Зутьрәке, чахе пʹадшатийа Хԝәдейә әʹзмани сәр тʹәмамийа дьнйайе сәрԝертийе бькә, әʹрд ԝе гәләк бәдәԝ бә у жийина ль сәр гәләк хԝәш бә. Мәрьв жи ԝе тʹәвайи бәхтәԝар бьжин у шьхӧлед ӧсава мьжул бьн, йед кӧ ԝе ԝанарʹа шабуне биньн. Хԝәде Иса Мәсиһ кʹьфш кьр, ԝәки әԝ сәрԝертийе ль әʹрде бькә. Сәрԝеред рʹожед мә бона бьнәлийед хԝә хәм накьн. Иса жь ԝана щӧдә дьбә, чьмки әԝ тʹьме бона мәрьва хәм дькә у йа һәри баш бона ԝан дьхԝазә. Сәрԝертийа ԝи ԝе сәр һʹиме һʹьзкьрьне бә, у әԝе Пʹадшаки ԛәнщ, рʹәʹм у һәԛ бә (Ишайа 11:4).

Инсанәта кӧ ль сәр әʹрде бьжи ԝе сәр щурʹә-щурʹә мьләта башԛәкьри нибьн. Һʹәму мәрьв ԝе бьбьнә щьмәʹтәк у мьләтәк, әԝана ԝе йәктийеда бьжин (Әʹйанти 7:9, 10). Һʹәму мәрьвед сәр әʹрде ԝе Хԝәде у мәрьва һʹьз бькьн, у тʹәвайи шьхӧлкʹарийе бькьн, хԝәйитийе мала хԝә бькьн, демәк әʹрде у бь ԝе йәке ԛьрара Хԝәде дәрһәԛа әʹрде биньн сери (Зәбур 115:16).

Чахе Пʹадшатийа Хԝәде дәстпекә сәрԝертийе ль әʹрде бькә, Әʹфьрандар ԝе бь тʹәмами тʹәбийәте у еколожийайе контрол кә (Зәбур 24:1, 2). Гава Иса сәр әʹрде бу, әԝи ԛәԝата кӧ Хԝәде дабу ԝи әʹйан кьр, чахе һеса фьртонә да сәԛьрʹандьне (Марԛос 4:39, 41). Бьн сәрԝертийа Исада тʹӧ кәс ԝе жь тʹәшԛәлед тʹәбийәте нәтьрсә. Ӧса жи бьн Пʹадшатийа Хԝәдеда әме жь һʹәйԝанед бәйани нәтьрсьн у ида тʹӧ кәс ԝе зийане нәдә тʹәбийәте (Һосәйа 2:18).

Һәр кәс ԝе сьһʹәт-ԛәԝата кʹамьлрʹа ша бә. Тʹӧ кәс ԝе нәхԝәш нәкʹәвә, кал-пир нәбә у тʹӧ кәс ԝе нәмьрә (Ишайа 35:5, 6). Мәрьв ԝе тʹәбийәта бәдәԝ у тʹәмьзрʹа ша бьн, йа кӧ ԝе мина тʹәбийәта бахче Еденеда бә. Дьнйа тʹәзәда әʹрд ԝе бәре хԝә тʹер-тʹьжә бьдә у тʹӧ бьнәлийед әʹрде ԝе бьрʹчи нәминьн (Дәстпебун 2:9). Мина Исраела бәре, кӧ щьмәʹта Хԝәде бу, һәр кәс Щьнәтеда ԝе «нане хԝә тʹер бьхԝьн» (Ԛануна Кʹаһинтийе 26:4, 5).

Бьн сәрԝертийа пʹадшатийа Хԝәдеда, һәр кәс ԝе әʹдьлайерʹа ша бә у мәрьв ԝе һьндава һәвда ԛәнщ у һәԛ бьн. Шәрʹ-дәʹԝ у зордари ԝе ида тʹӧнә бьн, у мәрьв ԝе һʹәԝще тʹӧ тьшти нибьн, чьмки һʹәԝщед ԝан ԝе бенә рʹазикьрьне. Кʹьтеба Пирозда те готьне: «Ле бәле ԝе һәр кәс дь бьн меԝа хԝәда у дь бьн даре хԝәйи һежиреда рʹунен у йе кӧ ԝан бьтьрсинә тʹӧнә бә» (Миха 4:3, 4).

Мала һәр малбәтәки ԝе һәбә у әԝана ԝе нәтьрсьн, ԝәки кәсәк ԝе ԝана жь мал дәрхә. У һәр хәбат кӧ әме бькьн, ԝе ләзәте мәрʹа бинә. Ча Кʹьтеба Пирозда те готьне, әԝед кӧ дьнйа тʹәзәда бьжин ԝе «щийе вала кʹәда хԝә нәдьн», демәк ԝе бадиһәԝа нәчәрчьрьн (Ишайа 65:21-23).

Кʹьтеба Пироз соз дьдә: «Ԝе дьнйа жи бь занина Хӧданва тʹьжи бьбә» (Ишайа 11:9). Дьнйа тʹәзәда мәрьв ԝе жь биланийа Әʹфьрандаре хԝә, Йаһоԝа, һин бьн у гәләк тьшт дәрһәԛа әʹфринед ԝийә бәдәԝ пебьһʹәсьн. Әԝана ԝе занәбуна хԝә нәдьнә хәбате сәва кӧ чʹәка чекьн йан сәва кӧ зийане бьдьнә мәрьва (Ишайа 2:4). Дәԝсе әԝана ԝе һин бьн әʹдьлайеда тʹәви һәв бьжин у хԝәйитийе әʹрде бькьн (Зәбур 37:11).

Хԝәде гәләк ԛәԝат хәрщ кьр, сәва кӧ әʹрде бона жийина бәхтәԝар һазьр кә, ԝәки әм жь һәр рʹожи шабуне бьстиньн. Әԝи ԛьрар кьрийә, ԝәки мәрьв сәр әʹрде һʹәта-һʹәтайе бьжин (Зәбур 37:29; Ишайа 45:18). Сәва кӧ ве ԛьрара хԝә бинә сери, Хԝәде «ԝе мьрьн һәр у һәр даԛӧртинә» (Ишайа 25:8, ИМ). Кʹьтеба Пироз соз дьдә: «Иди мьрьне тʹӧнәбә, нә шин, нә гьри, нә еш-ешук» (Әʹйанти 21:4). Хԝәде ԝе һәр мәрьвирʹа мәщала жийина һʹәта-һʹәтайе бьдә, һьм ԝанрʹа кʹе кӧ ԝе жь кʹӧтакьрьна ве дьнйа зӧлм хьлаз бьн, һьм жи ԝанрʹа кʹе кӧ дьнйа тʹәзәда ԝе жь мьрьне рʹабьн (Йуһʹәнна 5:28, 29; Кʹаред Шандийа 24:15).

 Иро бь милйона мәрьв нав тʹәмамийа дьнйайе ида бона дьнйа тʹәзә һазьр дьбьн, йа кӧ гәләк незик ә. Рʹаст ә әԝана мәрьвнә гӧнәкʹар ьн, ле диса жи сәр хԝә дьхәбьтьн, ԝәки бьбьнә мәрьвнә ӧса, кʹижана кӧ Хԝәде дьхԝазә дьнйа тʹәзәда бьвинә. Гәло әԝана ча әԝе йәке дькьн? Әԝана занәбуне дәрһәԛа Йаһоԝа Хԝәде у Иса Мәсиһ дьстиньн (Йуһʹәнна 17:3).

Һе зедә пебьһʹәсьн дәрһәԛа ԝе йәке, кӧ ча һун дькарьн жь кʹӧтакьрьна ве дьнйа зӧлм хьлаз бьн у дьнйа тʹәзәда кӧ гәләк незик ә бьжин. Тʹәви Шәʹдед Йаһоԝа һинбуна Кʹьтеба Пирозә бепʹәрә дәстпекьн бь кʹьтеба Ша бә Жийинерʹа Һʹәта-Һʹәтайе!