1. Кʹәнге ль һьнәка зор те кӧ Йаһоԝарʹа хьзмәт бькьн?

БЬ ДИТЬНА ТӘ, кʹәнге һе зор ә кӧ әм Йаһоԝарʹа хьзмәт бькьн – гава әм дь тәнгасийеда ньн йан гава кӧ жийана мәда ԛәт тәнгаси тʹӧнә? Гава әм рʹасти тәнгасийа тен, әм хԝә дьсперьн Йаһоԝа. Ле һәгәр тәнгасийед мә тʹӧнә, әм чь дькьн? Гәло әм щарьна бир дькьн кӧ хьзмәта Хԝәде чьԛас фәрз ә? Йаһоԝа мьләте Исраелрʹа готьбу кӧ бьра әԝ һаш жь хԝә һәбьн кӧ әԝана шашикә ӧса нәкьн (Ԛан. Дщр. 6:10-12).

2. Аса Пʹадша кʹижан ԝарида мәрʹа бу мәсәлә?

² Аса Пʹадша мәсәләкә баш ә, чьмки әԝи хԝә бь тʹәмами дьспарт Йаһоԝа. Әԝи һьм ԝәхтед зорда һьм жи ԝәхтед аштийеда Йаһоԝарʹа хьзмәт дькьр. Жь щаһьлтийева, «дьле Аса һәр тʹьм бь Хӧданрʹа йәк бу» (1 Пʹадш. 15:14). Әԝи пʹутпарьсти жь ԝәлате Щьһуда рʹакьр у бь ви аԝайи амьнийа хԝә избат кьр. Кʹьтеба Пироз дьбежә кӧ Аса горигәһед пʹутпарьст у щийед бьльнд жь һоле рʹакьрьн у стун у дирәкед пироз шькенандьн (2 Дир. 14:3, 5). Бь сәрда, әԝи пирька хԝә Маака жь пʹадшатийе дәрхьст. Гәло чьма? Чьмки әԝе пьштгьрийа пʹутпарьстийе дькьр (1 Пʹадш. 15:11-13).

3. Ве готареда, әме ль сәр чь хәбәр дьн?

³ Хенщи ве кӧ Аса Пʹадша пʹутпарьсти жь һоле рʹакьр, әԝи пьштгьрийа һʹәбандьна Йаһоԝа дькьр у али щьмәʹта Щьһуда кьр кӧ әԝ вәгәрʹьн бал Йаһоԝа. Бь сайа бәрәкʹәта Йаһоԝа, ль ԝәлате Щьһуда дәмәкә әʹдьлайе дәстпебу. * Дь бьн һʹӧкӧмдарийа Аса Пʹадшада, ԝәлат ԝәкә 10 сал «рʹьһʹәт бу» (2 Дир. 14:1, 4, 6). Ве  готареда, әме бьвиньн кӧ Аса Пʹадша әв дәма аштийе чаԝа бь кʹар ани. Паше, әме бьвиньн кӧ шагьртед Иса йед пешьн дәмәкә аштийе чаԝа бь кʹар ани. Ӧса жи, әме щаба ве пьрсе бьстиньн: Һәгәр һʹәбандьна Йаһоԝарʹа дь ԝәлате мәда сәрбәст ә, әм чаԝа дькарьн ве дәма әʹдьлайе бь билани бьдьнә хәбате?

4. Ль гора 2 Дирок 14:2, 6, 7, Аса Пʹадша дәма аштийе чаԝа бь кʹар ани?

⁴ 2 Дирок 14:2, 6, 7 бьхунә. Аса щьмәʹтерʹа гот ԝәки йе кӧ әʹдьлайи да ԝан, Йаһоԝа йә. Әԝ нәдьфькьри кӧ дәма әʹдьлайе, дәма рʹьһʹәтийе йә, ләма әԝи дәст бь авакьрьна бажар, сур, бьрщ у дәргәһа кьр. Әԝи жь щьмәʹта Щьһударʹа ӧса гот: «Һе ԝәлат ль бәр мә йә». Аса дьхԝәст чь бьгота? Мәʹнийа готьнед Аса Пʹадша әв ә кӧ мьләт аза бу вьрда-ԝеда һәрә у шьхӧле авакьрьне бәрдәԝам бькә, чьмки ль дәрдора ԝан дьжмьн тʹӧнә бу. Ләма Аса щьмәʹтерʹа гот кӧ бьра әԝ ве дәма аштийе рʹьнд бь кʹар биньн.

5. Аса Пʹадша чьма ордийа хԝә һе ԛәԝи кьр?

⁵ Ӧса жи, Аса Пʹадша әв дәма аштийе бь кʹар ани кӧ ордийа хԝә һе ԛәԝи бькә (2 Дир. 14:8). Гәло әв йәк те һʹәсабе кӧ баԝәрийа ԝи сьст бу? На. Аса заньбу кӧ ԝәк пʹадша, йәк жь щабдарийед ԝи әв ә кӧ мьләте хԝә жь бо тәнгасийа һазьр бькә. Аса Пʹадша заньбу кӧ дәма аштийе ԝе рʹожәке хьлаз бьбә, у бь рʹасти жи ӧса бу.

6. Шагьртед Иса йед пешьн дәма аштийе чаԝа бь кʹар ани?

⁶ Ль ԛьрʹна йәке, шагьртед Иса пʹьрʹ зӧлм дьдит, ле бәле щарьна, ԝана рʹожед  рʹьһʹәт жи дьдитьн. Гәло ԝана дь дәма аштийеда чь дькьр? Ван шагьртед амьн мьзгина Пʹадшатийе «бь тьрса Хӧдан» у бе сәкьнандьн бәла дькьр. Кʹьтеба Кʹаред Шандийада те готьне кӧ әԝ «бь тьрса Хӧдан пешва дьчун». Ахьрийеда, шагьртед Иса чьԛас дьчу «зедә дьбун». Әшкәрә йә кӧ Йаһоԝа ише кӧ ԝан дь дәма аштийеда дьани сери, бьбәрәкʹәт дькьр (Кʹар. Шанд. 9:26-31).

7-8. Гава мәщал дькʹәтьн дәсте Паԝлос у шагьртед дьн, ԝана чь дькьр?

⁷ Шагьртед Иса йед пешьн һʹәму мәщал дьда хәбате кӧ мьзгине бәла бькьн. Мәсәлә, гава Паԝлосе шанди ль бажаре Әфәсе бу, әԝи дит кӧ бона бәлакьрьна мьзгине дәрики мәзьн вәбу, у әԝи әв мәщал бь кʹар ани кӧ мьзгине бьдә гәләк мәрьва у ԝана бькә шагьртед Иса (1 Корн. 16:8, 9).

⁸ Дь сала 49 Д.М.-да, ԝәхта кӧ проблема сьнәтбуне сафи бу, Паԝлос у шагьртед дьнрʹа мәщаләкә ну чебу кӧ әԝ мьзгине бәла бькьн (Кʹар. Шанд. 15:23-29). Паши кӧ сафикьрьна кʹома рʹебәрийе щьватарʹа һат әʹлам кьрьн, шагьртед Иса пʹьрʹ хирәт кьр кӧ «хәбәра Хӧдан һин дькьр у даннасин дькьр» (Кʹар. Шанд. 15:30-35). Ахьри чь бу? Кʹьтеба Пироз ӧса дьбежә: «Щьвинед баԝәрмәнда дь баԝәрийеда ԛәԝи дьбун у рʹож бь рʹож һәжмара ԝан зедә дьбу» (Кʹар. Шанд. 16:4, 5, ИМ).

9. Һʹале гәләк ԝәлата чаԝа йә, у ԝе баш бә кӧ әм жь хԝә чь бьпьрсьн?

⁹ Ль гәләк ԝәлата, әм дькарьн мьзгине аза бәла бькьн. Һәгәр дь ԝәлате тәда азайа баԝәрийе һәйә, жь хԝә ӧса бьпьрсә: «Гәло әз ве азайе чаԝа бь кʹар тиньм?» Ль ван рʹожед ахьрийе, тʹәшкиләта Йаһоԝа хәбәра хере ль сәрансәре дьнйайе бәла дькә. Әв иш бь рʹасти жи пʹьрʹ мәзьн ә (Марԛ. 13:10). Бона хьзмәткʹаред Йаһоԝа гәләк мәщал һәнә кӧ ви шьхӧлида аликʹарийе бьдьн.

10. Ль гора 2 Тимотʹейо 4:2, ԝе баш бә кӧ әм чь бькьн?

¹⁰ Гәло тӧ чаԝа дькари ве дәма аштийе бь билани бьди хәбате? (2 Тимотʹейо 4:2 бьхунә). Гәло тӧ йан жи нәфәрәки малбәта тә дькарә һе зедә хьзмәт бькә йан жи бьбә пешәнг? Ньһа ԝәхта тʹопкьрьна мал у мьлкʹ нинә, чьмки әме нькарьбьн ван тьшта хԝәрʹа бьбьн дьнйайа тʹәзә (Мәтʹлк. 11:4; Мәт. 6:31-33; 1 Йуһʹн. 2:15-17).

11. Һьнә мьзгинван чь дькьн кӧ мьзгине бьгьһиньн мәрьва?

¹¹ Иро, гәләк мьзгинван жь бо бәлакьрьна мьзгине зьманәки ну һин дьбьн. Тʹәшкиләта Хԝәде әʹдәбйәта бь гәләк зьмана һазьр дькә кӧ мьзгин бьгьһижә һʹәму мәрьва. Дь сала 2010-да, әʹдәбйәтед мә ԝәкә бь 500 зьмани дьһатьн дәрхьстьн, ле иро, әʹдәбйәтед мә ида зедәтьри 1 000 зьмани тен нәшьр кьрьн!

12. Гава мәрьв мьзгина Пʹадшатийе бь зьмане хԝә дьбьһен, әв йәк ль сәр ԝан чаԝа һʹӧкӧм дькә? Мәсәле бинә.

¹² Гава мәрьв мьзгина Пʹадшатийе бь зьмане хԝә дьбьһен, әв йәк ль сәр ԝан чаԝа һʹӧкӧм дькә? Ль Америкайе, хушкәкә мә чубу щьватәкә мәзьн, йа кӧ бь зьмане Кинйарԝанда дәрбаз дьбу. Әв зьман һәри зедә ль Рԝанда, Уганда у Кʹомара Демократик йа Конго бәлабуйи йә. Паши щьвине, хушка мә ӧса гот: «Әз 17 сал бәре дәрбази Америкайе бум, ле дь ве щьвата мәзьнда, мьн щара пешьн бәрнамә бь зәлали фәʹм кьр».  Әʹйан ә кӧ гава хушка мә бәрнамәйа щьвина мәзьн бь зьмане хԝә бьһист, ве йәке дьле ԝе гьрт. Гәло ль дәрдоре тә мәрьвед кӧ бь зьманәки дьн хәбәр дьдьн, һәнә? Сәва кӧ тӧ мьзгине бьгьһини ԝан, гәло тӧ дькари зьмане ԝан һин би? Әв йәк һьлбәт һеса нинә, ле баԝәр бә кӧ хирәта тә ԝе бе хәлат кьрьн.

13. Ль Русйайе, хушк у бьрайед мә дәма аштийе чаԝа данә хәбате?

¹³ Һьнә хушк у бьред мә нькарьн мьзгине бь сәрбәсти бәла бькьн. Ль һьнә ԝәлата, ише мә жь алийе дәԝләтева һатийә ԛәдәхә кьрьн. Мәсәлә, һʹале Русйайе бинә бәр чʹәʹве хԝә. Хушк у бьрайед мә, йед кӧ ль Русйайе дьжин, бь дәһа сала жь алийе дәԝләта Совйәте зӧлм дьдит, ле дь мәһа Адаре йа сала 1991-да, дәԝләта Русийайе изьн да ише Шәʹдед Йаһоԝа. Ль ԝе дәме, ль Русйайе ԝәкә 16 000 мьзгинван һәбун. 20 сал шунда, һәжмара ԝан жь 160 000 зедәтьр бу. Әшкәрә йә кӧ хушк у бьред мә сәрбәстийа хԝә бь билани дабу хәбате. Ле рʹожәке, дәма әʹдьлайе хьлаз бу. Диса жи, хирәта хушк у бьрайед мә кем нәбуйә. Әԝ чь жь дәсте ԝан те дькьн кӧ хьзмәта хԝә бәрдәԝам бькьн.

14-15. Йаһоԝа чаԝа али Аса Пʹадша кьр?

¹⁴ Дь рʹожед Аса Пʹадшада, ԝәхт һат кӧ әʹдьлайи хьлаз бу. Жь милйонәки зедәтьр әскәред Әтйопйайи һʹьщуми сәр ԝәлате Щьһуда кьр. Фәрмандаре ԝан Зәраһ баԝәр бу кӧ ордийа ԝи ԝе һеса бькарьбә ԝәлате Щьһуда бьн дәст бькә. Ле бәле, Аса Пʹадша баԝәрийа хԝә Йаһоԝа ани. Әԝи ӧса дӧа кьр: «Йа Хӧдан Хԝәдайе мә, аликʹарийе бь мәрʹа бькә! жь бәр кӧ мә хԝә сьпартьнә тә у әм  бь наве тә ль дьжи ве ажаԝәйе [әʹлаләте] дәркʹәтьн» (2 Дир. 14:11).

¹⁵ Рʹаст ә әскәред Әтйопйайи ԝәкә дӧ щара жь әскәред Щьһу зедәтьр бун, ле Аса заньбу кӧ Йаһоԝа дькарә хьзмәткʹаред хԝә бьпарезә. Бь рʹасти жи ӧса бу. Бь аликʹарийа Йаһоԝа, ордийа Әтйопйайи ль һьмбәри ԝан бьн кʹәт (2 Дир. 14:8-13).

16. Әм жь кӧ заньн кӧ рʹожәке, дәма әʹдьлайе ԝе хьлаз бьбә?

¹⁶ Әм һьлбәт ньзаньн кӧ чь ԝе бьԛәԝьмә, ле әм заньн кӧ дәма әʹдьлайе ԝе һʹәта бь һʹәтайе бәрдәԝам нәбә. Иса Мәсиһ жь бәреда готьбу кӧ «һʹәму мьләт» ԝе шагьртед ԝи «нәфрʹәт бькьн» (Мәт. 24:9). Паԝлосе шанди жи готьбу кӧ «һәр кәсе кӧ дьхԝазә йәктийа Мәсиһ Исада бь хԝәденаси бьжи ԝе бе зерандьне» (2 Тимтʹ. 3:12). Мире-щьна гәләк һерс ә, у гәрәке әм нәфькьрьн кӧ һерса ԝи ԝе ль сәр мә һʹӧкӧм нәкә (Әʹйан. 12:12).

17. Дьбә кӧ баԝәрийа мә ԝе чаԝа бе щерʹьбандьн?

¹⁷ Дь дәмәкә незикда, амьнийа мә ԝе бе щерʹьбандьн. Ԝәк Иса Мәсиһ готьбу, «тәнгасикә ӧса мәзьн ԝе бьбә, кӧ жь дәстпебуна дьнйайе һʹәта ньһа мина ԝе нәбуйә» (Мәт. 24:21). Ль ԝе дәме, дьбә кӧ мәрьвед мә ԝе бьбьн дьжмьнед мә у ише мә ԝе бе ԛәдәхә кьрьн (Мәт. 10:35, 36). Гәло әме мина Аса Пʹадша баԝәрийа хԝә бь Йаһоԝа биньн у баԝәр бьн кӧ әԝе мә бьпарезә?

18. Ль гора Ибрани 10:38, 39, чь ԝе али мә бькә кӧ әм бона хьлазбуна дәма аштийе һазьр бьн?

¹⁸ Бь гәләк сала, Йаһоԝа али мә кьрийә кӧ баԝәрийа мә ԛәԝи бә. Бь сайа «хӧламе амьн у сәрԝахт», Йаһоԝа дь ԝәхта рʹастда хԝарьна рʹӧһʹани дьдә мә, ԝәки әм рʹийа рʹастийеда ԛәԝи бьсәкьньн (Мәт. 24:45). Гәрәке әм хирәт бькьн кӧ баԝәрийа мә һьндава бь Йаһоԝа һәр тʹьм сахләм бә (Ибрани 10:38, 39 бьхунә).

19-20. Ль гора 1 Дирок 28:9, ԝе баш бә кӧ әм жь хԝә чь бьпьрсьн, у чьма?

¹⁹ Мина Аса Пʹадша, гәрәке әм ль Йаһоԝа бьгәрʹьн (2 Дир. 14:4; 15:1, 2). Гәло әм чаԝа дькарьн ль Йаһоԝа бьгәрʹьн?  Гава пешьн әв ә кӧ әм ԝи нас бькьн у бенә ньхӧмандьне. Гәрәке әм чь жь дәсте мә те бькьн кӧ һʹьзкьрьна Йаһоԝа дьле хԝәда һе мәзьн бькьн. Сәва кӧ әм фәʹм бькьн кʹа әм бь рʹасти ль Йаһоԝа дьгәрʹьн йан на, ԝе баш бә кӧ әм жь хԝә ӧса бьпьрсьн: «Гәло әз дьчьм һʹәму щьвина?» Ль щьвинед кӧ жь алийе тʹәшкиләта Йаһоԝава тен организә кьрьн, әм һьм һелан дьбьн һьм жи хԝарьна рʹӧһʹани дьстиньн (Мәт. 11:28). Ӧса жи, ԝе баш бә кӧ әм жь хԝә ӧса бьпьрсьн: «Гәло мьн леколина Кʹьтеба Пироз хԝәрʹа кьрийә хәйсәт?» Һәгәр тӧ тʹәви малбәта хԝә дьжийи, гәло тӧ һәр һʹәфтә жь бо ԛӧльхкьрьна тʹәви малбәте ԝәхт вәдьԛәтини? Һәгәр тӧ тʹәне дьжийи, гәло тӧ диса жи жь бо леколине ԝәхт вәдьԛәтини? Ӧса жи, чь дәсте тә те, тӧ бәлакьрьна мьзгинеда дьки?

²⁰ Ԝе чьма баш бә кӧ әм ван пьрса жь хԝә бьпьрсьн? Кʹьтеба Пироз дьбежә кӧ Йаһоԝа һʹьш у дьле мә леколин дькә, ләма гәрәке әм жи ӧса бькьн (1 Дирок 28:9 бьхунә). Һәгәр әм тедәрхьн кӧ гәрәке әм нет, ньһерʹандьн йан фькред хԝә бьгӧһезьн, лазьм ә әм аликʹарийе жь Йаһоԝа бьхԝазьн кӧ әм бькарьбьн ван гӧһастьна бькьн. Гәрәке әм хԝә ньһада бона щерʹьбандьна һазьр бькьн. Бьра тʹӧ тьшт нәбә сәбәб кӧ әм дәма әʹдьлайе бь аԛьлмәнди нәдьн хәбате!