Паул, кʹижан кӧ жьна ԝи у дӧ зарʹед ԝи һәнә гьли дькә: «Дь ԝәлате мәда паши дәстпебуна инфласийайе, хԝарьн гәләк чәтьн дәстдькʹәт у һьн жи зәʹф бьһа бу. Чахе әз дьчум кӧ хԝарьне бькʹьрʹьм, әз бь сьһʹәта дьсәкьним һʹәта сьрийа мьн бьһата, у гәләк щар чахе ида сьрийа мьн бу, хԝарьн ида нәдьма. Жь бо бьрʹчибуне мәрьв гәләк жар дьбун, у һьнәк жи һәла һе дьхәрьԛин жи. Баһе хԝарьнед лазьм, һʹәта милйона у милиарда жи бьльнд дьбу. Ахьрийе жи пʹәре ԝәлате мә ԛимәте хԝә ӧнда кьр. Мьн пʹәре хԝә банкеда ӧнда кьр, һьн жи пенсийа хԝә».

Паул фәʹм дькьр, кӧ сәва малбәта хԝә хԝәй кә, ԝирʹа лазьм бу билани (Мәтʹәлок 3:21). Әԝ гьли дькә: «Әз електрик бум, ле ԝи чахи чь хәбат рʹасти мьн дьһат мьн дькьр, ле һәԛ гәләк кем бу. Һьнәка дәԝса пʹәра хԝарьн дьданә мьн, йан жи тьштед дьн бона малбәте. Мәсәлә, һәрге кәсәки чар һʹәв сабун дьда мьн, мьн дӧ һʹәв хԝәрʹа дьһишт, ле дӧ һʹәв жи дьфрот. Ахьрийе мьн 40 һʹәв щущьк ԛазанч кьр. Чахе әԝана мәзьн бун, мьн фьрот у дәԝсе 300 һʹәв щущьк кʹьрʹи. Һьнә ԝәʹдә шунда, мьн 50 һʹәв гӧһаст тʹәви 50 килограм аре гәньме мьсьре. Малбәта мә у чәнд малбәтед дьн, кӧ мә аликʹари дьда ԝан, гәләк ԝәхт пе ԝи ари йолә чун».

Паул ӧса жи рʹьнд заньбу, кӧ биланийа лапә баш әԝ ә, кӧ гӧмана хԝә бьдә сәр Хԝәде. Хԝәде һьнге али мә дькә, чахе гӧрʹа ԝи дькьн. Дәрһәԛа хәмед һәррʹожи Иса гот: «Бәр хԝә нәкʹәвьн. Чьмки . . . Баве ԝә занә кӧ һун һʹәԝще ԝан тьшта нә» (Луԛа 12:29-31).

Ле йазьх, дьжмьне Хԝәде Шәйтʹан мәрьва һелан дькә, кӧ әԝана дәрһәԛа һәбуне хәмгин бьн. Ләма мәрьв гәләк ԛәԝат хәрщ дькьн, сәва кӧ һʹәԝщед хԝә у хԝәстьнед хԝә рʹази кьн. Әԝана һʹәму тьшти дькьн, сәва кӧ тьштед ӧса бькʹьрʹьн, кʹижан кӧ ԝанрʹа ԛә нәлазьм ә. Гәләк дькʹәвьнә бьн дәйна, у паше ида фәʹм дькьн кӧ «йе дәйн дьстинә,  дьбә ԛуле [хӧламе] йе кӧ дәйн дьдә» (Мәтʹәлок 22:7).

Һьнәка сафикьрьнед ӧса кьрьн, кӧ зийан данә хԝә. Паул дьбежә: «Гәләк щинаред мьн, малбәта хԝә у һәвалед хԝә һиштьн, у чунә ԝәлатед хәриб, сәва кӧ пʹәра ԛазанч кьн. Һьнәк жь ԝана нькарьбун бьхәбьтийана, чьмки документед ԝан нәрʹаст бун. Ԝана хԝә жь полисе вәдьшартьн у гәләк щар шәв дәрва дьман. Ԝана нәдьһишт кӧ Хԝәде али ԝан бькә. Ле мә сафи кьр, кӧ бь аликʹарийа Хԝәде, проблемед пʹәрава гьредайи тʹәви малбәта хԝә сафи кьн».

Паул бәрдәԝам дькә: «Иса гот: ‹Иди бона рʹожа сьбе хәма нәкьн, чьмки рʹожа сьбе ԝе бона хԝә хәма бькә. Хәмед рʹоже бәси ԝе нә›. Ләма жи, әз тʹьме дӧа дькьм, кӧ Хԝәде тʹәне ‹нане мәйи рʹоже› бьдә мә, сәва кӧ әм бьжин. У Хԝәде жи али мә кьр, чаԝа кӧ Иса готийә. Ле хԝарьна мә тʹьме әԝ нибу, чь кӧ мә һʹьз дькьр. Щарәке дькʹанеда әз сәкьни бум һʹәта сьрийа мьн бьһата, у мьн ньзаньбу чь те фьротьне. Чахе сьрийа мьн һат, мьн дит кӧ тʹәне йогурте дьфрошьн. Әз йогурте һʹьз накьм, ле әԝ хԝарьн бу, у ԝе еваре мә йогурт хԝар. Әз гәләк жь Йаһоԝа рʹази мә, кӧ ԝи ԝәʹде чәтьн, әз у малбәта мьн бехԝарьн нә ман». a (Бьньһерʹә спартьн.)

«Иро алийе пʹәрада һʹале мә пʹак ә. Ле бь сайа ԝан чәтьнайа, әм һин бун кӧ сәва хәмгин нәбьн, йа лапә баш әԝ ә кӧ гӧмана хԝә бьдьнә сәр Йаһоԝа. Һʹәта әм ԛьрара Йаһоԝа b дьԛәдиньн, әԝ ԝе тʹьме али мә бькә. Әʹмьре мәда мә дит кӧ чаԝа гьлийед жь Зәбур 34:8 дьһатьнә сери: ‹Тәʹм бькьн у бьвиньн, чь ԛәнщ ә Хӧдан. Хԝәзи бь ԝи зьлами кӧ хԝә спартийә Хӧдан! (ИМ)›. Әм натьрсьн һәрге әм диса рʹасти проблемед пʹәрәва гьредайи бен».

«Иро әм гәләк рʹьнд фәʹм дькьн, кӧ бона мәрьв бьжи нәлазьм ә хәбат йан пʹәрә, ле хԝарьн лазьм ә. Әм гәләк һивийа ԝи ԝәʹдәйи нә, чахе созе Хԝәде бе сери: ‹Ль әʹрде . . . бь зедә бари гәньм һәбә›. Һʹәта әԝ ԝәʹдә бе, әм гәләк рʹази нә кӧ ‹кʹьнщ у хӧрәке мә һәйә›. Әԝ гьлийе жь Кʹьтеба пироз мә гәләк ԛәԝи дькьн: ‹Пʹәрәһʹьзи бьра нава жийина ԝәда щи нәгьрә, у дәстед ԝәда чьԛас һәйә, рʹази бьн, чьмки Хԝәде гот: ‹Әзе тʹӧ щар жь тә нәчьм у тʹӧ щар тә бәрʹнадьм›. Әԝ йәк мә дьлгәрм дькә у әм дькарьн бежьн кӧ: ‹Хӧдан пьштоване мьн ә у әз натьрсьм›». c (Бьньһерʹә спартьн.)

Паул у малбәта ԝи «рʹийа Хԝәдеда» дьчун, чьмки баԝәрийа ԝан һәбу. Мәрʹа жи лазьм ә баԝәри (Дәстпебун 6:9, ПКʹМ). Фьрԛи тʹӧнә иро әм рʹасти проблемед пʹәрава гьредайи тен йан найен, йан жи дьбәк ахьрийеда бен, мәсәла Паул кӧ баԝәри у биланийа ԝи һәбу, мәсәләкә баш ә бона мә.

Ле әм чь дькарьн бькьн, һәрге әм дәрһәԛа проблемед малбәте хәмгин дьбьн?