Хәбәра ширәткьрьн дькарә бе һʹәсабе рʹебәрийе бьдьн йан һин кьн. Щарна дькʹәвә нава wе йәке әw, кӧ рʹабун-рʹуньштьна нәрʹаст йа зарʹа, рʹаст кьн. Гәләк щарʹ әw ӧса жи дькарә бе һʹәсабе кӧ алийе нав-намусийеда зарʹе һин кьн, чь кӧ али wи дькә сафикьрьнед рʹаст бькә.

Чәнд дәһә салед пашwәхтийеда, гәләк мәрьв хwә жь ширәткьрьна зарʹа дур дьгьрьн, чьмки дьфькьрин кӧ ширәткьрьн у рʹасткьрьна зарʹа дькарә сәр wана хьраб һʹӧкӧм кә у әwана хwәда итʹбар нибьн. Чь жи һәбә де-бавед сәрwахт, qәйден билани бона зарʹед хwә кʹьфш дькьн у wана һин дькьн, wәки wан qәйда пек биньн.

Памела дьбежә: «Зарʹарʹа гәрәке бежьн кӧ wанарʹа чь изьн ә бькьн у чь на, сәва кӧ али wан бькьн әwана бьбьнә мәрьвнә билан. Зарʹ бе ширәткьрьн, wәк qәйика бе рʹебәри йә, кʹижан кӧ ахьрийе рʹийа хwә ӧнда дькә у нӧqи аве дьбә».

Пʹайе зарʹа бьдә. Һәрге зарʹа тә qәйден тә пьшт гӧһе хwәва давежә, wирʹа шьровәкә ча әw йәк дькарә сәр wи хьраб һʹӧкӧм кә. Хенщи wе йәке һазьр бә тʹьме пʹайе зарʹа хwә бьди, чахе әw гӧһ дьдә тә.

Кʹристина дьбежә: «Әз тʹьме пʹайе зарʹед хwә дьдьм бона гӧһдайина wан, чьмки wе дьнйайеда гӧһдайин кем дьбә. Чахе пʹайе зарʹа дьди, һьнге әwана һеса ширәткьрьне qәбул дькьн».

ПРИНСИПА КʹЬТЕБА ПИРОЗ: «Чьмки мәрьв чь дьчинә, wе жи дьчьнә» (Галати 6:7).

Сәрwахт бә. Чахе зарʹа ширәт дьки һьлдә һʹәсаб әʹмьре wи, фәрәсәтед wи у әwе йәке, кӧ әw һәла чь щурʹәйи шаши бәрдайә. Мәсәлә һәрге зарʹ гӧрʹа qәйде тә накә телефонева гьредайи, wе баш бә телефоне сәр wәʹдәки жь wи бьстини, йан тьштәкида wи синор ки. Һәйнәсәр сәва тьштед бьчʹук дьлтәнг нәбә.

Wендьл дьбежә: «Әз тʹьме дьхәбьтьм кӧ тедәрхьм һәла зарʹа мьн әʹйинатарʹа гӧрʹа мьн нәкьр йан ӧса һатә стандьн. Чахе мәрьв гәләк щар шашике бәрдьдә, әв йәк кемасийа wи дьдә кʹьфше, чь кӧ гәрәке бе рʹасткьрьне».

ПРИНСИПА КʹЬТЕБА ПИРОЗ: «Һерса зарʹед хwә рʹанәкьн, wәки әw бәр хwә нәкʹәвьн» (Колоси 3:21).

Һʹьзкьрьна хwә әʹйан кә. Чахе зарʹ фәʹм дькьн кӧ де-бав жь бо һʹьзкьрьне wана һин дькьн, һьнге әwана дьһа бь һазьрбун гӧһ дьдьн у ширәта де-бавед хwә пек тиньн.

Данийел дьбежә: «Чахе кӧрʹе мә шашийа бәрдьдә һьнге әм wи дьдьнә баwәркьрьне кӧ әм фьрнаq дьбьн һʹәму сафикьрьнед wийи башрʹа, чь кӧ әwи пешда кьрьбу. Әм wирʹа шьровәдькьн кӧ әw шаши, wе наве wи хьраб нәкә, һәрге әw ширәт у аликʹарийа мә qәбул кә».

ПРИНСИПА КʹЬТЕБА ПИРОЗ: «Һʹьзкьрьн думькдьреж у ширьн ә» (1 Корьнтʹи 13:4).