1. Әдәнеда, Йаһоԝа чь әʹйан кьр дәрһәԛа дьжмьне мә?

БЕШЬК, Адәм заньбу ԝәки мәʹр нькарьн хәбәр дьн. Ләма жи дьбәкә әԝ дьфькьри, ԝәки әʹфьринәки рʹӧһʹани бь ви мәʹри тʹәви Һеԝайе хәбәр дайә (Дәстп. 3:1-6). Дькарьн бежьн, ԝәки Адәм у Һеԝайе дәрһәԛа ԝи кәсе рʹӧһʹани тьштәк ньзаньбун. Йәкә, Адәм бь һʹәмде хԝә бьжарт кӧ пьшта хԝә бьдә Баве хԝәйи әʹзмана у тʹәви ԝи кәсе нәнас бу йәк, чьмки мьԛабьли ԛьрара Хԝәде дәркʹәт (1 Тимтʹ. 2:14). Ле Йаһоԝа дәрберʹа дәстпекьр дәрһәԛа ԝи дьжмьне кӧ Адәм у Һеԝа хальфандьн, һе зедә тьшт әʹйан кә у соз да, ԝәки ԝе ахьрийеда ԝи кʹӧта кә. Ле Йаһоԝа ӧса жи пешда гот, ԝәки әԝ әʹфьрине рʹӧһʹани кӧ бь мәʹр хәбәр да, ԝе мьԛабьли ԝан дәре йед кӧ Хԝәде һʹьз дькьн (Дәстп. 3:15).

2, 3. Мәʹни дьбәкә чь бу кӧ дәрһәԛа Шәйтʹан, пешийа һатьна Мәсиһ һьндьк дьһатә готьне?

² Йаһоԝа наве ԝи мьлйакʹәте кӧ мьԛабьли ԝи рʹабу, тʹӧ щар әʹйан нәкьрьбу. * У тʹәне паши ԝәкә 2 500 сала Хԝәде сафи кьр, ԝәки сәрнаве ԝи дьжмьни әʹйан кә (Иб. 1:6). Бь рʹасти Ньвисаред  Ибранида тʹәне се кʹьтеб бәʹса Шәйтʹан дькьн, 1 Дирок, Ибо, у Зәкәрйа. Әԝ нав те һʹәсабе «Йе Мьԛабьл». Ле гәло чьрʹа пешийа һатьна Мәсиһ дәрһәԛа ԝи дьжмьни һьндьк һатә готьне?

³ Те кʹьфше Йаһоԝа нәхԝәстийә, ԝәки Ньвисаред Ибранида гәләк тьшт дәрһәԛа Шәйтʹан у кьред ԝи бе готьне. Нета Йаһоԝайә сәрәкә Ньвисаред Ибранида әԝ бу, ԝәки Мәсиһ бе әʹйанкьрьне у щьмәʹта Хԝәде ԝи нас кә (Луԛа 24:44; Галт. 3:24). Гава әԝ йәк һатә сери у Мәсиһ һат, Йаһоԝа ԝи у шагьртед ԝи да хәбате, сәва һе зедә әʹйан кьн дәрһәԛа Шәйтʹан у ԝан мьлйакʹәта, йед кӧ тʹәви ԝи бунә йәк. * Әԝ йәк әʹщебмайи нинә, чьмки Иса у йед бьжарти ԝе ԛьрʹа Шәйтʹан у пәйчуйед ԝи биньн (Рʹом. 16:20; Әʹйан. 17:14; 20:10).

4. Чьрʹа әм гәрәке жь Мире-щьна нәтьрсьн?

⁴ Пәтрусе шанди Шәйтʹан Мире-щьна нав дькә ча «шер», йе кӧ «мьрʹә-мьрʹа ԝи йә», ле Йуһʹәнна ԝи нав дькә «мәʹр» у «зийа» (1 Пәт. 5:8; Әʹйан. 12:9). Ле әм гәрәке жь Шәйтʹан нәтьрсьн, чьмки ԛәԝата ԝи бь синор ә. (Бьхунә Аԛуб 4:7.) Йаһоԝа, Иса у мьлйакʹәтед амьн, мә хԝәй дькьн. Әм пе аликʹарийа ԝан дькарьн мьԛабьли дьжмьне хԝә дәрен. Ле әм гәрәке бьзаньбьн щаба ԝан се пьрсед сәрәкә: Ԛәԝат у һʹӧкӧме Шәйтʹан чьԛас ә? Әԝ һʹӧкӧме хԝә ча дьдә хәбате? Гәло һәнә тьшт кӧ әԝ нькарә бькә? Ԝәрә әм щаба ван пьрса шеԝьр кьн, у ӧса жи бьньһерʹьн чь дәрса дькарьн һин бьн.

5, 6. Чьрʹа сәрԝертийед мәрьва нькарьн гӧһастьнед ӧса бькьн кӧ мәрьв гәләк һʹәԝщә нә?

⁵ Гәләк мьлйакʹәт тʹәви рʹабәрибуна Шәйтʹан бунә йәк. Пешийа Селаве, Шәйтʹан һьнә жь ԝан мьлйакʹәта һелан кьр, ԝәки тʹәви жьна бенамусийе бькьн. Кʹьтеба Пирозда дәрһәԛа зийа, демәк Шәйтʹан, те готьне ԝәки әԝи жь се пʹара пʹарәкә стәйркед әʹзмен тʹәви хԝә кʹьшанд (Дәстп. 6:1-4; Щьһуд. 6; Әʹйан. 12:3, 4). Чахе әԝан мьлйакʹәта пьшта хԝә данә малбәта Хԝәде, ԝана алийе Шәйтʹан гьрт у хԝә кьрьн бьн һʹӧкӧме ԝи. Әԝ рʹабәр нә кӧ тʹәне кʹомәк ә, йа кӧ чәтьнайа пешда тинә, ле Шәйтʹан чʹәʹв дайә Пʹадшатийа Хԝәде, у сәрԝертийа хԝә кӧ найе дитьн, саз кьрийә. Ве сәрԝертийеда әԝ ә пʹадша, у әԝи һʹӧкӧм дайә щьна жи ԝәки сәрԝертийе сәр дьнйайе бькьн (Әфәс. 6:12).

⁶ Шәйтʹан бь сайа сәрԝертийа хԝәйә кӧ найе дитьн, һʹӧкӧм дькә сәр һʹәму сәрԝертийед мәрьва. Әԝ йәк рʹьнд һатә кʹьфше чахе Шәйтʹан «һʹәму пʹадшатийед дьнйайе» нишани Иса кьр у жерʹа гот: «Әзе рʹәԝш у сәрԝерийа ван һʹәмуйа бьдьмә дәсте тә, чьмки мьнрʹа һатийә дайине у кʹерʹа кӧ бьхԝазьм әзе бьдьме» (Луԛа 4:5, 6). Бәле, һәнә гәләк сәрԝертийед мәрьва кӧ тьштед баш дькьн бона бажарванед хԝә, у һьнә сәрԝер бь дьле тʹәмьз дьхԝазьн али мәрьва бькьн. Ле йәкә тʹӧ сәрԝер нькарә гӧһастьнед ӧса бькә, кӧ мәрьв гәләк һʹәԝщә нә (Зәб. 146:3, 4; Әʹйан. 12:12).

7. Шәйтʹан ча хенщи сәрԝертийед мәрьва, ӧса жи рʹелигийа ԛәлп у система комерси дьдә хәбате? (Бьньһерʹә шькле әʹԝльн.)

⁷ Шәйтʹан у щьн рʹелигийед ԛәлп у система комерси дьдьнә хәбате, сәва «тʹәмамийа дьне» бьхальфиньн (Әʹйан. 12:9). Шәйтʹан дәрһәԛа Йаһоԝа бь рʹелигийед ԛәлп дәрәԝа бәла дькә. Хенщи ве йәке, Мире-щьна ӧса дькә ԝәки мәрьв наве Хԝәде бир кьн (Йерәм. 23:26, 27). Ләма жи гәләк мәрьвед дьлсах дьфькьрьн ԝәки әԝана Хԝәде дьһʹәбиньн, ле бь рʹасти щьна дьһʹәбиньн (1 Корн. 10:20; 2 Корн. 11:13-15). Шәйтʹан ӧса жи бь сайа система  комерси тьштед ԛәлп бәла дькә. Мәсәлә, әԝ систем мәрьва һин дькә, ԝәки әԝана ԝе бәхтәԝар бьн һәрге пәй пʹәра кʹәвьн у гәләк һәбуке хԝәрʹа тʹоп кьн (Мәтʹлк. 18:11). Әԝед кӧ ве дәрәԝийе баԝәр дькьн, әʹмьре хԝәда дьбьнә хӧламед «һәбуке», нә кӧ хӧламед Хԝәде (Мәт. 6:24). Ахьрийеда, һʹьзкьрьна ԝанә һьндава һәбуке, дькарә һʹьзкьрьна ԝанә һьндава Хԝәде бьхәньԛинә (Мәт. 13:22; 1 Йуһʹн. 2:15, 16).

8, 9. а) Әм кʹижан дӧ дәрса һин дьбьн жь мәсәла Адәм, Һеԝайе у мьлйакʹәтед рʹабәр? б) Чьрʹа кʹар ә кӧ әм заньн ԝәки Шәйтʹан сәрԝертийе сәр ве дьнйайе дькә?

⁸ Әм жь мәсәла Адәм, Һеԝайе у мьлйакʹәтед рʹабәр дӧ дәрса һин дьбьн. Дәрса пешьн әԝ ә, ԝәки тʹәне дӧ рʹе һәнә у әм гәрәке йәке бьжберьн. Демәк, йан әм алийе Йаһоԝа бьгьрьн у жерʹа амьн бьминьн, йан жи хԝә бькьнә бьн дәсте Шәйтʹан (Мәт. 7:13). Дәрса дӧда жи әԝ ә, ԝәки кәсед кӧ алийе Шәйтʹан дьгьрьн, тʹәне кʹара ԝәʹдәлу дьстиньн. Адәм у Һеԝа бунә хԝә сәри хԝә сәва хԝәха сафи кьн чь ԛәнщ ә у чь хьраб e. Ле щьна жи һьнә һʹӧкӧм стандьн сәр сәрԝертийед мәрьва (Дәстп. 3:22). Бәле, әԝед кӧ алийе Шәйтʹан дьгьрьн, тʹьме ахьрийа хьраб дьстиньн у ԛә кʹаре жи настиньн (Иб. 21:7-17; Галт. 6:7, 8).

⁹ Ле чьрʹа кʹар ә кӧ әм заньн ԝәки Шәйтʹан һʹӧкӧм дькә сәр дьнйайе? Занәбуна ве йәке али мә дькә кӧ рʹаст бьньһерʹьн сәр сәрԝера у хьзмәткʹаред дәԝләте, у ӧса жи мә һелан дькә кӧ мьзгинийе бәла кьн. Әм фәʹм дькьн ԝәки Йаһоԝа дьхԝазә әм ԛәдьре сәрԝеред дәԝләте бьгьрьн (1 Пәт. 2:17). У әԝ дьхԝазә әм гӧрʹа ԛанунед сәрԝертийед мәрьва бькьн, һәрге әԝана мьԛабьли принсипед ԝи начьн (Рʹом. 13:1-4). Ле әм ӧса жи заньн ԝәки әм гәрәке тʹәвнәбуйине хԝәй кьн, у пьштгьрийа тʹӧ партиакә политики йан жи сәрԝерәки нәкьн (Йуһʹн. 17:15, 16; 18:36). Әм заньн Шәйтʹан дьхԝазә наве Йаһоԝа беһӧрмәт кә, ләма жи әм һәр тьшти дькьн сәва мәрьва рʹастийа дәрһәԛа Хԝәде һин кьн. Әм фьрнаԛ дьбьн кӧ наве ԝи сәр мә йә у кӧ әм наве ԝи һьлдьдьн. Хенщи ве йәке, һʹьзкьрьна мә һьндава Хԝәде, жь һʹьзкьрьна һьндава пʹәра у һәбуке бьльндтьр у ԛимәттьр ә (Иша. 43:10; 1 Тимтʹ. 6:6-10).

10-12. а) Шәйтʹан кʹижан тʹәльк да хәбате сәва мьлйакʹәта бьхальфинә? б) Әм жь шашийа ԝан мьлйакʹәта чь дәрса һин дьбьн?

¹⁰ Шәйтʹан метʹодед ԛәԝи дьдә хәбате, сәва сәр мәрьва һʹӧкӧм бькә. Мәсәлә, әԝ тʹәлька датинә, ԝана дькә щерʹьбандьне у ӧса жи щара әԝ ԝана дьтьрсинә, сәва бькә бьн һʹӧкӧме хԝә.

 ¹¹ Дина хԝә бьдьне, Шәйтʹан ча бь һостәти тʹәльк да хәбате кӧ гәләк мьлйакʹәт хальфанд. Ча те кʹьфше Шәйтʹан гәләк ԝәхт ԝана леколин дькьр, сәва тедәрхә һәла ча ԝана бькʹьшинә алийе хԝә. Чахе һьнә мьлйакʹәт кʹәтьнә тʹәльке у тʹәви жьна бенамуси кьрьн, паше ԝанрʹа зарʹед тәрьки һатьнә буйине, йед кӧ тьрса хԝә дькьрьнә сәр мәрьва (Дәстп. 6:1-4). Хенщи тʹәлька бенамусийе, дьԛәԝьмә Шәйтʹан ӧса жи ԝан мьлйакʹәтед нәамьнрʹа соз да, кӧ әԝана ԝе һʹӧкӧмтийе бькьн сәр һʹәму мәрьва. Нета ԝи дьбәкә әԝ бу, ԝәки рʹе бьгьрә сәва пʹехәмбәртийа дәрһәԛа һатьна зӧрʹәта создайи, нәйе сери (Дәстп. 3:15). Чь жи һәбә, йәкә Йаһоԝа әԝ һʹәму нетед Шәйтʹан у мьлйакʹәтед рʹабәр бош-бәтал кьр, чахе Селав ани сәр дьне.

¹² Әм чь дәрсе һин дьбьн жь ве йәке? Бир нәкьн, тʹәлькед бенамусийе у хԝәһʹьзийе гәләк ԛәԝи нә. Мьлйакʹәтед кӧ пьшта Шәйтʹан гьртьн, пешийе сәр әʹзмана гәләк сала кʹеләка Хԝәде бун, ле йәкә гәләк жь ԝана нав хԝәда хԝәстьнед хьраб пешда анин. Һәрге мьлйакʹәт кʹәтьнә ве тʹәльке, илаһи әм гәрәке чьԛас фәсал бьн, ԝәки хԝәстьнед хьраб дьле мәда кʹокед хԝә нәдьн. Бәле, фьрԛи тʹӧнә әм чьԛас сала Йаһоԝарʹа хьзмәт дькьн, йәкә әм гәрәке тʹьме мьԛати дьле хԝә бьн (1 Корн. 10:12). Бәле, гәләк фәрз ә әм дьле хԝә леколин бькьн, тʹәрка фькьред бенамуси бькьн, у жь хԝәһʹьзийе у ԛӧрʹәбуне дур бьн. (Галт. 5:26; бьхунә Колоси 3:5).

13. Шәйтʹан диса кʹижан тʹәльке дьдә хәбате, у әм ча дькарьн хԝә жь ве тʹәльке хԝәй кьн?

¹³ Диса тʹәлькәкә Шәйтʹан кӧ гәләк мәрьв дькʹәвьне, әԝ һәйә сербази. Иро хенщи рʹелигийед ԛәлп, Шәйтʹан ӧса жи щурʹә-щурʹә ԝәʹдәдәрбазкьрьна дьдә хәбате, сәва мәрьварʹа һʹәԝас бә дәрһәԛа щьна пебьһʹәсьн. Мәсәлә, филм, листькед әләктроники, медийа, сербазийе у кʹочʹәктийе әʹйан дькьн ча тьштәки баш. Ле ча әм дькарьн хԝә хԝәй кьн сәва нәкʹәвьнә ве тʹәльке? Тʹәшкиләта Хԝәдеда әм гәрәке һивийе нибьн, кӧ мәрʹа ԝе бе готьне кʹижан ԝәʹдәдәрбазкьрьн щайиз ә кʹижан на. Һәр кәс жь мә гәрәке ль гора принсипед Хԝәде исафа хԝә һин кә (Ибрн. 5:14). Ле әме бьжартьнед билан бькьн, һәрге ширәта Паԝлосе шанди бьдьнә хәбате, демәк һʹьзкьрьна мә һьндава Хԝәде «һʹьләкʹари нибә» (Рʹом. 12:9). Әм дькарьн пьрсе бьдьнә хԝә: «Гәло бьжартьнед мьн бона ԝәʹдәдәрбазкьрьне ԝе нишан кьн, ԝәки әз дӧрʹу ниньм? Һәрге әԝ мәрьв, тʹәви кʹижани әз һинбуна Кʹьтеба Пироз дәрбаз дькьм, йан жи сәрледана дӧбарә дькьм, бьвиньн әз кʹижан ԝәʹдәдәрбазкьрьне дьжберьм, ԝе чь бьфькьрьн?» Кьред мә  чьԛас анәгори хәбәрдана мә бьн, һаԛас ԝе мәрʹа һеса бә нәкʹәвьнә тʹәлькед Шәйтʹан (1 Йуһʹн. 3:18).

14. Шәйтʹан бь чь дькарә мә бьтьрсинә, у ча әм дькарьн ԛәԝи бьминьн?

¹⁴ Шәйтʹан хенщи тʹәлька, ӧса жи дьхԝазә мә бьдә тьрсандьне, сәва әм Йаһоԝарʹа амьн нәминьн. Мәсәлә, әԝ дькарә сәрԝера бьдә хәбате, ԝәки әԝана шьхӧле мәйи бәлакьрьна мьзгинийе ԛәдәхә бькьн. Йан жи әԝ дькарә һәвалхәбатчи йан жи һәвалдәрсханед мә бьдә хәбате, сәва әԝана ԛәрфа мә бькьн, чьмки әм пе принсипед Кʹьтеба Пироз дьжин (1 Пәт. 4:4). Әԝ ӧса жи дькарә нәфәред мала мә бьдә хәбате, сәва әԝана рʹе мә бьгьрьн әм нәчьн щьвата (Мәт. 10:36). Ле ча әм дькарьн ԝан дәрәщада ԛәԝи бьсәкьньн? Йа пешьн, әм гәрәке әʹщебмайи нәминьн чахе дькʹәвьнә ԝан дәрәщада, чьмки әм фәʹм дькьн ԝәки Шәйтʹан тʹәви мә шәрʹ дькә (Әʹйан. 2:10; 12:17). Ӧса жи әм гәрәке бир нәкьн әв пьрса лапә фәрз: Шәйтʹан дьбежә ԝәки әм Йаһоԝарʹа хьзмәт дькьн, тʹәне һьнге гава мәрʹа дәст дьдә, ле тәнгасийада әме пьшта хԝә бьдьнә Хԝәде (Иб. 1:9-11; 2:4, 5). Әм гәрәке тʹьме ԛәԝате жь Йаһоԝа бьхԝазьн, гава рʹасти щерʹьбандьна тен. Тʹӧ щар әм гәрәке бир нәкьн, ԝәки Хԝәде ԝе мә нәһелә (Ибрн. 13:5).

15. Гәло Шәйтʹан дькарә зоре мә бькә кӧ әм тьштед ӧса бькьн, чь кӧ нахԝазьн? Шьровәкьн.

¹⁵ Шәйтʹан нькарә зоре мәрьва бькә кӧ мьԛабьли хԝәстьна хԝә һәрʹьн (Аԛуб 1:14). Гәләк мәрьв бь нәзанийа хԝә, нә жи тедәрдьхьн ԝәки алийе Шәйтʹан дьгьрьн. Ле чахе әԝана рʹастийе педьһʹәсьн, һәр кәс жь ԝан хԝәха дьжберә кʹерʹа хьзмәт кә (Кʹар. Шанд. 3:17; 17:30). Һәрге мә дьле хԝәда сафи кьрийә кӧ ԛьрара Хԝәде биньн сери, Шәйтʹан тʹӧ тьшти нькарә бькә сәва амьнийа мә һьлшинә (Иб. 2:3; 27:5).

16, 17. а) Шәйтʹан у щьнед ԝи диса чь нькарьн бькьн? б) Чьрʹа әм гәрәке нәтьрсьн бь дәнге бьльнд Йаһоԝарʹа дӧа кьн?

¹⁶ Диса һәнә тьштед ӧса кӧ Шәйтʹан у щьнед ԝи нькарьн бькьн. Мәсәлә, Кʹьтеба Пирозда тʹӧ щики найе готьне, ԝәки әԝана дькарьн һʹьше мә у дьле мә бьхуньн, тʹәне Йаһоԝа у Иса дькарьн (1 Сам. 16:7; Марԛ. 2:8). Әм заньн ԝәки Шәйтʹан у щьнед ԝи мә дьбьһен, гава әм хәбәр дьдьн йан жи бь дәнге бьльнд дӧа дькьн. Ле гәло лазьм ә әм бьтьрсьн, ԝәки әԝана чь кӧ дьбьһен, ԝе мьԛабьли мә бьдьнә хәбате? Тʹӧ щар на! Ле чьрʹа? Әм заньн Мире-щьна мә дьвинә, ле әм натьрсьн кьред ԛәнщ бькьн кʹижан кӧ Йаһоԝа хԝәш тен. Ӧса жи, әм заньн кӧ әԝ мә дьбьһе чахе әм бь дәнге бьльнд дӧа дькьн, ле әм гәрәке нәтьрсьн. Кʹьтеба Пирозда һәнә сәрһатийед гәләк хьзмәткʹаред Хԝәде, йед кӧ бь дәнге бьльнд дӧа дькьрьн, у тʹӧ щики найе готьне, ԝәки әԝана дьтьрсийан кӧ Мире-щьна ԝе ԝана бьбьһе (1 Пʹадш. 8:22, 23; Йуһʹн. 11:41, 42; Кʹар. Шанд. 4:23, 24). Һәрге хәбәрдан у кьред мә ль гора ԛьрара Хԝәде нә, әм гәрәке дӧдьли нәбьн кӧ Йаһоԝа ԝе нәһелә, ԝәки Мире-щьна зийанәкә ӧса бьдә мә, кӧ жийина һʹәта-һʹәтайе нәстиньн. (Бьхунә Зәбур 34:7.)

¹⁷ Әм гәрәке дьжмьне хԝә рʹьнд нас бькьн, ле әм гәрәке тʹӧ щар жь ԝи нәтьрсьн. Пе аликʹарийа Йаһоԝа һәла һе мәрьвед гӧнәкʹар жи дькарьн шәрʹда тʹәви Шәйтʹан сәркʹәвьн (1 Йуһʹн. 2:14). Һәрге әм мьԛабьли ԝи бьсәкьньн, әԝ ԝе жь мә бьрʹәвә (Аԛуб 4:7; 1 Пәт. 5:9). Шәйтʹан илаһи пәй щаһьла дькʹәвә. Ле гәло ча әԝана дькарьн ԛәԝи бьминьн у мьԛабьли ԝи бьсәкьньн? Готара дьнда әме щаба ве пьрсе шеԝьр кьн.