«Һʹьшйар бьминьн, чьмки һун нә рʹожа һатьна Кӧрʹе Инсан заньн, нә жи сьһʹәте» (МӘТТА 25:13).

«Һаш жь хԝә һәбьн! Һʹьшйар бьминьн! Чьмки һун ньзаньн кʹәнге ԝәхте перʹа бьгьһижә» (МАРԚОС 13:33).

Тʹӧ кәс сәр әʹрде ньзанә, кʹәнге ԝе хьлазийа ве системе бе. Ле Хԝәде «ԝәхт», демәк рʹож у сьһʹәта кʹӧтасийа ве дьнйайе кʹьфш кьрийә (Мәтта 24:36). Ле гәло әв те һʹәсабе ԝәки ԛә набә һаш пе һәбьн, ԝәки хьлази незик ә? Һьлбәт на. Иса готә шагьртед хԝә, ԝәки дина хԝә бьдьнә нишана йед кӧ ԝе бьдьнә кʹьфше, ԝәки ахьри незик ә.

Әв ԛәԝьмандьн ԝе бьбуна нишана «ахьрийа ве дьнйайе». Иса гот: «Мьләте рʹабә ль сәр мьләт, пʹадшати ль сәр пʹадшатийе, щи-щийа ԝе хәлайи-щәлайе у әʹрдһʹәже бьбьн» (Мәтта 24:3, 7). Әԝи ӧса жи гот, ԝәки нәхԝәшийед һʹал, демәк епидемийа ԝе пешда бен (Луԛа 21:11). Ле тӧ пе чʹәʹве хԝә дьвини ван ԛәԝьмандьна, дәрһәԛа кʹижана кӧ Иса пʹехәмбәрти кьр?

Иро сәр тʹәмамийа дьнйайе шәрʹе гьран, бьрʹчибун, әʹрдһʹәж у нәхԝәши йәк пәй йәкерʹа мәрьва дьчәрчьриньн. Мәсәлә, сала 2004-да жь бо әʹрдһʹәжәкә мәзьн Окйануса Һьндида, фьртонә рʹабу у 225 000 мәрьв ԛьрʹ бун. Нава се салада пандемийа COVID-19 әʹмьре ԝәкә 6,9 милйон мәрьва жь ԝан станд. Иса гот ԝәки ԛәԝьмандьнед ви щурʹәйи ԝе бьдьнә кʹьфше, ԝәки кʹӧтасийа ве дьнйайе незик ә.

Кʹьтеба Пироз ԝәхте незики кʹӧтасийа дьнйайе нав дькә «рʹожед ахьрийе»  (2 Пәтрус 3:3, 4). Дӧде Тимотʹейо 3:1-5 ньвисар ә, ԝәки рʹожед ахьрийеда дьнйа ԝе бь хьрабийе тʹьжә бә (Бьньһерʹә чаргошә « Хут Пешийа Хьлазийа Ве Дьнйайе»). Гәло тӧ пе чʹәʹве хԝә навини кӧ мәрьв хԝәһʹьз, пʹәрәһʹьз, кʹӧбар у бабах ьн? Әв һәр тьшт дьдьнә кʹьфше, ԝәки хьлазийа ве дьнйайе ида бәр шемике йә.

Ле рʹожед ахьрийе ԝе чьԛас бькʹьшиньн? Ль гора Кʹьтеба Пироз әв рʹож ԝе дьреж нәкʹьшиньн. Хԝәде ԝе ԛьрʹа ԝан мәрьва бинә «йед кӧ дьне хьраб дькьн» (Әʹйанти 11:15-18; 12:12).

Хԝәде ида рʹож кʹьфш кьрийә, кӧ ве система хьраб кʹӧта кә (Мәтта 24:36). Мьзгиникә дьһа баш жи әв ә, кӧ Хԝәде «нахԝазә тʹӧ кәс ӧнда бә» (2 Пәтрус 3:9). Әԝ мәщале дьдә һʹәму мәрьва, ԝәки дәрһәԛа ԝи пебьһʹәсьн у ль гора ԛьрара ԝи бьжин. Гәло чьрʹа? Чьмки Хԝәде дьхԝазә, ԝәки әм ԝәʹде кʹӧтакьрьна ве дьнйайе хьлаз бьн у һʹәта-һʹәтайе сәр әʹрде Щьнәте бьжин.

Хԝәде програма һʹәмдьнйайи бона һинкьрьна мәрьва саз кьрийә, ԝәки әԝана пебьһʹәсьн кӧ чаԝа хьлаз бьн у бьн Пʹадшатийа ԝида дьнйа тʹәзәда бьжин. Иса гот кӧ әв Мьзгинийа Пʹадшатийе «ԝе ль нав тʹәмамийа дьнйайе бе» бәлакьрьне (Мәтта 24:14). Сәр тʹәмамийа дьнйайе сәр тʹәмамийа дьнйайе Шәʹдед Йаһоԝа бь милйарда сьһʹәта хәрщ кьрьнә, ԝәки мьзгинийа Кʹьтеба Пироз дәрһәԛа һевийа баш бәла кьн у мәрьва һин кьн. Иса гот, ԝәки пешийа кʹӧтасийа ве дьнйайе, әв мьзгини ве сәр тʹәмамийа дьнйайе бәла бә.

Ԝәʹде сәрԝертийа мәрьва ида хьлаз дьбә. Ле бәрдьликә мәзьн әв ә, кӧ гава әва дьнйа бе кʹӧтакьрьне, тӧ дькари хьлаз би у бькʹәви Щьнәта кӧ Хԝәде соз дайә. Готара дьн ԝе шьровәкә, ԝәки тӧ чь дькари бьки кӧ дьнйа тʹәзәда бьжийи.