийа 5:27-29, Мәсиһийед ԛьрʹна йәке чь кьрьн у әм чаԝа дькарьн чʹәʹв бьдьнә ԝан?

⁴ Мина шандийед ԛьрʹна йәкеда, әм жи «гәрәке гӧрʹа Хԝәде бькьн, нә кӧ йа мәрьва» (Кʹаред Шандийа 5:27-29 бьхунә). Паши кӧ шанди һатьн ледане, әԝана жь диԝана бьльнд йа Щьһуйа дәркʹәтьн, у «ша дьбун кӧ бона наве Иса һежайи рʹәзилкьрьне бунә» у диса бәрдәԝам кьрьн хьзмәт кьн (Кʹаред Шандийа 5:40-42).

5. Әм гәрәке щаба кʹижан пьрса бьстиньн?

⁵ Ле һьнә пьрс пешда тен. Чаԝа Мәсиһийа дькарьбун һьм гӧрʹа Хԝәде бькьн, нә кӧ гӧрʹа мәрьва, у һьм жи ве тʹәмийа Кʹьтеба Пироз банийана сери, кӧ дьбежә: «Һәр мәрьвәк бьра гӧрʹа ԝан һʹӧкӧмәтийада бә»? (Рʹомайи 13:1) Әм чаԝа дькарьн һьм гӧһ бьдьн «сәрԝер у һʹӧкӧмәта» у һьм жи ль бәр Хԝәде, йе кӧ Һʹӧкӧмдаре мәйи һәри Бьльнд ә, амьн бьминьн? (Тито 3:1)

6. (а) Ль гора Рʹомайи 13:1, кʹи нә «һʹӧкӧмәт» у әм гәрәке һьндава ԝанда чаԝа бьн? (б) Гәло һʹӧкӧме сәрԝер у политика бесинор ә?

⁶ Рʹомайи 13:1 бьхунә. Кʹьтеба Пироз ӧса дьбежә: «Һәр мәрьвәк бьра гӧрʹа ԝан һʹӧкӧмәтийада бә». Ләма жи Мәсиһи гӧрʹа сәрԝера дькьн.  Сәрԝеред дьнйайе ӧса дькьн кӧ һәр тьшт бь организә бә, ԛануна датиньн у дина хԝә дьдьне, ԝәки мәрьв ль гора ԝан ԛануна бьжин у щарна һәла һе хьзмәткʹаред Йаһоԝа жи дьпарезьн (Әʹйанти 12:16). Ләма жи, мәрʹа тʹәми те дайине кӧ әм хәрщ, сәләф, тьрс у ԛәдьр кӧ әԝана жь мә дьхԝазьн, бьдьн ԝан (Рʹомайи 13:7). Әв һʹӧкӧм Йаһоԝа дайә дәсте сәрԝеред дьнйайе. Иса әв йәк да кʹьфше гава Пилато Понтийо, ԝәлийе Рʹоме, пьрс данә ԝи. Чахе Пилато гот кӧ дәсте ԝида йә кӧ Иса аза кә йан жи бькӧжә, Иса готе: «Һәгәр жь жор тәрʹа нәһата дайине, тʹӧ һʹӧкӧме тә ԝе ль сәр мьн тʹӧнәбуйа» (Йуһʹәнна 19:11). Чаԝа кӧ синоред һʹӧкӧме Пилато һәбун, иро жи синоред һʹӧкӧме һʹәму сәрԝер у политика һәйә.

7. Гәрәке әм кʹәнге гӧһдарийа сәрԝеред дьнйайе нәкьн, у сәрԝер гәрәке чь бьзаньбьн?

⁷ Һʹәта кӧ ԛанунед сәрԝеред дьнйайе мьԛабьли ԛанунед Хԝәде начьн, әм гӧһ дьдьнә ԝан. Ле һәрге әԝана тьштәки кӧ Хԝәде ԛәдәхә дькә, жь мә дәʹԝа кьн, йан жи тьштәки кӧ Хԝәде жь мә дьхԝазә, ԛәдәхә бькьн, әме гӧһдарийа ԝан нәкьн. Мәсәлә, дьбәкә әԝана бьхԝазьн ԝәки һʹәму хорт һәрʹьн әскәрийе. * Йан жи, дьбәкә әԝана ԝәлгәрʹандьна мә йа Кʹьтеба Пироз, әʹдәбйәтед мә, йан жи хьзмәти у щьвинед мә ԛәдәхә бькьн. Һәрге сәрԝер һʹӧкӧме хԝә нә рʹаст дьдьнә хәбате, мәсәлә, зӧлмийе шагьртед Иса Мәсиһ дькьн, әԝана ԝе бәр Хԝәде щаба хԝә бьдьн. Йаһоԝа һәр тьшти дьвинә! (Ԝаиз 5:8)

8. Ортʹа сәрԝеред дьнйайе у Йаһоԝада чь фьрԛи һәйә?

⁸ Чьԛас жи һʹӧкӧме сәрԝеред дьнйайе һәбә, әв йәк найе һʹәсабе кӧ сәрԝеред лапи баш у һәри бьльнд, әԝана нә. Бь рʹасти сәрԝере лапи баш у һәри Бьльнд тʹәк ә, әв һәйә Йаһоԝа Хԝәде. Кʹьтеба Пирозда, Йаһоԝа Хԝәде чар щара те навкьрьне «Йе Бьльнд» (Данийел 7:18, 22, 25, 27).

9. Данийел пʹехәмбәр хәԝн-хәйаледа чь дит?

⁹ Жь хәԝн-хәйала Данийел пʹехәмбәр, бь зәлали те фәʹмкьрьне кӧ Йаһоԝа жь һʹәму сәрԝеред дьн Бьльндтьр ә. Бәри пешьн, Данийел чар щәʹнәԝьред мәзьн дитьн, йед кӧ империйед һʹәмдьнйайе йед бәре у иройин тенә һʹәсабе, демәк Бабилон, Мәдийа-Фарьс, Йунаньстан, Рʹом у Англо-Америка, йа кӧ рʹожа иройин сәрԝертийе дькә (Данийел 7:1-3, 17). Паше, Данийел Йаһоԝа Хԝәде сәр тәхте диԝана әʹзмани рʹуньшти дит (Данийел 7:9, 10). Ԝе баш бә кӧ сәрԝеред дьнйайе, тьштед кӧ Данийел пʹехәмбәр паше дитьн, һьлдьн һʹәсаб.

10. Ль гора Данийел 7:13, 14, 27, Йаһоԝа сәрԝертийа дьнйайе тʹәсмили кʹе дькә, у әв йәк дәрһәԛа Йаһоԝа чь әʹйан дькә?

¹⁰ Данийел 7:13, 14, 27 бьхунә. Хԝәде ԝе һʹӧкӧмәтийе жь сәрԝеред дьнйайе бьстинә у бьдә кәсед дьһа һежа у ԛәԝат. Гәло ԝе бьдә кʹе? «Йәки мина лаԝе мәрьв», демәк Иса Мәсиһ у «пирозед Йе Бьльнд», демәк 144 000 кәсед кӧ ԝе «һәр у һәр» һʹӧкӧм бькьн (Данийел 7:18, ИМ). Әшкәрә йә кӧ Йаһоԝа «Йе Бьльнд» ә, чьмки тʹәне изьна ԝи һәйә тьштәки ӧса бькә.

11. Әв йәк кӧ Йаһоԝа жь мьләта Бьльндтьр ә, жь кʹижан готьнед дьн йед Данийел пʹехәмбәр те кʹьфше?

 ¹¹ Әв хәԝн-хәйала Данийел избат дькә тьштәки кӧ әԝи бәре готьбу. Әԝи готьбу кӧ «Хԝәдайе әʹзмана . . . пʹадшайа дәрдьхә сәр тʹәхт у тинә хԝаре, ИМ». Ӧса жи, әԝи готьбу кӧ ль сәр ԛьраләтийа мьрова Йе кӧ Бьльнд ә сәрԝертийе дажо у ԝе дьдә зьламе кӧ жерʹа дьхԝазә» (Данийел 2:19-21; 4:17). Гәло ԛә ӧса буйә кӧ Йаһоԝа пʹадшаки данийә сәр тʹәхт йан жи жь тʹәхт авитийә? Бәле!

12. Ԝәʹде бәре Йаһоԝа чаԝа пʹадша жь тʹәхт давитьн? (Шькьл бьньһерʹә.)

¹² Йаһоԝа әшкәрә нишан кьрийә кӧ әԝ жь сәрԝеред дьнйайе Бьльндтьр ә. Ԝәрә әм дина хԝә бьдьнә ван се мәсәла: (1) Мьсьреда Фьрәԝьн Исраели хԝәрʹа кьрьбун дил, у әԝи чәнд щара хԝәстьна Муса кӧ ԝана аза кә, инкʹар кьр. Ле Хԝәде щьмәʹта хԝә хԝәй кьр у Фьрәԝьн авитә бәʹра Сор (Дәркʹәтьн 14:26-28; Зәбур 136:15). (2) Пʹадше Бабилоне Бәлшатсар, щәжьнәкә мәзьн дәрбаз кьр у хԝә «ль һьмбәри Хӧдане әʹзмана . . . бьльнд кьр» у дәԝса кӧ пәсьне Йаһоԝа бьдә, пәсьне хӧданед «зив у зерʹ» да (Данийел 5:22, 23). Ле Хԝәде әв мере ԛӧрʹә ньмьз кьр. «Ԝе шәве», Бәлшатсар һатә кӧштьне, у пʹадшатийа ԝи кʹәтә дәсте Мәдийа-Фарьса (Данийел 5:28, 30, 31). (3) Пʹадше Палестинайе Һеродәс Әгрипа I, Аԛубе шанди дабу кӧштьне у паше Пәтрусе шанди авитә кәле, кӧ ԝи жи бькӧжә. Ле Йаһоԝа изьн нәда кӧ Һеродәс нета хԝә бинә сери. «Мьлйакʹәтәки Хӧдан ԝи хьст», у әԝ мьр (Кʹаред Шандийа 12:1-5, 21-23).

13. Ԝәʹде бәре Йаһоԝа чаԝа мьԛабьли кʹомед сәрԝера сәрдькʹәт?

¹³ Хенщи ве йәке, Йаһоԝа нишан кьрийә кӧ әԝ жь һʹәму кʹомед сәрԝера жи бьльндтьр ә. Мәсәлә, әԝи али Исраелийа кьр, ԝәки әԝана ԛьрʹа кʹома жь 31 пʹадшед Кәнани биньн, у пʹаред мәзьн йед Әʹрдед Создайи зәфти хԝә кьн (Йешу 11:4-6, 20; 12:1, 7, 24). Ӧса жи, Йаһоԝа али Исраелийа кьр, кӧ әԝана Бән-һадад у 32 сәрԝеред дьн йед Сурйайе, йед кӧ мьԛабьли  ԝан шәрʹ дькьрьн, бь тʹәмами алт кьн (1 Пʹадшати 20:1, 26-29).

14-15. (а) Нәбукәднәсәр Пʹадша у Дарйус Пʹадша дәрһәԛа сәрԝертийа Йаһоԝа чь готьн? (б) Зәбурбеж дәрһәԛа Йаһоԝа у щьмәʹта ԝи чь гот?

¹⁴ Йаһоԝа гәләк щара избат кьрийә кӧ «Йе Бьльнд», әԝ ә! Чахе пʹадше Бабилоне Нәбукәднәсәр хԝә ԛӧрʹә кьр, пәсьне ԛәԝата хԝә да у сәре хԝә ль бәр мәзьнайа Хԝәде хар нәкьр, Хԝәде ӧса кьр кӧ әԝ һʹьше хԝә ӧнда кә. Ле чахе һʹьше Нәбукәднәсәр һатә сәре ԝи, әԝи «Йе кӧ Бьльнд ә» пироз кьр у ԛәбул кьр кӧ «сәрԝертийа [Йаһоԝа] сәрԝертийа» һʹәта һʹәтайе йә. Ӧса жи, әԝи гот: «Тʹӧ кәсе кӧ . . . жерʹа бежә: ‹Тӧ чь дьки?› тʹӧнәйә» (Данийел 4:30, 33-35, ИМ). Паши кӧ амьнийа Данийел һатә щерʹьбандьне у Йаһоԝа әԝ жь чʹәла шера хьлаз кьр, Дарйус Пʹадша фәрман да, ԝәки һʹәму мәрьв жь «Хԝәдайе Данийел бьтьрсьн у бьләрьзьн. ‹Хԝәдайе Жиндар әԝ ә, Әԝе һәр у һәр һәбә. Ԝе пʹадшатийа ԝи һьлнәшә, Сәрԝертийа ԝи һәр у һәр ә›» (Данийел 6:7-10, 19-22, 26, 27, ИМ).

¹⁵ Кʹьтеба Пироз ӧса дьбежә: «Хԝәзи ль ԝи мьләти, Хԝәдейе кʹижани Хӧдан ә у ль ԝе щьмәʹте, кʹижан бьжарт кьрә ԝаре Хԝә» (Зәбур 33:10, 12). Һәрге ӧса йә, гәло һежа нинә кӧ әм Йаһоԝарʹа амьн бьминьн?

16. Әм баԝәр ьн кӧ ԝәʹде ‹тәнгасийа мәзьн› чь ԝе бьԛәԝьмә у чьрʹа? (Шькьл бьньһерʹә.)

¹⁶ Мә хԝәнд кӧ ԝәʹде бәре, Йаһоԝа чь кьрийә. Гәло әԝе дәмәкә незикда чь бькә? Әм дькарьн баԝәр бьн кӧ ԝәʹде ‹тәнгасийа мәзьн›, әԝе хьзмәткʹаред хԝә йед амьн хьлаз кә (Мәтта 24:21; Данийел 12:1). Гава коалисйа мьләта, бь наве Гог жь Магоге сәр тʹәмамийа дьнйайе һʹьщуми сәр амьнед Йаһоԝа бькә, Йаһоԝа ԝе ԝана алт кә. Һәрге  әв коалисйа жь 193 әндәмед Мьләтед Йәкбуйи бә жи, йәкә әԝана ԝе нькарьбьн мьԛабьли Йе Бьльнд у ордийа ԝийә әʹзмани сәр кәвьн. Йаһоԝа соз дайә: «Әзе хԝә мәзьн бькьм у хԝә пироз бькьм у әзе дь чʹәʹве гәләк нәтәԝәйанда [мьләтада] хԝә бьдьм насин у ԝе бьзаньбьн кӧ, әз Хӧдан ьм!» (Һәзәԛел 38:14-16, 23; Зәбур 46:10).

17. Ль гора Кʹьтеба Пироз, чь ԝе бе сәре пʹадшед дьнйайе у чь һивийа ԝан мәрьва йә, йед кӧ Йаһоԝарʹа амьн ьн?

¹⁷ Гава Гог һʹьщуми сәр хьзмәткʹаред Хԝәде бькә, Йаһоԝа ԝе шәрʹе Һармәгәдонеда «һʹәму пʹадшед дьнйайе» ԛьрʹ кә (Әʹйанти 16:14, 16; 19:19-21). Жь алийе дьнва жи Йаһоԝа «әʹмьре амьнед Хԝә хԝәй дькә» (Зәбур 97:10).

18. Гәләк Мәсиһи һазьр бун чь бькьн у чьрʹа? (Данийел 3:28)

¹⁸ Бь ԛьрʹна, гәләк Мәсиһи азайа хԝә у һәла һе әʹмьре хԝә жи дькьнә бьн хофе, чьмки Йаһоԝа һʹьз дькьн у ԝи ча Сәрԝер ԛәбул дькьн. Мина се хортед Ибрани, йед кӧ сәва амьнийа хԝә Йаһоԝарʹа, жь агьр һатьн хьлазкьрьне, Мәсиһи жи һәр тьшти дькьн ԝәки Йаһоԝарʹа амьн бьминьн (Данийел 3:28 бьхунә).

19. Йаһоԝа ԝе сәр һʹиме чь диԝана хьзмәткʹаред хԝә бькә, у әм гәрәке чь бькьн?

¹⁹ Бь ван готьна, Даԝьд Пʹадша нишан кьр кӧ чьԛас фәрз ә ԝәки әм Йаһоԝарʹа амьн бьминьн у беԛьсуртийа хԝә хԝәй кьн: «Хӧдан сәр мьләтада дьньһерʹә. Хӧдано, Тӧ һәԛийе ль мьн бькә, ль гора ԝе рʹасти у бесущийа мьн» (Зәбур 7:8). Рʹезәкә дьнда жи, Даԝьд ӧса гот: «Һʹәлали у рʹасти бьра мьн хԝәй кьн, чьмки әз бь гӧман һивийа Тә мә» (Зәбур 25:21). Ләма чь жи һәбә, әм дьхԝазьн Йаһоԝарʹа амьн бьминьн! Ви чахи әме жи хԝә мина зәбурбеж тʹәхмин кьн йе кӧ Йаһоԝарʹа гот: «Амьнед Тә бьра әшԛ у ша бьн» (Зәбур 132:9).