Бь Нетед Хԝәйә Рʹӧһʹани Әʹфьрандар Рʹумәт кә

«ЧАХЕ мәрьв ньзанә кӧ дьхԝазә һәрʹә кʹижан бәндәре, һьнге тʹӧ ба ԝе али ԝи нәкә». Дьбежьн ԝәки әв гьлийе философәки Рʹомайи нә, кӧ ԛьрʹна йәкеда дьжит. Гьлийе ԝи дьдә кʹьфше, ԝәки сәва кӧ нет-мәрәма жийина мәрьв һәбә, әԝ гәрәке нета дайнә пешийа хԝә.

Кʹьтеба Пирозда мәсәлед мәрьвед ӧса һәнә, йед кӧ нет дабунә пешийа хԝә. Мәсәлә, Нӧһ ԝәкә 50 сала хәбьти у «бона хьлазбуна мала хԝә гәми чекьр». Дәрһәԛа Муса пʹехәмбәр те готьне, ԝәки әԝ «чʹәʹвньһерʹи бу, кӧ һәԛе хԝә» жь Хԝәде «бьстанда» (Ибрани 11:7, 26). Йешу жи, кʹижан кӧ дәԝса Муса гьрт, нет данибу пешийа хԝә, кӧ әʹрде Кәнане зәфт кә (Ԛануна Дӧщари 3:21, 22, 28; Йешу 12:7-24).

Паԝлосе шанди, кʹижан кӧ ԛьрʹна йәке Д.М-да дьжит, нетед рʹӧһʹани данибу пешийа хԝә. Ча те кʹьфше, гьлийе Иса сәр ԝи һʹӧкӧм кьрьбун: «Мьзгинийа Пʹадшатийе ԝе ль нав тʹәмамийа дьнйайе бе даннасинкьрьне» (Мәтта 24:14). Хәԝн-хәйалед кӧ Паԝлос жь Иса стандьбу, ӧса жи әԝ тʹәмийа кӧ «наве [Иса]» мьләтед дьнрʹа жи бьдьнә наскьрьне, Паԝлос һелан кьрьбун хирәт бә. Ләма жи Паԝлосе шанди роләкә фәрз лист сазкьрьна щьватед Мәсиһийада ча Асйа Бьчʹукда, ӧса жи Әԝропайеда (Кʹаред Шандийа 9:15; Колоси 1:23).

Ча әм дьвиньн, нава тʹәрихийеда хьзмәткʹаред Йаһоԝа тʹьме нет данә пешийа хԝә у гьһиштьнә ԝан, бь сайа чь жи рʹумәт данә Хԝәде. Ле әм чь щурʹәйи дькарьн иро нета дайньн пешийа хԝә? Кʹижан нета әм дькарьн дайньн у чь бькьн, кӧ бьгьһижьнә ԝан?

Бь Дьле Тʹәмьз Нета Дайньн Пешийа Хԝә

Әм һәргав у һʹәму дәрәщед жийина хԝәда дькарьн нета дайньн пешийа хԝә. Ве дьнйайеда жи гәләк мәрьвед ӧса һәнә, йед кӧ хԝәрʹа нета датиньн. Ле нетед мәйә рʹӧһʹани щӧдә дьбьн жь нет у хԝәстьнед ве дьнйайе. Гава ве дьнйайеда мәрьв нета датиньн, мәʹни әԝ ә кӧ әԝана дьхԝазьн зәʹф дәԝләти бьн, һьм жи һʹьзрәта һʹӧкӧмәтийе у нав-дәнгийе нә. Ԝе чьԛас нәаԛьлайи бә, ԝәки нета сәва ве йәке дайньн кӧ һʹӧкӧмәтийе бькьнә дәсте хԝә у навдар бьн! Нетед мәйә кӧ Йаһоԝа Хԝәде рʹумәт кьн, пьштгьрийа Пʹадшатийа Хԝәде дькьн (Мәтта 6:33). Әм ԝан нета датиньн пешийа хԝә, чьмки Хԝәде у мәрийа һʹьз дькьн, у дьхԝазьн Хԝәдерʹа амьн бьминьн (Мәтта 22:37-39; 1 Тимотʹейо 4:7).

Бьра нета дьле мә тʹәмьз бә, гава әм нета датиньн пешийа хԝә у дьгьһижьнә ԝан, фьрԛи тʹӧнә әм дьхԝазьн борщдарийед дьһа мәзьн бьстиньн йан рʹӧһʹанида пешда һәрʹьн. Һәла һе жи нетед кӧ әм бь дьле тʹәмьз датиньн пешийа хԝә, тʹьме найенә сери. Ле әм чь бькьн кӧ бькарьбьн бьгьһижьнә нетед хԝә?

Бьра Хԝәстьна Тә Ԛәԝи бә

Ԝәрә шеԝьр кьн, кӧ чаԝа Йаһоԝа гәрдун әʹфьранд. Бь ван гьлийа «бу евар у сьбәһ», Йаһоԝа ԝәʹдә да кʹьфше кӧ ԝе чь пәй чь бе әʹфьрандьне (Дәстпебун 1:5, 8, 13, 19, 23, 31). Дәстпека ԝәʹде һәр әʹфьрандьнәкеда, Әʹфьрандар рʹьнд заньбу, ԝәки ԝе «рʹоже» чь гәрәке бьәʹфьринә. У әԝи нета хԝәйә әʹфьрандьне гав пәй гав ани сери (Әʹйанти 4:11). Ибо ӧса гот: «Щане ԝи [Йаһоԝа] чь бьхԝазә, ԝе . . . бькә» (Ибо 23:13). Һәмьки Йаһоԝа чьԛас ша дьбу, чахе дина хԝә дьда «һʹәму кьрьна хԝә» у дьгот, ԝәки әԝ «гәләки ԛәнщ бун»! (Дәстпебун 1:31)

Сәва кӧ нетед мә бенә сери, хԝәстьна мә бона ԝан нета гәрәке гәләк ԛәԝи бә. Ԝе чь али мә бькә кӧ хԝәстьна ви щурʹәйи нав хԝәда пешда биньн? Гава әʹрд бе щурʹә у вала бу, Йаһоԝа дьда бәр чʹәʹве хԝә ахьрийа кьред хԝә, кӧ әʹрд космоседа бьбә дӧрʹәки хас, кʹижан кӧ һӧрмәт-рʹумәте ԝирʹа бинә. Әм жи дькарьн хԝәстьна хԝәйә кӧ нетед хԝә биньн сери, ԛәԝи кьн, һәрге бьфькьрьн дәрһәԛа тьштед баш кӧ пеканина нетед мә ԝе пәй хԝә биньн. Сәрһатийа Тони әве йәке рʹьнд дьдә кʹьфше. Әԝ 19 сали бу, чахе щара пешьн чубу филиала Шәʹдед Йаһоԝа Әԝропайа Рʹоавайеда у әԝ чь кӧ әԝи ԝедәре дит, гәләк дьле ԝи гьрт. Жь ԝи чахи фькьрәк жь һʹьше Тони дәрнәдькʹәт: «Хԝәзьл мьн жи щики ви щурʹәйида бьжита у хьзмәт кьра!» Тони тʹьме дәрһәԛа ве йәке дьфькьри у ԛәԝат дьда хәбате, кӧ бьгьһижә нета хԝә. Чәнд сал шунда чахе әԝ тʹәглиф кьрьн кӧ филиаледа хьзмәт кә, әԝ зәʹф ша бу!

Һәрге әм тʹәви ԝан мәрьва һәвалтийе бькьн, кʹижан кӧ гьһиштьнә һьнә нетед хԝә, әԝ йәк жи дькарә хԝәстьна мә зедә кә кӧ әм бьгьһижьнә нетед хԝә. Щейсон кӧ ньһа 30 сали йә, тинә бира хԝә, ԝәки чахе әв һе бьчʹук бу, әԝи хьзмәткьрьн һʹьз нәдькьр. Ле паши хьлазкьрьна мәкʹтәбе, әԝи бь шабуне дәстпекьр ча пешәнг хьзмәт кә. Чь али Щейсон кьр, ԝәки әԝе хԝәстьне нав хԝәда пешда бинә? Әԝ дьбежә: «Мьн тʹьме тʹәви пешәнга хьзмәт дькьр у тʹәви ԝан һәвалти дькьр, у әв йәк гәләк баш сәр мьн һʹӧкӧм бу».

Нетед Хԝә Бьньвисьн

Фькьред мә дьһа зәлал дьбьн чахе әм бь гьлийа шьровәдькьн. Сьлеман готьбу, ԝәки ԛәԝата хәбәред кӧ рʹаст тенә бьжартьне, һәйә у әԝана мина шьва шьван ьн, кӧ рʹебәрийе дьдә һʹәйԝана (Ԝаиз 12:11). Гава гьли тенә лекьрьне, әԝана дькарьн гәләк сәр һʹьш-аԛьле мә у сәр дьле мә һʹӧкӧм бьн. Ләма жи Йаһоԝа тʹәми дабу пʹадшед Исраеле, ԝәки Ԛануне бәр бьгьрьн (Ԛануна Дӧщари 17:18). Ԝе баш бә кӧ әм нетед хԝә у методед кӧ әм ча бьгьһижьнә ԝан, хԝәрʹа бьньвисьн. Ӧса жи әм дькарьн бьньвисьн кӧ әме рʹасти чь чәтьнайа бен у ча дькарьн алт кьн. Һьм жи ԝе баш бә тедәрхьн кʹижан пьрсада әм гәрәке занәбуна хԝә зедә кьн, кʹижан фәрәсәта пешда биньн у кʹе дькарә пьштгьрийа мә бькә.

Нетед рʹӧһʹани ӧса жи гәләк баш сәр Щефри һʹӧкӧм бун. Щефри гәләк сал ча пешәнге мәхсус щийе дур, Асйайеда хьзмәт дькьр. Ԝәʹде хьзмәткьрьна ԝийә Асйайеда ньшкева жьна ԝи мьр. Паши ве ԛәзийе, гава әԝ һьнәки һатә сәр һʹьше хԝә, әԝи нетед рʹӧһʹани дани пешийа хԝә у һәр тьшт дькьр сәва кӧ бьгьһижә ԝан нета. Әве йәке али ԝи кьр, ԝәки ԛьдум нәкʹәвә. Әԝи сафи кьр һʹәму ԛәԝата хԝә хьзмәткьрьна пешәнгтида хәрщ кә. Әԝи нетед хԝә сәр кʹахаз ньвиси у дәрһәԛа ԝан нета дӧа кьр. Әԝи хԝәст ԝәки хьлазийа мәһе тʹәви се мәрьва һинбуна Кʹьтеба Пироз дәстпекә. Һәр рʹож әԝ дьфькьри һәла әԝи чь ида кьр у дәһә рʹожа щарәке дина хԝә дьдайе һәла әԝ гьһиштийә чь. Гәло ахьрийеда әԝ гьһиштә нетед хԝә? Әре, әԝи нә кӧ сьсе, ле чар һинбунед Кʹьтеба Пироз дәстпекьр! Әԝе йәке шабунәкә мәзьн кьрә дьле ԝи!

Жь Нетед Бьчʹук Дәстпекә

Дькарә ӧса бе кʹьфше, ԝәки чәтьн ә бьгьһижи һьнә нета. Тонирʹа, дәрһәԛа кʹижани кӧ жоре һатьбу готьне, ӧса дьһатә кʹьфше кӧ хьзмәткьрьна филиала Шәʹдед Йаһоԝада, нетәкә реали нинә. Мәʹни әԝ бу, кӧ рʹабун-рʹуньштьна ԝи нә лайиԛи нормед Хԝәде бу у әԝи нә жи хԝә тʹәсмили Хԝәде кьрьбу. Ле диса жи Тони сафи кьр жийина хԝә ль гора нормед Хԝәде бьгӧһезә у нет дани пешийа хԝә, кӧ бе ньхӧмандьне. Паши ньхӧмандьне жи әԝи нетед тʹәзә дани пешийа хԝә. Әԝи салнәʹма хԝәда кʹьфш кьр, кӧ чь чах ԝе дәстпекә ча пешәнге ԝәʹдәлу у паше жи ча пешәнге һәртʹьм хьзмәт кә. Паши дәстпекьрьна пешәнгтийе, нета ԝийә кӧ филиаледа хьзмәт кә, бона ԝи ида реали бу.

Әм жи дькарьн бьфькьрьн, кӧ кʹижан нетед бьчʹук әм дькарьн дайньн пешийа хԝә, сәва кӧ бьгьһижьнә нета хԝәйә сәрәкә. Нетед бьчʹук мина нишанед сәр рʹе, дькарьн мә бәрбь нета сәрәкә бьвьн. Әм гәрәке һәр щар дина хԝә бьдьне, һәла әм нетед хԝәда чьԛас пешда чунә. Әв йәк ԝе али мә бькә, кӧ дина мә тʹьме сәр нета мәйә сәрәкә бә. Ӧса жи гәләк фәрз ә Йаһоԝарʹа тʹьме дӧакьрьнеда дәрһәԛа нетед хԝә гьли кьн. Әв йәк ԝе али мә бькә кӧ тʹәрка нета хԝә нәдьн. Паԝлосе шанди гот: «Һәр гав дӧа бькьн» (1 Тʹесалоники 5:17).

Хирәт бә у Сьст Нәбә

Һәрге жи мә графика рʹьнд хԝәрʹа чекьрийә у гәләк һʹьзрәта ԝе йәке нә, кӧ бьгьһижьнә нета хԝә, ле диса жи дьԛәԝьмә найе стандьн. Бьдә һʹәсабе хԝә, кӧ Йуһʹәннайе шанди, кӧ жерʹа Марԛос дьготьн, чьԛас дьлтәнг бу чахе Паԝлосе шанди ԝәʹде рʹеԝитийа хԝәйә дӧда нәхԝәст ԝи тʹәви хԝә бьвә! (Кʹаред Шандийа 15:37-40) Марԛос гәрәке жь ве йәке хԝәрʹа дәрс һьлда у нетед хԝәйә дәрһәԛа зедәкьрьна хьзмәтийе, бьгӧһаста. Әԝи һәма ӧса жи кьр. Һьнә ԝәʹдә шунда Паԝлос дәрһәԛа Марԛос баш хәбәр да. Ӧса жи Марԛос тʹәви Пәтрусе шанди Бабилонеда шьхӧлкʹари дькьр (2 Тимотʹейо 4:11; 1 Пәтрус 5:13). Ԝирʹа һәла һе ԛәдьрәки ӧса жи һатьбу дайине, кӧ әԝи жь бина бәр Хԝәде сәрһатийа дәрһәԛа жийин у хьзмәтийа Иса ньвиси.

Дьԛәԝьмә әм жи рʹасти чәтьнайа бен, чахе нетед рʹӧһʹани датиньн пешийа хԝә у бәрбь ԝан дьчьн. Ле дәԝса кӧ сьст бьн у тʹәрка нета хԝә бьдьн, ԝе баш бә һьнә леколина бькьн, диса щарәке кʹур дәрһәԛа нета хԝә бьфькьрьн у һәрге лазьм ә гӧһастьна бькьн. Гава сәр рʹийа мә чәтьнайи пешда тен, әм гәрәке хирәт бьн у ԛәԝате бьдьнә хәбате, сәва кӧ сьст нәбьн. Сьлеман Пʹадшайе билан ӧса мә дьдә баԝәркьрьне: «Шьхӧле хԝә бьдә дәсте Хӧдан у те бьгьһижи нет-мәрәме хԝә» (Мәтʹәлок 16:3).

Ле диса жи щарна жь бо һьнә дәрәща, әм нькарьн бьгьһижьнә нетед хԝә. Мәсәлә жь бо сьһʹәт-ԛәԝата сьст йан борщдарийед малбәте, әме нькарьбьн нета хԝә биньн сери. Чь жи һәбә, ԝәрә әм тʹӧ щар бир нәкьн, ԝәки хәлата мәйә мәзьн, жийина һʹәта-һʹәтайе йә, йан ль әʹзмен йан жи сәр әʹрде (Луԛа 23:43; Филипи 3:13, 14). Ле чаԝа әве хәлате ԛазанщ кьн? Йуһʹәннайе шанди ӧса ньвиси: «Әԝе кӧ әʹмьре Хԝәде дьԛәдинә ԝе һʹәта-һʹәтайе бьминә» (1 Йуһʹәнна 2:17). Мәрьв дьбәкә жь бо дәрәща хԝә, нькарьбә бьгьһижә нета хԝә, ле әԝ диса жи дькарә «жь Хԝәде бьтьрсә у әʹмред ԝи бьгьрә» (Ԝаиз 12:13, ИМ). Нетед рʹӧһʹани али мә дькьн, кӧ дина мә тʹьме сәр ԝе йәке бә, ԝәки ԛьрара Хԝәде биньн сери. Ләма жи ԝәрә әм бь нетед хԝә Әʹфьрандаре хԝә тʹьме һӧрмәт-рʹумәт кьн.

[Чаргошә]

Сәр Ԝан Нетед Рʹӧһʹани Бьфькьрә

○ Һәр рʹож Кʹьтеба Пироз бьхунә

○ Һәр журналәкә «Бьрща Ԛәрәԝьлийе» у «Һʹьшйар Бьн!» кӧ тʹәзә дәртен, бьхунә

○ Дӧайед хԝә баш кә

○ Бәре рʹӧһʹ бьдә кʹьфше

○ Бьхәбьтә кӧ хьзмәтийа хԝә зедә ки

○ Бәлакьрьна мьзгинийеда у һинкьрьнеда бьбә һостә

○ Һин бә кӧ рʹьнд бь телефоне, нәформал у ль щийед кӧ гәләк мәрьв тʹоп дьбьн хьзмәт ки