Кʹьтеба Пироз Жийина Мәрьва Дьгӧһезә

ЧЬ ҺЕ зедә шабун мерәки жь Скотләндайерʹа ани, нә кӧ пешдачуйина бизнеседа? Чь али мерәки жь Бразилйайе кьр, кӧ жийина бенамус бьһелә у тʹәрка крек кокайине бьдә? Ча мерәк жь Словенйайе карьбу тʹәрка ичʹке бьдә? Ԝәрен әм бьхуньн һәла әԝ мәрьв дәрһәԛа хԝә чь гьли дькьн.

«Әʹмьре Мьн Гәләк Мьн Хԝәш Дьһат». ЩОН РИКЕТТС

САЛА БУЙИНЕ: 1958

ԜӘЛАТ: СКОТЛӘНДА

БӘРЕ: БИЗНЕСМЕНӘКИ ПЕШДАЧУЙИ БУ

ЖИЙИНА МЬНӘ БӘРЕ: Малбәта мәда кемасийа пʹәра тʹӧнә бу. Баве мьн офисере ордийа Британи бу, ләма жи әм гәләк щар дәрбази щурʹә-щурʹә щийа дьбун. Хенщи Скотләндайе әм ӧса жи Инглистане, Алманйайе, Кәнйайе, Ирләндайе у Кипрусе дьжитьн. Чахе әз һʹәйшт сали бум Скотләндайеда әз дьчумә мәкʹтәба кʹидәре зарʹ шәв дьман. Паше мьн Университета Кембрище хьлаз кьр.

Чахе әз 20 сали бум, 8 сала әз сәр бизнеса ньфте дьхәбьтим. Пешийе әз Америкайа Башуреда дьхәбьтим, паше һьнә ԝәхт әз Африкайеда дьхәбьтим у паше Роавайа Австралйайеда. У Австралйайеда мьн компанийәк саз кьр кʹижан паше фьрот.

Бь сайа ве йәке мәщал мьнрʹа һатә дайине, кӧ 40 сале хԝәда ида нәхәбьтьм у һәрʹьмә рʹеԝитийе. Бь сайа мотосикле мьн дӧ щара тʹәмамийа Австралйайе дит у ӧса жи мьн рʹеԝитийа тʹәмамийа дьнйайе кьр. Әʹмьре мьн гәләк мьн хԝәш дьһат.

ЧАԜА КʹЬТЕБА ПИРОЗ ЖИЙИНА МЬН ГӦҺАСТ: Пешийа ԝе йәке кӧ мьн бизнес бьһишта, мьн дьхԝәст рʹазибуне жь Хԝәде бьхԝазьм бона әʹмьре хԝәйе баш, ле мьн ньзаньбу ча ԝе йәке бькьм. Чахе әз бьчʹук бум, әз дьчумә дера Англикани, ләма жи мьн сафи кьр диса һәрʹьмә ԝедәре. Паше мьн дәстпекьр һәрʹьмә щәм Мормона, ле ԝәʹдә шунда әз жь ԝедәре чум, чьмки ԝана ԛә дина хԝә нәдьда Кʹьтеба Пироз.

Щарәке Шәʹдед Йаһоԝа дәре мьн хьстьн у гәләк дьле мьн гьрт әԝ йәк, ԝәки чь кӧ ԝана һин дькьр, сәр һʹиме Кʹьтеба Пироз бу. Ԝана мьнрʹа хԝәнд 1 Тимотʹейо 2:​3, 4 кʹидәре те готьне, кӧ ԛьрара Хԝәде ԝе йәкеда нә, ԝәки «һʹәму мәрьв хьлаз бьн у рʹастийе нас кьн». Гәләк сәр мьн һʹӧкӧм кьр әԝ йәк, кӧ Шәʹдед Йаһоԝа дәрһәԛа занәбуна рʹаст сәр һʹиме Кʹьтеба Пироз гьли дькьрьн.

Һинбуна Кʹьтеба Пироз тʹәви Шәʹдед Йаһоԝа али мьн кьр занәбуна рʹаст бьстиньм. Мәсәлә, әз пеһʹәсийам ԝәки Хԝәде у Иса Сейәканә ниньн (Йуһʹәнна 14:28; 1 Корьнтʹи 11:3). Занәбуна ве рʹастийе гәләк дьле мьн гьрт. Әз гәләк хәмгин бум, кӧ мьн һаԛас ԝәхт ньзаньбу рʹастийа ве йәке.

Паше мьн дәстпекьр һәрʹьм сәр щьватед Шәʹдед Йаһоԝа. Әз әʹщебмайи мам чахе мьн дит, кӧ әԝана чьԛас һәвалһʹьз бун у ԝана хԝә нормед нав-намусийе дьгьрт. Те бежи әԝана мәрьвнә пироз бун. Һʹьзкьрьна ԝанә һʹәлал мьн да избаткьрьне, кӧ мьн религийа рʹаст дит (Йуһʹәнна 13:35).

ЧЬ КʹАР МЬН СТАНД: Паши ньхӧмандьне әз рʹасти кәчʹькәкә дәлал һатьм, наве кʹижане Диана бу. Әԝ жь зарʹотийа хԝә нава рʹастийеда мәзьн бьбу у гәләк һʹӧнӧред ԝейә баш һәбун. Ахьрийе әм зәԝьщин. Һәвалти у пьштгьрийа Дианайе, жь Йаһоԝа кʹәрәм бу бона мьн.

Хԝәстьнәкә мәзьн щәм мьн у Дианайе пешда һат, ԝәки дәрбази ԝе територийайе бьн, кʹидәре һʹәԝщәти һәбу. Сала 2010 әм дәрбази Белизе бун, йа кӧ Америкайа Навәнда нә. Вьра әм али ван мәрьва дькьн, йед кӧ Хԝәде һʹьз дькьн у дьхԝазьн рʹастийа ԝи пебьһʹәсьн.

Әз чьԛас дәрһәԛа Хԝәде у Хәбәра ԝи, демәк Кʹьтеба Пироз педьһʹәсийам, һаԛас һе зедә мьн әʹдьлайа дьл дьстанд. Һʹәчʹи зәʹф ԝәʹде хԝә мьн хьзмәткьрьнеда дәрбаз дькьр, ләма жи мәщаләкә ӧса мьнрʹа дьһатә дайине, кӧ гәләк мәрийарʹа дәрһәԛа Хԝәде гьли кьм. Бь рʹасти шабунәкә мәзьн әԝ ә, чахе тӧ дьвини кӧ Кʹьтеба Пироз әʹмьре мәрьва дьгӧһезә, чаԝа әʹмьре мьн жи гӧһаст. Ньһа әз бь рʹасти бәхтәԝар ьм, чьмки бь сайа хьзмәткьрьне әз дькарьм рʹазибуне Хԝәдерʹа бьдьмә кʹьфше, бона әʹмьре хԝәйе баш.

«Әԝана Гәләк Һʹәйф Бун Һьндава Мьн». МАУРИСИУ АРАУЖУ

САЛА БУЙИНЕ: 1967

ԜӘЛАТ: БРАЗИЛЙА

БӘРЕ: БЬ ЖИЙИНӘКӘ БЕНАМУС ДЬЖИТ

ЖИЙИНА МЬНӘ БӘРЕ: Әз мәзьн бьбум шәһәрәки бьчʹук Авареда, йа кӧ Сао Паулода нә. Ԝедәре һʹәчʹи зәʹф хәбатчи дьминьн.

Чахе дийа мьн сәр мьн дӧһʹали бу, баве мьн мьр. Бьчʹуктайеда чахе дийа мьн нәмал бу, мьн кʹьнщед ԝе хԝә дькьр. Ԝәʹдә шунда рʹабун-рʹуньштандьна мьн бу мина йа жьнька у мәрьва мьн һʹәсаб дькьрьн һомосексуалист. Паше мьн тʹәви гәда у мера бенамуси дькьр.

Әз 20 салийа хԝәда ӧса бенамусийева һатьбум гьредане, кӧ мьн һʹәму щийа, мәсәлә клубада у һәла һе дерада жи, жьн у мер дьгәрʹийа, сәва кӧ тʹәви ԝана бенамусийе бькьм. Ԝәʹде карнавале мьн кʹьнще жьна хԝә дькьр у дьлист. Әз бьбумә йәки навдар.

Мьн тʹәви һомосексуалиста, ԛава у тʹәви наркомана һәвалти дькьр. Һьнәк жь ԝан мьнрʹа крек кокайин дьдан у паше әз пева һатьмә гьредане. Щарна тʹәмамийа шәве мә крек кокайин дькʹьшанд. Щарна жи мьн башԛә тʹәмамийа рʹоже дькʹьшанд. Әз гәләк жар бьбум у һьнә мәрьв дьфькьрин, ԝәки щәм мьн нәхԝәшийа AIDS (СПИД) һәйә.

ЧАԜА КʹЬТЕБА ПИРОЗ ЖИЙИНА МЬН ГӦҺАСТ: Ԝи ԝәʹдәйи әз рʹасти Шәʹдед Йаһоԝа һатьм. Әԝана гәләк һʹәйф бун һьндава мьн. Ԝана мьнрʹа Рʹомайи 10:​13 хԝәнд, кʹидәре те готьне: «Кʹи гази наве Хӧдан кә, ԝе хьлаз бә». Әԝ хәбәр сәр мьн гәләк һʹӧкӧм кьрьн у мьн фәʹм кьр, ԝәки чьԛас фәрз ә наве Хԝәде бьдьнә хәбате. Гәләк щар паши ԝе йәке, чахе мьн тʹәмамийа шәве крек кокайин дькʹьшанд, мьн пʹәнщәрә вәдькьр, ль сәр әʹзмана дьньһерʹи у пе һесьра жь Йаһоԝа лава дькьр, ԝәки әԝ али мьн бькә.

Дийа мьн гәләк дьчәрчьри гава дьдит, кӧ ча наркотик әʹмьре мьн хьраб дькә. Әз бона дийа хԝә бәр хԝә дькʹәтьм, ләма жи мьн сафи кьр тʹәрка наркотика бьдьм. Паше ԝе йәке, әз ԛайил бум ԝәки Шәʹдед Йаһоԝа тʹәви мьн һинбуна Кʹьтеба Пироз дәстпекьн. Ԝана мьн да баԝәркьрьне кӧ бь сайа һинбуна Кʹьтеба Пироз, әзе бькарьбьм тʹәрка наркотика бьдьм. У рʹасти жи ӧса ԛәԝьми!

Бь сайа һинбуна Кʹьтеба Пироз мьн фәʹм кьр, кӧ әз гәрәке щурʹе әʹмьре хԝә бьгӧһезьм. Йа лапә чәтьн сәва мьн әв бу, кӧ тʹәрка һомосексуалийе бьдьм. Чьмки әԝ йәк бьбу пʹарәкә жийина мьн. Ле чахе мьн тʹәрка һәвале хԝәйә нәбаш да у ида нәдьчумә клуба, әԝе йәке али мьн кьр, ԝәки әʹмьре хԝә бьгӧһезьм.

Рʹаст ә мьнрʹа нәһеса бу ԝан гӧһастьна бькьм, ле занәбуна ԝе йәке кӧ Йаһоԝа бона мьн хәм дькә у фәʹм дькә ԝәки әз рʹасти чь чәтьнайа тем, бәрдьлийа мәзьн дьда мьн (1 Йуһʹәнна 3:​19, 20). Сала 2002 мьн бь тʹәмами тʹәрка һомосексуалийе да у ԝе сале әз һатьмә ньхӧмандьне у бумә Шәʹде Йаһоԝа.

ЧЬ КʹАР МЬН СТАНД: Гӧһастьнед кӧ мьн кьр ӧса сәр дийа мьн һʹӧкӧм кьрьн, кӧ әԝе жи дәстпекьр Кʹьтеба Пироз һин бә. Ле йазьх инсулте лехьст. Ле диса жи әԝе бәрдәԝам дькьр һʹьзкьрьне һьндава Йаһоԝа у рʹастийа Кʹьтеба Пироз пешда бинә.

Әԝа ида һʹәйшт сал ә әз ча пешәнге һәртʹьм хьзмәт дькьм у али мәрийа дькьм Кʹьтеба Пироз һин бьн. Рʹаст бежьм щарна мьн тʹәви хԝәстьнед хԝәйә нәрʹаст шәрʹ дькьр. Ле мьн фәʹм дькьр, кӧ һәрге әз нәкʹәвьмә бәр байе ԝан хԝәстьнед хԝә, әзе дьле Йаһоԝа ша кьм.

Чахе әз незики Йаһоԝа бум у мьн дәстпекьр ӧса бьжим ча ԝи хԝәш те, ӧса мьн ԛәдьр у ԛимәта хԝә ԛазанщ кьр. Ньһа әз гәләк бәхтәԝар ьм.

«Мьн Бе Һʹәмде Хԝә Ичʹкә Вәдьхԝар». ЛУКА ШУТС

САЛА БУЙИНЕ: 1975

ԜӘЛАТ: СЛОВЕНЙА

БӘРЕ: ГӘЛӘК ИЧʹКЕ ВӘДЬХԜАР

ЖИЙИНА МЬНӘ БӘРЕ: Әз һатьмә буйине Лйублйанеда, пʹайтʹәхта Словенйайе. Бьчʹуктайа мьн, һʹәта чар салийа мьн баш бу. Паше баве мьн хԝә кӧшт. Паши ԝи дәрди дийа мьн дьхәбьти, сәва кӧ әз у бьре мьни мәзьн бьрʹчи нәминьн.

Чахе әз 15 сали бум, әз чум тʹәви пирька хԝә бьжим. Мьн хԝәш дьһат тʹәви ԝе бьжим, чьмки һʹәчʹи зәʹф щинаред мә, һәвалед мьн бун. Хенщи ԝе йәке, мьн ԝедәре һе хԝә аза тʹәхмин дькьр нә кӧ мале. Чахе әз 16 сали бум, мьн дәстпекьр тʹәви ԝан мәрьва һәвалтийе бькьм, кʹе ичʹкә вәдьхԝар. Һьнә ԝәхт шунда мьн пʹорʹе хԝә дьреж кьр, дәстпекьр нәщайиз кʹьнща хԝә кьм у щьхаре жи бькʹьшиньм.

Мьн щурʹә-щурʹә наркотика дьда хәбате, ле һʹәчʹи зәʹф мьн хԝәш дьһат ичʹке вәхԝьм. Пешийе мьн щарәкерʹа чәнд кʹас шәрав вәдьхԝар, ле паше ботʹләк зедәтьр. Мьн дькарьбу жь мәрьва вәшарта, кӧ бь рʹасти мьн чьԛас вәхԝарийә. Тʹәне пе ԝе йәке дькарьбун фәʹм кьрана кӧ мьн вәхԝарийә, чахе бина ичʹке мьн дьһат. Ле диса жи тʹӧ кәси нькарьбу бьда бәр чʹәʹве хԝә, кӧ мьн чәнд литьр шәрав йан бирә тʹәви араԛе вәхԝарийә.

Щарна мьн жь һәвале хԝә дӧ щара зедәтьр ичʹкә вәдьхԝар у паше ԝе йәке мьн али ԝан һәвалед хԝә дькьр, чьмки әԝана сәр ньга нәдьсәкьнин. Щарәке мьн бьһист ча һәваләки мьн гот, кӧ әз бе һʹәмде хԝә ичʹке вәдьхԝьм у ԝәки әз мина бочʹка бе бьн ьм. Сәр зьмане Словенйайе, әԝ гьли сәр ԝи кәси дьбежьн, кʹе жь гьшка зәʹфтьр ичʹке вәдьхԝә. Әве йәке гәләк дьле мьн ешанд.

Мьн дәстпекьр дәрһәԛа һʹале әʹмьре хԝә бьфькьрьм. Мьн хԝә бәр тʹӧ тьшти һʹәсаб нәдькьр. Те бежи әʹмьре мьн пʹучʹ у вала бу.

ЧАԜА КʹЬТЕБА ПИРОЗ ЖИЙИНА МЬН ГӦҺАСТ: Ԝи чахи мьн тʹәхмин кьр, кӧ ча хәйсәте һәвалдәрсханәки мьн алийе башда һатә гӧһастьне. Әԝ гӧһастьна ԝи гәләк сәр мьн һʹӧкӧм кьр, ләма жи мьн сафи кьр рʹасти ԝи бем у пебьһʹәсьм һәла мәʹнийа ве йәке чьда бу. Ԝәʹде хәбәрдане әԝи мьнрʹа гот, кӧ тʹәви Шәʹдед Йаһоԝа һинбуна Кʹьтеба Пироз дәстпекьрийә. Әԝи мьнрʹа гьли кьр һәр тьшт чь кӧ ԝәʹде һинбуне пеһʹәсийа бу у сәва мьн әԝ йәк тьштәки тʹәзә бу, чьмки чахе әз бьчʹук бум, тʹӧ кәси дәрһәԛа религийайе тʹәви мьн хәбәр нәдабу. Мьн дәстпекьр һәрʹьм сәр щьватед Шәʹдед Йаһоԝа у ԝана дәстпекьр тʹәви мьн һинбуна Кʹьтеба Пироз дәрбаз кьн.

Чахе әз Кʹьтеба Пироз һин дьбум әз гәләк тьшт дәрһәԛа рʹастийе педьһʹәсийам. Мәсәлә әз пеһʹәсийам, ԝәки әм «рʹожед ахьрийеда» дьжин (2 Тимотʹейо 3:​1-5). Әз ӧса жи пеһʹәсийам, кӧ зутьрәке Хԝәде ԝе һʹәму мәрьвед хьраб сәр әʹрде бьдә һьлдане, ле мәрьвед рʹаст ԝе сәр әʹрде щьнәте һʹәта-һʹәтайе бьжин (Зәбур 37:29). Хԝәстьна мьн пешда һат кӧ әʹмьре хԝә бьгӧһезьм, ԝәки һевийа мьн жи һәбә кӧ һʹәта-һʹәтайе сәр әʹрде бьжим.

Әз дәрһәԛа рʹастийа Кʹьтеба Пироз чь һин дьбум, мьн әԝ йәк һәвалед хԝәрʹа гьли дькьр. Рʹаст ә гәләк жь ԝан сәр мьн дькʹәнийан у ԛәрфе хԝә мьн дькьрьн, ле әԝ йәк һе рʹьнд бу, чьмки ӧса мьн фәʹм кьр кӧ әԝана һәвалед рʹаст нибун. Ӧса жи мьн фәʹм кьр, кӧ һʹәта әз тʹәрка һәвалед хԝә нәдьм, әзе нькарьбьм тʹәрка ичʹке бьдьм. Тʹәмамийа һʹәфтийе һәвалед мьн тʹәне һивийа ԝе йәке бун, кӧ шәми-ләʹда ичʹке вәхԝьн.

Ләма жи мьн тʹәрка ԝан да у дәстпекьр тʹәви Шәʹдед Йаһоԝа һәвалтийе бькьм. Әԝана пьштгьрийа мәзьн бун бона мьн, чьмки ԝана бь рʹасти Хԝәде һʹьз дькьрьн у ль гора принсипед ԝи дьжитьн. У ԝәʹдә шунда мьн карьбу тʹәрка ичʹке бьдьм.

ЧЬ КʹАР МЬН СТАНД: Әз гәләк жь Йаһоԝа рʹази мә кӧ ньһа мьнрʹа ичʹкә нәлазьм ә, сәва кӧ шабуне бьстиньм. Әз нә жи заньм кӧ әзе чь һʹалида бума, һәрге жийина хԝәда ԝан гӧһастьна нәкьра. Ньһа әз бь рʹасти бәхтәԝар ьм.

Әԝ ида ча 7 сал ә әз Словенйайеда, Бәйтʹәла Шәʹдед Йаһоԝада хьзмәт дькьм. Мьн нета жийине ԝи чахи дит, чахе Йаһоԝа нас кьр у дәстпекьр ԝирʹа хьзмәт кьм.