ԚӦРБАНКЬРЬН әʹдәтәкә бәре йә, кӧ тʹьме һʹәбандьна рʹастда щийе фәрз дьгьрә. Исраелийа һʹәйԝан ԛӧрбан дькьрьн, у Мәсиһи жи бь «ԛӧрбана пәсьндайине» тʹьме әʹйан бун. Ле һәнә ԛӧрбанед дьн жи кӧ дьле Хԝәде те у әԝ ԛәбул дькә (Ибрн. 13:15, 16). Әԝ ԛӧрбанкьрьн һьн шабуне һьн жи кʹәрәма тиньн. Мәсәлед жере ве йәке зәлал нишан дькьн.

Һанна, хьзмәткʹара амьнә бәре, безӧрʹәт бу у гәләк дьхԝәст, ԝәки кӧрʹ жерʹа бьбә. Дӧада әԝе бәр Хԝәде сонд хԝар кӧ һәрге жерʹа кӧрʹ бьбә, әԝе ԝи «тʹәмамийа рʹожед жийана» ԝида бьдә Йаһоԝа (1 Сам. 1:10, 11). Ԝәʹдә шунда, әԝ гьран дәркʹәт у жерʹа кӧрʹ бу, әԝе наве ԝи дани Самуйел. Паше чахе Самуйел ширәвәбу, Һаннайе ԝи бьрә коне пироз, чаԝа кӧ сонд хԝарьбу. Йаһоԝа Һанна кʹәрәм кьр бона мәрʹдани у рʹәзәдьлийа ԝе. Паше, Хԝәде диса ле кʹәрәм кьр у 5 зарʹ Һаннайерʹа бун, у Самуйел бу пʹехәмбәр, һьн жи бу ньвискʹарәки Кʹьтеба Пироз (1 Сам. 2:21).

Мина Һаннайе у Самуйел, иро бал Мәсиһийа жи ԛәдьрәки ӧса һәйә кӧ әʹмьре хԝә тʹәсмили Әʹфьрандаре хԝә кьн. Иса гот кӧ бона һәр ԛӧрбанәкә кӧ әм Йаһоԝарʹа дьдьн, әме гәләк бенә кʹәрәмкьрьне (Марԛ. 10:28-30).

Ԛьрʹна йәкеда, Мәсиһик бь наве Хәзал, бь «ԛәнщи у херкьрьнада» әʹйан бу. Сәва аликʹарийе бьдә йед майин, әԝе гәләк ԛӧрбанкьрьн дькьр. Йазьх, паше әԝ «нәхԝәш кʹәт мьр», у щьвате шина ԝе дькьр. Гава хушк-бьра пеһʹәсийан кӧ Пәтрус шәһәрда нә, ԝана һиви жь ԝи кьрьн кӧ бе бал ԝан. Бьдьнә бәр чʹәʹве хԝә кӧ шабунәкә чьԛас мәзьн бу, гава Пәтрус һат у Хәзал жь мьрьне рʹакьр. Әԝ сәрһатийа пешийе йә дәрһәԛа сахкьрьне кӧ алийе шандида һатә кьрьне (Кʹар. Шанд. 9:36-41). Бәле, Хԝәде ԛәнщийа ԝе у ԛӧрбанед ԝе бир нәкьр (Ибрн. 6:10). Сәрһатийа ԝе Хәбәра Хԝәдеда һатә хԝәйкьрьне, у бона мә мәсәлә йә кӧ чʹәʹв бьдьнә ԝе.

Паԝлос жи мәсәла баш һишт бона мә. Әԝи бь мәрʹдани ԝәʹде хԝә хәрщ дькьр сәва мәрьвед майин. Чахе әԝи хушк-бьред Корьнтʹирʹа нәʹмә ньвиси, әԝи гот: «Әзе бь дьләки ша хԝә жи у мал-һʹале хԝә жи бона ԝә бьдьм» (2 Корн. 12:15). Паԝлос жь щурʹә-щурʹә дәрәща һин бу, кӧ ԛӧрбанкьрьн бона мәрьвед майин нә кӧ тʹәне шабуне тинә, ле йа лапә фәрз кʹәрәм у ԛәбулкьрьна Йаһоԝа тинә (Кʹар. Шанд. 20:24, 35).

Әшкәрә йә, дьле Йаһоԝа гәләк ша дьбә чахе әм ԝәʹдә у ԛәԝата хԝә хәрщ дькьн, сәва шьхӧле ԝи у аликʹарийа хушк-бьра. Ле гәло диса чь щурʹейи әм дькарьн пьштгьрийа шьхӧле бәлакьрьна мьзгинийе бькьн? Хенщи аликʹарийа хушк-бьрарʹа, әм ӧса жи дькарьн бь ԛӧрбанкьрьнед рʹәзәдьли Хԝәде һӧрмәт кьн. Әв пʹәре кӧ әм ԛӧрбан дькьн, тенә хәрщкьрьне сәр шьхӧле һʹәмдьнйайе, у дькʹәвә нава хәрщед мисйонера у хьзмәткʹаред һәртʹьмә мәхсус. Әԝ пʹәрә ӧса жи те хәрщкьрьне сәр һазьркьрьна у ԝәлгәрʹандьна әʹдәбйәта, видеойа, сәр аликʹарийа ԝәʹде хәзәба, у авакьрьна Одед Щьвата. Әм гәрәке дӧдьли нәбьн кӧ «дӧайе ль мәрʹд бе кьрьне», демәк мәрьве мәрʹд ԝе әʹсә бе кʹәрәмкьрьне. Хенщи ԝе йәке, чахе әм Йаһоԝарʹа тьштед хԝәйә ԛимәт ԛӧрбан дькьн, әм ԝи һӧрмәт дькьн (Мәтʹлк. 3:9; 22:9).