БЬРАКИ мә бь наве Ален * гьли дькә: «Әз бәрхԝә дькʹәтьм чахе дәрбази ԝьра дьбум. Мьн ньзаньбу әзе бькарьбьн хԝәрʹа һәвала бьвиньн йан на у ԝе ча мьн ԛәбул кьн щьватеда». Ален һини щьвата хԝәйә тʹәзә дьбә, кʹижан кӧ 1 400 км зедәтьр дури мала ԝи йә.

Һәрге һун дәрбази щьвата тʹәзә бунә, дьбәкә һун жи бәрхԝә дькʹәвьн. Ле чь дькарә али ԝә бькә кӧ һини щьвата тʹәзә бьн? Һун чь дькарьн бькьн һәрге һун һивийе нибун кӧ ԝе ӧса чәтьн бә ԝәрʹа? Ле һәрге һун дәрбази щьвата тʹәзә нәбунә, һун ча дькарьн али ԝан бькьн, йед кӧ тʹәзә дәрбази щьвата ԝә бунә, сәва әԝана зу һини щьвате бьн?

Бьфькьрьн дәрһәԛа ве мәсәле: Чахе бах кʹокева рʹадькьн у щигӧһасти дькьн, әԝ дькʹәвә стресе. Гава бах жь әʹрде дәрдьхьн, кʹокед ԝи һʹәчʹи зәʹф тенә бьрʹине, сәва һеса бә щики дьн дачʹькиньн. Чахе бах ида дадьчʹькиньн, әԝ зу дәстпекә кʹокед тʹәзә бьдә. Мина ве йәке, чахе һун дәрбази щьвата тʹәзә дьбьн, дьбәкә дькʹәвьнә стресе. Щьвата хԝәйә бәреда ԝә ча бежи ида «кʹокед» хԝә дабу, чьмки ԝә һәвалед баш хԝәрʹа дитьбу у ԝә тʹьме Йаһоԝарʹа хьзмәт дькьр. Ле ньһа һун гәрәке ида ча бежи кʹокед тʹәзә бьдьн, сәва кӧ һини щийе тʹәзә бьн. Ле чь дькарә али ԝә бькә ве йәкеда? Принсипед Кʹьтеба Пироз дькарьн али ԝә бькьн. Ԝәрә әм чәнд принсипа шеԝьр кьн.

Кәсе кӧ тʹьме Хәбәра Хԝәде дьхунә мина «дара дәве ава йә, кӧ ԝәʹде хԝәда бәре хԝә дьдә, бәлге ль сәр начʹьльмьсә, чь жи дьхԝазә мийасәр дьбә» (Зәб. 1:1-3).

Чаԝа бах аве жь канийе дькʹьшинә сәва ԛәԝи бә у шин бә, Мәсиһи жи гәрәке тʹьме пе Хәбәра Хԝәде тʹер бә сәва кӧ рʹӧһʹанида ԛәԝи бьминә. Ләма жи бәрдәԝам кьн һәр рʹож Кʹьтеба Пироз бьхуньн, у тʹьме һәрʹьнә щьвате. Бьра ԝәрʹа бьбә хәйсәт кӧ ԛӧльхкьрьна тʹәви малбәте у һинбуна шәхси дәрбаз кьн. Чаԝа щьвата бәреда ԝә һәр тьшт дькьр сәва һәләԛәтийа хԝә тʹәви Йаһоԝа ԛәԝи хԝәй кьн, щьвата тʹәзәда жи һун гәрәке бәрдәԝам кьн ӧса бькьн.

«Авдаррʹа жи аве бе дайине» (Мәтʹлк. 11:25).

Һуне зу һини щьвате бьн у пешда һәрʹьн, һәрге тʹьме хьзмәт бькьн у щьватеда кʹар бькьн. Кевин кӧ рʹуспи йә дьбежә: «Чахе әм дәрбази щьвата тʹәзә бун, хьзмәтийа ча пешәнгед кʹомәкдар гәләк али мьн у жьна мьн кьр. Мә зу хушк-бьра, пешәнг у мьһал нас кьрьн». Бьраки бь наве Рощер жи дәрбази щьватәкә тʹәзә бу, кʹижан кӧ 1 600 км зедәтьр дури мала ԝи йә. Әԝ гьли дькә: «Йа лапә баш кӧ чаԝа һини щьвате бьн әԝ ә, кӧ чьԛас дькарьн тʹьме хьзмәт кьн. Ӧса жи, һун дькарьн рʹуспийед щьвата тʹәзәрʹа бежьн, ԝәки һун һазьр ьн чьда лазьм ә кʹомәке бьдьн, бәʹса хәбәре, тʹәмьзкьрьна Ода Щьвате, һәрге лазьм бе дәԝса кәсәки пʹарәкә щьвате дәрбаз кьн, йан жи пе тʹәмаше дәрен, йан жи кәсәки пе әʹрәбе бьвьнә щьвате. Чахе хушк-бьра бьвиньн кӧ щьвата ԝанда йе тʹәзә чьԛас хирәт у һʹәйф ә, әԝана зу ԝе ԝи ԛәбул кьн у бьхԝазьн тʹәви ԝи һәвалтийе бькьн».

«Дьле хԝә . . . вәкьн» (2 Корн. 6:13).

Дьле хԝә вәкьн бона һʹьзкьрьна бьрати. Хушкәкә мә Мелиса малбәта хԝәва дәрбази щьвата тʹәзә бу. Ԝана нет данә пешийа хԝә, кӧ һәвалед тʹәзә хԝәрʹа бьвиньн. Әԝ гьли дькә: «Ода  Щьватеда һьн пешийа щьвате у һьн паши щьвате мә тʹәви хушк-бьра хәбәр дьда. Әԝе йәке мәщал дьда мә, нә кӧ тʹәне сьлаве бьдьнә һәв, ле һе незик һәвдӧ нас кьн». Бь сайа ве йәке әԝе малбәте зу наве хушк-бьра бира хԝәда хԝәй кьрьн. Хенщи ве йәке, ԝана меванһʹьзи дьданә кʹьфше, у әԝе йәке али ԝан кьр һәвалед незик хԝәрʹа бьвиньн. Мелиса зедә дькә: «Мә һәжмара тʹелед һәвдӧ хԝәрʹа ньвисин, сәва кӧ шьхӧлед щьватеда у шьхӧлед дьнда тʹәви ԝан кʹар бькьн».

Һәрге ԝәрʹа чәтьн ә тʹәви мәрьвед тʹәзә хәбәр дьн, хәбәрдане тьштед бьчʹукда дәстпекьн. Мәсәлә, хушк-бьрарʹа бькʹәньн һәрге жи ԝәрʹа чәтьн ә. Мәрьве бь бәшәра хԝәш, мәрьва бәрбь хԝә дькʹьшинә. Кʹьтеба Пироз дьбежә: «Рʹонайиа чʹәʹва дьл ша дькә» (Мәтʹлк. 15:30). Хушкәкә мә бь наве Рейчел дәрбази щьватәкә гәләк дур бу. Әԝ гьли дькә: «Хәйсәтда әз йәкә шәрмокә мә. Щара әз зоре хԝә дькьм, ԝәки щьвата тʹәзәда тʹәви хушк-бьра хәбәр дьм. Әз Ода Щьватеда ԝан мәрьва дьгәрʹьм, йед кӧ хԝәрʹа кәрʹ-лал рʹуньштьнә, чьмки әԝ жи мина мьн шәрмокә нә». Ле ԝе керһати бә кӧ һун нете дайньн пешийа хԝә, ԝәки пешийа у паши щьвате тʹәви кәсәки бькʹәвьнә хәбәрдане.

Алики дьнва жи, дьбәкә һун дәстпекеда шәрм дькьн тʹәви мәрьвед тʹәзә хәбәр дьн. Ле ԝәʹдә дәрбаз бә мәрьвед «тʹәзә» жи ида ԝе «кәвьн» бьн. Ләма һьнге лазьм ә бәрдәԝам кьн һәвалед тʹәзә хԝәрʹа бьвиньн.

Һьнә бахарʹа лазьм ә гәләк ԝәʹдә сәва щийе тʹәзәда кʹокед хԝә бьдьн. Мина ве йәке, нә һʹәмушк зу һини щьвата тʹәзә дьбьн. Һәрге һун дәрбази щьвата тʹәзә бунә, у ԝәʹдә дәрбаз буйә, ле һун һе һини щьвате нәбунә, әван принсипед жь Кʹьтеба Пироз дькарьн али ԝә бькьн:

«Жь ԛәнщикьрьне . . . ащьз нәбьн, чьмки әме ԝәхтда бьчьньн һәгәр әм нәдьнә дәр» (Галт. 6:9).

Дьԛәԝьмә тәрʹа һе зедә ԝәʹдә лазьм бе сәва һини щьвате би. Мәсәлә, гәләк мисйонер кӧ паши Мәкʹтәба Гиләд ԝәлатед хәрибда һатьнә кʹьфшкьрьне, чәнд сала начьнә ԝәлатед хԝә, сәва кӧ һини ԝи щийи, әʹдәтед ԝедәре у һини хушк-бьред ԝедәре бьн. Әԝ йәк али ԝан дькә кӧ һәләԛәтийа хԝә тʹәви ԝан хушк-бьра ԛәԝи кьн.

Алехандро, йе кӧ чәнд щара дәрбази щьватед тʹәзә бу, дьбежә кӧ мәрьв дәрберʹа нькарә һини щьвата тʹәзә бә. Әԝ гьли дькә: «Щара пашьн кӧ әм дәрбази щьвата тʹәзә бун, жьна мьн гот: ‹Һʹәму һәвалед мьн щьвата бәреда ньн!›». Алехандро ани бира ԝе ԝәки әԝе әԝ гьли 2 сал пешда жи гот, чахе әԝана дәрбази щьватәкә дьн бьбун. Ле нава ԝан дӧ салада, әԝ тʹәви хушк-бьред нәнас незик дьбу у әԝана жерʹа дьбунә һәвалед незик.

«Чьма рʹожед бәреда жь вана һин жи ԛәнщтьр бун? нәбежә; жь бәр кӧ пьрсийара тә йа дь дәрһәԛа вейада нә бь занйари йә» (Ԝаиз 7:10).

Тʹӧ щар щьвата хԝәйә бәре тʹәви йе тʹәзә бәрамбәр нәкьн. Мәсәлә, хушк-бьред жь щьвата тʹәзә дьбәкә хәбәрхԝәш у вәкьри ниньн. Дина хԝә бьдьнә хәйсәтед ԝани баш, чаԝа кӧ һун дьхԝазьн әԝана нав ԝәда бьвиньн. Һьнә хушк-бьра кӧ дәрбази щьвата тʹәзә бун, хԝә щерʹьбандьн ве пьрседа: «Гәло әз һʹәму бьратийе һʹьз дькьм?» (1 Пәт. 2:17).

 «Бьхԝазьн һуне бьстиньн» (Луԛа 11:9).

Бәрдәԝам кьн бона аликʹарийе Йаһоԝарʹа дӧа бькьн. Бьраки мә бь наве Девид, кӧ рʹуспи йә дьбежә: «Нәфькьрә кӧ тӧйе бь ԛәԝата хԝә бькарьби сәбьр ки. Гәләк тьшт әм дькарьн бькьн тʹәне пе аликʹарийа Йаһоԝа. Дӧа бькьн бона ве йәке!» Рейчел бәʹса кʹижани мә жоре кьр, гот: «Һәрге әз у мере мьн щара дьфькьрьн кӧ әм нә пʹара ве щьвате нә, әм рʹастә-рʹаст Йаһоԝарʹа дӧа дькьн у дьбежьн: ‹Йаһоԝа мәрʹа әʹйан кә һәрге әм тьштәки нәрʹаст дькьн кӧ хушк-бьрарʹа чәтьн дьбә незики мә бьн›. У паше әм гәләк ԝәʹдә тʹәви хушк-бьра дәрбаз дькьн».

Де-бавно, һәрге зарʹед ԝәрʹа чәтьн ә һини щьвата тʹәзә бьн, тʹәви ԝан дӧа бькьн дәрһәԛа ве йәке. Али ԝан бькьн ԝәки һәвалед тʹәзә хԝәрʹа бьвиньн, мәсәлә ԝана тʹәглиф кьн кӧ ԝәʹдә дәрбаз кьн.

Һәрге кәсәк тʹәзә дәрбази щьвата ԝә буйә, чьда һун дькарьн али ԝи бькьн? Ӧса бькьн ԝәки жь дәстпекеда ида ԝанрʹа һәвалтийе бькьн. Бона ԝе йәке керһати йә бьдьнә бәр чʹәʹве хԝә, кӧ һәрге һун тʹәзәда дәрбази щьвате буна, һуне чьԛас рʹазибуна бона хәмкьрьна йед дьнена (Мәт. 7:12). Мәсәлә, ԝе баш бә кӧ йед тʹәзә тʹәглиф кьн сәр ԛӧльхкьрьна тʹәви малбәте, йан жи JԜ Бродкастинге тʹәвайи бьньһерʹьн. Ӧса жи тʹәви ԝан дәркʹәвьнә хьзмәтийе. Һәрге һун ԝана сәр нанхԝарьнәкә бьчʹук жи тʹәглиф кьн, әԝ меванһʹьзийа ԝә гәләк ԝәхт ԝе бира ԝанда бьминә. Ле гәло диса чьда дькарьн али ԝан бькьн?

Бьраки мә бь наве Карлос дьбежә: «Чахе әм һатьнә щьвата тʹәзә шәһәрәки дьнда, хушкәке кʹахаз да мә кʹидәре ньвисар бу кʹижан ьн махазийед арзан. Әԝе йәке гәләк али мә кьр». Йед тʹәзә кӧ жь ԝәлатед ӧса һатьнә кʹидәре кӧ һәԝа щурʹәки майин ә, ԝе гәләк рʹази бьн ԝәки һун ԝанрʹа бежьн кʹьнще ча хԝә кьн гәрмеда, сәрмеда у чахе шьли йә. Ӧса жи һун дькарьн али ԝан бькьн кӧ хьзмәтийеда пешда һәрʹьн. Мәсәлә, ԝанрʹа гьли кьн дәрһәԛа мьһала хԝә у әʹдәт у динед ԝи щийи.

Ален дәрһәԛа кʹижани мә жоре гот, ида саләкә зедәтьр щьвата тʹәзәда нә. Әԝ дьбежә: «Пешийе, мьнрʹа чәтьн бу насийа хԝә бьда хушк-бьра. Ле нака әԝана бона мьн ча малбәт ьн у әз гәләк ша мә». Ален фәʹм кьр кӧ чахе әԝ дәрбаз бу, нә кӧ һәвалед хԝә ӧнда кьр, ле әԝи һәвалед тʹәзә хԝәрʹа дит.