1. Шагьртед Иса әʹлаләтәкә мәзьнрʹа чь готьн?

РʹОЖА Пенщийе Һʹәсабе йа сала 33 Д.М., тьштәки әʹщеб ԛәԝьми. Гәләк мәрьвед жь щурʹә-щурʹә ԝәлат у мьләта бона щәжнәке һатьбун Оршәлиме. Ньшкева, һьнә Щьһуйа дәстпекьр бь зьманед ԝан хәбәр дьн. Тьштед кӧ ԝана дьгот гәләк һʹәԝас бун. Ԝана дьготьнә мәрьва кӧ һәгәр әԝана баԝәрийа хԝә Иса Мәсиһ биньн, әԝе бькарьбьн хьлаз бьн. Ве хәбәре дьле ԝан гьрт, у ԝана пьрси: «Әм чь бькьн?» Пәтрусе шанди ӧса щаб да: «Бьра жь ԝә һәр йәк . . . бе ньхӧмандьне» (Кʹаред Шандийа 2:37, 38).

2. Ве готареда, әме чь шеԝьр кьн? (Бьньһерʹә шькле рʹуйе журнале.)

² Ԝе рʹоже, ԝәкә 3 000 кәс һатьн ньхӧмандьне у бь ве йәке бунә шагьртед Иса Мәсиһ. Шьхӧле бәлакьрьна мьзгине, кӧ Иса дабу шагьртед хԝә, ԝе рʹоже дәстпебу. Әв шьхӧл һʹәта ньһа жи бәрдәԝам дьбә. Әм һьлбәт нькарьн али кәсәки бькьн кӧ әԝ нава чәнд сьһʹәтада бона ньхӧмандьне һазьр бә. Һʹәта кӧ кәсәк бона ньхӧмандьне һазьр бә щарна чәнд мәһ йан жи чәнд сал дәрбаз дьбьн. Һәгәр тӧ тʹәви кәсәки һинбуна Кʹьтеба Пироз дәрбаз дьки, тӧ рʹьнд зани кӧ әв йәк чьԛас ԝәхт у ԛәԝате дьстинә. Ве готареда, әме бьвиньн кӧ әм чаԝа дькарьн али хԝәндәкʹаред Кʹьтеба Пироз бькьн кӧ әԝана бәрбь ньхӧмандьне пешда һәрʹьн.

3. Ль гора Мәтта 28:19, 20, гәрәке хԝәндәкʹаред мә чь бькьн, ԝәки әԝана бәрбь ньхӧмандьне пешда һәрʹьн?

³ Пешийа кӧ хԝәндәкʹарәки Кʹьтеба Пироз бе ньхӧмандьне, гәрәке әԝ тьштед кӧ әԝ жь Кʹьтеба Пироз һин дьбә, пек бинә (Мәтта 28:19, 20 бьхунә). Гава хԝәндәкʹарәк ве йәке дькә, әԝ дьбә мина «мәрьвәки сәрԝахт» жь мәсәла Иса, йе кӧ мала хԝә сәр кевьр чекьр (Мәтта 7:24, 25; Луԛа  6:47, 48). Гәло әм чаԝа дькарьн али хԝәндәкʹаред хԝә бькьн, ԝәки әԝ тьштед кӧ һин дьбьн, пек биньн? Ньһа әме дина хԝә бьдьн се ширәта.

4. Әм чаԝа дькарьн али хԝәндәкʹаред хԝә бькьн кӧ әԝана бәрбь ньхӧмандьнева пешда һәрʹьн (Чаргошә « Али Хԝәндәкʹаре Хԝә Бькә кӧ Әԝ Хԝәрʹа Нета Дайнә у Бьгьһижә Ԝан» бьньһерʹә.)

⁴ Али хԝәндәкʹаре хԝә бькә кӧ әԝ хԝәрʹа нета дайнә. Гәло әв йәк чьма фәрз ә? Мәрьвед кӧ һьлдькʹьшьн чʹийайед гәләк бьльнд һʹәчʹи зәʹф рʹастә-рʹаст нагьһижьн сәре чʹийе, ле хԝәрʹа чәнд нетед бьчʹук датиньн. Бь ве йәке, әԝана гав бь гав дьһа незики сәре чʹийе дьбьн. Мина ве йәке, һәгәр хԝәндәкʹарәки Кʹьтеба Пироз хԝәрʹа һьнә нетед бьчʹук дайнә у бьгьһижә ван, әԝе бьвинә кӧ әԝ дькарә бьгьһижә нета ньхӧмандьне. Пʹара бь наве «Нет» йа кʹьтеба «Ша бә Жийинерʹа Һʹәта-Һʹәтайе!» дькарә али хԝәндәкʹар бькә кӧ әԝ пешда һәрә. Хьлазийа һәр дәрсе, шеԝьр кә кӧ нета нишанкьри чаԝа дәрсева гьредайи йә. Һәгәр тӧ дьфькьри кӧ нетәкә дьн ԝе бона хԝәндәкʹаре тә керһати бә, ве нете ль пʹара «Нетед дьн» бьньвисә. Бь аликʹарийа ве пʹара һинбуне, дәрһәԛа нетед бьчʹук у мәзьн йед хԝәндәкʹаре хԝә, тʹәви ԝи шеԝьр кә.

5. Ль гора Марԛос 10:17-22, Иса мерәки дәԝләмәндрʹа чь гот, у чьрʹа?

⁵ Али хԝәндәкʹаре хԝә бькә кӧ әԝ әʹмьре хԝәда гӧһастьна бькә (Марԛос 10:17-22 бьхунә). Иса заньбу кӧ бона мәрьвәки дәԝләмәнд чьԛас зор ә кӧ һʹәму мал у мьлкʹе хԝә бьфьрошә (Марԛос 10:23). Диса жи, Иса ви мерирʹа гот кӧ бьра әԝ жийина хԝә бьгӧһезә. Гәло чьма? Чьмки Иса ԝи һʹьз дькьр. Щарна, әм бәлки  хԝә паш дьгьрьн у һьнә ширәта надьн хԝәндәкʹаре хԝә, чьмки әм дьфькьрьн кӧ әԝ һе һазьр нинә әʹмьре хԝәда гӧһастьна бькә. Һьлбәт ԝәхт лазьм ә кӧ мәрьв тʹәрка хәйсәт-һʹӧнӧред хԝәйә бәре бьдә у мәрьве ну ль хԝә бькә (Колоси 3:9, 10). Ле тӧ ве  пьрсе чьԛас зу вәки, һаԛас зу хԝәндәкʹаре тә ԝе гӧһастьнед лазьм бькә. Әв йәк кӧ тӧ бәʹса ван тьшта дьки нишан дькә ԝәки тӧ бона хԝәндәкʹаре хԝә хәм дьки (Зәбур 141:5; Мәтʹәлок 27:17).

6. Чьма фәрз ә кӧ әм жь хԝәндәкʹаре хԝә бьпьрсьн һәла әԝ сәр тʹемәке чь дьфькьрә?

⁶ Гәләк фәрз ә кӧ әм щар щара жь хԝәндәкʹар бьпьрсьн һәла әԝ дәрһәԛа тʹемәке чь дьфькьрә. Бь аликʹарийа пьрсед ӧса, тӧ дькари тедәрхи кӧ хԝәндәкʹар чь фәʹм кьрийә у чь баԝәр дькә. Бь ве йәке, ԝе тәрʹа дьһа һеса бә пьрсед кʹур тʹәви ԝи шеԝьр ки. Ль кʹьтеба «Ша бә Жийинерʹа Һʹәта-Һʹәтайе!» гәләк пьрсед ӧса һәнә. Мәсәлә, дәрса 4-да әв пьрс дәрбаз дьбә: «Йаһоԝа чь сәр хԝә тʹәхмин дькә гава тӧ наве ԝи дьди хәбате?» Дәрса 9-да, пьрсәкә ӧса һәйә: «Тӧ дьхԝази дәрһәԛа чь Хԝәдерʹа дӧа бьки?» Сәрида, дьбә кӧ хԝәндәкʹаре тәрʹа һʹәвәки зор бе кӧ щабед пьрсед ӧса бьдә. Һәгәр ӧса бә, ԝе баш бә кӧ тӧ дина ԝи бькʹьшини сәр һьнә рʹеза у сәр шьклед жь кʹьтебе.

7. Әм ча дькарьн сәрһатийед хушк у бьра бьдьнә хәбате?

⁷ Гава хԝәндәкʹар фәʹм дькә кӧ гәрәке әԝ чь бькә, бь аликʹарийа сәрһатийа дьл бьдә ԝи, ԝәки әԝ ван тьшта бькә. Мәсәлә, һәгәр хԝәндәкʹаре тә тʹьме найе щьвина, тӧ дькари видеойа бь наве «Йаһоԝа бона Мьн Хәм Дькьр», йа кӧ ль пʹара «Һе Зедә Пебьһʹәсә» дәрса 14-да һәйә, нишани ԝи бьки. Ль гәләк дәрсед кʹьтеба «Ша бә Жийинерʹа Һʹәта-Һʹәтайе!», сәрһатийед ӧса тӧйе бьвини ль пʹаред «Кʹур Леколин кә» у «Һе Зедә Пебьһʹәсә». * Хԝәндәкʹаре хԝә бәрамбәри кәсед дьн нәкә у нәбежә: «Һәгәр әԝи карьбу, тӧйе жи бькарьби ве йәке бьки!». Бьра хԝәндәкʹар хԝәха бьгьһижә ве фькре. Бона ве йәке, дина хԝәндәкʹар бькʹьшинә сәр һьнә фькред сәрәкә, йед кӧ али мәрьве видеойеда кьр, ԝәки принсипед Кʹьтеба Пироз бьдә хәбате. Мәсәлә, тӧ дькари дина ԝи бькʹьшини сәр рʹезәкә фәрз йан сәр һьнә гавед керһати. Һәгәр дьбә, нишан кә кӧ Йаһоԝа ча али ви кәси кьр.

8. Әм чаԝа дькарьн али хԝәндәкʹаред хԝә бькьн кӧ әԝана Йаһоԝа һʹьз бькьн?

⁸ Али хԝәндәкʹаре хԝә бькә кӧ әԝ Йаһоԝа һʹьз бькә. Гәло чаԝа? Дина хԝәндәкʹар бькʹьшинә сәр һʹӧнӧред Йаһоԝа. Нишани ԝи бькә кӧ Йаһоԝа Хԝәдейе хԝәзьли йә, йе кӧ пьштгьрийа хьзмәткʹаред хԝә дькә (1 Тимотʹейо 1:11; Ибрани 11:6). Ӧса жи, дина хԝәндәкʹар бькʹьшинә сәр  кʹара принсипед Кʹьтеба Пироз у нишани ԝи бькә кӧ Кʹьтеба Пироз һʹьзкьрьна Йаһоԝа чаԝа әʹйан дькә (Ишайа 48:17, 18). Чьԛас зедә хԝәндәкʹар Йаһоԝа һʹьз бькә, әԝе һаԛас һе зедә бьхԝазә жийина хԝә бьгӧһезә (1 Йуһʹәнна 5:3).

9. Ча Марԛос 10:29, 30 нишан дькә, чь дькарә али кәсәки бькә ԝәки әԝ ԛӧрбана бькә у хԝә бона ньхӧмандьне һазьр кә?

⁹ Сәва кӧ хԝәндәкʹаред Кʹьтеба Пироз бәрбь ньхӧмандьнева пешда һәрʹьн, лазьм ә кӧ әԝана һьнә ԛӧрбана бькьн. Мина ви мере дәԝләмәнд йе ль рʹожед Иса Мәсиһ, дьбәкә лазьм бә һьнә хԝәндәкʹаред мә жи алийед тьштед материалида ԛӧрбана бькьн. Мәсәлә, һәгәр хәбата ԝан мьԛабьли принсипед Кʹьтеба Пироз ә, ԝе лазьм бә кӧ әԝана хԝәрʹа хәбатәки дьн бьвиньн. Йан жи, ԝе дьбәкә лазьм бә кӧ әԝана һәләԛәтийа хԝә тʹәви һәвалед хԝә йед бәре бьԛәтиньн, йед кӧ Йаһоԝа һʹьз накьн. Ӧса жи, һьнә мәрьвед хԝәндәкʹаред  мә пьшта хԝә дьдьнә ԝан, чьмки әԝана Шәʹдед Йаһоԝа нәфрʹәт дькьн. Иса заньбу кӧ һьнәкарʹа чәтьн ә ԛӧрбанед ӧса бькьн. Ле әԝи соз дабу ԝәки йед кӧ пәй ԝи дьчьн ԝе бенә кʹәрәмкьрьне у ԝе бьбьн пʹара малбәтәкә рʹӧһʹани (Марԛос 10:29, 30 бьхунә). Гәло тӧ ча дькари али хԝәндәкʹаре хԝә бьки кӧ әԝ ве кʹәрәме бьстинә?

10. Сәрһатийа Мануел чь мә һин дькә?

¹⁰ Тʹәви хԝәндәкʹаре хԝә һәвалтийе бькә. Гәләк фәрз ә кӧ нишани хԝәндәкʹаре хԝә бьки, ԝәки тӧ бона ԝи хәм дьки. Гәло чьма? Бьраки бь наве Мануел, йе кӧ Мәксикеда дьжи, ԝәхта кӧ әԝ һе хԝәндәкʹар бу тинә бира хԝә: «Пешийа һәр дәрсе, дәрсдаре мьн дьпьрси һәла әз чаԝа мә. Әԝи али мьн дькьр кӧ әз хԝә рʹьһʹәт тʹәхмин кьм, у әԝи мәщал дьда ԝәки әз бәʹса тьштед дьн жи бькьм. Әԝи жь дьл бона мьн хәм дькьр».

11. Ԝе чьма баш бә кӧ әм тʹәви хԝәндәкʹаред хԝә ԝәхт дәрбаз кьн?

¹¹ Чаԝа кӧ Иса тʹәви шагьртед хԝә ԝәхт дәрбаз дькьр, тӧ жи тʹәви хԝәндәкʹаре хԝә ԝәхт дәрбаз кә (Йуһʹәнна 3:22). Һәгәр дьбә, хԝәндәкʹаре хԝә гази мала хԝә бькә. Һун дькарьн чайәке вәхԝьн, хԝарьне бьхԝьн йан жи тʹәвайи бәрнамәкә JW Бродкастинге бьньһерʹьн. Илаһи ԝәʹде щәжна, гава әԝ хԝә тʹәне тʹәхмин дькә, аликʹарийа тә гәләк керһати бә. Бьраки жь Угандайе, бь наве Казибԝә ӧса дьбежә: «Хенщи һинбуна Кʹьтеба Пироз, аликʹарийа дәрсдаре мьн жи али мьн кьр кӧ Йаһоԝа баштьр нас бькьм. Мьн дит кӧ Йаһоԝа бь рʹасти жи бона хьзмәткʹаред хԝә хәм дькә у әԝана мәрьвнә бәхтәԝар ьн. Мьн жи дьхԝәст мина ԝан бәхтәԝар бума».

12. Ԝе чьма баш бә кӧ әм щурʹә-щурʹә мьзгинвана тʹәви хԝә бьвьн сәр һинбуна Кʹьтеба Пироз?

¹² Мьзгинванед дьн тʹәви хԝә бьвә сәр һинбуне. Щарна әм дьбәкә дьфькьрьн кӧ ԝе дьһа һеса бә ԝәки әм һинбуне тʹәне дәрбаз кьн йан жи тʹьме тʹәви хушкәке йан бьраки һәрʹьн сәр һинбуне. Дьбәкә әв йәк бь рʹасти жи дьһа һеса йә, ле һәгәр әм щурʹә-щурʹә мьзгинвана тʹәви хԝә бьвьн,  хԝәндәкʹар ԝе дьһа зедә кʹаре бьстинә. Бьре мә Дмитри, йе кӧ Молдовайеда дьжи, ӧса дьбежә: «Һәр мьзгинване кӧ дьһат сәр һинбуна мьн, готьнед Кʹьтеба Пироз алики дьнва мьнрʹа зәлал дькьр. Ве йәке али мьн дькьр ԝәки әз тʹема дьһа баш фәʹм бькьм. Ӧса жи, гава әз щара пешьн чум щьвине, мьн хԝә рʹьһʹәт тʹәхмин дькьр у шәрм нәдькьр, чьмки мьн гәләк хушк у бьра ида нас дькьр».

13. Чьма гәрәке әм али хԝәндәкʹаред хԝә бькьн кӧ әԝана бен щьвина?

¹³ Али хԝәндәкʹаре хԝә бькә кӧ әԝ бе щьвина. Әв йәк фәрз ә, чьмки Йаһоԝа дьхԝазә кӧ хьзмәткʹаред ԝи тʹәви һәв тʹоп бьн. Пʹарәкә фәрз йа һʹәбандьна мә, әԝ һәйә щьвинед мә (Ибрани 10:24, 25). Ӧса жи, хушк у бьред мә малбәта мәйә рʹӧһʹани нә. Гава әм сәр щьвина тʹәви ԝан тʹоп дьбьн, әв мина ве йәке йә кӧ малда хԝарьнәкә хԝәш тʹәвайи бьхԝьн. Гава тӧ хԝәндәкʹаре хԝә һелан дьки бе щьвина, әв йәк ԝе гәләк али ԝи бькә ԝәки әԝ бәрбь ньхӧмандьне пешда һәрʹә. Ле әв йәк бона ԝи дьбәкә һеса нинә. Гәло кʹьтеба «Ша бә Жийинерʹа Һʹәта-Һʹәтайе!» ча дькарә али хԝәндәкʹаре тә бькә кӧ әԝ сәри жь чәтьнайа дәрхә у бе щьвина?

14. Әм ча дькарьн хԝәндәкʹаред хԝә һелан кьн ԝәки әԝана бен щьвина?

¹⁴ Дәрса 10 йа кʹьтеба «Ша бә Жийинерʹа Һʹәта-Һʹәтайе!» дькарә али тә бькә, ԝәки тӧ дьл бьди хԝәндәкʹаре хԝә. Пешийа кӧ әв кʹьтеб һатә дәрхьстьне, әԝ жь алийе чәнд мьзгинванед щерʹьбандива һатьбу щерʹьбандьн, у әԝ дьбежьн кӧ дәрса 10 гәләк али хԝәндәкʹаред ԝан кьр ԝәки әԝана бен щьвина. Һьлбәт гәрәке әм һʹәта дәрса 10 һивийе нибьн кӧ хԝәндәкʹаред хԝә гази щьвина бькьн. Чьԛас зу әм хԝәндәкʹара тʹәглиф бькьн, ԝе һаԛас баш бә. Һьлбәт лазьм ә кӧ әм бир нәкьн ԝәки һʹале һәр кәси жь һәв щӧда йә. Ләма дина хԝә бьдә һʹәԝщед хԝәндәкʹаре хԝә, у бьфькьрә кӧ тӧ ча дькари али ԝи бьки. Һәгәр әԝ дәрберʹа нәйе щьвина, хәмгин нәбә у бь сәбьр ԝи диса у диса тʹәглиф кә.

15. Һьнә тьрсед хԝәндәкʹара чь нә?

¹⁵ Гава тӧ рʹастийе һин дьбуйи, гәло тӧ һʹәвәки дьтьрсийайи кӧ бьби Шәʹде Йаһоԝа? Дьбәкә тә дьгот кӧ тӧйе тʹӧ щар нькарьби мал бь мал хьзмәт бьки? Йан жи, дьбәкә тӧ жь мәрьв у һәвалед хԝә дьтьрсийайи, ԝәки әԝана ԝе мьԛабьли тә рʹабьн? Һәгәр ӧса йә, тӧ бешьк тьрсед хԝәндәкʹаре хԝә рʹьнд фәʹм дьки. Иса жи заньбу кӧ тьрсед мәрьва дькарьн һәбьн. Ле әԝи шагьртед хԝәрʹа гот кӧ бьра әԝана сәва тьрсед хԝә хьзмәтийа хԝә Йаһоԝарʹа нәдьн сәкьнандьн (Мәтта 10:16, 17, 27, 28). Гәло Иса ча али шагьртед хԝә дькьр кӧ әԝана жь тьрсед хԝә аза бьн? Гәло тӧ ча дькари чʹәʹв бьди метода Иса?

16. Әм ча дькарьн хԝәндәкʹаред хԝә һин бькьн кӧ әԝана кәсед дьнрʹа бәʹса мьзгине бькьн?

¹⁶ Тʹьме али хԝәндәкʹаре хԝә бькә кӧ әԝ кәсед дьнрʹа бәʹса мьзгине бькә. Гава Иса Мәсиһ шагьртед хԝә шандьн кӧ әԝ мьзгине бәла кьн, ԝана дьбәкә хәм дькьр кӧ ве йәке ча бькьн. Ле Иса ԝанрʹа бь зәлали гот кӧ гәрәке әԝана мьзгине кʹидәре бәла бькьн у чь бежьн (Мәтта 10:5-7). Тӧ ча дькари чʹәʹв бьди Иса? Али хԝәндәкʹар бькә кӧ әԝ тедәрхә, ԝәки әԝ кʹидәре дькарә мьзгине бәла кә. Мәсәлә, бьпьрсә дьбәкә әԝ кәсәки нас дькә, йе кӧ ԝе бьхԝазә дәрһәԛа тʹемәке жь Кʹьтеба Пироз пебьһʹәсә. Паше, али ԝи бькә ԝәки әԝ хԝә һазьр бькә у бьзаньбә кӧ чаԝа ве тʹеме бь щурʹәки һеса зәлал бькә. Һәгәр дьбә, тӧ дькари ван пʹаред «Һьнә Мәрьв Дьбежьн» у «Дьбәкә Һьнә Мәрьв Пьрсәкә Ӧса Бьдьн», йед жь кʹьтеба «Ша бә Жийинерʹа Һʹәта-Һʹәтайе!», бьди хәбате ԝәки  ԝи һазьр ки. Али хԝәндәкʹар бькә ԝәки әԝ бь сайа Кʹьтеба Пироз щабед һеса бьдә у бь мәʹрифәти хәбәр дә.

17. Әм ча дькарьн бь сайа Мәтта 10:19, 20, 29-31 али хԝәндәкʹаред хԝә бькьн кӧ әԝана итʹбарийа хԝә Йаһоԝа биньн?

¹⁷ Али хԝәндәкʹаре хԝә бькә кӧ әԝ итʹбарийа хԝә Йаһоԝа бинә. Иса Мәсиһ шагьртед хԝәрʹа гот кӧ Йаһоԝа ԝе али ԝан бькә, чьмки әԝ ԝана һʹьз дькә (Мәтта 10:19, 20, 29-31 бьхунә). Бинә бира хԝәндәкʹаре хԝә кӧ Йаһоԝа ԝе али ԝи жи бькә. Сәва кӧ әԝ хԝә бьсперә Йаһоԝа, тʹәви ԝи дәрһәԛа нетед ԝи дӧа бькә. Бьраки бь наве Франческ, йе кӧ ль Полонйайе дьжи, ӧса дьбежә: «Дәрсдаре мьн гәләк щар дӧайед хԝәда бәʹса нетед мьн дькьр. Гава мьн дьдит кӧ Йаһоԝа ча щаба дӧайед дәрсдаре мьн дьдә, мьн жи дәстпекьр дӧа бькьм. Мьн хәбата тʹәзә дәстпекьрьбу, у һәр щара гава мьн жь мәзьне хәбате хԝә изьн дьхԝәст ԝәки һәрʹьм щьвина у щьватед мәзьн, мьн аликʹарийа Йаһоԝа дьдит».

18. Йаһоԝа шьхӧле кӧ әм дькьн, чаԝа дьвинә?

¹⁸ Йаһоԝа бона хԝәндәкʹаред мә хәм дькә. Гава әм али мәрьва дькьн кӧ әԝана дьһа незики ԝи бьн, әԝ хирәта мә ԛимәт дькә (Ишайа 52:7). Һәгәр хԝәндәкʹаре тә тʹӧнә бә жи, тӧ дькари тʹәви мьзгинванед дьн һәрʹи сәр һинбунед ԝан у али хԝәндәкʹаред ԝан бьки, ԝәки әԝана бәрбь ньхӧмандьне пешда һәрʹьн.