1-2. (а) Гава әм сәр жийин у хьзмәтийа Иса дьфькьрьн, әм чь тʹәхмин дькьн? (б) Әме ве готареда дәрһәԛа чь хәбәр дьн?

 ГАВА мәрьвәки мәйи һʹьзкьри дьмьрә, әм гәләк бира ԝи дькьн! Серида, хенщи еше әм тьштәки дьн тʹәхмин накьн. Гава әм дьфькьрьн дәрһәԛа рʹожед пешийа мьрьна ԝи, у илаһи кӧ әԝи чьԛас еш дькʹьшанд, дьле мә гәләк дьшәԝьтә. Ле ԝәʹдә шунда, дьбәкә еша дьле мә һьнәки сьвьк дьбә. Дьбәкә әм бь шабуне тиньн бира хԝә кӧ әԝ мәрьве мәйи дәлал, чь готьбу йан чь кьрьбу, ԝәки мә ԛәԝи кә, бәшәра мә хԝәш кә йан жи тьштәки мә һин кә.

² Мина ве йәке, гава әм дәрһәԛа еш у мьрьна Иса Мәсиһ дьхуньн, дьле мә хәмгин дьбә. Һʹәфтийед пешийа у паши Биранине, әм ԝәʹдә вәдьԛәтиньн, сәва кӧ дәрһәԛа кʹьрʹине кʹур бьфькьрьн (1 Корьнтʹи 11:24, 25). Ле чахе әм дәрһәԛа жийина Исайә сәр әʹрде дьфькьрьн, демәк сәр гьли у кьред ԝи, әм гәләк ша дьбьн. Ӧса жи гава әм дина хԝә дьдьн тьштед кӧ Иса иро дькә у тьштед кӧ әԝе ахьрийеда бона мә бькә, дьле мә ԛәԝи дьбә. Әме ве готареда пебьһʹәсьн, кӧ ча дьшьрмишбуна сәр ван тьшта у сәр һʹьзкьрьна Иса, дькарә мә дәʹф дә, ԝәки әм рʹазибуна хԝә чәнд алийада нишан кьн.

3. Әм жь бо кʹижан мәʹнийа бона кʹьрʹине шекьрдар ьн?

³ Гава әм сәр жийин у мьрьна Иса дьфькьрьн, дьле мә бь рʹазибуне тʹьжә дьбә. Ԝәʹде хьзмәтийа хԝәйә сәр әʹрде, Иса мәрьв һин дькьрьн, кӧ Пʹадшатийа Хԝәде ԝе чьԛас кʹәрәма сәр мәда бьбаринә. Әм рʹастийа дәрһәԛа Пʹадшатийа Хԝәде гәләк ԛимәт дькьн. Әм бона кʹьрʹине рʹази нә, чьмки әԝ рʹе вәдькә, ԝәки әм бьбьнә достед Йаһоԝа у Иса. Кәсед кӧ баԝәрийа хԝә Иса тиньн, һевидар ьн кӧ ԝе жийина һʹәта-һʹәтайе бьстиньн у мәрьвед хԝәйи незик  кӧ мьрьнә, диса бьвиньн (Йуһʹәнна 5:28, 29; Рʹомайи 6:23). Мә тʹӧ тьшт нәкьрийә кӧ һежайи ԝан кʹәрәма бьн, у әме тʹӧ щар нькарьбьн бьн ԛәнщийа Хԝәде у Иса дәред (Рʹомайи 5:8, 20, 21). Ле әм дькарьн шекьрдарийа хԝә ԝанрʹа нишан кьн. Гәло чь щурʹәйи?

4. Мәрйәма Мәждәлани шекьрдарийа хԝә Исарʹа чаԝа нишан кьр? (Бьньһерʹә шькьл.)

⁴ Ԝәрә әм дина хԝә бьдьн мәсәла кʹӧлфәтәкә Щьһу, бь наве Мәрйәма Мәждәлани. Һʹале ԝе гәләк гьран бу, чьмки һʹәфт щьн кʹәтьбунә ԝе. Дьбәкә әԝ дьфькьри, кӧ һʹале ԝе бечʹарә йә. Дә ньһа бьдә бәр чʹәʹве хԝә, ԝәки әԝ чьԛас шекьрдар бу, кӧ Иса Мәсиһ жь һʹӧкӧме щьна ле хьлаз кьр! Әԝ ӧса рʹази бу, кӧ хԝәст бьбә шагьрта Иса у бь ԝәʹдә, ԛәԝат у һәбука хԝә хьзмәтийеда пьштгьрийа ԝи бькә (Луԛа 8:1-3). Рʹаст ә Мәрйәм бона гәләк тьшта жь Иса шекьрдар бу, ле дьбәкә әԝе һе фәʹм нәдькьр кӧ Иса Мәсиһ ԝе ахьрийеда бона ԝе чь бькә. Әԝи гәрәке жийина хԝә бона һʹәму мәрьва бьда, ԝәки «һәр кәсе кӧ ԝи баԝәр бькә ӧнда нәбә, ле жийина ԝийә һʹәта-һʹәтайе һәбә» (Йуһʹәнна 3:16). Мәрйәме шекьрдарийа хԝә бь ве йәке да кʹьфше, кӧ Иса Мәсиһрʹа амьн ма. Гава Иса Мәсиһ ль сәр стуна щәфайе дьчәрчьри, Мәрйәм незики ԝи сәкьни бу, чьмки әԝе бона ԝи хәм дькьр, у дьхԝәст дьлбинийе бьдә ԝи у мәрьвед дьн, йед кӧ ԝедәре бун (Йуһʹәнна 19:25). Паши мьрьна Иса, Мәрйәме у дӧ жьнед дьн бьһарәтед бинхԝәш бона дәфьнкьрьна ԝи анинә тʹьрбе (Марԛос 16:1, 2). Мәрйәме бона амьнийа хԝә хәлатәкә мәзьн станд. Чахе Иса жь мьрьне һатә рʹакьрьне, Мәрйәме әԝ дит у перʹа хәбәр да. Әв мәщал нәкʹәтьбу дәсте гәләк шагьрта (Йуһʹәнна 20:11-18).

5. Әм чаԝа дькарьн шекьрдарийа хԝә Йаһоԝа у Исарʹа бьдьнә кʹьфше?

⁵ Әм жи дькарьн шекьрдарийа хԝә Йаһоԝа у Исарʹа нишан кьн у пе ԝәʹдә, ԛәԝат у пʹәрʹе хԝә пьштгьрийа шьхӧле Пʹадшатийа Хԝәде бькьн. Мәсәлә, әм дькарьн пьштгьрийа шьхӧле авакьрьне  у тʹәзәкьрьна авайед бона һʹәбандьна Йаһоԝа, бькьн.

6. Чьма әм дькарьн бежьн, кӧ кʹьрʹин пʹешкʹешәкә мәхсус ә бона һәр кәси?

⁶ Йаһоԝа у Иса мә гәләк һʹьз дькьн. Һʹьзкьрьна ԝан мә һелан дькә, кӧ әм жи ԝан һʹьз бькьн (1 Йуһʹәнна 4:10, 19). Һәрге әм баш фәʹм бькьн кӧ Иса жийина хԝә бона мә дайә, әме ԝана һе зедә һʹьз бькьн. Әв һʹьзкьрьн дьле Паԝлосе шандида жи һәбу, у әԝи шекьрдарийа хԝә ӧса ани зьмен: «Кӧрʹе Хԝәде … әз һʹьз кьрьм у щанийа хԝә бона мьн да дәр» (Галати 2:20). Сәр һʹиме кʹьрʹине Йаһоԝа мә бәрбь хԝә дькʹьшинә, ԝәки әм бькарьбьн бьбьнә достед ԝи (Йуһʹәнна 6:44). Бәле, Йаһоԝа тьштәки ԛәнщ дьле тәда дитийә у сәва кӧ тӧ бьби досте ԝи, әԝи ԛимәта һәри мәзьн дайә. Гәло әв йәк тә һелан накә, ԝәки тӧ Йаһоԝа у Иса һе зедә һʹьз бьки? Ԝе баш бә кӧ әм әве пьрсе бьдьнә хԝә: «Гәло әв һʹьзкьрьн мьн дәʹф дьдә, кӧ әз тьштәки бькьм?»

7. Чаԝа кӧ сәр шькьл те кʹьфше, әм ча дькарьн нишан кьн, кӧ әм Йаһоԝа у Иса һʹьз дькьн? (2 Корьнтʹи 5:14, 15; 6:1, 2)

⁷ Һʹьзкьрьна мә һьндава Хԝәде у Иса Мәсиһ мә һелан дькә, ԝәки әм мәрьва жи һʹьз бькьн (Бьхунә 2 Корьнтʹи 5:14, 15; 6:1, 2). Мәсәлә, гава әм мьзгинийа хере бь дьл у щан бәла дькьн, әм һʹьзкьрьна хԝә нишан дькьн. Әм мьзгинийе һʹәмуйарʹа бәла дькьн. Фьрԛи тʹӧнә мәрьв жь чь мьләти нә, сәр чь зьмани хәбәр дьдьн, кʹәсиб, дәԝләти, хԝәнди йан нәхԝәнди нә, бәр чʹәʹве мә гьшк йәк ьн. Ләма жи әм ль гора ԛьрара Йаһоԝа һәрәкʹәт дькьн, йе кӧ «дьхԝазә һʹәму мәрьв хьлаз бьн у рʹастийе нас кьн» (1 Тимотʹейо 2:4).

8. Әм чаԝа дькарьн нишан кьн, кӧ әм хушк-бьред хԝә һʹьз дькьн?

⁸ Кәсе кӧ һʹьзкьрьна хԝә хушк-бьрарʹа  нишан дькә, избат дькә, кӧ әԝ Йаһоԝа Хԝәде у Иса Мәсиһ һʹьз дькә (1 Йуһʹәнна 4:21). Әм бь дьл у щан дькʹәвьнә һʹәйра хушк-бьра, у гава әԝана тәнгасийа дькʹьшиньн, әм кʹеләка ԝан ьн у али ԝан дькьн. Гава мәрьве ԝани һʹьзкьри дьмьрә, әм дьчьн сәрхԝәшийа ԝан у дьлбинийе дьдьнә ԝан. Гава әԝана нәхԝәш дькʹәвьн, әм дьчьн тʹәсәлийа ԝан дькьн. У гава әԝана дьлтәнг ьн, чь жь дәсте мә те әм дькьн, ԝәки бәр дьле ԝанда бен (2 Корьнтʹи 1:3-7; 1 Тʹесалоники 5:11, 14). Әм тʹьме бона ԝан дӧа дькьн, чьмки әм заньн кӧ «дӧайе йе рʹаст гәләки ԛәԝат ә у һʹӧкӧм дькә» (Аԛуб 5:16).

9. Диса ча әм дькарьн нишан кьн, кӧ әм хушк-бьред хԝә һʹьз дькьн?

⁹ Һәрге әм гәләк хирәт бькьн, ԝәки тʹәви хушк-бьра әʹдьлайеда бьн, әме ӧса избат кьн кӧ әм бь рʹасти ԝана һʹьз дькьн. Әм дьхԝазьн бахшандьнеда чʹәʹв бьдьнә Йаһоԝа Хԝәде. Йаһоԝа һишт ԝәки Кӧрʹе ԝи бона гӧнед мә әʹмьре хԝә бьдә. Ләма жи, һәрге кәсәки һьмбәри мә гӧнә кьрьбә, гәрәке әм жи һазьр бьн ԝәки ԝи жь дьл бьбахшиньн. Әм нахԝазьн мина ԝи хӧламе хьраб бьн, йе кӧ Иса мәтʹәлока хԝәда бәʹса ԝи кьрьбу. Ахайе ԝи дәйне ԝийә мәзьн бахшандьбу ԝи, ле һәла һе паши ве йәке жи, әԝи хӧлами нәхԝәст дәйнәки бьчʹук йе хӧламәки дьн, бьбахшинә (Мәтта 18:23-35). Һәрге ортʹа тә у хушк йан бьракида проблемәк пешда бе, гәло тӧ дькари гава пешьн бавежи, ԝәки һун пешийа Биранине ль һәв бен? (Мәтта 5:23, 24) Кәсед кӧ ӧса дькьн нишан дькьн, ԝәки әԝана жь дьл Йаһоԝа у Иса Мәсиһ һʹьз дькьн.

10-11. Рʹуспи чаԝа дькарьн нишан кьн кӧ әԝана Йаһоԝа Хԝәде у Иса һʹьз дькьн? (1 Пәтрус 5:1, 2)

¹⁰ Гәло рʹуспи чаԝа дькарьн нишан кьн, кӧ әԝана Йаһоԝа Хԝәде у Иса һʹьз дькьн? Рʹуспи гәрәке бона пәзед Иса Мәсиһ хәм бькьн (Бьхунә 1 Пәтрус 5:1, 2). Иса мәʹна ве йәке Пәтрусе шандирʹа зәлал кьр. Паши кӧ Пәтрус Иса се щара инкʹар кьрьбу, әԝи гәләк дьхԝәст избат кә, ԝәки әԝ Иса һʹьз дькә. Паши рʹабуна хԝә жь мьрьне, Иса жь Пәтрус пьрси: «Шьмһʹуне кӧрʹе Йуһʹәнна, тӧ мьн һʹьз дьки?» Әм дькарьн баԝәр бьн, кӧ Пәтрус һәр тьшт кьр, ԝәки һʹьзкьрьна хԝә Ахайе хԝәрʹа избат кә. Иса Пәтрусрʹа гот: «Шьвантийе пәзед мьн бькә» (Йуһʹәнна 21:15-17). У һʹәта хьлазийа әʹмьре хԝә, Пәтрус бь дьл у щан бона пәзед Ахайе хԝә хәм дькьр у ӧса избат кьр, ԝәки әԝ Иса һʹьз дькә.

¹¹ Рʹуспино, һʹәфтийед пешийа у паши Биранине, һун чаԝа дькарьн избат кьн, ԝәки әв готьнед Иса кʹижан кӧ әԝи Пәтрусрʹа готьбу, бона ԝә жи гәләк фәрз ьн? Һун дькарьн мина шьванед дьлован тʹьме дьле хушк-бьра ԛәԝи кьн. Илаһи али ԝан бькьн, дьле кʹижана һьндава рʹастийе сар буйә, ԝәки әԝана вәгәрʹьн щәм Йаһоԝа (Һәзәԛел 34:11, 12). Бь ви щурʹәйи, һун дькарьн нишан кьн, кӧ һун Йаһоԝа у Иса һʹьз дькьн. Ӧса жи һун дькарьн тʹәви хԝәндәкʹаред Кʹьтеба Пироз у кәсед кӧ тенә сәр Биранине хәбәр дьн у дьл бьдьнә ԝан. Әм дьхԝазьн бь дьлгәрми ԝана сьлав кьн, чьмки әм баԝәр ьн, кӧ әԝана жи рʹожәке ԝе бьбьн шагьртед Иса.

12. Гьлийед Иса кӧ әԝи шәва пешийа мьрьна хԝә готьбу, чьма мерхасийе дьдә мә? (Йуһʹәнна 16:32, 33)

¹² Шәва пешийа мьрьна хԝә, Иса шагьртед хԝәрʹа ӧса готьбу: «Һуне дьнйайеда тәнгасийе бьбиньн, ле мерхас бьн! Мьн дьнйа кьрә бьндәсте хԝә» (Бьхунә Йуһʹәнна 16:32, 33). Гәло чь али Иса  дькьр, ԝәки әԝ мьԛабьли дьжмьнед хԝә бьсәкьнә у һʹәта хьлазийа әʹмьре хԝә, амьн бьминә? Әԝи хԝә дьспарт Йаһоԝа. Иса заньбу ԝәки тәнгасийед кӧ һатьбун сәре ԝи, ԝе бенә сәре шагьртед ԝи жи. Ләма жи, әԝи жь Йаһоԝа лава кьр, кӧ әԝ ԝана бьпарезә (Йуһʹәнна 17:11). Әв йәк чьрʹа мерхасийе дьдә мә? Чьмки Йаһоԝа жь һʹәму дьжмьнед мә ԛәԝаттьр ә (1 Йуһʹәнна 4:4). Йаһоԝа Хԝәде һәр тьшти дьвинә. Һәрге әм хԝә бьсперьн Йаһоԝа, әԝе али мә бькә кӧ әм ԝәʹде тьрс у хофе жи мерхас бьминьн.

13. Усьве Аримәтйайи мерхасийа хԝә ча нишан кьр?

¹³ Ԝәрьн әм дина хԝә бьдьн мәсәла Усьве Аримәтйайи. Әԝ нав щьмәʹта хԝәда йәки хԝәйиԛәдьр бу. Әԝ әндәмәки Щьвина Гьрәгьра бу, демәк әндәме диԝана һәри бьльнд йа Щьһуйа. Гава Иса сәр әʹрде бу, сьстбуна Усьв әԝ бу кӧ әԝ мәрьва дьтьрсийа. Чаԝа кӧ Йуһʹәнна дәрһәԛа ԝи готьбу, әԝ «шагьрте Иса бу, ле жь тьрса щьһуйа хԝә әʹйан нәдькьр» (Йуһʹәнна 19:38). Усьв чьԛас жи дьхԝәст мьзгинийа Пʹадшатийе нас бькә жи, әԝи баԝәрийа хԝә һьндава Иса бәр кәсед дьн әшкәрә нәдькьр. Бешьк, Усьв дьтьрсийа кӧ ԛәдьре хԝә нав мьләте хԝәда ӧнда кә. Ле чаԝа Кʹьтеба Пироз дьбежә, Усьв паши мьрьна Иса Мәсиһ «тӧрӧш кьр, чу щәм Пилато, щьнйазе Иса же хԝәст» (Марԛос 15:42, 43). Һьнгева, Усьв вәнәдьшарт кӧ әԝ шагьртәки Иса Мәсиһ йә.

14. Һәрге тӧ мәрьвед дәр-дора хԝә дьтьрси, тӧ дькари чь бьки?

¹⁴ Гәло тӧ жи мина Усьв щарна мәрьвед дәр-дора хԝә дьтьрси? Мәкʹтәбеда йан сәр хәбате, гәло тӧ щарна шәрм дьки бежи кӧ тӧ Шәʹде Йаһоԝа йи? Гәло тӧ шәрм дьки кӧ бәлакьрьна мьзгинийе дәстпеки, йан жи бейи ньхӧмандьне, чьмки тӧ дьтьрси һәла кәсед дьн ԝе сәр тә чь бежьн? Изьне нәдә ԝәки һәст у фькьред ӧса бьбьн сәбәб, ԝәки тьштед рʹаст нәки. Жь дьл Йаһоԝарʹа дӧа бькә. Жь ԝи бьхԝазә кӧ әԝ мерхасийе бьдә тә, ԝәки тӧ бькарьби ԛьрара ԝи бини сери. Гава тӧ бьвини ча Йаһоԝа ԛәԝате дьдә тә, дьле тә ԝе дьһа ԛәԝи бә (Ишайа 41:10, 13).

15. Паши кӧ Иса шагьртед хԝәрʹа әʹйан бу, әԝ шабуна ԝан бәрбь чь ԝана һелан кьр? (Луԛа 24:52, 53)

¹⁵ Паши мьрьна Иса Мәсиһ, шагьртед ԝи гәләк дьлтәнг бун. Һәла хԝә дайнә дәԝса ԝан. Ԝана нә кӧ тʹәне достәки  дәлал ӧнда кьр, ле ԝана ӧса тʹәхмин дькьр кӧ те бежи әԝана бе һеви ман (Луԛа 24:17-21). Ле гава Иса шагьртед хԝәрʹа әʹйан бу, әԝи ԝанрʹа шьровәкьр, кӧ пʹехәмбәртийед Кʹьтеба Пироз ча сәр ԝи һатьнә сери. Ӧса жи, Иса щабдарикә фәрз да ԝан (Луԛа 24:26, 27, 45-48). Паши 40 рʹожи, Иса чу ль әʹзмана. Ԝи чахи хәмгинийа шагьртед ԝи дәрбаз бу у шабун кʹәтә дьле ԝан. Әԝана гәләк ша бун, чьмки ԝана заньбу кӧ Ахайе ԝан сах ә у ԝе али ԝан бькә, ԝәки шьхӧле хԝәйә тʹәзә биньн сери. Әԝ шабун ԝана дәʹф дьда ԝәки тʹьме пәсьне Йаһоԝа бьдьн (Бьхунә Луԛа 24:52, 53; Кʹаред Шандийа 5:42).

16. Әм жь мәсәла шагьртед Иса чь һин дьбьн?

¹⁶ Әм жь мәсәла шагьртед Иса дькарьн чь һин бьн? Әм дькарьн хьзмәтийеда шабуне бьстиньн, нә тʹәне һʹәфтийед пешийа у паши Биранине, ле тʹәмамийа сале. Жь бо ве йәке, гәрәке әм шьхӧлед Пʹадшатийа Хԝәде жийина хԝәда дайньн сәр щийе пешьн. Мәсәлә, гәләк кәса шьхӧлед хԝә ӧса организә кьрьнә, ԝәки бькарьбьн мьзгинийе бәла кьн, һәрʹьн щьвата у ԛӧльхкьрьна тʹәви малбәте дәрбаз кьн. Һьнә хушк-бьред мә сафи кьрьнә, ԝәки һьнә тьштед материали ԛазанщ нәкьн, йед кӧ бь ньһерʹандьна гәләк мәрьва лазьм ьн, сәва кӧ бькарьбьн һе зедә аликʹарийе бьдьн щьвата хԝә йан һәрʹьн щики ӧса, кʹидәре кӧ мьзгинван лазьм ьн. Рʹаст ә, сәва кӧ әм бькарьбьн бәрдәԝам кьн Йаһоԝарʹа хьзмәт кьн, мәрʹа сәбьр лазьм ә, ле Йаһоԝа соз дайә кӧ һәрге әм шьхӧлед Пʹадшатийа ԝи жийина хԝәда дайньн сәр щийе пешьн, әԝе мә гәләк кʹәрәм кә (Мәтʹәлок 10:22; Мәтта 6:32, 33).

17. Тә бона һʹәфтийед пешийа у паши Биранине кʹижан нет хԝәрʹа данийә? (Бьньһерʹә шькьл.)

¹⁷ Әм һивийа ԝе рʹоже нә, гава Сешәма 4 Нисане, Биранина мьрьна Иса дәрбаз кьн. Ле ԝе баш бә кӧ әм ида ньһада жийин у мьрьна Иса, у һʹьзкьрьна кӧ әԝи у Йаһоԝа мәрʹа нишан кьрьнә, биньн бира хԝә. Һʹәфтийед пешийа у паши Биранине, бона ве йәке һәр мәщале бьдә хәбате у ԝәʹдә вәԛәтинә, ԝәки сәр ԛәԝьмандьнед һʹәфтийа хьлазийа жийина Иса Мәсиһ, кʹур бьфькьри (бьньһерʹә бәрнама щьвате mwb19.4, рʹупʹ. 4). Гава тӧ рʹезед дәрһәԛа жийина Иса дьхуни, дина хԝә бьдә рʹезед кӧ шекьрдари, һʹьзкьрьн, мерхаси у шабуна тә зедә дькьн. Паше бьфькьрә һәла тӧ чаԝа дькари шекьрдарийа хԝә жь дьл нишан бьки. Тӧ дькари баԝәр би кӧ Иса ԛимәт дькә һәр тьште кӧ тӧ ԝәʹде Биранине дьки, сәва кӧ ԝи бини бира хԝә (Әʹйанти 2:19).