Щьһуйед бәре гәләк дьтьрсийан ԝан мәрийа йед кӧ бь кʹотибуне нәхԝәш бун. Әв нәхԝаший хоф, дькарьбу нервед мәрийа зәфт кьра у мәрийа зийан у әлават дькьр. Тʹӧ ԛәнщкьрьна ве нәхԝашийа кʹотибуне тʹӧнә бу. Сәва кӧ мәрьвед дьн жь ԝана нәхԝәш нәкʹәвьн, мәрьвед кʹоти борщдар бун ԝәки йед дьненарʹа дәрһәԛа нәхԝәшийа хԝә әʹлам кьн. Ләма жи ԝана жь гьшка щӧдә дькьрьн (Ԛануна Кʹаһинтийе 13:45, 46)

Сәрԝеред дине религийа ԛәйдә дәрһәԛа кʹотийа кʹьфш кьрьн, йе кӧ нә ль сәр һʹиме Ньвисаред Пироз бун. У ӧса жийина кʹотийед бәлангаз һе чәтьн дькьрьн. Мәсәлә, ль гора ԛәйдньвисандьна равина, мәрийарʹа ԛәдәхәкьри бу кӧ әԝана ль сәр 2 метра незики кʹотийа буна. Һьнә мәрьвед Талмудван, дʹәԝакьрьнед Ньвисаред Пироз дәрһәԛа жийина жь «зоме дәр» ӧса шьроԝәдькьрьн, ԝәки йан чь мәрьвед кʹоти гәрәке жь шәһәре дәр бьжитана. Жь бо ве йәке чахе равинәк мәрьве кʹоте дь шәһәреда дит, әԝ кәԝьр авитьнә ԝи у гот: «Бьщәмә щийе хԝә, у мәрьвед дьн нәхԝәш нәкә».

Ле ньһерʹандьна Иса гәләк щӧдә дьбу! Дәԝса кӧ кʹотийа бәридә, әԝ бь һазьрбун дәсте хԝә да ԝан у һәла һе ԛәнщ кьр жи (Мәтта 8:3).

Дь ԛьрна йәкеда Д.М-да, тʹема дәрһәԛа жьнбәрдане гәләк шәрʹ-дәԝ пешда дьани ортʹа сәрԝеред религийа. Жь бо ԝе йәке, һьнә Фарьсийа хԝәстьн Иса бьщерʹьбиньн бь ве пьрсе: «Гәло ль гора Ԛануне рʹаст ә, кӧ бона һәр мәʹнике мер жьна хԝә бәрʹдә?» (Мәтта 19:3).

Ль гора Ԛануна Муса, ԛәдәхәкьри бу ԝәки мер, жьна хԝә бәрʹдә һәрге әԝ «сәр ԝе кемасике бьбинә» (Ԛануна Дӧщари 24:1). Ԝәʹде Иса, дӧ мәкʹтәбед равина һәбун, йед кӧ әв ԛанун пашопе шьроԝәдькьрьн. Шамай мәкʹтәбәкә һе сәрт бу. Ԝе дәре дьһатә шьроԝәкьрьне, ԝәки мәʹникә сәрәкә сәва кӧ мер жьна хԝә бәрʹдә, әԝ ә һәрге жьн һьндава мере хԝәда нәһʹәлал бә, демәк һәрге ԛавийе бькә. Ле Мәкʹтәба Һиләл хԝә ль ԝе нете дьгьрт, кӧ ль гора ԛануне, мер дькарә һәла һе сәва тьштед бьчʹук жи, жь жьна хԝә бьԛәтә. Ле ль гора мәкʹтәбед дьн жи, мер дькарьбу тʹәви жьна хԝә һьнге бьԛәтийа, һәрге әԝе хԝарьн хьраб кьра, йан жи һәрге мер ида йәкә дьне бәгәм кьра.

Ле гәло Иса чь щаб да Фарьсийа? Әԝи зәлал гот: «Кʹи кӧ бе сәбәбийа ԛавийе жьна хԝә бәрʹдә у йәкә дьн бьстинә, әԝ зьнекʹарийе дькә» (Мәтта 19:6, 9).