1, 2. а) Иса кʹижан мәтʹәлок һәвалед хԝәйи незикрʹа гьли кьрьн? (Бьньһерʹә шькьле әʹԝльн.) б) Әм чь гәрәке бьзаньбьн дәрһәԛа мәтʹәлока пез у бьзьна?

 ИСА тʹәви һәвалед хԝәйи незик Пәтрус, Әндраԝьс, Аԛуб у Йуһʹәнна дәрһәԛа тьштәки гәләк һʹәԝас хәбәрдьда. Паше чахе Иса мәтʹәлокед дәрһәԛа хӧламе амьн у сәрԝахт, дәһ ԛизед бькʹьр, у тәланта ԝанарʹа гьли кьр, пәйрʹа әԝи мәтʹәлока дьн гьли кьр. Дь ве мәтʹәлокеда әԝи хәбәрда дәрһәԛа ԝи ԝәʹдәйи чахе «Кӧрʹе Инсан» диԝана «һʹәму мьләта» бькә. Әԝи гот кӧ «Кӧрʹе Инсан» ԝе мәрьва жь һәвдӧ башԛә кә у бькә дӧ кʹома, кʹомәк бәрамбәри пез кьр у йа дьн жи бәрамбәри бьзьна. Әԝи ӧса жи гьли кьр дәрһәԛа кʹомәкә фәрз «бьред» Пʹадше. (Бьхунә Мәтта 25:31-46.)

² Әԝ мәтʹәлок чаԝа шандийарʹа ӧса жи ԝәʹде мәда ԛӧльхкʹаред Йаһоԝарʹа жи һʹәԝас ә, чьмки әԝ гьредайи йә тʹәви әʹмьре мәрийа. Иса гот кӧ һьнәк ԝе әʹмьре һʹәта-һʹәтайе бьстиньн, ле йед дьн ԝе бенә кʹӧтакьрьне. Ләма гәләк фәрз ә, ԝәки әм бьзаньбьн әԝ мәтʹәлок чь те һʹәсабе у әм чь гәрәке бькьн ԝәки әʹмьре һʹәта-һʹәтайе бьстиньн. Дь ве тʹемайеда, әме пебьһʹәсьн щаба ԝан пьрса: Ча Йаһоԝа али мә кьр ԝәки фәʹм бькьн әве мәтʹәлоке? Әм ча дькарьн бьзаньбьн кӧ әԝ мәтʹәлок  гьредайи йә тʹәви даннасинкьрьне? Кʹе гәрәке даннасин кә? У чьрʹа фәрз ә ԝәки мәрьв ньһа амьн бьн «Пʹадша» у «бьред» ԝирʹа?

3, 4. а) Әм чь гәрәке бьзаньбьн ԝәки әве мәтʹәлоке фәʹм бькьн? б) Сала 1881, «Бьрща Ԛәрәԝьлийеда» әԝ мәтʹәлок ча һатьбу шьровәкьрьне?

³ Сәва кӧ әм фәʹм бькьн мәтʹәлока дәрһәԛа пез у бьзьна, әм гәрәке бьзаньбьн 1) кʹе йә «Кӧрʹе Инсан», йан «Пʹадша», кʹе нә пәз у бьзьн, у кʹе нә «бьред» Пʹадше? 2) «Кӧрʹе Инсан» ԝе кʹәнге пез у бьзьна жь һәв башԛә кә, йан диԝане бькә? у 3) чьрʹа һьнәк тенә навкьрьне ча пәз ле йед дьн жи ча бьзьн?

⁴ Сала 1881, «Бьрща Ԛәрәԝьлийеда» һатьбу готьне кӧ «Кӧрʹе Инсан» йан жи «Пʹадша», әв һәйә Иса Мәсиһ. У ӧса жи һатьбу шьровәкьрьне кӧ «бьред» Пʹадше, нә кӧ тʹәне әԝ ьн кʹе ԝе тʹәви Иса һʹӧкӧмтийе бькә сәр әʹзмана, ле ӧса жи һʹәму мәрьвед кӧ ԝе бьжин сәр әʹрде, чахе бьбьнә ԛәданди. Дь ԝе «Бьрща Ԛәрәԝьлийеда» һатьбу готьне кӧ мәрьв ԝе бенә башԛәкьрьне ԝәʹде Һʹәзарсалийа Пʹадшатийа Иса, у йед кӧ һʹәму тьштида чʹәʹв дьдьнә һʹьзкьрьна Хԝәде, ԝе бенә навкьрьне ча пәз.

5. Сала 1923, щьмәʹта Йаһоԝа әԝ мәтʹәлок ча фәʹм дькьрьн?

⁵ Паше Йаһоԝа али щьмәʹта хԝә кьр, ԝәки әԝ мәтʹәлок ԝанарʹа дьһа фәʹмдари бә. Сала 1923, «Бьрща Ԛәрәԝьлийе» йа 15 Щотмәһеда һатьбу готьне, кӧ «Кӧрʹе Инсан» әԝ һәйә Иса. Ле паше бь сайа рʹезед жь Кʹьтеба Пироз һатә шьровәкьрьне кӧ «бьред» дь ве мәтʹәлокеда, әԝ ьн кʹи кӧ ԝе пʹадшатийе бькьн тʹәви Иса, у кӧ әԝана тʹәмам гәрәке сәр әʹзмана бьн ԝәʹде Һʹәзарсалийа Пʹадшатийе. Ӧса жи һатьбу готьне кӧ пәз тенә һʹәсабе әԝ йед кӧ ԝе бьжин сәр әʹрде, бьн пʹадшатийа Иса у бьред ԝида. У мәтʹәлокеда те готьне кӧ әԝана али бьред Пʹадше дькьн, башԛәкьрьн йан диԝанкьрьн, ԝе бе кьрьне чахе һәла һе бьред Иса сәр әʹрде бьн, демәк пешийа дәстпебуна Һʹәзарсалийа Пʹадшатийе. Дь ԝе журналеда ӧса жи һатьбу готьне, кӧ пәз ԝе әԝ бьн кʹижан кӧ баԝәрийа хԝә Иса тиньн у баԝәр дькьн кӧ тʹәне әԝ Пʹадшати ԝе әʹмьре лапи баш бьдә.

6. Сала 1995, фәʹмкьрьна ԝе мәтʹәлоке ча һатә гӧһастьне?

⁶ Гәләк сал әм дьшьрмиш дьбун кӧ ԝәʹде рʹожед ахьрийе мәрьв ԝе бенә диԝанкьрьне ль сәр һʹиме даннасинкьрьне. Һәрге ԝана мьзгини ԛәбул кьрана, ԝе бьбуна пәз, ле һәрге ԛәбул нәкьрана ԝе бьбуна бьзьн. Ле сала 1995 фәʹмкьрьна ԝе мәтʹәлоке һатә гӧһастьне. «Бьрща Ԛәрәԝьлийе» Мәтта 24:29-31 (бьхунә) бәрамбәр кьр тʹәви Мәтта 25:31, 32 (бьхунә), у шьровәкьр кӧ Иса ԝе ԝәʹде тәнгасийа мәзьн диԝана мәрийа бькә, чахе «Кӧрʹе Инсан» «рʹумәта хԝәва» бе. a (Бьньһерʹә спартьн.)

7. Мәтʹәлока дәрһәԛа пез у бьзьна чь те һʹәсабе?

⁷ Иро әм әве мәтʹәлока дәрһәԛа пез у бьзьна һе рʹьнд фәʹм дькьн. Әм заньн кӧ «Кӧрʹе Инсан» йан «Пʹадша» әԝ һәйә Иса. «Бьред» Пʹадше әԝ һәнә йед кӧ пе рʹӧһʹе пироз һатьнә рʹункьрьне, у тʹәви Иса ԝе сәр әʹзмана пʹадшатийе бькьн (Рʹомайи 8:16, 17). «Пәз» у «бьзьн» әԝ  һәнә мәрьв жь һʹәму мьләта. Әԝана ԝе бенә диԝанкьрьне пешийа хьлазбуна тәнгасийа мәзьн кӧ зутьрәке ԝе дәстпебә. У әм заньн кӧ Иса ԝе диԝана ԝана бькә анәгори ве йәке кӧ әԝана чаԝа бун һьндава рʹункьрийа йед кӧ һе сәр әʹрде нә. Әм гәләк жь Йаһоԝа рʹази нә ԝәки әԝи али мә кьр, фәʹм бькьн әԝе мәтʹәлоке у мәтʹәлокәд дьн жи жь Мәтта сәре 24 у 25!

8, 9. Чьрʹа Иса сәр әԝед кӧ тенә һʹәсабе пәз, гот кӧ әԝана «рʹаст ьн»?

⁸ Дь мәтʹәлока дәрһәԛа пез у бьзьнада Иса нәдайә хәбате нә хәбәра «даннасинкьрьн» нә жи хәбәра «шьхӧле даннасинкьрьне». Ԝәки ӧса нә, жь кʹӧ әм заньн кӧ әԝ мәтʹәлок мә һин дькә кӧ даннасинкьрьн гәләк фәрз ә?

⁹ Сәва кӧ щаба ԝе пьрсе бьвиньн, йа пешьн лазьм ә әм биньн бира хԝә кӧ Иса мәрьв бь сайа мәтʹәлока һин дькьрьн. Әԝи дәрһәԛа пәз у бьзьнед рʹаст нә дьгот. Иса ӧса жи нә дьгот ԝәки һәр кәс кʹи кӧ ԝе бе һʹәсабе пәз, гәрәке хԝарьне у кʹьнща бьдә рʹункьрийа, мьԛати ԝан бьн чахе әԝана нәхԝәш ьн, йан жи кәледа тʹәсәлийа ԝан бькьн. Ле Иса дәрһәԛа пез гот, кӧ әԝана «рʹаст ьн». Чьмки әԝана ль сәр рʹункьрийа ча сәр бьред хԝә дьньһерʹьн, у чьмки дь ԝан рʹожед ахьрийейә чәтьнда ԝанарʹа амьн дьминьн (Мәтта 10:40-42; 25:40, 46; 2 Тимотʹейо 3:1-5).

10. Пәз ча дькарьн али бьред Иса бькьн?

¹⁰ Чахе Иса гьли кьр мәтʹәлока дәрһәԛа пез у бьзьна, әԝи дьгот дәрһәԛа ԝе йәке, кӧ ԝе чь бьԛәԝьмә рʹожед ахьрийеда (Мәтта 24:3). Мәсәлә әԝи гот: «У әв Мьзгинийа Пʹадшатийе ԝе ль нав тʹәмамийа дьнйайе бе даннасинкьрьне» (Мәтта 24:14). Паше, пешийа кӧ хәбәрда дәрһәԛа пез у бьзьна, әԝи гьли кьр мәтʹәлока дәрһәԛа тәланта. Иса әԝ мәтʹәлок гьли кьр, сәва кӧ рʹункьрийа һин кә, кӧ гәләки бьхәбьтьн дь шьхӧле даннасинкьрьнеда. Ле ньһа ль сәр әʹрде рʹункьри тʹәне һьнәк манә, у гәләк шьхӧл майә кӧ бе кьрьне! Рʹункьрийарʹа һатьбу готьне, кӧ «һʹәму мьләтарʹа» даннасин кьн, һʹәта хьлази бе. Чаԝа әм жь мәтʹәлоке пеһʹәсийан, «пәз» али бьред Иса дькьн. Бь чь әԝана дькарьн али бьред Иса бькьн, йа лапә баш әԝ һәйә даннасинкьрьн. Ле һәгәр әԝана пʹәра ԛӧрбан кьн бона ԝи шьхӧли йан жи рʹункьрийа һелан кьн кӧ даннасин кьн, әԝ йәк бәсә?

11. Һьнәк дькарьн чь бьпьрсьн, у чьрʹа?

¹¹ Иро һʹәйшт милйон шагьртед Иса һәнә у һʹәчʹи зәʹф жь ԝана рʹункьри ниньн. Иса тәлант нәда ԝан. Әԝи тәлант да бьред хԝәйи рʹункьри (Мәтта 25:14-18). Ләма һьнәк дькарьн бьпьрсьн: «Һәгәр Иса тәлант нәдайә ԝан, ле гәло рʹасти лазьм ә кӧ әԝана даннасин кьн?» Бәле, лазьм ә. Ԝәрә әм пебьһʹәсьн чьрʹа.

12. Әм чь һин дьбьн жь гьлийед Иса дь Мәтта сәре 28:19, 20-да?

¹² Иса тʹәми да һʹәму шагьртед хԝә кӧ даннасин кьн. Иса чахе һатә сахкьрьне, әԝи готә пәйчуйед хԝә кӧ шагьрта һазьр кьн у ԝана «һʹәму тʹәмийед» ԝи һин кьн. Демәк, әԝед кӧ бьбуна шагьртед ԝи, гәрәке ӧса жи бьԛәдандана тʹәмийа Иса дәрһәԛа даннасинкьрьне. (Бьхунә Мәтта 28:19, 20.) Демәк жь ԝьр зәлал дьбә кӧ жь мә  һәр кәс гәрәке даннасин кә, фьрԛи тʹӧнә гӧмана мә жийина сәр әʹзмана йә йан сәр әʹрде (Кʹаред Шандийа 10:42).

13. Әм чь һин дьбьн жь дитьнока кӧ Йуһʹәнна дит?

¹³ Жь кʹьтеба Әʹйанти әм һин дьбьн кӧ мәсиһийед рʹункьри у йед нәрʹункьри гәрәке даннасин кьн. Иса дитьнок да Йуһʹәннайе шанди дәрһәԛа «буке», кʹижан кӧ мәрийа тʹәглиф дькә ԝәки бен у вәхԝьн ава жийине. Бук те һʹәсабе 144 000 рʹункьри, йед кӧ ԝе сәр әʹзмана тʹәви Иса сәркʹартийе бькьн (Әʹйанти 14:1, 3; 22:17). Ав, те һʹәсабе ԛӧрбана Иса, йе кӧ ԝе али мәрийа бькә ԝәки бе гӧнә у бе мьрьн бьжин (Мәтта 20:28; Йуһʹәнна 3:16; 1 Йуһʹәнна 4:9, 10). Рʹункьри бь хирәт мәрийа һин дькьн дәрһәԛа ԝе ԛӧрбане у чаԝа дькарьн кʹаре же бьстиньн (1 Корьнтʹи 1:23). Ле дь дитьнокеда дәрһәԛа кʹомәкә дьн жи һатә готьне, йед кӧ рʹункьри ниньн у гӧмана ԝан жийина сәр әʹрде йә. Ԝанарʹа жи тʹәми һатә дайине кӧ мәрийарʹа бежьн: «Ԝәрә!» У ԝана гӧрʹа ԝе тʹәмийе кьрьн, бь даннасинкьрьна мьзгинийа хере. Демәк, әԝ дитьнок нишан дькә кӧ һәр кәс кʹе мьзгинийа хере ԛәбул дькә, хԝәха жи гәрәке даннасин бькә.

14. Ча әм «ԛануна Мәсиһ» дьԛәдиньн?

¹⁴ Һәр кәс кʹе «ԛануна Мәсиһ» дьԛәдинә гәрәке даннасин кә (Галати 6:2). Йаһоԝа һивийе йә жь ԝан кʹе ԝирʹа ԛӧльх дькә ԝәки ԛанунед ԝи бьԛәдиньн. Бәреда, әԝи һьн жь исраелийа һьн жь хәриба жи дәʹԝа дькьр кӧ ԛанунед ԝи бьԛәдиньн (Дәркʹәтьн 12:49; Ԛануна Кʹаһинтийе 24:22). Рʹаст ә, мәрʹа иро нә лазьм ә һʹәму ԛанун кʹижан кӧ исраелийарʹа һатьбун дайине, бьԛәдиньн. Дәԝсе, әм рʹункьри нә йан на, әм гәрәке «ԛануна Мәсиһ» бьԛәдиньн. Йәк жь тьштед фәрз кӧ Иса һин дькьр әԝ һәйә кӧ һʹьз бькьн (Йуһʹәнна 13:35; Аԛуб 2:8). Әм гәрәке Йаһоԝа, Иса у мәрьва һʹьз бькьн. У әм һʹьзкьрьна хԝә дькарьн мәрийарʹа нишан кьн бь щурʹе лапи баш, демәк мьзгинийа Пʹадшатийе ԝанрʹа гьли кьн (Йуһʹәнна 15:10; Кʹаред Шандийа 1:8).

15. Чьрʹа әм дькарьн бежьн кӧ Иса тʹәмийа даннасинкьрьне да һʹәму шагьртед хԝә?

 ¹⁵ Әԝ чь кӧ Иса һьнә шагьртарʹа гот, дькарә щар-щара бона һʹәму шагьрта бә. Мәсәлә, Иса тʹәне тʹәви 11 шагьртед хԝә пәйман гьреда у соз да кӧ әԝана ԝе дь Пʹадшатийа ԝида һʹӧкӧмтийе бькьн. Ле бь рʹастийе 144 000 рʹункьри ԝе тʹәви ԝи һʹӧкӧмтийе бькьн (Луԛа 22:29, 30; Әʹйанти 5:10; 7:4-8). У паше чахе Иса һатә сахкьрьне, шагьртед ԝи тʹәне һьнәка бьһистьн тʹәмийе ԝи дәрһәԛа даннасинкьрьне (Кʹаред Шандийа 10:40-42; 1 Корьнтʹи 15:6). Ле һʹәму шагьртед Иса дь ԛьрʹна йәкеда әԝ тʹәми ԛәдандьн (Кʹаред Шандийа 8:4; 1 Пәтрус 1:8). Иро жи, мә әԝ гьлийе Иса нә бьһистийә кӧ әԝи шьхӧли бькьн, ле йәкә әм заньн кӧ гәрәке даннасин кьн. У рʹасти жи, ԝәкә һʹәйшт милйона шьхӧле даннасинкьрьне дькьн. Әм заньн кӧ бь даннасинкьрьне әм дьдьнә кʹьфше кӧ бь рʹастийе баԝәрийа хԝә Иса тиньн (Аԛуб 2:18).

16-18. Әм ча дькарьн амьн бьн бьред Исайә рʹункьрирʹа, у әԝ йәк чьрʹа ньһа лазьм ә?

¹⁶ Шәйтʹан һе зедә у зедә шәрʹ дькә тʹәви бьред Исайә рʹункьри йед кӧ һе сәр әʹрде нә, илаһи әԝ занә кӧ «ԝе һьндьки бьминә» (Әʹйанти 12:9, 12, 17). Рʹаст ә Шәйтʹан ԛайим мьԛабьли ԝана дьчә, ле йәкә рʹункьри рʹебәрийа шьхӧле даннасинкьрьне дькьн, у тʹӧ щар һаԛас гәләк мәри дәрһәԛа мьзгинийа хере пенәһʹәсийанә, чьԛас ньһа. Кʹьфш ә, кӧ Иса тʹәви рʹункьрийа йә, у әԝ рʹебәрийе ԝан дькә (Мәтта 28:20).

¹⁷ Әм ԛәдьрәки мәзьн һʹәсаб дькьн әве йәке, кӧ али бьред Иса Мәсиһ дькьн дь даннасинкьрьнеда. Әм ӧса жи али ԝан дькьн бь ԛӧрбанкьрьнед хԝә у чахе гәләки дьхәбьтьн сәр авакьрьна Одед Щьвата, Щьватед Мәзьн, у филиала. Чахе әм бь амьни гӧһдарийа рʹуспийа у бьред дьн дькьн, йед кӧ «хӧламе амьн у сәрԝахт» кʹьфш кьрьнә, әм дьдьнә кʹьфше кӧ дьхԝазьн али бьред Иса бькьн (Мәтта 24:45-47; Ибрани 13:17).

¹⁸ Зутьрәке, рʹункьрийед кӧ манә ԝе бьстиньн мора хьлазийе. Паше мьлйакʹәт ԝе «байед һәр чар ԛӧлбед дьнйайе» бәрʹдьн, у тәнгасийа мәзьн ԝе дәстпебә (Әʹйанти 7:1-3). Пешийа дәстпебуна Һармәгәдоне, Иса ԝе рʹункьрийа бьвә сәр әʹзмана (Мәтта 13:41-43). Демәк чахе Иса бе, һәгәр әм дьхԝазьн бенә һʹәсабкьрьне пәз, ньһа йә ԝәʹдә кӧ амьн бьн бьред Исайә рʹункьрирʹа.