Де-бав, һәвал у мәзьне хәбате һеса итʹбарийа хwә мәрьвед итʹбар тиньн. Әw мәрьв ль гора qәйда дькьн, хwәйе созе хwә нә у тʹьме рʹастийе хәбәр дьдьн.

Бь рʹасти һәр дәрәщада бәндә дькарә һаqас азайе бьстинә, чьqас кӧ әwи избат кьрийә wәки дькарьн итʹбарийа хwә wи биньн.

Сараһи дьбежә: «Сәва кӧ де-баве тә итʹбарийа хwә тә биньн, тӧ гәрәке бьди кʹьфше, wәки тӧ йәки сәрwахт и у щерʹьбанди йи. Әwе йәке тӧ гәрәке нә кӧ һьнге бьди кʹьфше гава тӧ тʹәви wан и, ле ӧса жи чахе тӧ тʹәне йи».

ПРИНСИПА КʹЬТЕБА ПИРОЗ: «Дьле хwә бьщерʹьбиньн у дина хwә бьдьне, кʹа һун нава баwәрийеда нә?» (2 Корьнтʹи 13:5).

Һәрге тӧ дьхwази кӧ мәрьв һе зедә итʹбарийа хwә тә биньн, йан жи тӧ дьхwази итʹбарийа ӧндакьри диса qазанч ки, ширәтед кӧ жере тенә дайине, дькарьн али тә бькьн.

Йәки рʹаст бә. Мәрьв дәрбера дькарьн итʹбарийа хwә һьндава тәда ӧнда кьн, чахе бьвиньн кӧ тӧ дәрәwа дьки. Алийе дьнва жи, чахе тӧ мәрьвәки рʹаст у дьлвәкьри йи, илаки һьндава шашийед хwә, һьнге мәрьв дәстпедькьн итʹбарийа хwә тә биньн.

Каиман дьбежә: «Чахе һʹәму тьшт баш ә, һьнге һеса йә мәрьвәки һәq би. Ле гава тӧ дәрәщед гьранда кемасийед хwә вәнашери, мәрьв һе зедә итʹбарийа хwә тә тиньн».

ПРИНСИПА КʹЬТЕБА ПИРОЗ: «Әм . . . дьхwазьн кӧ һәр тьшти рʹаст бькьн» (Ибрани 13:18).

Мәрьвәки итʹбар бә. Ль гора һʹәсаба, 78 сәләф мәрьвед щерʹьбанди дь Дәwләтед Йәкбуйида готьнә, кӧ «чахе кәсәки һьлдьдьн ль кампанийәкеда бьхәбьтә, һьнге мәзьне хәбате нав мәрьвида дьхwазьн бьвиньн, һәла әw чьqас мәрьвәки итʹбар ә». Һәрге тӧ ньһа һин дьби кӧ мәрьвәки итʹбар би, ахьрийеда жи гава мәзьн би, әв йәк wе тәрʹа керһати бә.

Сара дьбежә: «Чахе де-баве мьн дьвиньн кӧ әз йәкә щабдар ьм, у һʹәму шьхӧли бь щабадьрийе дькьм, һьнге әwана ида сәд щари мьнрʹа тьшта навәкʹьлиньн. Чьqас һе зәʹф әз ӧса хwә кʹьфш дькьм, һаqас һе зедә әwана итʹбарийа хwә мьн тиньн».

ПРИНСИПА КʹЬТЕБА ПИРОЗ: «Мьн әв йәк тәрʹа ньвиси, чьмки әз заньм те жь готьна мьн зедәтьр бьки» (Фьлимон 21).

Сәбьр кә. Һәмьки wәʹдә у сәбьр лазьм ә, кӧ мәрьвед дьн бьвиньн wәки тӧ чьqас мәзьн буйи, бьльнд буйи у алийе физикида qәwи буйи. Анәгори wе йәке вьра жи сәбьр лазьм ә, wәки мәрьв бьвиньн кӧ тӧ буйи йәки щерʹьбанди у сәрwахт.

Брандон дьбежә: «Сәва кӧ де-бав у мәрьвед дьн итʹбарийа хwә тә биньн, бона wе йәке лазьм ә wәʹдә у qәwат. Һәрге тӧ тʹәне щарәке дьди кʹьфше кӧ йәки щабдар и, у паши wе йәке тʹӧ тьшти наки, те нькарьби һивийе би, кӧ де-баве тә итʹбарийа хwә тә биньн».

ПРИНСИПА КʹЬТЕБА ПИРОЗ: «Сәбьре ль хwә wәргьрьн» (Колоси 3:12).