Рʹожа Ләʹде, Кенет у Филомена йед кӧ дь Киурасаода дьжин, чубун щәм щоте зәԝьщи тʹәви кʹижана кӧ ԝана һинбуна Кʹьтеба Пироз дәрбаз дькьр.

Кенет дьбежә: «Чахе әм незики мале бун, мә дит кӧ дәри дадайи йә у авто жи бәр дери нинә. Тебежи тьштәки әз дәвдам, ԝәки ԝе жьнькерʹа тʹелехьм».

Әв жьньк тʹела хԝә һьлдьдә у дьбежә, кӧ мере ԝе нә мал ә, чуйә хәбате. Ле чахе әԝ педьһʹәсә кӧ Кенет у Филомена ида бәр дәринә, әԝ дәри вәдькә у ԝана тʹәглифи мале дькә.

Әԝана тедәрдьхьн ԝәки жьньк гьрйа бу. Чахе Кенет һинбуна Кʹьтеба Пироз дәстпедькә, жьньк диса дьгьри. Һьнге Кенет у Филомена бь нәрми дәрһәԛа һʹале ԝе педьһʹәсьн.

Жьньк гьли дькә, кӧ әԝе сафи кьрьбу хԝә бькӧжә, у мере хԝәрʹа нәʹма пашьн ледькьр. Ле чахе Кенет тʹеле дьхә, зәнгьле тʹеле ԝе дьдә сәкьнандьне. Әԝ ԝанрʹа гьли дькә кӧ әԝ жь бо депресийайе дьчәрчьрә. Кенет у Филомена дина ԝе дьдьнә сәр һьнә фькьред жь Кʹьтеба Пироз, у әԝ дьлбинийе дьстинә. Әв бәрдьли ԝәʹдәда бу у жийина ԝе хьлас кьр.

Кенет дьбежә «Мә рʹазибуна хԝә Йаһоԝарʹа да кʹьфше, кӧ әԝи әм һелан кьрьн, али ԝе кʹӧлфәта дьлтәнг бькьн. Илаки кӧ Әԝи бь рʹӧһʹе хԝәйи Пироз у мәләка, әм һелан кьрьн ве кʹӧлфәтерʹа тʹеле хьн!» *

Кенет у Филоменайе баԝәр дькьрьн, ԝәки Хԝәде дькарә бь мәләка у рʹӧһʹе Хԝәйи пироз, һьнә дәрәщада али мә бькә. Ле гәло әв йәк рʹаст ә? Йан әв ньшкева ӧса ԛәԝьми, кӧ Кенет ԝәʹдәда тʹеле хьст?

Әм нькарьн сәд сәләфи бежьн. Ле әʹйан ә, ԝәки Хԝәде мәләкед хԝә дьдә хәбате кӧ рʹӧһʹанида али мәрийа бькьн. Кʹьтеба Пироз дьбежә, кӧ Хԝәде мәләк да хәбате сәва кӧ Филипойе мьзгинван һелан кә, ԝәки әԝ али ԝәзире Әтйупийе кә, кʹьжанира кӧ рʹебәрийа рʹӧһʹани лазьм бу (Кʹаред Шандийа 8:26-31).

Щурʹә-щурʹә религийа дәрһәԛа әʹфринед рʹӧһʹанийә мәхсус, һин дькьн. Мәсәлә йанчь әԝана ча мәләкед ԛәнщ тенә хӧйане, кӧ ԛьрара Хԝәде тиньн сери, йан жи ча мәләкед мәрьвайә шәхси кӧ ԝана хԝәй дькьн. Гәләк мәрьв нә тʹәне баԝәр дькьн кӧ мәләк һәнә, ле ӧса жи баԝәр дькьн кӧ әԝана ль сәр жийина ԝан һʹӧкӧм дькьн. Ле һәнә мәрьвед ӧса жи, йед кӧ ԛә баԝәрийа хԝә мәләка найньн.

Гәло мәләк бь рʹасти һәнә? Һәрге ӧса нә, әԝана чаԝа пешда һатьнә? Әԝана бь рʹасти кʹи нә? Чаԝа әԝана дькарьн ль сәр жийина тә һʹӧкӧм кьн? Ԝәрен әм шеԝьр кьн.