1. Чьма баш ә ԝәки әм гьли кьн, кӧ әм чаԝа һатьнә сәр рʹийа «рʹастийе»?

 «ТӦ ЧАԜА һати сәр рʹийа рʹастийе?» Нава Шәʹдед Йаһоԝада, әв пьрс гәләк щара те дайине. Гава әм һәврʹа дьбьнә нас, йәк жь пьрсед пешьн, йед кӧ әм жь һәвдӧ дьпьрсьн, әв ә. Әм гәләк һʹьз дькьн һәвдӧрʹа дәрһәԛа хԝә гьли кьн у бежьн, ԝәки мә чаԝа Йаһоԝа нас кьрийә (Рʹомайи 1:11). Хәбәрданед ӧса тиньн бира мә, ԝәки рʹийа рʹастийе чьԛас ԛимәт ә. Ӧса жи, әм сафи дькьн кӧ тʹьме «нава рʹастийеда» бьминьн, демәк ль гора хԝәстьна Йаһоԝа бьжин (3 Йуһәнна 4).

2. Ве готареда, әме дәрһәԛа чь шеԝьр кьн?

² Ве готареда, әме дина хԝә бьдьн һьнә мәʹнийа кӧ әм чьма рʹастийе һʹьз дькьн. Паше, әме бьвиньн кӧ әм чаԝа дькарьн бәрдәԝам кьн, ԝәки ве пʹешкʹеше ԛимәт кьн. Бь сайа ве готаре әме дьһа зедә бьшекьриньн, ԝәки Йаһоԝа мә бәрбь рʹастийе кʹьшандийә (Йуһʹәнна 6:44). Ӧса жи, әв готар ԝе хԝәстьна мә дьһа ԛәԝи кә, ԝәки әм кәсед дьнрʹа дәрһәԛа рʹастийе гьли кьн.

3. Әм һәри зедә чьма рʹастийе һʹьз дькьн?

³ Мәʹни гәләк ьн кӧ чьрʹа әм рʹастийе һʹьз дькьн. Йа һәри фәрз, әм Йаһоԝа һʹьз дькьн, йе кӧ Канийа рʹастийе йә. Бь сайа Кʹьтеба Пироз, әм нә тʹәне һин бунә кӧ әԝ Әʹфьрандаре әʹрд у әʹзмана йә, ле әм пеһʹәсийанә кӧ әԝ Баве мәйи дьлован ә у бона мә хәм дькә (1 Пәтрус 5:7). Әм заньн ԝәки Йаһоԝа йә «Хԝәдейе рʹәʹм у кʹәрәме, сәбьр-ськʹане, бь һʹӧб у амьнийеда хьнейо» (Дәркʹәтьн 34:6). Йаһоԝа һәԛийе һʹьз дькә (Ишайа 61:8). Гава әԝ  дьвинә кӧ әм еше дькʹьшиньн, әԝ хәмгин дьбә у һазьр ә кӧ ль ԝәхта рʹаст һʹәму кӧл у дәрдед мә кʹокева рʹакә (Йерәмйа 29:11). Әм гәләк һивийа ԝе рʹоже нә! Бәле, мәʹник кӧ чьма әм Йаһоԝа һаԛас һʹьз дькьн, әв ә.

4-5. Паԝлосе шанди һевийа мә чьма бәрамбәри ләнгәре кьр?

⁴ Диса чьма әм рʹастийе һʹьз дькьн? Рʹийа рʹастийе кʹарәкә мәзьн дьдә мә. Мәсәлә, бь сайа рʹастийа Кʹьтеба Пироз, һевийа мә һәйә. Паԝлосе шанди дәрһәԛа ве һевийе ӧса ньвиси: «Гӧмана бона жийина мә дьбә ләнгәрәкә һʹимгьрти у амьн» (Ибрани 6:19). Чаԝа кӧ ләнгәр гәмийе дьгьрә, ԝәки ав ле нәбә, һевийа мә жи дькарә ԝәʹде тәнгасийа али мә бькә, ԝәки ԛәԝи бьминьн.

⁵ Контекста ве рʹезе нишан дькә, ԝәки Паԝлосе шанди бәʹса һевийа жийина сәр әʹзмана дькьр, йа кӧ Мәсиһийед кʹьфшкьри һивийе нә. Һевийа Мәсиһийед кӧ һивийа жийина сәр әʹрде нә жи мина ләнгәре йә (Йуһʹәнна 3:16). Бәле, һевийа жийина һәрһәйи сәр әʹрде, нета жийине дьдә мә.

6-7. Рʹастийа Кʹьтеба Пироз ча али Ивон кьр, ԝәки ахьрийе нәтьрсә?

⁶ Ԝәрә әм дина хԝә бьдьнә сәрһатийа хушкәкә бь наве Ивон. Гава әԝ зарʹ бу, әԝе рʹастийа Кʹьтеба Пироз ньзаньбу, у әԝ жь мьрьне дьтьрсийа. Щарәке, әԝе әв щьмлә хԝәнд: «Ахьрийа ахьрийе, һәр кәс дьмьрә». Ивон дьбежә: «Сәва ван готьна, шәв хәԝ нәдькʹәтә чʹәʹве мьн, у әз дәрһәԛа ахьрийе дьфькьрим. Мьн хԝәрʹа дьгот: ‹Әз баԝәр накьм кӧ әʹмьр һаԛас кьн ә. Әз чьма һатьмә дьнйайе?› Мьн нәдьхԝәст бьмьрьм!»

⁷ Паше, гава Ивон һьнәки мәзьн бу, әԝ рʹасти Шәʹдед Йаһоԝа һат. Әԝ дьбежә: «Мьн баԝәр кьр кӧ әз дькарьм һʹәта-һʹәтайе Щьнәтеда сәр әʹрде бьжим». Гәло хушка мә жь рʹастийе чаԝа кʹар дит? Әԝ дьбежә: «Әз ида ахьрийе у мьрьне натьрсьм у шәв рʹьһʹәт рʹадьзем». Ивон рʹастийе гәләк ԛимәт дькә, у әԝ бь дьл у щан кәсед дьнрʹа бәʹса һевийа хԝә дькә (1 Тимотʹейо 4:16).

8-9. (а) Мәсәла Исада, мәрьвәки кӧ хьзнә дит, әв хьзнә чьԛас ԛимәт дькьр? (б) Рʹасти бона тә чьԛас ԛимәт ә?

⁸ Мьзгинийа Пʹадшатийа Хԝәде жи пʹарәкә рʹастийе йә. Иса Мәсиһ рʹастийа дәрһәԛа Пʹадшатийе бәрамбәри хьзнәкә вәшарти кьр. Ль гора Мәтта 13:44, Иса ӧса гот: «Пʹадшатийа Әʹзмана мина ве йәке йә: Әʹрдәкида хьзнәкә вәшарти һәбу. Мәрьвәк ԝе дьбинә, вәдьшерә, шабуна дьчә һʹәму һәбука хԝә дьфьрошә у ԝи әʹрди дькʹьрʹә». Әв мер ве хьзне нәдьгәрʹийа, ле гава дит, әԝи мал-һʹале хԝә фьрот кӧ ве хьзне ԛазанщ кә. Гәло чьрʹа? Әԝи заньбу кӧ әв хьзнә жь һʹәму тьштед кӧ щәм ԝи һәбун, ԛимәттьр ә.

⁹ Ле тӧ жи рʹастийе ӧса ԛимәт дьки? Бешьк әре! Чьмки чь кӧ дьнйа пʹешкʹеши мә дькә, нькарә шабунәкә ӧса бьдә мә, ча хьзмәтийа Йаһоԝарʹа дьдә мә. Һьм жи, һевийа мә һәйә кӧ әме һʹәта-һʹәтайе бьн сәрԝертийа Пʹадшатийа Хԝәдеда бьжин. Ӧса жи, достийа мә тʹәви Йаһоԝа, һежайи һәр ԛӧрбанкьрьна йә, ләма жи әм бь дьл у щан хирәт дькьн, ԝәки «һәр алийава ль ԝи хԝәш бен» (Колоси 1:10).

10-11. Маикл чьма жийина хԝә гӧһаст?

¹⁰ Гәләка жь мә епʹещә тьшт жь хԝә кем кьрьнә, ԝәки дьле Йаһоԝа ша кьн. Һьнәка жь мә хәбата баш һиштьнә. Һьнәк жи ида пәй һәбуке накʹәвьн.  Һьнә мәрьва чахе Йаһоԝа нас кьрьн, жийина хԝә бь тʹәмами гӧһастьн. Мәсәлә, бьраки бь наве Маикл жи ӧса кьр. Гава әԝ зарʹ бу, әԝи Йаһоԝа нас нәдькьр. Щаһьлтийеда, әԝ гӧлаше һин бу. Әԝ дьбежә: «Спорт бона мьн гәләк фәрз бу. Щарна әз дьфькьрим кӧ жь мьн ԛәԝаттьр кәсәк тʹӧнә». Ле гава Маикл дәстпекьр Кʹьтеба Пироз һин бә, әԝ пеһʹәсийа кӧ Йаһоԝа зӧлмийе нәфрʹәт дькә (Зәбур 11:5). Маикл сәр хушк-бьре кӧ тʹәви ԝи һинбун дәрбаз дькьрьн, ӧса дьбежә: «Ԝана тʹӧ щара мьнрʹа нәдьгот кӧ гәрәке әз гӧлаше бьһельм. Ԝана тʹәне рʹастийа Кʹьтеба Пироз әз һин дькьрьм».

¹¹ Чьԛас кӧ Маикл дәрһәԛа Йаһоԝа һин дьбу, һаԛас һе зедә әԝи Йаһоԝа һʹьз дькьр. Илаһи ԝи хԝәш дьһат кӧ Йаһоԝа һьмбәри хьзмәткʹаред хԝә чьԛас рʹәʹм ә. Ԝәʹдә шунда, Маикл фәʹм кьр кӧ гәрәке әԝ сафикьрьнәкә фәрз бькә. Әԝ дьбежә: «Бона мьн гәләк чәтьн бу тʹәрка гӧлаше бьдьм. Ле мьн заньбу кӧ һәрге әз ве йәке бькьм, Йаһоԝа ԝе жь мьн рʹази бә, у әз баԝәр бум кӧ хьзмәтийа ԝи һежайи һәр тьшти йә». Маикл фәʹм кьр, кӧ рʹастийа Кʹьтеба Пироз чьԛас ԛимәт ә, у әԝе йәке ԝи һелан кьр кӧ жийина хԝә бьгӧһезә (Аԛуб 1:25).

12-13. Рʹастийа Кʹьтеба Пироз чаԝа али Майлийе кьр?

¹² Кʹьтеба Пироз ԛимәта рʹастийе бәрамбәри чʹьрайе дькә, кӧ тәʹрийеда дьчʹурьсә (Зәбур 119:105; Әфәси 5:8). Хушка мә Майли, йа кӧ Азәрбайщанеда дьжи, рʹонайа кӧ әԝе жь Хәбәра Хԝәде стандийә, гәләк ԛимәт дькә. Баве ԝе Мьсьлман бу, ле дийа ԝе Щьһу бу. Майли дьбежә: «Әз тʹӧ щар дӧдьли нәдьбум кӧ Хԝәде һәйә, ле һьнә пьрсед мьн һәбун. Мәсәлә, әз бәрхԝә дькʹәтьм: ‹Чьрʹа Хԝәде мәрьв әʹфьрандьнә у чьрʹа мәрьв тʹәмамийа әʹмьре хԝә еше дькʹьшиньн у паше жи һʹәта-һʹәтайе щәʹньмеда дьшәԝьтьн?› Мәрьва дьгот кӧ һәр тьшт ԛьрара Хԝәде йә. Ләма жи әз бәрхԝә дькʹәтьм: ‹Гәло Хԝәде хԝәш те гава дьвинә, кӧ ча мәрьв дьчәрчьрьн?›»

¹³ Майли бәрдәԝам дькьр щабед пьрсед хԝә бьгәрʹә. Ԝәхт шунда, әԝе дәстпекьр Кʹьтеба Пироз һин бә у һатә сәр рʹийа рʹастийе. Әԝ дьбежә: «Һинкьрьнед Кʹьтеба Пироз кӧ бь логики у бь итʹбар ьн, ньһерʹандьна мьн бь тʹәмами гӧһастьн у али мьн кьрьн ԝәки әз бьбьм мәрьвәкә бәхтәԝар. Бь сайа ве йәке, әʹдьлайи кʹәтә дьле мьн». Мина Майлийе, әм гьшк шькьрийе дьдьнә наве Йаһоԝа, йе кӧ әм «жь тәʹристанийе гази рʹонайа хԝәйә һʹӧжмәкʹар кьрьнә» (1 Пәтрус 2:9).

14. Әм ча дькарьн рʹастийе һе зедә һʹьз бькьн? (Бьньһерʹьн чаргошә « Мәсәлед Дьн».)

¹⁴ Әва тʹәне чәнд сәрһати бун, кӧ ԛимәта рʹастийе нишан дькьн. Бешьк, тӧ жи гәләк сәрһатийед ӧса зани. Гәло әм диса чьрʹа рʹастийе һʹьз дькьн? Һәрге әм дәрһәԛа ве йәке леколина шәхси бькьн, әв йәк ԝе али мә бькә кӧ һе зедә рʹастийе һʹьз бькьн. Бәле, чьԛас зедә әм рʹастийе һʹьз бькьн, һаԛас һе зедә әме мәщала бьгәрʹьн, ԝәки рʹазибуна хԝә бона ве йәке бьдьнә кʹьфше.

15. Әм чаԝа дькарьн нишан кьн кӧ әм рʹастийе һʹьз дькьн?

¹⁵ Бь ве йәке кӧ әм бәрдәԝам дькьн Кʹьтеба Пироз у әʹдәбйәтед сәр һʹиме Кʹьтеба Пироз леколин дькьн, әм нишан  дькьн кӧ әм рʹастийе һʹьз дькьн. Фьрԛи тʹӧнә кӧ чәнд сал ә әм Шәʹдед Йаһоԝа нә, гәрәке әм тʹәрка һинбуне нәдьн. Журнала пешьн йа «Бьрща Ԛәрәԝьлийеда» ӧса дьһатә готьне: «Рʹасти, әԝ һәйә мина кӧлирка бьчʹук, кʹижан кӧ чоле мәзьн дьбә, у дәр-дора ԝе зиԝанед дәрәԝийе мәзьн дьбьн у нав хԝәда ле вәдьшерьн. Һәрге һун дьхԝазьн әԝе кӧлирке бьвиньн, һун гәрәке рʹьнд бьгәрʹьн. . . . Гава ԝә әԝ дит, лазьм ә бьсәкьньн у һьлдьн. Ле тʹәне бь ве кӧлиркәкә рʹастийе, тʹер нәбьн. . . . Диса йед дьн бьгәрʹьн, нәсәкьньн һе зедә тʹоп кьн». Леколин һеса нинә, ле бь рʹасти һежа йә кӧ әм ве йәке бькьн.

16. Тӧ чь щурʹәйи леколине дьки? (Мәтʹәлок 2:4-6)

¹⁶ Һьнә мәрьв хԝәндьн у леколине һаԛас һʹьз накьн. Ле Йаһоԝа мәрʹа дьбежә кӧ тʹьме рʹастийе леколин кьн, ԝәки бькарьбьн дьһа баш рʹастийе фәʹм кьн (Мәтʹәлок 2:4-6 бьхунә). Гава әм ве йәке дькьн, щәфе мә бадиһәԝа начә, чьмки әв йәк тʹьме кʹаре дьдә мә. Бьраки бь наве Кори дьбежә кӧ гава әԝ Кʹьтеба Пироз дьхунә, әԝ дина хԝә дьдә тʹәмамийа рʹезе: «Әз һʹәму спартьна дьхуньм, һәр әʹламәтийа зедә дьньһерʹьм у дьһа  зедә леколине дькьм. . . . Бь ви щурʹәйи, әз жь хԝәндьне кʹарәкә мәзьн дьстиньм!» Фьрԛи тʹӧнә әм чь щурʹә леколине дькьн, ԝе баш бә ԝәки әм ве йәке бь дьл у щан бькьн. Ӧса әме нишан кьн, кӧ әм рʹастийе гәләк ԛимәт дькьн (Зәбур 1:1-3).

17. Әм ча дькарьн ль гора рʹастийе бьжин? (Аԛуб 1:25)

¹⁷ Әм һәмьки заньн, ԝәки бәс нинә кӧ әм тʹәне рʹастийе леколин бькьн. Сәва кӧ әм жь рʹастийе кʹаре у шабуна рʹаст бьстиньн, әм гәрәке ль гора тьштед кӧ әм һин дьбьн, бьжин (Аԛуб 1:25 бьхунә). Гәло әм ча дькарьн бьзаньбьн һәла әм ль гора рʹастийе дьжин йан на? Бьраки мә дьбежә кӧ әм гәрәке дьле хԝә леколин бькьн у тедәрхьн, һәла әм кʹижан алийада ида пешда чунә, у кʹижан алийада гәрәке диса сәр хԝә бьхәбьтьн. Паԝлосе шанди ӧса гот: «Әм гьһиштьнә чь дәрәще, анәгори ԝе йәке бьжин» (Филипи 3:16).

18. Әм чьма хирәт дькьн кӧ «нава рʹастийеда» бьжин?

¹⁸ Дә бьдьнә һʹәсабе хԝә кӧ һәгәр әм чь жь дәсте мә те бькьн, ԝәки «нава рʹастийеда» бьжин, әме кʹарәкә чьԛас мәзьн бьстиньн! Һьм жийина мә ԝе дьһа баш бә, һьм жи әме дьле Йаһоԝа у дьле хушк-бьра ша кьн (Мәтʹәлок 27:11; 3 Йуһʹәнна 4). Гәло һежа нинә ԝәки әм рʹастийе һʹьз бькьн у ль гора рʹастийе бьжин?