Тә ԛә пьрсед ӧса дайә хԝә? Һәрге әре, бьзаньбә ԝәки хенщи тә диса гәләк мәрьв һәнә, кӧ сәр пьрсед ԝи щурʹәйи дьшьрмиш дьбьн. Мәрьв һәр гав дьфькьрьн сәр ԝан пьрсед фәрз, кʹижан кӧ әʹмьрва гьредайи нә. Ле гәло щаба ԝан пьрса мәрьв дькарә бьвинә?

Бь милйона мәрьва ԝе бьготана, «Бәле!» Ле чьрʹа? Чь ԝана һелан дькә ӧса бежьн? Әԝана ӧса дьбежьн, чьмки щабед сәр пьрсед хԝә, дь Кʹьтеба Пирозда дьвиньн. Ле һун дьхԝазьн бьзаньбьн, ча Кʹьтеба Пироз щаба ԝан пьрса дьдә? Һәрге әре, Шәʹдед Йаһоԝа һазьр ьн бе пʹәрә тʹәви ԝә һинбуна Кʹьтеба Пироз дәрбаз кьн. a

Ԝәки бь рʹастийе бежьн, чахе хәбәрдан дьчә дәрһәԛа һинбуна Кʹьтеба Пироз, һьнәк дьбежьн: «Ԝәʹде мьн тʹӧнә йә». «Кʹьтеба Пироз әԝ кʹьтебәкә һеса нинә». «Әз нахԝазьм щабдарийе һьлдьм сәр хԝә». Ле һьнә мәрьв ӧса дьшьрмиш набьн. Әԝана ша дьбьн ԝәки мәщал һәйә пебьһʹәсьн кӧ Кʹьтеба Пироз чь һин дькә. Бьньһерʹә ԝьра һьнә мәсәлә һәнә:

• «Гәләк пьрсед мьн һәбун. Сәва кӧ щабед сәр ԝан пьрса бьвиньм, әз чумә дера Протестанта, пʹарьстгәһа Сикха, у монастера Будиста, у әз университета религийайеда һин дьбум, ле йәкә мьн тʹӧ щийа щабед сәр пьрсед хԝә нәстанд. Щарәке Шәʹдеки Йаһоԝа һатә мала мьн. Әз гәләк әʹщебмайи мам чахе әԝи пе Кʹьтеба Пироз щаба пьрсед мьн да. Әз дәрберʹа рʹази бум Кʹьтеба Пироз һин бьм». (Гили, Инглистан.)

• «Гәләк пьрсед мьн һәбун дәрһәԛа әʹмьр у һʹале мә, ле мьн щаба пьрсед хԝә щаба кʹәшишда жи нәдит. Ле Шәʹдәки Йаһоԝа пе Кʹьтеба Пироз щаба һʹәму пьрсед мьн да. Чахе әԝи мьн пьрси, кӧ әз дьхԝазьм һе зедә дәрһәԛа Хԝәде пебьһʹәсьм, әз бь шабун рʹази бум». (Кофи, Бенин.)

• «Тʹьме гәләк пьрс бал мьн пешда дьһатьн дәрһәԛа мьрьне. Мьн баԝәр дькьр ԝәки мьри дькарьн зийане бьдьнә мәрийа, ле мьн дьхԝәст бьзаньбуйа Кʹьтеба Пироз чь дьбежә дәрһәԛа ве йәке. У ӧса мьн тʹәви һәваләки хԝә йе кӧ Шәʹде Йаһоԝа бу, һинбуна Кʹьтеба Пироз дәстпекьр». (Жозе, Бразилйа.)

• «Мьн сафи кьр Кʹьтеба Пироз бьхуньм, ле мьн тʹӧ тьшт ле фәʹм нәкьр. Щарәке Шәʹдед Йаһоԝа һатьн бал мьн, ԝана фәʹмдари у зәлал мьнрʹа чәнд пʹехәмбәртийед жь Кʹьтеба Пироз шьровәкьрьн. Паши ԝе йәке мьн хԝәст һе зедә пебьһʹәсьм». (Дениз, Мәксика.)

• «Мьн дьхԝәст пебьһʹәсийама гәло Хԝәде рʹасти сәва мьн хәм дькә йан на. У ләма жи мьн сафи кьр кӧ Хԝәдайе Кʹьтеба Пирозрʹа дӧа бькьм. Свәтьре Шәʹдед Йаһоԝа дәре мьн хьстьн, у мьн тʹәви ԝан һинбуна Кʹьтеба Пироз дәстпекьр». (Анжи, Нәпал.)

Әв ԛәԝьмандьн хәбәред Иса тиньн бира мә: «Хԝәзи ль рʹӧһʹфәԛира» (Мәтта 5:3). Мәрьв ӧса һатьнә чекьрьне кӧ хԝәстьна ԝанә рʹӧһʹани һәйә у һʹәԝщә нә дәрһәԛа Хԝәде һе зедә пебьһʹәсьн. Ләма жи тʹәне Хԝәде дькарә һʹәԝщәтийа мә рʹази кә, бь хәбәра хԝә, демәк Кʹьтеба Пироз.

Ча те дәрбазкьрьне һинбуна Кʹьтеба Пироз? Һинбуна Кʹьтеба Пироз ԝе чь кʹаре ԝәрʹа бинә? Щаба ԝан пьрса әме пебьһʹәсьн готара майинда.