ИНСАНӘТ

Кʹьтеба Пироз дьбежә: «Хԝәдайе кӧ шькьл дайә дьне у ԝе афьрандийә . . . ԝе ль валаһийе нәафьрандийә» (ИШАЙА 45:18).

ПЛАНЕТА ӘʹРД

Кʹьтеба Пироз дьбежә: «Ньфшәйәк дьчә у ньфшәйәк те; ле бәле дьнйа абадин дьсәкьнә» (ԜАИЗ 1:4).

ӘВ ЧЬ ТЕ ҺʹӘСАБЕ: Ль гора Кʹьтеба Пироз әʹрд ԝе тʹӧ щар нәйе кʹӧтакьрьне у әве тʹьме бь мәрьва тʹьжә бә. Һәгәр ӧса нә, демәк чь те һʹәсабе кʹӧтасийа ве дьнйайе?

БЬФЬКЬРӘ: Кʹьтеба Пироз ахьрийа ве дьнйайе бәрамбәри рʹожед Нӧһ пʹехәмбәр дькә. Ԝи чахи дьнйа бь «хьрабийава тʹьжи» бьбу (Дәстпебун 6:13). Ле Нӧһ мәрьвәки һәԛ у амьн бу. Ләма жи Хԝәде Нӧһ у малбәта ԝи хьлаз кьр, ле бь селаве ԛьрʹа һʹәму мәрьвед хьраб ани. Кʹьтеба Пирозда те шьровәкьрьне, ԝәки ԝи чахи чь һатә сәре дьнйайе: «У бь аве жи дьнйа бәре нӧԛ бу, ӧнда бу» (2  Пәтрус 3:6). Бь ԝе йәке дьнйа ԝи чахи һатә кʹӧтакьрьне. Демәк чь кʹӧта бу? Нә кӧ әʹрд, ле мәрьвед хьраб сәр тʹәмамийа дьнйайе. Ләма жи гава Кʹьтеба Пирозда те готьне дәрһәԛа кʹӧтасийа дьнйайе, әв найе һʹәсабе кʹӧтакьрьна планете. Ле те һʹәсабе кʹӧтакьрьна мәрьвед хьраб у система кӧ әԝана саз дькьн.

ЧӘТЬНАЙИ У ЗӦЛМИ

Кʹьтеба Пироз дьбежә: «Бәле һьнәки шунда нәпʹаке бәтавәбә, те ль щийе ԝи бьгәрʹи у ԝи нәбини. Ле бәле мьлуке әʹрде ԝар бьн, хер-хԝәшийева ԝе хьне бьн у ша бьн» (ЗӘБУР 37:10, 11).

ӘВ ЧЬ ТЕ ҺʹӘСАБЕ: Селава рʹожед Нӧһ ԛьрʹа һʹәму зӧлмийа дьнйайе сәр һәрһәйи нәани. Паши Селаве мәрьвед зӧлм диса жийина һәр кәси хьраб дькьн у ԝана дьлтәнг дькьн. Ле зутьрәке Хԝәде ԝе һʹәму хьраби у зӧлмийе сәр һәрһәйи кʹӧта кә. Чаԝа кӧ зәбурбеж гот: «Нәпʹаке бәтавәбә». Хԝәде ԝе бь сайа Пʹадшатийа хԝә ԛьрʹа һʹәму зӧлмийе у хьрабийе бинә. Әв Пʹадшати ԝе жь әʹзмен сәр мәрьвед гӧһдар сәрԝертийе бькә.

БЬФЬКЬРӘ: Гәло сәрԝер у политикед ве дьнйайе ԝе ша бьн у пьштгьрийа Пʹадшатийа Хԝәде бькьн? Кʹьтеба Пироз дьбежә, кӧ на. Әԝана ԝе һәла һе бефәʹмтийе жи бькьн, ԝе мьԛабьли Пʹадшатийа Хԝәде дәрен (Зәбур 2:2). Ахьрийа ԝе йәке ԝе чь бә? Пʹадшатийа Хԝәде ԝе дәԝса һʹәму пʹадшатийед мәрьва бьгьрә у «хԝәха ԝе һʹәта-һʹәтайе бьминә» (Данийел 2:44, ДТʹ). Ле чьрʹа сәрԝертийа мәрьва гәрәке бе кʹӧтакьрьне?

Кʹьтеба Пироз дьбежә: «Рʹейа мәрьв нә дь дәсте ԝида йә; гавед хԝә рʹасткьрьн, нә дь дәсте мәрьве кӧ дьмәшәда йә» (ЙЕРӘМЙА 10:23).

ӘВ ЧЬ ТЕ ҺʹӘСАБЕ: Мәрьв ӧса нәһатьнә әʹфьрандьне, кӧ сәрԝертийе сәр һәвдӧ бькьн. Мәрьв нькарьн рʹебәрийе һәвдӧ бькьн у чәтьнайа сафи кьн.

БЬФЬКЬРӘ: Кʹьтебәкеда те готьне, ԝәки ԛәԝата сәрԝера нагьһиже кӧ сәр тʹәмамийа дьнйайе проблемед ӧса сафи кьн ча кʹәсиббун, бьрʹчибун, нәхԝәши, тʹәшԛәлед тʹәбийәте, шәрʹ у зӧлмийед дьн. Ӧса жи ве кʹьтебеда те готьне кӧ һьнә мәрьв баԝәр дькьн, ԝәки тʹәне сәрԝертийа һʹәмдьнйайе дькарә ԝан чәтьнайед инсанәте сафи кә («Britannica Academic»). Ле һәрге һʹәму сәрԝеред дьнйайе бьбьнә йәк, диса жи дьне ԝе бьн сәрԝертийа мәрьвед гӧнәкʹарда бьминә, йед кӧ нькарьн ван проблема бьдьнә һьлдане. Тʹәне Пʹадшатийа Хԝәде дькарә һʹәму проблемед инсанәте сәр һәрһәйи сафи кә.

Демәк ль гора Кʹьтеба Пироз мәрьвед ԛәнщ гәрәке кʹӧтакьрьна ве дьнйа зӧлм нәтьрсьн. Дәԝсе, әԝана гәрәке һивийа ви ԝәʹдәйи бьн, чьмки әв дьнйа зӧлм у ԛәлп ԝе бе гӧһастьне сәр дьнйа тʹәзә, бьн сәрԝертийа Хԝәде!

Ле кʹәнге әԝ йәк ԝе бе сери? Готара дьн ԝе щаба ве пьрсе сәр һʹиме Кʹьтеба Пироз бьдә.