Чьԛас һе зедә әм дәрһәԛа хәйсәт-һӧнӧред кәсәки педьһәсьн, һаԛас һе рʹьнд әм дәстпедькьн ԝи мәрьви нас кьн у һәвалтийа мә һе незик дьбә. Анәгори ԝе йәке әм чьԛас һе зедә дәрһәԛа хәйсәт-һӧнӧред Йаһоԝа педьһʹәсьн, һаԛас һе рʹьнд әм дьвиньн ԝәки әԝ йәки чаԝа нә у достийа мә тʹәви ԝи ԛәԝи дьбә. Жь һʹәму һӧнӧред Хԝәде, чар йед сәрәкә нә: әв һәнә ԛәԝат, билани, һәԛи у һʹьзкьрьн.

«Ах, йа Хӧдан, ХӦДАН! А вай, тә әʹзман у әʹрде бь һеза [ԛәԝата] хԝә йи дьреж кьрива әʹфьранд» (ЙЕРӘМЙА 32:17).

Ԛәԝата Хԝәде әʹшкәрә жь чекьрьна дәстед ԝи те кʹьфше. Мәсәлә чахе тӧ һавине дәртейи бәр тәʹве, тӧ сәр хԝә чь тʹәхмин дьки? Гәрмайа тәʹве. Рʹаст ә? Демәк тӧ сәр хԝә тʹәхмин дьки ԛәԝата Хԝәде, кӧ жь әʹфьринед ԝи те кʹьфше. Гәло ԛәԝата тәʹве чьԛас ә? Һатьбу тедәрхьстьне ԝәки гәрмайа һьндӧре тәʹве ԝәкә 15 000 000°C. Һәр сәники, тәʹв енержийа ӧса ԛәԝи дьдә, кʹижан кӧ бәрамбәри тʹәԛандьна бь сәда милйона бомбед атоме дьбә.

Һьмбәри милийона стәйркед дьн гәрдунеда тәʹв һәри бьчʹук ә. Зандар дьбежьн кӧ стәйрка лапә мәзьн бь наве UY Scuti, 1 700 щара жь тәʹве мәзьнтьр ә. Һәрге стәйрка UY Scuti дайньн дәԝса тәʹве, һьнге әве тʹәмамийа әрʹде мә демәк гәрстерка мә, у һәла һе һʹәта рʹегәһа Бәрчиш “Jupiter” жи бь хԝә дадә. Әв йәк али мә дькә һе рʹьнд фәʹм бькьн гьлийе  Йерәмйа пʹехәмбәр, кӧ Йаһоԝа Хԝәде бь ԛәԝата хԝә әʹрд, әʹзман у тʹәмамийа гәрдуне әʹфьрандийә.

Жь ԛәԝата Хԝәде әм чь кʹаре дьстиньн? Жийина мә гьредайи йә тʹәви әʹфьринед Хԝәде, мәсәлә тәʹв у һʹәму тьштед ԛимәт сәр әʹрде. Хенщи ԝе йәке Хԝәде ԛәԝата хԝә дьдә хәбате, сәва кӧ бона һәр йәки башԛә хәм бькә. Чь щурʹәйи? Ԛьрна йәкеда, Хԝәде ԛәԝат дабу Иса, ԝәки әԝ кʹәрәмәта бькә. Әм дьхуньн: «Кор дьбиньн, сәԛәт дьгәр′ьн, к′оти паԛьж дьбьн, кәр′ дьбьһен, мьри р′адьбьн» (Мәтта 11:5). Ле дәрһәԛа рʹожа иро әм чь дькарьн бежьн? Кʹьтеба Пироз дьбежә, ԝәки Хԝәде ԛәԝате дьдә йе вәстийайи, у йед кӧ баԝәрийа хԝә Ԝи тиньн ԝе ԛәԝате бьстиньн (Ишайа 40:29, 31). Хԝәде дькарә «зорайийа ԛәԝате» бьдә мә, кӧ әм бькарьбьн һʹәму щерʹьбандьн у чәтьнайада тәйах кьн (2 Корьнтʹи 4:7). Бь рʹасти жи чьԛас баш ә незики Хԝәдайе ӧса бьн, кʹижан кӧ ӧса мә һʹьз дькә, ԝәки ԛәԝата хԝә дьдә хәбате кӧ али мә бькә.

«Йа Йаһоԝа, Бәрһәмен тә чьԛас пʹьрр ьн! Тә әԝ һʹәму бь шәһрәзайийе ава кьрьнә» (ЗӘБУР 104:24, ДО).

Чьԛас һе зедә әм дәрһәԛа кьред Хԝәде педьһʹәсьн, һаԛас һе зедә әм биланийа ԝирʹа фьрнаԛ дьбьн. Бь рʹасти иро зандар әʹфьринед Йаһоԝа леколин дькьн, чʹәʹв дьдьнә ԝан әʹфрина у ль гора ве йәке һьнә тьшта саз дькьн. Мәсәлә әв йәк рʹьнд те кʹьфше жь щурʹе сазкьрьна тәйара.

Һʹәчʹи зәʹф биланийа Хԝәде жь ԝе йәке те кʹьфше, кӧ чь щурʹәйи бәдәна мерьв һатийә чекьрьне. Кʹа әм шеԝьр кьн. Протсеса ве йәке дәстпедьбә жь зедәбуна шанәйа, кʹижанида ида һәйә тʹәмамийа информасийона гәнәтики. Әв шан ль сәр гәләк шанед дьн пʹарәвәдьбьн, йед кӧ мина һәв ьн. У ԝәʹде лазьмда, әв шанә дәстпедькьн бь щурʹәки майин чебьн, жь кʹижана бь сәда щурʹед тʹәзә чедьбьн, йед ӧса ча шанед хуне, шанед нерва у шанед һәсту. Зутьрәке паши ԝе йәке, система әндәма чедьбә у дәстпедькә бьхәбьтә. Нава нәһ мәһада, жь ԝан шанед әʹсли, бәдәнәкә бьчʹук чедьбә, йа кӧ жь мьлиарда шана йә. Биланийа кӧ ве йәкеда те кʹьфше гәләка һелан кьр, ԝәки ԛайил бьн тʹәви ньвискʹаре Кʹьтеба Пироз, йе ко гот: «Пәсьн у шькьрийе дьдьмә Тә, кӧ әз әʹщебмайи чекьри мә» (Зәбур 139:14).

Жь биланийа Хԝәде әм чь кʹаре дьстиньн? Әʹфьрандар занә, кӧ чь мәрʹа лазьм ә, сәва кӧ бәхтәԝар бьн. Занәбун у биланийа Хԝәде пʹьрʹ ә, ләма жи әԝ дькарә ширәтәкә баш у билан бьдә мә, кʹижан кӧ әм дькарьн Хәбәра Ԝида бьвиньн. Мәсәлә, Хԝәде мә һелан дькә: «Ль һәв . . . бьбахшиньн» (Колоси 3:13). Гәло әв ширәтәкә керһати йә? Бәле. Леколинкʹара тедәрхьстьнә, ԝәки чахе дьбахшиньнә мерьв, бь ве йәке хәԝа мерьв натʹәԛьсә у тʹансийона хуна ԝи баш дьбә. Әв йәк ӧса жи мәрийа жь депресийайе хԝәй дькә у жь проблемед дьн кӧ сьһʹәт-ԛәԝатева гьредайи нә. Бәле, Хԝәде мина достәки билан у бь һʹьзкьрьне тʹьжә, тʹӧ щар хԝә паш нагьрә сәва кӧ ширәтед керһати бьдә мә, кӧ али мә бькә (2 Тимотʹейо 3:16, 17). Тәйе бьхԝәста кӧ досте тәйи ӧса һәбә?

«Хӧдан һәԛийе һʹьз дькә» (ЗӘБУР 37:28).

Хԝәде тʹьме ԝе йәке дькә, чь кӧ рʹаст ә. Бь рʹасти наԛәԝьмә, ԝәки Хԝәдайе Һьмзор хьрабийе у нәһәԛийе бькә (Ибо 34:10). Диԝана ԝи бь һәԛи йә, у зәбурбеж жи дәрһәԛа Йаһоԝа ӧса дьбежә: «Чьмки тӧ бь рʹастийе» диԝана мьләта дьки (Зәбур 67:4). «Хӧдан ль дьл дьнер′ә», ләма жи т′ӧ тьшт у т′ӧ кәс нькарә ԝи бьхальфинә, чьмки әԝ р′астийе дьвинә у бь һәԛийе диԝане дькә (1 Самуйел 16:7). Хенщи ԝе йәке, Хԝәде һ′әму нәр′асти у нәһәԛийа дьвинә, кӧ ль сәр ә′рде тенә кьрьне у соз дьдә, ԝәки зутьрәке «нәп′аке жь сәр р′уйә ә′рдә ӧнда бьн һәр′ьн» (Мәт′әлок 2:22).

Һьм жи Хԝәде һакьме сәрт нинә, йе кӧ т′әне һʹьзрәта щәзакьрьне йә. Чахе лазьм ә, әԝ р′әмтийа хԝә дьдә к′ьфше. К′ьтеба Пироз дьбежә: «Йаһоԝа дьлован к′әрәмдар ә» (Зәбур 103:8, ДО; 2 Пәтрус 3:9).

Жь һәԛийа Хԝәде әм чь кʹаре дьстиньн? Пәтрусе шанди гот: «Хԝәде р′асти жи фьрԛийе накә нава мьләта. Ле жь нав һәр мьләтида, йе кӧ жь ԝи хоф дькә у р′астийе дькә ль ԝи ԛәбул ә» (Кʹаред Шандийа 10:34, 35). Әм жь һәԛийа Хԝәде к′аре дьстиньн, чьмки әԝ фьрԛийе накә нава мәрьва. Әм т′ьме дькарьн незики ԝи бьн, бьбьнә хьзмәткʹаред ԝи у фьрԛи т′ӧнә әм к′и нә, жь чь мьләти нә, у чьԛас әм нав у дәнг ьн.

Хԝәде дьхԝазә ԝәки әм фәʹм бькьн у к′аре бьстиньн жь һәԛийа ԝи, ләма жи әԝ бь исафе әм хәлат кьрьнә. К′ьтеба Пироз исафе нав дькә ча ԛанун, йа кӧ дьле мәда һатийә ньвисаре, у шә′дәтийе дьдә мә, һәла кьред мә р′аст ьн йан на (Рʹомайи 2:15). Гәло, ле әм чь к′аре дьстиньн? Чахе исафа мә р′аст һинкьрийә, һьнге әԝ мә һелан дькә ԝәки жь кьред зийан у нәр′аст хԝә дур бьгьрьн. У һәрге әм шашийа бәрдьн жи, исаф дькарә мә һелан кә т′обә бькьн у бенә гӧһастьне. Бь р′асти жи гава әм р′ьнд һәԛийа Хԝәде фә′м дькьн, әԝ али мә дькә һе незики ԝи бьн!

«Хԝәде һ′ьзкьрьн ә» (1 ЙУҺʹӘННА 4:8).

Хԝәде ԛәԝате, бьланийе у һәԛийе дьдә к′ьфше, ле К′ьтеба Пироз набежә ԝәки Хԝәде һәйә ԛәԝат, билани йан һәԛи. Ле әԝ дьбежә, ԝәки Хԝәде һәйә һ′ьзкьрьн. Чьма? Чьмки ԛәԝата Хԝәде ԝи һелан дькә, кӧ бькә. Һәԛи у биланийа ԝи, р′ебәрийа кьред Ԝи дькьн. Ле һ′ьзкьрьна Ԝи, ԝи һелан дькә ида дәстпекә к′ар бькә. Рʹасти жи, һ′ьзкьрьн һ′ӧкӧм дькә ль сәр һ′әму кьред ԝи.

Йаһоԝа һ′әԝще тьштәки нибу, ле бь р′асти һ′ьзкьрьна ԝи һелан кьр ԝәки Әԝ мәләкед ә′змен у мәрийа бьә′фьринә, к′ижан кӧ дькарьн к′аре у ләзәте бьстиньн жь һ′ьзкьрьн у хәмгинийа Йаһоԝа. Әԝи бь һʹьзкьрьне ә′рд һ′азьр кьр, ԝәки әԝ бьбә маләкә хас бона инсанәте. Ле диса жи Йаһоԝа бәрдәԝам дькә һ′ьзкьрьна хԝә һьндава инсанәте бьдә к′ьфше. Мәсәлә, Әԝ «тә′ва хԝә дәрдьхә һьн сәр ԛәнща, һьн жи сәр хьраба у баране дьбаринә һьн сәр р′аста, һьн жи сәр нәр′аста» (Мәтта 5:45).

Һәйнәсәр, «Хӧдан гәләк дьлован у т′ьжә р′ә′м ә» (Аԛуб 5:11, ИМ). Әԝ дьлованийа хԝә һьндава ԝан дьдә к′ьфше, йед кӧ бь дьле т′әмьз ԛәԝате дьдьнә хәбате, сәва кӧ Ԝи нас бькьн у незики ԝи бьн. Хԝәде башԛә-башԛә дина хԝә дьдә ԝан мәрийа. У бь р′асти «әԝ бона ԝә хәм дькә» (1 Пәтрус 5:7).

Жь һ′ьзкьрьна Хԝәде әм чь кʹаре дьстиньн? Әм ләзәте дьвиньн жь бәдәԝийа ԝе йәке, кӧ чаԝа р′о дьчә ава. Әм ӧса жь ләзәте дьстьньн, чахе к′әне зар′а бьч′ук дьбьһен. Әм гәләк ша дьбьн, чахе һ′ьзкьрьна нәфәред мала хԝә, ль сәр хԝә т′әхмин дькьн. Дьԛәԝьмә әԝ тьштед сәрәкә ниньн, ле әԝ һ′әму тьшт жийина мә бәдәԝ у бәхтәԝьр дькьн.

Әм диса жи к′аре дьстиньн жь һ′ьзкьрьна Хԝәде, йа кӧ бь щур′әки дьн ә′йан дьбә: демәк дӧакьрьн. К′ьтеба Пироз мә һелан дькә: «Бона т′ӧ тьшти хәм нәкьн, ле хԝәстьна ԝә бьра бь дӧа-дьрозга, р′азибунева т′әвайи, Хԝәдева ә′йан бә». Анәгори бавәки кӧ бь һ′ьзкьрьне т′ьжә йә, Йаһоԝа дьхԝазә ԝәки чахе әм хәмгин дьбьн, гәрәке дьле хԝә ԝир′а вәкьн. Паше Йаһоԝа бь һ′ьзкьрьна хԝәйә дьловани, соз дьдә ԝәки ԝе ә′дьлайа хԝә, «кӧ жь һәр һ′ьш-аԛьли дәрбазтьр ә», бьдә мә (Филипи 4:6, 7).

Шеԝьркьрьна кьн дәрһәԛа хәйсәт-һ′ӧнӧред Хԝәде, мәсәлә ԛәԝат, билани, һәԛи у һ′ьзкьрьн, али мә кьрьнә һе р′ьнд бьвиньн, кӧ бь р′асти Хԝәде йәки чаԝа нә. Сәва һе зедә р′азибуна хԝә һьндава Хԝәде пешда биньн, әм ԝә т′әглиф дькьн пебьһ′әсьн, ԝәки Хԝәде бона һ′алхԝәшийа ԝә чь кьрийә у диса әԝ ԝе чь бькә.