Мәрьвед хәбатһʹьз хwә жь хәбате дур нагьрьн. Әwана ләзәте дьстиньн жь хәбате, кӧ дькарьн бона һʹәwщед хwә хәм бькьн у али йед дьнена бькьн, һәла һьнге жи гава әв хәбат бәрбьчʹәʹв нинә.

Чь жи һәбә, щәм мә гәләк щабдари һәйә. Дь ве дьнйайеда гәләк мәрьв һʹьз накьн хәбата гьран бькьн, ле чахе тӧ хәбатһʹьз и у һʹәму хәбат дьки, бь wе йәке тӧ кʹарәкә мәзьн дьстини (Wаиз 3:13).

Реон дьбежә: «Әз һин бум, кӧ чахе рʹьнд дьхәбьтьм, һьнге дьле хwәда ләзәте тʹәхмин дькьм у хwәрʹа фьрнаq дьбьм. Һәсте ләзәтстандьне әз һелан кьрьмә хәбате һʹьз бькьм. Чахе тӧ хәбатеда щабдарийа хwә тини сери, тӧ ӧса жи навәки баш хwәрʹа qазанч дьки».

ПРИНСИПА КʹЬТЕБА ПИРОЗ: «Һәр шьхӧлида кʹар һәйә» (Мәтʹәлок 14:23).

Ньһерʹандьна рʹаст ль сәр хәбате пешда бинә у ширәтед кӧ жере тенә дайине, һьлдә һʹәсаб.

Шьхӧле кӧ тӧ дьки, һе рʹьнд бькә. Фьрqи тʹӧнә тӧ чь шьхӧли дьки, мәсәлә дәрсе хwә, сәр хәбате тьштәки дьки, йан жи шьхӧлед дьн, бьхәбьтә кӧ хwә пʹешкʹеши шьхӧле хwә бьки. Дьqәwьмә тә шьхӧләк баш кьрийә, ле диса жи мәщала бьвинә кӧ шьхӧле хwәда һоста би, һьм жи кӧ зу бьки у даһа баш. Бь ве йәке тӧйе даһа щерʹьбанди би, у хәбата тә wе тәрʹа ләзәте бинә.

ПРИНСИПА КʹЬТЕБА ПИРОЗ: «Тә әw мәрьве шьхӧлкʹаре хwә дитийә? Әw ль бәр пʹадша дьсәкьнә, нә кӧ ль бәр мәрьве бекер дьсәнә» (Мәтʹәлок 22:29).

Дәрһәqа йед дьнена хәм бькә. Һәр дәрәщада, гава тӧ щабдарийед хwә рʹьнд пек тини, бь wе йәке тӧ мәрьвед дьнрʹа жи кʹаре тини. Бәʹса хәбәре, чахе тӧ хәбатһʹьз и у хәбата хwә рʹьнд дьки, бь wе йәке тӧ баре нәфәред мала хwә сьвьк дьки.

ПРИНСИПА КʹЬТЕБА ПИРОЗ: «Хwәзи ль дайийа, нә кӧ ль стандийа» (Кʹаред Шандийа 20:35).

Километрәке зедәтьр дәрбаз бә. Гава тӧ тьштәки дьки, һе зедә бькә, демәк жь wе йәке зедәтьр бькә, чьqас кӧ жь тә те хwәстьне. Тӧйе әве йәке нә бь дәсте зоре бьки, ле бь рʹәзәдьли. Ӧса, чахе тӧ һе зедә дьки, тӧ хwәха хwә контрол дьки (Мәтта 5:41).

ПРИНСИПА КʹЬТЕБА ПИРОЗ: «Qәнщийа тә ӧса нәбә, чаwа борщәк кьрьбьнә стуйе тә, ле бь рʹәзәдьлийа тә бә» (Фьлимон 14).

Сәрwахт бә. Мәрьвед хәбатһʹьз тʹәмбәл ниньн, әw нә жи фанатике хәбата хwә нә. Әwана бь сәрwахти хәбата хwә дькьн, у ләзәте дьвиньн ча хәбатеда ӧса жи wәʹде һесабуне.

ПРИНСИПА КʹЬТЕБА ПИРОЗ: «Бь арамийе тʹьжибуна ләпәки, жь дӧ ләпен тʹьжи ен кӧ бь кʹәде у жь хәбата кӧ жь бо гьртьна байе qәнщтьр ә» (Wаиз 4:6).