1, 2. а) Чьрʹа мәсәла ԝан хушк-бьра, йед кӧ ԝи щийида хьзмәт дькьн кʹидәре мәрьв кем гӧһ дьдьнә мьзгинийе, мә дьшьдиньн? (Бьньһерʹә шькле әʹԝльн.) б) Иса дәрһәԛа хьзмәтийа «щи-мьскʹәне» хԝәда чь гот? (Бьньһерʹьн спартьн.)

СЕРЖИО У ОЛИНДА жь Амәрикайе, жьн-мер ьн, йед кӧ ԝәкә 80 сали нә у пешәнг ьн. Ԝан пашԝәхтийа, жь бо еша ньгед хԝә чуйин-һатьн бона ԝан чәтьн буйә. Йәкә чаԝа ԝана бь дәһа сала дькьр, һʹәта иро әԝана шәбәԛе сьһʹәта һʹәфта дьчьнә мәйдане, кʹидәре кӧ гәләк мәрьв һәнә. Әԝана незики щийе сәкьнандьна отобусе дьсәкьньн у мәрьварʹа әʹдәбйәтед мә бәла дькьн. Һʹәчʹи зәʹф мәрьв дина хԝә надьнә ԝан, ле йәкә әв жьн-мер диса жи ԝедәре дьсәкьньн, у ԝан мәрьварʹа дькʹәньн йед кӧ ԝан дьньһерʹьн. Нивро, әԝана һеди-һеди дьчьн мала хԝә. Сьвәтьре диса сьһʹәта һʹәфта, әԝана дьчьнә мәйдане. Бь рʹасти әԝ жьн-мер нава саледа һәр һʹәфти шәш рʹожа, шәбәԛа мьзгинийа Пʹадшатийе бәла дькьн.

² Гәләк хушк-бьред мә мина Сержио у Олиндайе нав тʹәмамийа дьнйайе нава гәләк салада хьзмәт дькьн ԝан щийада,  кʹидәре мәрьв кем гӧһ дьдьнә мьзгинийе. Һәрге һун жи мьһаләкә ӧсада хьзмәт дькьн, әм дьхԝазьн бь дьл у щан бона сәбьра ԝә, пʹайе ԝә бьдьн. * Гәләк хушк-бьра, һәла һе жи йед щерʹьбанди, дьшьдьн жь бо амьнийа ԝә хьзмәтийеда. Дина хԝә бьдьне бәрпьрсийарәки мьһале чь гот: «Чахе әз тʹәви ԝан хушк-бьред амьн хьзмәт дькьм, әз пе мәсәла ԝан ԛәԝи дьбьм. Амьнийа ԝан мьн һелан дькә, ԝәки мерхас бьм у хьзмәтийа хԝә бәрдәԝам кьм. Мәсәла ԝан мьн дьлгәрм дькә».

3. Ве готареда әме кʹижан се пьрса шеԝьр кьн, у чьрʹа?

³ Сәва кӧ әм шьхӧле бәлакьрьна мьзгинийе кӧ Иса дайә мә, бь тʹәмами биньн сери, ԝәрә әм ве готареда щаба ԝан се пьрса шеԝьр кьн: Чьрʹа щара әм дьлтәнг дьбьн? Чаԝа әм дькарьн бәр бьдьн? Чь ԝе али мә бькә бәрдәԝам кьн бь сәбьр бәр бьдьн?

4. а) Паԝлос ча хԝә тʹәхмин дькьр чахе дьдит, кӧ гәләк Щьһу мьзгини ԛәбул нәдькьрьн? б) Чьрʹа Паԝлос хԝә ӧса тʹәхмин дькьр?

⁴ Һәрге һун бәрхԝә дькʹәвьн, чьмки щийе кӧ һун хьзмәт дькьн мәрьв кем гӧһ дьдьн мьзгинийе, бь рʹасти һун тʹәне ниньн, Паԝлос жи щара бәрхԝә дькʹәт бона ве йәке. Әԝи ԝәкә 30 салед хьзмәтийа хԝәда гәләк мәрьв кьрә шагьртед Мәсиһ (Кʹар. Шанд. 14:21; 2 Корн. 3:2, 3). Әԝи ӧса жи дьхԝәст гәләк Щьһуйа жи бинә сәр рʹийа рʹастийе, ле әԝ йәк дәсте ԝи нә дьһат. Гәләк жь ԝана Паԝлос ԛәбул нәдькьрьн, у һьнәка һәла һе жи ԝи дьзерандьн у пәй ԝи дькʹәтьн (Кʹар. Шанд. 14:19; 17:1, 4, 5, 13). Ле әв кьред ԝан һьндава Паԝлос гәло ча сәр ԝи һʹӧкӧм дьбу? Әԝи гот: «Әз бь Мәсиһ бе хельф рʹаст дьбежьм . . . әз гәләки бәр хԝә дькʹәвьм у кӧла дьле мьн жи кʹур ә» (Рʹом. 9:1-3). Чьрʹа Паԝлос ӧса хԝә тʹәхмин дькьр? Чьмки дьле ԝи сәр шьхӧле бәлакьрьна мьзгинийе бу. Әԝи Щьһуйарʹа мьзгини гьли дькьр, чьмки бона ԝан хәм дькьр у дьле ԝи дьшәԝьти бона ԝан. Ләма жи чахе Паԝлос дьдит кӧ әԝана рʹәʹма Хԝәде ԛәбул накьн, дьле ԝи дьешийа.

5. а) Чь мә һелан дькә кӧ мьзгинийе мәрьварʹа гьли кьн? б) Чьрʹа әʹщебмайи нинә кӧ щара әм бәрхԝә дькʹәвьн?

⁵ Әм жи мина Паԝлос мәрьварʹа мьзгинийе гьли дькьн, чьмки дьле мә сәр ԝан дьшәԝьтә у әм дьхԝазьн али ԝан бькьн (Мәт. 22:39; 1 Корн. 11:1). Әм заньн кӧ мәрьв дькарьн гәләк кʹәрәма бьстиньн, һәрге бьбьнә хьзмәткʹаред Йаһоԝа. Гава әм дьфькьрьн дәрһәԛа мәрьвед мьһала хԝәда, дьле хԝәда дьбежьн: «Хԝазьл ԝана гӧһ бьдана мә у пебьһʹәсийана кӧ әʹмьрәки чьԛас баш әԝана дькарьн ԛазанщ кьн!» Ләма жи әм бәрдәԝам дькьн ԝана һелан дькьн, ԝәки рʹастийа дәрһәԛа Йаһоԝа у ԛьрара ԝи һьндава инсанәте пебьһʹәсьн. Бьдьнә бәр чʹәʹве хԝә кӧ әм мәрьварʹа дьбежьн: «Мә ԝәрʹа пʹешкʹешәкә ԛимәт анийә. Һиви дькьн ԛәбул кьн!». Ле чахе мәрьв әве пʹешкʹеше ԛәбул накьн, бешьк әԝ йәк дьбә «кӧла дьле» мә. У гава әм бона ве йәке дьлтәнг дьбьн, әԝ найе һʹәсабе ԝәки әм баԝәрийеда сьст ьн, ле әԝ те һʹәсабе кӧ дьле мә сәр хьзмәтийе йә. Рʹаст ә әм бәрхԝә дькʹәвьн, ле диса жи сәбьр дькьн у шьхӧле хԝә бәрдәԝам дькьн. Елена, кӧ 25 сала зедәтьр пешәнг ә, дәрһәԛа ве йәке дьбежә: «Бәле, хьзмәти һеса нинә, ле йәкә тʹӧ шьхӧләки ӧса тʹӧнә кӧ дәԝса ԝи шьхӧли бьгьрә».

6. Әме кʹижан пьрсе шеԝьр кьн?

⁶ Чьрʹа әм дькарьн дӧдьли нәбьн, ԝәки әме хьзмәтийеда пешдачуйи бьн, фьрԛи  тʹӧнә әм кʹидәре жи хьзмәт кьн? Сәва щаба ве пьрса фәрз бьдьн, ԝәрә әм дӧ мәсәлед Иса шеԝьр кьн, кʹидәре те готьне кӧ чьрʹа лазьм ә «бәр» бьдьн (Мәт. 13:23). Мәсәла пешьн дәрһәԛа кʹола тьрийе йә.

7. а) Мәсәла Исада кʹе те һʹәсабе «рʹәзван», «кʹола тьрийе» у «чʹьԛьл»? б) Әме щаба кʹижан пьрсе пебьһʹәсьн?

⁷ Бьхунә Йуһʹәнна 15:1-5, 8. Дина хԝә бьдьне кӧ Иса чь готә шандийед хԝә: «Баве мьне бе рʹумәткьрьне, гава һун пе гәләк бәрдайине бьдьнә кʹьфше, кӧ һун бунә шагьртед мьн». Иса гот кӧ ве мәсәледа Йаһоԝа «рʹәзван ә», хԝәха әԝ «кʹола тьрийейә» рʹаст ә, шагьртед ԝи жи «чʹьԛьл» ьн. * Ле гәло чь те һʹәсабе бәр, кʹижан кӧ шагьртед Иса гәрәке бьдана? Ве мәсәледа Иса рʹастә-рʹаст набежә кӧ әԝ чь бәр ә, ле әԝи тьштәки ӧса гот, кӧ али мә дькә әм фәʹм кьн щаба ве пьрсе.

8. а) Чьрʹа мәсәла Исада, бәр нькарә бе һʹәсабе шагьртед тʹәзә? б) Йаһоԝа чьԛаси жь мә дәʹԝа дькә?

⁸ Иса дәрһәԛа Баве хԝә гот: «Һәр чʹьԛьле мьнва кӧ бәр надә әԝ дьбьрʹә». Демәк, щурʹәки дьн бежьн, Йаһоԝа мә ча хьзмәткʹаред хԝә һʹәсаб дькә тʹәне һьнге, һәрге әм бәр дьдьн (Мәт. 13:23; 21:43). Жь ве мәсәле әм дьвиньн, ԝәки бәр, кʹижан кӧ һәр Мәсиһи гәрәке бьдә, найе һʹәсабе әԝ шагьртед тʹәзә, йед кӧ мә али ԝан кьрийә бьбьнә шагьрт (Мәт. 28:19). Һәрге әԝ ӧса буйа, ль гора мәсәла Иса, чʹьԛьлед бебәр ԝе бьһатана һʹәсабе әԝ Шәʹдед Йаһоԝайи амьн, йед кӧ тʹӧ кәс нәкьрьнә шагьрт, чьмки хьзмәт дькьн щийе ӧса, кʹидәре кӧ һьндьк мәрьв мьзгинийе ԛәбул дькьн. Ле әԝ йәк нәрʹаст ә. Чьрʹа? Чьмки әм зоре тʹӧ кәси нькарьн бькьн ԝәки бьбьнә шагьрт. Һьн жи, Йаһоԝа Хԝәдейе һʹьзкьрьне йә, у әԝ тʹӧ щар жь хьзмәткʹаред хԝә тьштед ӧса дәʹԝа накә, кӧ жь ԛәԝата ԝан дәр бә. Әԝ тʹьме һаԛаси жь мә дьхԝазә, чьԛас әм дькарьн бькьн (Ԛан. Дщр. 30:11-14).

9. а) Әм кʹижан шьхӧлида бәр дьдьн? б) Әме кʹижан мәсәле шеԝьр кьн у чьрʹа?

⁹ Ԝәки ӧса нә, кʹижан ә әԝ бәр кӧ әм гәрәке бьдьн? Әшкәрә йә, ԝәки бәр әԝ шьхӧл ә, кʹижан кӧ һәр кәс жь мә ԝәкә ԛәԝата хԝә дькарә бькә. Ле гәло әԝ чь шьхӧл ә бь сайа кʹижани әм дькарьн «бәр» бьдьн? Әԝ һәйә бәлакьрьна мьзгинийа Пʹадшатийа Хԝәде * (Мәт. 24:14). Мәсәла Иса дәрһәԛа тʹохьмрʹәш ве йәке дьдә кʹьфше. Ԝәрә әм ве мәсәле шеԝьр кьн.

10. а) Мәсәла дәрһәԛа тʹохьмрʹәшда, чь те һʹәсабе тʹохьм у әʹрд? б) Чʹиле гәньм чь тинә?

¹⁰ Бьхунә Луԛа 8:5-8, 11-15. Мәсәла дәрһәԛа тʹохьмрʹәшда, бь симболик тʹохьм те һʹәсабе «хәбәра Хԝәде», демәк мьзгинийа Пʹадшатийе. Әʹрд те һʹәсабе дьле мерьв. Тʹохьме кӧ кʹәтийә сәр әʹрде ԛәнщ, шин бу у бу чʹил, бәʹса хәбәре чʹиле гәньм. Паше әԝ чʹил «сәд щар бәр дан». Ле чь щурʹә бәр дьдә әԝ чʹиле гәньм? Гәло әԝ диса чʹилед бьчʹук дьдә? На, әԝ тʹохьмед тʹәзә дьдә, кʹижан ахьрийеда ԝе бьбьнә чʹилед гәньм. Ве мәсәледа, тʹохьмәк сәд щара тʹохьм тинә. Гәло әԝ мәсәлә ча гьредайи йә тʹәви хьзмәтийа мә?

11. а) Чаԝа мәсәла дәрһәԛа тʹохьмрʹәш хьзмәтийа мәва гьредайи йә? б) Чаԝа әм тʹохьме Пʹадшатийе дьдьн?

¹¹ Сәва әве йәке рʹьнд фәʹм бькьн, ԝәрә әм биньн бира хԝә, кӧ ча гәләк сал пешда әм мьзгинийа Пʹадшатийе жь Шәʹдед Йаһоԝа йан жи дьбәкә жь де-бавед хԝәйи Мәсиһи пеһʹәсийан. Әԝана гәләк ша бун  чахе тедәрхьстьн, кӧ дьле мә нәрм ә сәва ԝи тʹохьме мьзгинийа Пʹадшатийе ԛәбул кә. Чаԝа мәсәла Исада әʹрде баш тʹохьм хԝәй кьр, ӧса жи мә әԝ әʹламәти ԛәбул кьр у хԝәй кьр. Ахьрийеда, әԝ тʹохьме мьзгинийа Пʹадшатийе кʹокед хԝә да, мәзьн бу, бу чʹил у паше ида һазьр бу сәва бәр бьдә. Чаԝа кӧ чʹиле гәньм бәр дьдә, демәк тʹохьмед тʹәзә дьдә, нә кӧ чʹилед тʹәзә, әм жи бәр дьдьн бь тʹохьме тʹәзә йе Пʹадшатийе, нә кӧ шагьртед тʹәзә. * Ле чаԝа әм тʹохьме тʹәзә йе Пʹадшатийе дьдьн? Һәр щар гава әм мьзгинийа дәрһәԛа Пʹадшатийе бәла дькьн, бь ве йәке әм әԝ тʹохьме кӧ дьле мәда һатьбу чандьне, дьрʹәшиньн (Луԛа 6:45; 8:1). Әԝ мәсәлә мә һин дькә, ԝәки гава әм мьзгинийа Пʹадшатийе бәла дькьн, әм «бь сәбьр бәре» хԝә дьдьн.

12. а) Әм чь дәрсе һин дьбьн жь мәсәлед Иса дәрһәԛа кʹола тьрийе у тʹохьмрʹәш? б) Ча әԝ дәрс сәр ԝә һʹӧкӧм дькә?

¹² Әм чь дәрсе дькарьн жь мәсәлед Иса дәрһәԛа кʹола тьрийе у тʹохьмрʹәш һин бьн? Әԝ мәсәлә мә дьдьнә фәʹмкьрьне, ԝәки бәрдайин гьредайи нинә ве йәкева кӧ мьһала мәда мәрьв гӧһ дьдьнә мә йан на. Дәԝсе, әԝ амьнийа мәва гьредайи йә. Паԝлос жи рʹастийа ве йәке да кʹьфше гава гот: «Һәр кәсе һәԛе хԝә бьстинә, ԝәкә хәбата хԝә» (1 Корн. 3:8). Демәк, әм һәԛе хԝә дьстиньн ль гора хәбата хԝә, нә кӧ ль гора ахьрийа хәбата хԝә. Хушкәкә мә бь наве Матилда, йа кӧ ида 20 сал ә пешәнг ә, дьбежә: «Дьле мьн бь шабуне тʹьжә йә, чьмки әз заньм кӧ Йаһоԝа шьхӧл у ԛәԝата мә кʹәрәм дькә».

13, 14. Ль гора Рʹомайи 10:1, 2, Паԝлос чьрʹа тʹәрька ԝан нәда, йед кӧ мьзгинийа Пʹадшатийе ԛәбул нәдькьрьн?

¹³ Чь ԝе али мә бькә, ԝәки бәрдәԝам кьн бь сәбьр бәр бьдьн? Чаԝа мә жоре гот, Паԝлос бәрхԝә дькʹәт бона Щьһуйед кӧ мьзгинийа Пʹадшатийе ԛәбул нәдькьрьн. Ле йәкә ԝи чахи жи әԝи тʹәрька ԝан нәдьда. Дина хԝә бьдьне, әԝи дәрһәԛа ԝан Щьһуйа чь гот: «Дӧа у хԝәстьна дьле мьн жь Хԝәде бона хьлазбуна Исраеле йә. Әз шәʹде  ԝана мә, кӧ әԝ һьндава Хԝәдеда хԝәйихирәт ьн, ле әв йәк бе занәбун ә» (Рʹом. 10:1, 2). Чь мәʹнийед Паԝлос һәбун кӧ әԝи хьзмәтийа хԝә бәрдәԝам дькьр?

¹⁴ Йа пешьн, Паԝлос шьровәкьр ԝәки әԝ бәрдәԝам дькә Щьһуйарʹа мьзгинийе бәла кә, чьмки әԝ «хԝәстьна дьле» ԝи бу. Паԝлос бь дьл у щан дьхԝәст, ԝәки әԝ Щьһу хьлаз бьн (Рʹом. 11:13, 14). Йа дӧда, Паԝлос гот кӧ әԝи бона хьлазбуна ԝан «дӧа . . . жь Хԝәде» дькьр. Әԝи дӧада лавайа Хԝәде дькьр сәва әԝ али ԝи бькә, ԝәки Щьһу мьзгинийа Пʹадшатийе ԛәбул кьн. Йа сьсийа, Паԝлос дәрһәԛа ван Щьһуйа гот: «Әԝ һьндава Хԝәдеда хԝәйихирәт ьн». Бәле, Паԝлос нав мәрьвада тьштед баш дьдит у тʹәхмин дькьр кӧ әԝана дькарьн бьбьнә хьзмәткʹаред Хԝәдейи хирәт, чаԝа әԝ хԝәха бу.

15. Әм ча дькарьн чʹәʹв бьдьнә Паԝлос? Мәсәла биньн.

¹⁵ Ча әм дькарьн чʹәʹв бьдьнә Паԝлос? Йа пешьн, әм гәрәке бь дьл бьхԝазьн мәрьвед ӧса бьвиньн, йед кӧ «бона жийина һʹәта-һʹәтайе кʹьфшкьри» нә. Йа дӧда, әм бь дӧа жь Йаһоԝа һиви дькьн, ԝәки дьле мәрьвед һʹәлал вәкә (Кʹар. Шанд. 13:48; 16:14). Хушкәкә мә бь наве Силвиана, йа кӧ ԝәкә 30 сала пешәнг ә, дьбежә: «Әз пешийа кӧ һʹәрьм мал бь мал хьзмәт кьм, әз Йаһоԝарʹа дӧа дькьм сәва ньһерʹандьна позитив бьдә мьн». Ӧса жи әм Хԝәдерʹа дӧа дькьн, ԝәки мьлйакʹәтед ԝи рʹебәрийе мә бькьн кӧ әм мәрьвед дьлсах бьвиньн (Мәт. 10:11-13; Әʹйан. 14:6). Дина хԝә бьдьне, бьраки мә бь наве Роберт кӧ 30 сала зедәтьр ча пешәнг ә, чь дьбежә: «Һәвкʹари тʹәви мьлйакʹәтед кӧ һаш жийина хԝәйед мала һәнә, рʹасти жи тьштәки мәхсус у һʹәԝас ә». Йа сьсийа, әм гәрәке нав мәрьвада тьштед баш бьвиньн. Бьраки мә бь наве Карл кӧ рʹуспи йә у 50 сала зедәтьр ньхӧманди йә, дьбежә: «Әз дина хԝә дьдьмә һәр нишанәкә бьчʹук жи кӧ дькарә әʹйан кә мәрьве һʹәлал, бәʹса хәбәре дьԛәԝьмә бәшәра ԝийи хԝәш, йан жи пьрсәкә һʹәлал». Бәле, мина Паԝлос әм жи дькарьн бь сәбьр бәр бьдьн.

16, 17. а) Әм чь дәрсе һин дьбьн жь Ԝаиз 11:6? б) Гьли кьн чаԝа хьзмәтийа мә дькарә сәр мәрьва һʹӧкӧм бә.

¹⁶ Һәрге жи әм дьвиньн ԝәки мьзгинийа кӧ әм бәла дькьн нагьһижә дьле мәрьва, әм гәрәке нәфькьрьн кӧ шьхӧле мә бадиһәԝа йә. (Бьхунә Ԝаиз 11:6.) Рʹаст ә гәләк мәрьв гӧһ надьнә мә, ле йәкә әԝана дина хԝә дьдьнә мә. Әԝана дина хԝә дьдьн кʹьнщхԝәкьрьна мәйә лайиԛ, рʹабун-рʹуньштьна мә у бәшәра мәйә хԝәш. Ԝәʹдә дәрбаз дьбә, у рʹабун-рʹуньштьна мә дькарә чʹәʹвед ԝан вәкә у фькьред нәрʹаст һьндава мә бьгӧһезә. Сержио у Олинда бәʹса кʹижана мә дәстпекеда кьр, фәʹм кьрьн ԝәки әԝ йәк ӧса нә.

¹⁷ Сержио гьли дькә: «Әм жь бо нәхԝәшийе, ԝәʹдәке нәдьчунә мәйдане. Ле чахе әм вәгәрʹийан, мәрьвед кӧ бәр мәрʹа дәрбаз дьбун, жь мә дьпьрсин: ‹Һʹәму тьшт баш ә? Мә бира ԝә кьрийә›». Олинда жи дькʹәнә у дьбежә: «Ажованед отобуса, дәстед хԝә мәрʹа дьһәжандьн у һьнәка жи бь дәнге бьльнд мәрʹа дьготьн: ‹Әʹфәрәм!› Ԝана һәла һе жи жь мә журнал дьхԝәстьн». Әԝана ӧса жи әʹщебмайи мабун чахе мерькәк һатьбу бәр стенда ԝан, кӧлирк дабу ԝан у ԝанрʹа готьбу ԝәки рʹази йә бона шьхӧле кӧ әԝана дькьн.

18. Чьрʹа һун дьхԝазьн «бь сәбьр» бәр бьдьн?

¹⁸ Рʹасти жи, һʹәта кӧ әм рʹьһʹәтийе надьнә дәсте хԝә кӧ тʹохьме Пʹадшатийе бьчиньн, әм шьхӧләки ԛимәт дькьн, чьмки «һʹәму мьләтарʹа» шәʹдәтийе дьдьн (Мәт. 24:14). Хенщи ве йәке, әм дьлша нә, чьмки заньн ԝәки Йаһоԝа ԛәбул дькә у һʹьз дькә ԝана, йед кӧ «бь сәбьр бәре хԝә дьдьн»!