1-2. Әм чаԝа дькарьн ширәта жь Мәтʹәлок 4:25 пек биньн?

ВАН мәсәла бинә бәр чʹәʹве хԝә: Хушкәкә әʹмьрда мәзьн рʹожед хԝәш тинә бира хԝә. Жийана ԝе ньһа һе зор ә, ле әԝ диса жи бь дьл у щан Йаһоԝарʹа хьзмәт дькә (1 Корн. 15:58). Әԝ һәр рʹож дьдә бәр чʹәʹве хԝә кӧ жийина дьнйа тʹәзәда ԝе чьԛас хԝәш бә. Хушкәкә дьн тинә бира хԝә кӧ хушкәкә жь щьвата ԝе дьле ԝе чаԝа ешандьбу, ле әԝ сафи дькә кӧ һерса хԝә бәрʹдә (Колс. 3:13). Бьрак шашийед хԝә йед бәре бир нәкьрийә, ле ньһа әԝ сәр хԝә дьхәбьтә у һәр тьшти дькә ԝәки амьн бьминә (Зәб. 51:10).

² Әв се мәсәлә чаԝа һәвва гьредайи нә? Һәрсека жи бир нәкьрийә кӧ дь рʹожед бәреда чь ԛәԝьмибу. Диса жи, әԝ рʹастә-рʹаст ль пешийа хԝә дьньһерʹьн, у һʹьше ԝан ль сәр тьштед бәре наминә (Мәтʹәлок 4:25 бьхунә).

3. Чьма фәрз ә кӧ чʹәʹве мә рʹастә-рʹаст бьньһерʹьн?

³ Чьма фәрз ә кӧ чʹәʹве мә рʹастә-рʹаст бьньһерʹьн? Мәрьвәки кӧ һәртʹьм ль паш дьньһерʹә нькарә рʹастә-рʹаст рʹе һәрʹә. Мина ве йәке, һәгәр әм һәртʹьм дәрһәԛа рʹожед бәре бьфькьрьн, әме нькарьбьн дь хьзмәта Йаһоԝада пешда һәрʹьн (Луԛа 9:62).

4. Ве готареда, әме дәрһәԛа чь хәбәр бьдьн?

⁴ Ве готареда, әме дәрһәԛа се тʹәлька хәбәр дьн, йед кӧ дькарьн бьбьн сәбәб кӧ әм бь зедәйи дәрһәԛа рʹожед бәре бьфькьрьн: (1) Носталжи, (2)  һерсбун у (3) хԝәсущдаркьрьн. Әме бьвиньн кӧ принсипед Кʹьтеба Пироз чаԝа дькарьн али мә бькьн кӧ әм бь зедәйи ль сәр «тьштед пьшт хԝәва һьшти» нәфькьрьн, ле пешийа хԝә бьньһерʹьн (Фили. 3:13).

5. Ԝаиз 7:10 бәʹса кʹижан тʹәльке дькә?

⁵ Ԝаиз 7:10 бьхунә. Дина хԝә бьдә кӧ әв рʹез набежә кӧ гәрәке әм нәпьрсьн: «Чьма рʹожед бәре баш бун?» Бь әʹсле хԝә, биранинед хԝәш пʹешкʹешәкә жь Йаһоԝа нә. Ле бәле, рʹез ӧса дьбежә: «Нәпьрсә ‹Чьма рʹожед бәре жь йед ньһа четьр бун?›» Демәк тʹәльк әв ә кӧ әм һʹале хԝәйи бәре бәрамбәри һʹале хԝәйи ньһа бькьн у бьфькьрьн кӧ ньһа, һәр тьшт дьһа хьраб ә.

6. Гәрәке әм чьма нәфькьрьн кӧ жийана мәйә бәре четьр бу?

⁶ Гәрәке әм чьма нәфькьрьн кӧ рʹожед бәре «четьр бун»? Носталжи дькарә бьбә сәбәб кӧ әм тʹәне тьштед хԝәш биньн бира хԝә. Гава әм дькʹәвьн носталжийе, зәʹмәтед кӧ мә бәре кʹьшандьбун дькарьн дь чʹәʹве мәда бьчʹук хӧйа бькьн. Паши кӧ Исраели жь ԝәлате Мьсре дәркʹәтьн, әԝ кʹәтьн ве тʹәльке. Ԝана зу бир кьр кӧ жийана ль Мьсре чьԛас зор бу. Ԝана тʹәне дина хԝә да хԝарьнед хԝәш, йед кӧ ль ԝедәре һәбун. Ԝана гот: «Те бира мә әԝ мәʹсийед Мьсьреда кӧ мә бе һәԛ дьхԝарьн. Ӧса жи хийар, зәвәш, пивазок, пиваз у сир» (Жьмар 11:5). Гәло ԝана бәре бь рʹасти «бе һәԛ» хԝарьн дьхԝар? На! Ԝи чахи, әԝ ль Мьсре хӧлам бун (Дәркʹ. 1:13, 14; 3:6-9). Бәле, ԝана зәʹмәтед хӧламтийе бир кьр, у бира рʹожед бәре дькьр. Дәԝса кӧ әԝ дина хԝә бьдана кʹәрәмед кӧ ԝана жь Йаһоԝа дьстандьн, ԝана дина хԝә дьда рʹожед бәре (Жьмар 11:10).

7. Чь али хушкәке кьр кӧ әԝ хԝә жь тʹәлька носталжийе дур бьгьрә?

⁷ Әм чаԝа дькарьн хԝә жь тʹәлька носталжийе бьпарезьн? Ве сәрһатийе бинә бәр чʹәʹве хԝә: Хушкәке дь сала 1945-да хьзмәта ль Бәйтʹәла Бруклине дәстпекьрьбу. Чәнд сал шунда, әԝе Бәйтʹәлванәк станд, у ԝана бь гәләк сала тʹәвайи ль Бәйтʹәле хьзмәт кьр. Ле бәле, ль салед 1970, мере ԝе гьран нәхԝәш кʹәт. Гава әԝ ль бәр мьрьне бу,  әԝи жьна хԝәрʹа ширәтәкә баш да. Әԝи гот: «Зәԝаща мә бәхтәԝар бу. Гәләк инсан тʹӧ щара һаԛас бәхтәԝар набьн». Ӧса жи, әԝи гот: «Биранинед тә ԝе һьлбәт ӧнда нәбьн. Диса жи, һәртʹьм ль сәр рʹожед бәре нәфькьрә. Ԝәхт ԝе бьрина тә ԛәнщ бькә. Бьһерс нәбә у бь зедәйи хәмгин нәбә. Ша бә кӧ тә әв дьлхԝәши у кʹәрәм стандьнә. Биранинед мә пʹешкʹешәкә жь Хԝәде нә». Һьлбәт тӧ жи ԛайил и кӧ әв ширәтәкә баш ә.

8. Хушка мә чаԝа кʹар станд, кӧ әԝе бь зедәйи дина хԝә нәдьда рʹожед бәре?

⁸ Хушка мә әв ширәт дь дьле хԝәда хԝәй кьр. Әԝе 92 сал әʹмьр кьр у һʹәта мьрьне бь амьни Йаһоԝарʹа хьзмәт кьр. Чәнд сал пешийа мьрьна хԝә, әԝе ӧса гот: «Гава әз ль ван 63 сала дьньһерʹьм, йед кӧ мьн дь хьзмәта һәртʹьмда дәрбаз кьрьнә, әз дькарьм бежьм кӧ жийина мьн бь рʹасти жи гәләк хԝәш бу». Гәло чьма? Әԝе гот: «Тьште кӧ жийина мә бь рʹасти хԝәш дькә әв ә, кӧ бьратийа мәйә мәхсус һәйә у һевийа мә һәйә кӧ әме тʹәви хушк у бьра дь щьнәта ль сәр әʹрде бьжин у һʹәта-һʹәтайе жь Әʹфьрандаре Мәзьн у Хԝәдайе рʹаст Йаһоԝарʹа хьзмәт бькьн». * Хушка мә бь рʹасти жи рʹастә-рʹаст дина хԝә дьда пешийа хԝә. Чь мәсәләкә баш ә!

9. Ԝәк Ԛануна Кʹаһинтийе 19:18 нишан дькә, щарьна бәлки чьма ль мә зор те кӧ әм һерса хԝә бәрʹдьн?

⁹ Ԛануна Кʹаһинтийе 19:18 бьхунә. Гава дост йан мәрьвәки мә, йан жи кәсәки жь щьвате дьле мә дьешинә, щарьна ль мә зор те кӧ әм һерса хԝә бәрʹдьн. Мәсәлә, хушкәкә жь щьвате хушкәкә дьн нәһәԛ кьрьбу кӧ әԝе пʹәре ԝе дьзийә. Паше, хушка кӧ әԝ сущдар кьрьбу жь ԝе бахшандьн хԝәст, ле хушка сущдаркьри нькарьбу нәһәԛийа кӧ  һат сәре ԝе бир бькә. Гәло тьштәки ӧса ԛәт һатийә сәре тә? Бәлки тʹӧ жи щарьна һерс дькʹәви у дьфькьри кӧ тӧйе тʹӧ щара нькарьби һерса хԝә бәрʹди.

10. Гава әм һерс дькʹәвьн, чь дькарә али мә бькә?

¹⁰ Гава әм һерс дькʹәвьн, чь дькарә али мә бькә? Йа йәке, гәрәке әм бир нәкьн кӧ Йаһоԝа һәр тьшти дьвинә. Гава әм рʹасти тәнгасийе йан нәһәԛийе тен, әԝ ве йәке дьвинә (Ибрн. 4:13). Гава әм еше дькʹьшиньн, әԝ әʹщьз дьбә (Иша. 63:9). Бь сәрда, әԝи соз дайә кӧ рʹожәке, әԝе һʹәму тьштед кӧ жь бо нәһәԛийе тенә сәре мә, ԝе кʹокева рʹакә (Әʹйан. 21:3, 4).

11. Чьма бона мә ԝе кʹар бә һәгәр әм һерса хԝә бәрʹдьн?

¹¹ Гәрәке әм биньн бира хԝә кӧ гава әм һерсе хԝә бәрʹдьдьн, әв йәк бона мә кʹар ә. Ԝәʹдә шунда, хушка сущдаркьри әв йәк фәʹм кьр, у әԝе һеди-һеди һерса хԝә бәрʹда. Әԝе фәʹм кьр кӧ гава әм кәсед дьн дьбахшиньн, Йаһоԝа жи дьбахшинә мә (Мәт. 6:14). Әв йәк найе һʹәсабе кӧ әԝе шашийа хушка дьн ида бьчʹук дьдит, ле әԝе сафи кьр кӧ һерса хԝә бәрʹдә. Ахьрийеда, хушка мә һе бәхтәԝар бу у дькарьбу дина хԝә бьдә хьзмәта Йаһоԝа.

12. Готьнед 1 Йуһʹәнна 3:19, 20 чь мә һин дькьн?

¹² 1 Йуһʹәнна 3:19, 20 бьхунә. Һьнә кәс сәва шашийед кӧ ԝана кьрьбун, пешийа кӧ бун Шәʹдед Йаһоԝа, хԝә сущдар дькьн. Һьнә кәс жи сәва шашийед кӧ ԝан паши ньхӧмандьне кьрьн, хԝә сущдар дькьн. Әм гьшк щарьна сәва шашийед хԝә йед бәре әʹщьз дьбьн (Рʹом. 3:23). Әм һьлбәт дьхԝазьн тьштед рʹаст бькьн. Ле бәле, әм «һʹәму жи гәләки шашийа дькьн» (Аԛуб 3:2; Рʹом. 7:21-23). Һьнә кʹаред хԝәсущдаркьрьне жи һәнә, чьмки гава әм хԝә сәва шашикә хԝә сущдар дькьн, әв йәк дькарә али мә бькә кӧ әм хԝә рʹаст бькьн у шашийа хԝә дӧбарә нәкьн (Ибрн. 12:12, 13).

13. Чьма фәрз ә кӧ әм хԝә бь зедәйи сущдар нәкьн?

¹³ Ле бәле, тʹәльк әв ә кӧ әм хԝә бь зедәйи сущдар бькьн. Мәсәлә, дьбәкә мә тʹобә кьрийә у Йаһоԝа нишан кьрийә кӧ әԝи әм әʹфу кьрьнә, ле әм хԝә диса жи сущдар дькьн. Әв йәк дькарә зьраре бьдә мә (Зәб. 31:10; 38:3, 4). Гәло чьма? Сәрһатийа хушкәкә кӧ хԝә сәва шашийед хԝә йед бәре сущдар дькьр, бинә бәр чʹәʹве хԝә. Әԝ дьбежә: «Әз дьфькьрим кӧ нә һежа йә кӧ әз дь хьзмәта Йаһоԝада бьхирәт бьм, чьмки һʹале мьн бечʹарә йә». Бәлки әм жи щарьна ԝәк ве хушке дьфькьрьн. Гәрәке әм хԝә жь тʹәлька хԝәсущдаркьрьне бьпарезьн. Һәгәр әм бьфькьрьн кӧ Йаһоԝа ида мә һʹьз накә у хьзмәта хԝә бьдьнә сәкьнандьне, әв йәк ԝе дьле Мире-щьна гәләк ша бькә (2 Корьнтʹи 2:5-7, 11 жи бьньһерʹә).

14. Әм чьма дькарьн баԝәр бьн кӧ Йаһоԝа һе мә һʹьз дькә?

¹⁴ Бәлки әм жь хԝә ӧса дьпьрсьн: «Гәло әз чаԝа дькарьм бьзаньбьм ка Йаһоԝа һе мьн һʹьз дькә йан на?» Бь әʹсле хԝә, һәгәр тӧ ве пьрсе дьпьрси, әв йәк те һʹәсабе кӧ Йаһоԝа дькарә тә әʹфу бькә. Дь сала 1954-да, журнала «Бьрща Ԛәрәԝьлийеда» ӧса һатьбу готьне: «Әм [бәлки] әʹйни шашийе диса у диса дькьн. Дьбәкә хәйсәтәки мәйә бәре ӧса кʹур нав мәда рʹуньштийә кӧ һʹәта ньһа мәрʹа чәтьн ә әв хәйсәт кʹокева дәрхьн. . . . Һевийа хԝә ӧнда нәкә! Нәфькьрә кӧ тә гӧнәки ӧса кьрийә, йа кӧ Йаһоԝа  нькарә әʹфу бькә. Шәйтʹан дьхԝазә кӧ тӧ ӧса бьфькьри. Әв йәк кӧ тӧ сәва шашийа хԝә хәмгин и нишан дькә кӧ тӧ мәрьвәки хьраб нини у Йаһоԝа дькарә бьбахшинә тә. Бь мьлукти у жь дьл жь Хԝәде рʹәща бькә кӧ әԝ тә әʹфу бькә, исафа тә паԛьж бькә у али тә бькә кӧ тӧ ве шашийе ида нәки. Чаԝа кӧ зарʹокәки бьчʹук сәва проблемед хԝә диса у диса жь баве хԝә аликʹарийе дьхԝазә, тӧ жи дькари аликʹарийе жь Йаһоԝа бьхԝази, у әԝе бь дьловани али тә бькә». *

15-16. Һьнә хушк у бьред мә чаԝа фәʹм кьрьнә кӧ Йаһоԝа һе ԝана һʹьз дькә, у ве йәке ль сәр ԝан чаԝа һʹӧкӧм кьрийә?

¹⁵ Гәләк хьзмәткʹаред Йаһоԝа дьлрʹьһʹәт бунә, чьмки ԝана фәʹм кьрийә кӧ Йаһоԝа һе ԝана һʹьз дькә. Мәсәлә, чәнд сал пешда, сәрһатийәкә кӧ ль рʹеза готара йа бь наве «Кʹьтеба Пироз Жийина Мәрьва Дьгӧһезә» дьле бьраки мә гьрт. Дь ве готареда, хушкәке гот кӧ сәва жийана хԝә йа бәре, ль ԝе зор дьһат кӧ баԝәр бькә ԝәки Йаһоԝа дькарә ԝе һʹьз бькә. Паши ньхӧмандьна ԝе, әв проблема ԝе диса жи бь гәләк сала бәрдәԝам кьр. Ле бәле, гава әԝ ль сәр ԛӧрбана Иса кʹур фькьри, әԝе ньһерʹандьна хԝә гӧһәранд. *

¹⁶ Сәрһатийа ве хушке ль сәр бьре мә чаԝа һʹӧкӧм кьр? Әԝи ньвиси: «Гава әз щаһьл бум, мьн гәләк щара ль шьклед порнографи дьньһерʹи, у ль мьн зор дьһат кӧ тʹәрка ве йәке бькьм. Чәндәк пешда, мьн диса ль порнографийе ньһерʹи. Мьн жь рʹуспийед щьвате аликʹари хԝәст, у әз гәләк сәр хԝә дьхәбьтьм. Рʹуспийед щьвате али мьн кьрьн кӧ әз баԝәр бькьм ԝәки Хԝәде дьлрʹәʹм ә у мьн һʹьз дькә. Диса жи, әз хԝә щарьна беԛимәт һʹәсаб дькьм, ԛәй Йаһоԝа нькарә мьн һʹьз бькә. Сәрһатийа ве хушке гәләк али мьн кьр. Ньһа әз фәʹм дькьм кӧ гава әз дьфькьрьм ԝәки Хԝәде нькарә мьн әʹфу бькә, әв йәк те һʹәсабе кӧ әз баԝәр накьм кӧ ԛӧрбана Кӧрʹе ԝи бәс ә, ԝәки гӧнед мьн паԛьж бькә. Мьн әв готар хԝәрʹа  вәшартийә. Гава әз хԝә беԛимәт тʹәхмин дькьм, әз ве готаре диса дьхуньм у ль сәр ԝе кʹур дьфькьрьм».

17. Паши кӧ Паԝлос бу шагьрте Иса Мәсиһ, әԝи хԝә чаԝа жь тʹәлька хԝәсущдаркьрьне дьпараст?

¹⁷ Сәрһатийед ӧса һʹале Паԝлосе шанди тиньн бира мә. Пешийа кӧ әԝ бу шагьрте Иса Мәсиһ, әԝи һьнә гӧнед гьран кьрьбун. Паԝлос һьлбәт бир нәкьрьбу кӧ әԝи чь кьрьбу, ле әԝ бь зедәйи ль сәр ван шашийа нәдьфькьри (1 Тимтʹ. 1:12-15). Ԝи ԛӧрбана Иса Мәсиһ ԝәк пʹешкʹешәкә шәхси дьдит (Галт. 2:20). Ләма, Паԝлос нәдькʹәт тʹәлька хԝәсущдаркьрьне, ле әԝи бәрдәԝам кьр бь дьл у щан Йаһоԝарʹа хьзмәт бькә.

18. Ве готареда, әм чь һин бун?

¹⁸ Әм дәрһәԛа се тʹәлькед кӧ дь ве готареда тен шеԝьркьрьне, чь һин бун? (1) Биранинед хԝәш кʹәрәма Йаһоԝа нә; ле бәле, жийана мә йа бәре чьԛас хԝәш бу жи, жийана мә йа дьнйа тʹәзәда ԝе дьһа хԝәш бә. (2) Мәрьвед дьн дькарьн дьле мә бешиньн, ле һәгәр әм ԝана әʹфу бькьн, әме бькарьбьн ль сәр рʹийа хԝә пешда һәрʹьн. (3) Һәгәр әм хԝә бь зедәйи сущдар бькьн, әв йәк дькарә бьбә сәбәб кӧ әм бь шабуне Йаһоԝарʹа хьзмәт нәкьн. Ләма, мина Паԝлосе шанди, гәрәке әм баԝәр бькьн кӧ Йаһоԝа әм әʹфу кьрьнә.

19. Әм жь кʹӧ заньн кӧ дьнйа тʹәзәда, әме ида сәва тьштед бәре пʹошман нәбьн?

¹⁹ Жийана һʹәта-һʹәтайе пешийа мә йә. Дьнйа тʹәзәда, әме ида сәва тьштед бәре пʹошман нәбьн. Кʹьтеба Пироз ӧса дьбежә кӧ тьштед бәре ԝе нәйен бира мә (Иша. 65:17). Һьнәк жь мә хьзмәта Йаһоԝада кал у пир бунә, ле дьнйа тʹәзәда, әме диса щаһьл бьбьн (Иб. 33:25). Ләма, бьра әм һәри зедә дина хԝә бьдьн, нә рʹожед бәре, ле ахьрийа хԝәш кӧ һивийа мә йә!