Нет нә кӧ тʹәне мәрәм ә, ле һе зедә йә. Демәк тьштәки кӧ тӧ һʹьзрәт и wәки бьqәwьмә. Фькьрандьн, сафикьрьн у рʹаст wәʹдәбьжартьн, дькʹәвә нава нетед рʹаст.

Нет дькарьн кьн бьн, кʹижан кӧ нава чәнд һʹәфтийада дькари бини сери. Ӧса жи һәнә нетед ӧса, кӧ нава чәнд мәһада дькари бини сери. У һәнә йед дьреж жи, йед кӧ сала йан һе зедә дькʹьшиньн. Бь сайа нетед бьчʹук әм дькарьн бьгьһижьн нет-мәрәмед хwәйә дьреж.

Чахе дьгьһижи нетед хwә, әw али тә дькә хwәда баwәр би, һәвалтийа хwә qәwи ки у шабуна хwә зедә ки.

Хwәбаwәри: Чахе тӧ нетед бьчʹук датини пешйа хwә у дьгьһижи wан нета, тӧ хwәда баwәр дьби у һелан дьби бьгьһижи нетед мәзьн жи. Бь ве йәке тӧ ӧса жи нава проблемед һәр рʹожида, хwәда баwәр дьби у һелан дьби нәкʹәви бәр байе мәрьвед дьн.

Һәвалти: Мәрийарʹа хwәш те нава wанда бьн, йед кӧ нета датиньн пешийа хwә. Демәк әwед кӧ заньн чь дьхwазьн у һазьр ьн бона wе йәке шьхӧл бькьн. Хенщи wе йәке, сәва кӧ һәвалтийа хwә qәwи кьн тʹәви мәрьвәки дьн, лазьм ә тʹәви һәв шьхӧлкʹарийе бькьн кӧ нетед хwә тʹәвайи биньн сери.

Бәхтәwари: Чахе тӧ дьгьһижи нетед хwә тӧ даһа бәхтәwар дьби.

Хортәки бь наве Кристофер дьбежә: «Әз һʹьз дькьм нета дайиньм пешийа хwә. Бь сайа wе йәке әз тʹьме тьштәкива мьжул дьбьм у һелан дьбьм әве йәке бькьм. У чахе тӧ дьгьһижи нетед хwә, тӧ ләзәте дьстини у дьбежи ‹Ча баш ә, бал мьн һатә стандьн! Әз гьһиштьмә нета хwә›».

ПРИНСИПА КʹЬТЕБА ПИРОЗ: «Йе чʹәʹвдерийе ль байе дькә, начинә у йе кӧ ль әwран бьнерә, чьнандьнә накә» (Wаиз 11:4).

Әван гава һьлдә һʹәсаб кӧ бьгьһижи нет-мәрәмед хwә.

Тедәрхә. Нетед хwә бьньвисә, кӧ чь пәйи чь дьхwази бьки. Бьжберә кʹижан жь wан нета тӧ дьхwази пешийе бини сери, кʹижан йа дӧда, сьсийа у йед дьн.

Тʹьвдире бькә. Бона һәр нетәкә хwә әве йәке бькә:

• Зәлал кʹьфш кә кӧ чьqас wәʹдә тәрʹа лазьм ә, wәки нетед хwә бини сери.

• Гав бь гав сафи кә.

• Пешда бьфькьрә кӧ чь дькарә рʹийа тә бьгьрә, у әwан чәтьнайа тәйах кә.

Бькә. Һивийе нибә һʹәта кӧ һәр тьшт тәрʹа дәст бьдә, кӧ дәстпеки нета хwә бини сери. Һәла бьфькьрә: «Бәри пешьн әз чь гәрәке бькьм, сәва кӧ незики нета хwә бьм?» Паше ида дәстпекә. Дина хwә бьде, кӧ чаwа тӧ һеди-һеди дьгьһижи нета хwә.

ПРИНСИПА КʹЬТЕБА ПИРОЗ: «Тʹьвдира мәрьве хирәт әʹсә кʹаре тинә» (Мәтʹәлок 21:5).