Чьԛас кӧ шьхӧле бәлакьрьна мьзгинийе пешда дьчу, һаԛас һʹәԝщәти әʹдәбйәтада һе зедә дьбу. Журнал Бәйтʹәла Бруклинеда дьһатьнә нәшьркьрьн, ле кʹьтеб фирмада дьһатьнә нәшьркьрьне. Чахе фирмәке гәләк мәһа нькарьбу епʹещә кʹьтеб нәшьр кә, бьре Рутерфорд жь Роберт Мартин бьра пьрси, йе кӧ менещере ве кʹархане бу, һәла бь ньһерʹандьна ԝи мәщала ԝан һәйә кӧ әԝана хԝәха кʹьтеба нәшьр кьн, йан на.

Мартин бьра ӧса гот: «Әв фькьрәкә әʹщебмайи бу, чьмки бона ве йәке, ԝе лазьм буйа кӧ мә кʹарханәкә бона нәшьркьрьна кʹьтеба вәкьра». Һьнге бьра, авайикә, Бруклинеда (Конкорд Стрит 18) щик кʹьре гьртьн, у һʹәму мәкʹинәйед лазьм һатьн кʹьрʹине.

Һьнә мәрьв жь бо ве йәке әʹщьз бун. Сәрԝере фирмәки кӧ кʹьтебед мә нәшьр дькьр, һат дина хԝә бьдә кʹархана тʹәзә. Әԝи гот: «Ньһа дәсте ԝәда һʹәму мәкʹинед нәшьркьрьне һәнә, ле һун ньзаньн кӧ ван мәкʹина чаԝа бьдьнә хәбате. Нава шәш мәһада, һуне һәр тьшти хьраб кьн».

Мартин бьра гот: «Готьнед ԝи те бежи логики бун, ле әԝи ньзаньбу кӧ Йаһоԝа тʹәви мә йә». Рʹасти жи Хԝәде али ԝан кьр. Гәләк ԝәхт дәрбаз нәбу, кӧ кʹархана тʹәзә рʹоже 2 000 кʹьтеб дәрдьхьст.

Хенщи ве йәке кӧ хьзмәткʹаред Йаһоԝа хԝәха һьнә кʹьтеб нәшьр дькьрьн, ԝана дәстпекьр радиойе жи бьдьнә хәбате, ԝәки мьзгинийе бәла кьн. Рʹожа Ләʹде 26 Сьбате, сала 1922, паши нивро, бьре Рутерфорд щара пешьн пе радиойе хәбәр да. Әԝи готара бь наве «Бь Милйона Кәсед кӧ Ньһа Дьжин ԝе Тʹӧ Щара  Нәмьрьн» сәр стансйәкә радиойе, Лос Анщелеседа хԝәнд.

Ԝәкә 25 000 мәрьва гӧһ данә ве бәрнаме. Һьнәка нәʹмә ньвисин кӧ бона ве бәрнаме рʹази нә. Йәк жь ван нәʹма, жь мерәки бь наве Ԝилард Ашфорд һат, йе кӧ Калифорнйайеда дьжит. Әԝи пәсьне бьре Рутерфорд да, чьмки готара ԝи гәләк хԝәш бу. Ӧса жи әԝи гот: «Һәрге ԝә әв готар щики незики мә бьхԝәнда жи, әме нькарьбуна бьһатана ԝедәре, чьмки мала мәда се кәсед нәхԝәш һәнә».

Паше бәрнамед дьн жи бь сайа радиойе һатьн дәрбазкьрьн. Чаԝа кӧ журнала Бьрща Ԛәрәԝьлийеда һатьбу готьне, һʹәта хьлазийа сале, «лапи кем 300 000 мәрьва мьзгини бь сайа радиойе бьһистьбу».

Сәва ве йәке, Леколинкʹаред Кʹьтеба Пироз сафи кьрьн, ԝәки Стеитед Аилендеда, незики Бәйтʹәла Бруклине, стансйәкә радиойе ава кьн. Әв стансйа, йа кӧ ча «WBBR» һатә навкьрьне, чәнд сала бона бәлакьрьна мьзгинийа Пʹадшатийе һатә хәбьтандьне.

Журнала «Бьрща Ԛәрәԝьлийеда» йа 15 Һʹәзиране, сала 1922 һатә әʹламкьрьне, кӧ жь 5 Илоне һʹәта 13 Илоне сала 1922, щьвата мәзьн ԝе Сидар Поинтеда бе дәрбазкьрьне. Ләма жи Леколинкʹаред Кʹьтеба Пироз гәләк ша бун, чахе һатьнә Сидар Поинте сәр щьвата мәзьн.

Готара хԝәйә пешьнда, бьре Рутерфорд гӧһдарарʹа ӧса гот: «Әз баԝәр ьм кӧ Хԝәде ԝе . . . щьвата мәзьн кʹәрәм кә у шәʹдәтикә мәзьн бьдә дьнйайе». Сәр ве щьвата мәзьн, готарвана чәнд щара готьн, кӧ шьхӧле бәлакьрьна мьзгинийе гәләк фәрз ә.

Паше, рʹожа Инийе, 8 Илоне, ԝәкә 8 000 гӧһдарван гәләк һивийа готара бьре Рутерфорд бун. Әԝана һивийе бун ԝәки бьре Рутерфорд шьровәкә, кӧ чь те һʹәсабе һʹәрфед «ADV», йед кӧ сәр бәлгед тʹәглифкьрьне ньвиси бун. Гава әԝана рʹуньшти бун, һьнә жь ԝан плаката гӧломәтккьрийә мәзьн дьдит, йа кӧ сәр сенерʹа  дардакьри бу. Бьраки бь наве Артур Клаус, йе кӧ жь Талсайе һатьбу, хԝәрʹа щики гәләк баш дитьбу, ԝәки бькарьбә дәнге готарван рʹьһʹәт бьбьһе. Ԝе дәме, әԝ щики гәләк ԛимәт бу, чьмки һьнге микрофон һе нәдьһатьн хәбьтандьне.

Рʹебәре бәрнаме әʹлам кьр кӧ ԝәʹде готара бьре Рутерфорд, изьн ԝе нәйе дайине ԝәки кәсед кӧ дәрәнг тен, бькʹәвьнә оде, ԝәки гӧһдарванед дьн әʹщьз нәбьн. Сьһʹәта ниве дәһа, бьре Рутерфорд бь ван готьнед Иса Мәсиһ готара хԝә дәстпекьр: «Пʹадшатийа Әʹзмана незик буйә» (Мәтта 4:17). Әԝи зәлал кьр, кӧ мьзгинийа дәрһәԛа ве Пʹадшатийе чаԝа гәрәке бьһата бәлакьрьне: «Иса Мәсиһ хԝәха готьбу кӧ ԝәʹде һазьрбуна ԝи, әԝе шагьртед хԝәйә рʹаст у амьн тʹоп кә».

Артур бьра, йе кӧ ода мәзьнда рʹуньшти бу, ӧса гот: «Мә бь һʹәԝасәкә мәзьн гӧһ дьда һәр готьна ԝи». Ле ньшкева, сәре Артур геж бу, у лазьм бу кӧ әԝ жь оде дәркʹәвә. Артур бе дьл дәркʹәт, чьмки әԝи заньбу кӧ изьн тʹӧнә ԝәки әԝ диса бькʹәвә һӧндӧрʹ.

Чәнд дәԛә шунда, әԝи ида хԝә баш тʹәхмин дькьр. Гава әԝ вәдьгәрʹийа оде, әԝи дәнге чʹәпькед ԛайим бьһист. Әԝ йәк хԝәстьна ԝи һе гӧрʹ кьр, ԝәки гӧһ бьдә бәрнаме! Әԝи сафи кьр, кӧ һәрге лазьм бә, әԝе һьлкʹьшә сәр бане авайе жи ԝәки гӧһ бьдә ве готара хԝәш. Һьнге әԝ 23 сали бу, ләма жи әԝи хԝәрʹа рʹе дит, кӧ ча һьлкʹьшә сәр бан. Пʹәнщәред жоре вәкьри бун, у гава әԝ незики пʹәнщәра бу, әԝ ша бу кӧ дәнг рʹьнд дьһатә бьһистьне.

Хенщи Артур, һьнә һәвалед ԝи жи ԝедәре бун. Йәк жь ԝан, Франк Щонсон бу, әԝи ле пьрси: «Кʹера тәйә туж һәйә»?

Артур щаб да: «Әре, һәйә».

 Франк гот: «Тӧ щаба дӧайед мә йи! Тӧ ве плаката мәзьн дьвини? Әва постер ә, сәр ван мьха гьредайи йә. Рʹьнд гӧһ бьдә Һʹакьм. * Гава әԝ бежә ‹әʹлам бькьн, әʹлам бькьн, әʹлам бькьн›, ван чар бәна жекә».

Ләма жи Артур пе кʹера хԝә тʹәви һәвалед хԝә һивийа әʹламәтийе сәкьни. Гәләк ԝәхт дәрбаз нәбу, кӧ Рутерфорд бьра гьһиштә хьлазийа готара хԝә. Әԝи бь хирәт у бь дәнге бьльнд ӧса гот: «Бона Хԝәде бьбьн Шәʹдед рʹаст у амьн. Һʹәта кӧ Бабилон бь тʹәмами ԝеран бә, нәԝәстьн! Ве мьзгинийе һʹәму щийа бәла кьн. Бьра дьнйа әʹлам бьзаньбә кӧ Йаһоԝа йә Хԝәде, у Иса Мәсиһ Пʹадше пʹадша у Хӧдане хӧдана йә. Әԝа ԝәʹдәки лапи мәхсус ә тʹәрихийеда . Пʹадша ида һʹӧкӧм дькә! Мьзгинванед ԝи һун ьн. Ләма жи дәрһәԛа Пʹадша у Пʹадшатийа ԝи әʹлам бькьн, әʹлам бькьн, әʹлам бькьн»!

Артур у бьред дьн бән жекьрьн, у постер һеди-һеди вәбу. Сәр постере ӧса ньвиси бу: «Пʹадша у Пʹадшатийе әʹлам бькьн». Хәбәра «ADV» ида һатә фәʹмкьрьне: Әв һʹәрф, се һʹәрфед пешьн йа хәбәра Инглизи нә, кӧ те һʹәсабе «әʹламкьрьн».

Щьвата мәзьн Сидар Поинтеда, али хушк-бьра кьр, кӧ әԝана дина хԝә бьдьн шьхӧле бәлакьрьна мьзгинийа Пʹадшатийе, у кәсед хирәт әв шьхӧл бь шабуне дьанинә сери. Пешәнгәки жь Оклаһомайе ӧса ньвиси: «Ве һәремеда, кʹидәре кӧ әм мьзгинийе бәла дькьн, гәләк мәрьв ви щийи дьхәбьтьн, кʹидәре кӧ кʹомьре дәрдьхьн, у һʹәчʹи зәʹф жь ԝан гәләк кʹәсиб ьн». Гәләк щар, гава мәрьв хәбәра жь журнала «Ԛьрʹна Зерʹин» дьбьһистьн, чʹәʹвед ԝан бь һесьра тʹьжә дьбун. Бьре мә гот: «Әм гәләк ша нә кӧ дькарьн бәр дьле ԝанда бен».

Леколинкʹаред Кʹьтеба Пироз рʹастийа ван готьнед Иса Мәсиһ, рʹьнд фәʹм дькьрьн: «Нандьрун гәләк ә, ле пʹалә һьндьк ьн» (Луԛа 10:2). Хьлазийа сале, әԝана дьһа һелан бун кӧ мьзгинийа Пʹадшатийе һәр дәра әʹлам кьн.