Дәстарʹ дьданә хәбате сәва кӧ гәньм бьһерʹьн у бькьнә ар, сәва кӧ нан чекьн. Хәбьтандьна дәстерʹ шьхӧле һәр рʹожи бу, кʹижан кӧ дькарьн бежьн һʹәму малада, жьн йан хӧлама дькьр. Бәре дәнге һеране мәрьв һәр рʹожа жи дьбьһист (Дәркʹәтьн 11:5; Йерәмйа 25:10).

Жь һәйкәл у шькьлед бәре жь Мьсьре, те кʹьфше кӧ әԝ шьхӧл ча дьһатә кьрьне. Гәньм дькьрьнә сәр кәвьре һьнәки хар, кʹижан кӧ горизонтал һатьбу данине. Әԝ кәвьр ӧса жи навдькьрьн ча аше мина зин. Кʹе кӧ дьһера, дькʹәтә сәр чока бәр дәстарʹ, у бь һәрдӧ дәста кәвьре бьчʹук дьгьрт, у пешда пашда сәр гәньм дьбьр дани. Бь ԝи щурʹәйи гәньм дьһера у дькьрә ар. Ль гора каники, әԝ кәвьре дәстарʹ ԝәкә 2-4 кг бу. Һәрге әԝи кәвьри мина чʹәк бьдьнә хәбате, мәрьв дькарә бе кӧштьне (Һʹакьмти 9:50-54).

Һерана гәньм ӧса зәʹф фәрз бу бона һʹалхԝәшийа малбәте, кӧ Кʹьтеба Пироз ԛәдәхә дькьр кӧ дәстарʹ кʹәфил демәк дәԝса дәйн һьлдьн. Ԛануна Дӧщари 24:6-да те готьне: «Бьра тʹӧ кәс нә дәстарʹ нә жи кәвьре ԝейи бьни кʹәфил һьлнәдә, чьмки йе кӧ ве йәке дькә әԝ нәфсәке кʹәфил һьлдьдә» (ПКʹМ).

Кʹьтеба Пироз дьбежә кӧ Иса «һʹәмеза Баведа йә» (Йуһʹәнна 1:18). Әԝ гьли кʹьфш дькә кӧ һәләԛәтийа Иса тʹәви Хԝәде гәләк незик у мәхсус бу. Әԝ гьли тинә бира мә ԛәйде Щьһуйа ԝәʹде нанхԝарьне.

Ԝәʹде Иса, Щьһу вәдьләзийан сәр тʹәхт, кʹижан кӧ дора сьфре бу. Йед кӧ нан дьхԝарьн, сәре ԝан алийе сьфре бу ле ньгед ԝан дур бун. Ԝана мьле хԝәйи чʹәпе дьданә сәр бәлги у хԝә ӧса дьгьртьн, ле дәсте ԝани рʹасте аза бу, бона хԝарьне бьхԝьн. Әԝед кӧ нан дьхԝарьн пәй һәв сәр кʹеләка чʹәпе вәдьләзийан, у «сәре мәрьве пешбәр, бәр пʹашла мәрьве пьшт ԝи бу», у ләма жи дькарьн бежьн кӧ «әԝ мәрьв вәдьләзийа ‹һʹәмеза йе пьшт хԝәда›».

Вәләзандьна һʹәмеза хԝәйе маледа йан жи йа ԝида кʹе кӧ тʹәглиф кьрийә, дьһатә һʹәсабе ԛәдьрәки мәзьн. Жь ве йәке те кʹьфше кӧ чьрʹа чахе Иса Щәжьна Дәрбазбуне щара пашьн дәрбаз дькьр, һʹәмеза ԝида вәләзийа бу йәк жь «шагьртед ԝи, йе кӧ Иса же һʹьз дькьр». Әԝ Йуһʹәннайе шанди бу. Ләма әԝи дькарьбу хԝә бьдә бәр синге Иса, сәва кӧ пьрсе бьдә ԝи (Йуһʹәнна 13:23-25; 21:20).