1, 2. а) Тӧ гәләк һивийа чь йи чахе дьнйа тʹәзә бе? (Бьньһерʹә шькьле әʹԝльн.) б) Дьнйа тʹәзәда чь шабунәкә лапә баш әме бьстиньн?

 ӘМ БЬ рʹастийе жи һивийа «жийина һʹәта-һʹәтайе» нә. Паԝлосе шанди бона ве жийине гот кӧ әԝ «рʹасти жийин ә». (Бьхунә 1 Тимотʹейо 6:18, 19.) Бона гәләка, әԝ те һʹәсабе жийина һʹәта-һʹәтайе сәр әʹрде. Ньһа мәрʹа чәтьн ә бьдьнә бәр чʹәʹве хԝә, кӧ һәр шәбәԛ әме сьһʹәт-ԛәԝат һʹьшйар бьн, бәхтәԝар бьн, у ша бьн (Ишайа 35:5, 6). Бьфькьрә кӧ ԝе чьԛас хԝәш бә ԝәʹдәдәрбазкьрьна тʹәви малбәте у һәвала, у ӧса жи тʹәви ԝан йед кӧ вәгәрʹьнә жийине (Йуһʹәнна 5:28, 29; Кʹаред Шандийа 24:15). Ԝәʹде тә ԝе һәбә сәва кӧ фәрәсәтед тʹәзә һин би у һе һостәки баш би дь ԝан шьхӧлада, кʹижана тӧ һʹьз дьки. Мәсәлә, тӧйе бькарьби һе зедә пебьһʹәси у һин би дәрһәԛа зандарийе, йан бькарьби һин би чаԝа сәр һащәтед мусикайе лехи, йан чаԝа мала хԝә рʹьнд чеки.

² Бәле әм гәләк һивийа ԝан тьштед баш ьн, ле ԛӧльхкьрьна мә Йаһоԝарʹа, ԝе шабунәкә лапә баш мәрʹа бинә. Бьдә бәр чʹәʹве хԝә кӧ жийин дьнйа тʹәзәда ԝе чьԛас хԝәш бә, чахе һʹәму мәрьв наве Йаһоԝа пироз кьн у ԝи чаԝа Сәрԝере хԝә ԛәбул кьн (Мәтта 6:9, 10). Әме әʹщебмайи бьминьн, чахе бьвиньн кӧ дьнйа бь мәрьве  ԛәданди тʹьжә бә, чаԝа кӧ ԛьрара Хԝәде бу. Дә һәла бьфькьрьн, чахе әм һеди-һеди бьбьнә ԛәданди, ԝе мәрʹа чьԛас һе һеса бә, һәләԛәтийа хԝә тʹәви Йаһоԝа ԛәԝи кьн (Зәбур 73:28; Аԛуб 4:8).

3. Әм гәрәке бона чь иро хԝә һазьр кьн?

³ Әм итʹбарийа хԝә Йаһоԝа тиньн кӧ әԝ ԝе һʹәму ԝан тьштед баш бькә, чьмки «һәр тьшт жь дәсте Хԝәде те» (Мәтта 19:25, 26). Һәрге әм дьхԝазьн дьнйа тʹәзәда һʹәта-һʹәтайе бьжин, ньһа ԝәʹдә йә кӧ әм жийина һʹәта-һʹәтайе «ԛазанщ кьн». Әм заньн кӧ хьлази ида те, у ләма әм гәрәке ӧса бьжин, кӧ бьдьнә кʹьфше ԝәки әм һивийе нә кӧ хьлази ԝе ньшкева бе. Әм гәрәке ньһа ида һʹәму тьшти бькьн, сәва кӧ һазьр бьн бона жийина дьнйа тʹәзәда. Ԝәрә әм шеԝьр кьн, һәла чаԝа әм дькарьн әԝе йәке бькьн.

4. Чаԝа әм дькарьн хԝә һазьр кьн бона жийина дьнйа тʹәзәда? Мәсәле биньн.

⁴ Чаԝа әм дькарьн хԝә һазьр кьн бона жийина дьнйа тʹәзәда? Һәрге әм дьхԝазьн һәрʹьн ԝәлатәки дьн у ԝедәре бьжин, фәʹмдари йә әме һьнә тьшт бькьн, сәва кӧ һазьр бьн бьжин дь ви ԝәлатида. Мәсәлә, әм дькарьн дәстпекьн зьман у әʹрф-әʹдәтед ԝи ԝәлати һин бьн. Дьбәкә әм һьнә хԝарьнед ԝан жи тәʹм кьн. Ӧса жи бона жийина дьнйа тʹәзәда, әм ида ньһа дькарьн хԝә һазьр кьн у ӧса бьжин, йанчь әм ида ԝедәре нә. Ԝәрен һьнә тьшт шеԝьр кьн, кӧ чаԝа әм дькарьн хԝә һазьр кьн.

5, 6. Һәрге әм гӧһдарийа рʹебәрийа тʹәшкиләта Йаһоԝа дькьн, әԝ йәк ча али мә дькә, кӧ һазьр бьн бона жийина дьнйа тʹәзәда?

⁵ Дь ве дьнйайеда, Шәйтʹан мәрьва һелан дькә кӧ мәрьв ӧса бьфькьрьн, кӧ әԝана һʹәму тьшти чь кӧ һʹьз дькьн у дьхԝазьн, изьна ԝан һәйә бькьн. Гәләк дьфькьрьн, кӧ фәрз ә кәсәкива гьредайи нибьн у кӧ нәлазьм ә гӧрʹа Хԝәде бькьн. Ле ахьрийа ԝе йәке чь йә? Әԝана гәләк кӧл-дәрда дьвиньн у бәхтәԝар ниньн (Йерәмйа 10:23). Ле Йаһоԝа Сәрԝере бь һʹьзкьрьн ә. Ԝе чьԛас жийинәкә хԝәш бә дьнйа тʹәзәда, чахе һәр кәс гӧрʹа Хԝәде бькә!

⁶ Дьнйа тʹәзәда әме гәләк ша бьн, чахе пәй рʹебәрийа тʹәшкиләта Йаһоԝа һәрʹьн, кӧ әʹрде бькьнә щьнәта бәдәԝ, у али ԝан бькьн у һин кьн йед кӧ ԝе вәгәрʹьнә жийине. Йаһоԝа ԝе гәләк шьхӧл бьдә мә. Ле әме хԝә ча кʹьфш кьн, һәрге йед щабдар жь мә һиви кьн, кӧ ԝан тьшта бькьн, чь кӧ әм һʹьз накьн? Гәло әме гӧрʹа ԝана бькьн? Гәло әме ԝи шьхӧли рʹьнд бькьн у перʹа ша бьн? Сәва кӧ һазьр бьн бона жийина дьнйа тʹәзәда,  әм гәрәке ида ньһа гӧһ бьдьнә рʹебәрийа тʹәшкиләта Йаһоԝа.

7, 8. а) Чьрʹа әм гәрәке шьхӧлкʹарийе бькьн тʹәви ԝан йед кӧ щабдар ьн? б) Һьнә кʹьфшкьрьнед Мәсиһийа ча һатьнә гӧһастьне? в) Дьнйа тʹәзәда әм чьда дькарьн баԝәр бьн?

⁷ Һәрге әм дьхԝазьн һазьр бьн бона жийина дьнйа тʹәзәда, әм гәрәке һин бьн кӧ ԛайил бьн у шьхӧлкʹарийе бькьн тʹәви тʹәшкиләта Йаһоԝа у тʹәви һәвдӧ. Мәсәлә чахе мәрʹа шьхӧләки тʹәзә дьдьн, әм гәрәке һазьр бьн кӧ һәвалшьхӧлкʹарийе бькьн у һʹәму тьшти бькьн сәва кӧ бәхтәԝар у рʹази бьн. Һәрге әм ньһа тʹәви йед щабдар шьхӧлкʹарийе бькьн, әме дьнйа тʹәзәда жи ӧса бькьн. (Бьхунә Ибрани 13:17.) Чахе Исраели кʹәтьнә Әʹрде Создайи, ԝанрʹа һатә кʹьфшкьрьне кӧ кʹе кʹидәре ԝе бьжи (Жьмар 26:52-56; Йешу 14:1, 2). Әм ньзаньн кӧ дьнйа тʹәзәда кʹидәре ԝе мәрʹа бе кʹьфшкьрьне кӧ әм бьжин. Ле һәрге әм һин бунә һәвалшьхӧлкʹарийе бькьн, әме бәхтәԝар бьн чахе ԛьрара Йаһоԝа бьԛәдиньн, у ԝе мәрʹа фьрԛи тʹӧнә бә әме кʹидәре бьжин.

⁸ Бьдә бәр чʹәʹве хԝә кӧ ԝе ԛәдьрәки чьԛас мәзьн бә, кӧ әм ԛӧльх кьн дьнйа тʹәзәйә Хԝәдеда, у бьн сәрԝертийа Пʹадшатийа ԝида! Ләма, ньһа әм ша нә кӧ тʹәви тʹәшкиләта Йаһоԝа шьхӧлкʹарийе дькьн у чь шьхӧли жи дьдьнә мә әм дькьн. Ле щара дькарә шьхӧлед мә йане жи кʹьфшкьрьнед мә бенә гӧһастьне. Мәсәлә, һьнә хушк-бьра кӧ дь Бәйтʹәла Дәԝләтед Йәкбуйида ԛӧльх дькьрьн, әԝана һатьнә кʹьфшкьрьне кӧ дәштеда ԛӧльх кьн. У ӧса жи һьнә бәрпьрсийаре рʹеви, жь бо әʹмьре хԝәйи мәзьн һатьнә кʹьфшкьрьне чаԝа пешәнге мәхсус. Әԝана кʹьфшкьрьна хԝәйә тʹәзәрʹа ша дьбьн, у Йаһоԝа жи ԝана кʹәрәм дькә. Һәрге әм Йаһоԝарʹа дӧа дькьн бона аликʹарийе, у чьԛас дькарьн һʹәму тьшти дькьн кӧ ԝирʹа ԛӧльх кьн, ӧса жи һин дьбьн кӧ ԛайил бьн һʹәму щурʹә кʹьфшкьрьнарʹа, әме бәхтәԝар бьн у Йаһоԝа ԝе мә кʹәрәм кә. (Бьхунә Мәтʹәлок 10:22.) Гәло әме хԝә ча кʹьфш кьн һәрге дьнйа тʹәзәда әм бьхԝазьн бьжин ԝи щийи кʹидәре мә хԝәш те, ле тʹәшкиләта Йаһоԝа мәрʹа бежә кӧ щики майин бьжин? Һьнге, ида ԝе мәрʹа фьрԛи тʹӧнә бә әме кʹидәре бьжин йан чь бькьн. Чьмки ԝи чахи әме гәләк рʹази бьн, кӧ әм дьнйа тʹәзәда ньн (Нәһәмийа 8:10).

9, 10. а) Чьрʹа дьнйа тʹәзәда дьбәкә мәрʹа сәбьркьрьн лазьм бә? б) Әм ча дькарьн ньһа бь сәбьр бьн?

⁹ Дьнйа тʹәзәда, щара дьбәкә мәрʹа сәбьркьрьн лазьм бә. Мәсәлә, әм дькарьн бьвиньн кӧ чаԝа һьнә мәрьв гәләк ша  дьбьн, кӧ мәрьвед ԝанә незик у һәвалед ԝан жь мьрьне рʹабунә. Ле әм дьбәк һе һивийа рʹабуна мьрийед хԝәйи һʹьзкьри бьн. Һәрге ӧса бә, гәло әме тʹәви ԝан мәрьва ша бьн у бь сәбьр бьн? (Рʹомайи 12:15). Һәрге әм иро һин дьбьн кӧ бь сәбьр һивийа созед Йаһоԝа бьн, әԝ йәк ԝе али мә бькә кӧ дьнйа тʹәзәда жи бь сәбьр бьн (Ԝаиз 7:8).

¹⁰ Әм ӧса жи дькарьн һин бьн бь сәбьр бьн, чахе фәʹмкьрьна рʹастийа Кʹьтеба Пироз те гӧһастьн. Гәло әм леколин дькьн әԝан тьштед тʹәзә, у һәрге әм бь тʹәмами фәʹм накьн, әм сәбьр дькьн? Һәрге әре, дьнйа тʹәзәда ԝе мәрʹа һе һеса бә, кӧ сәбьр кьн һәр гав чахе Йаһоԝа рʹебәрийед тʹәзә бьдә мә (Мәтʹәлок 4:18; Йуһʹәнна 16:12).

11. Чьрʹа әм гәрәке ньһа һин бьн кӧ һәвдӧ бьбахшиньн, у ча әԝ йәк ԝе дьнйа тʹәзәда али мә бькә?

¹¹ Әм ӧса жи дькарьн һазьр бьн бона жийина дьнйа тʹәзәда, чахе һин бьн бьбахшиньн. Ԝәʹде Һʹәзарсалийа Пʹадшатийа Иса, һьнә ԝәʹдә ԝе лазьм бе, сәва кӧ һәр кәс бьбә ԛәданди (Кʹаред Шандийа 24:15). Ләма жи пьрс пешда те гәло әме тʹәви йед дьн бь һʹьзкьрьн бьн у бьбахшиньн һәвдӧ? Һәрге әм ньһа һин бьн кӧ һәвдӧ бьбахшиньн у һәләԛәтийа баш нав һәвда хԝәй кьн, дьнйа тʹәзәда ԝе мәрʹа һеса бә кӧ ӧса бькьн. (Бьхунә Колоси 3:12-14.)

12. Чьрʹа әм гәрәке ида ньһа хԝә һазьр кьн бона жийина дьнйа тʹәзәда?

¹² Дьнйа тʹәзәда, дьбәкә әм чь кӧ бьхԝазьн тʹьме нәстиньн, йан жи әм гәрәке һивийе бьн кӧ бьстиньн. Чь жи һәбә, гәрәке әм рʹази бьн у ԛайил бьн. Рʹасти жи, мәрʹа әԝ һʹӧнӧр ԝе лазьм бьн, кʹижан кӧ Йаһоԝа мә һин дькә кӧ әм ньһа бьдьнә кʹьфше. Демәк һәрге әм ньһа һин дьбьн кӧ ԝан һʹӧнӧра бьдьнә кʹьфше, әм избат дькьн кӧ бона мә дьнйа тʹәзә реали йә у кӧ әм һазьр дьбьн бона жийина һʹәта-һʹәтайе (Ибрани 2:5; 11:1). Бь ԝе йәке әм ӧса жи әʹйан дькьн, кӧ әм бь рʹастийе дьхԝазьн ве дьнйайеда бьжин кʹидәре кӧ һәр кәс гӧрʹа Йаһоԝа дькә.

13. Дьнйа тʹәзәда, чь ԝе әʹмьре мәда щийе пешьн бьгьрә?

¹³ Дьнйа тʹәзәда, һʹәму тьштед мә ԝе һәбә сәва кӧ әм жийина хԝәрʹа ша бьн. Ле шабунәкә мәйә лапә мәзьн ԝе әԝ бә, кӧ һәләԛәтийа мәйә незик ԝе тʹәви Йаһоԝа һәбә (Мәтта 5:3). Әме бь ԛӧльхкьрьна хԝәйә Йаһоԝарʹа, мьжул бьн, у жь ԝе йәке әме шабунәкә мәзьн бьстиньн (Зәбур 37:4). Чахе Йаһоԝа ида ньһа әʹмьре мәда щийе пешийе дьгьрә, бь ԝе йәке әм һазьр дьбьн бона жийина дьнйа тʹәзәда. (Бьхунә Мәтта 6:19-21.)

14. Щаһьл чь нете дькарьн дайньн пешийа хԝә дь ԛӧльхкьрьнеда?

¹⁴ Әм ча дькарьн һе зедә шабуне бьвиньн жь ԛӧльхкьрьна хԝәйә Йаһоԝарʹа? Гавәк әԝ ә кӧ нета дайньн пешийа хԝә. Һәрге тӧ щаһьл и, бьфькьрә кӧ ча дькари ӧса бьжи кӧ һе зедә Йаһоԝарʹа ԛӧльх ки? Тӧ дькари дь әʹдәбйәтед мәда леколин бьки дәрһәԛа щурʹә-щурʹә ԛӧльхкьрьна һәртʹьм. У нете бьдә пешийа хԝә, кӧ жь ԝан щурʹе ԛӧльхкьрьне, йәке пек бини. a (Бьньһерʹә спартьн.) Хәбәрдә тʹәви ԝан, йед кӧ гәләк сала Йаһоԝарʹа ԛӧльх кьрьнә чаԝа ԛӧльхкʹаред һәртʹьм. Һәрге тӧ әʹмьре хԝә ԛӧльхкьрьнеда дәрбаз ки, тӧйе һе щерʹьбанди у һинкьри би. Әԝ йәк ԝе аликʹарийе бьдә тә бона ԛӧльхкьрьна тә дьнйа тʹәзәда.

15. Әм кʹижан нетед дьн жи дькарьн дайньн пешийа хԝә ԛӧльхкьрьнеда?

¹⁵ Диса гәләк нет һәнә, кʹижан кӧ әм дькарьн дайньн пешийа хԝә. Мәсәлә, әм дькарьн нете дайньн пешийа хԝә кӧ фәрәсәтед тʹәзә дь ԛӧльхкьрьнеда һин бьн. Йан жи әм дькарьн принсипед Кʹьтеба Пироз леколин кьн, сәва кӧ һе рʹьнд фәʹм кьн у бьзаньбьн ча дь әʹмьре хԝәда бьдьнә хәбате. Әм дькарьн ӧса жи дәркʹәтьнед хԝә сәр сене, у щабед сәр щьвате һе баш кьн.  Демәк, чахе әм бона ԛӧльхкьрьна хԝәйә Йаһоԝарʹа нете датиньн пешийа хԝә, әԝ йәк али мә дькә кӧ һе хирәт бьн, у һазьр бьн бона жийина дьнйа тʹәзәда.

16. Чьрʹа ԛӧльхкьрьн Йаһоԝарʹа әԝ жийинәкә лапә баш ә?

¹⁶ Гәло чахе әм ԝәʹде хԝә хәрщ дькьн сәва кӧ һазьр бьн бона жийина дьнйа тʹәзәда, әм иро жийина баш ӧнда дькьн? На! Ԛӧльхкьрьн Йаһоԝарʹа әԝ жийинәкә лапә баш ә. Әм Йаһоԝарʹа ԛӧльх накьн сәва ве йәке, чьмки кәсәк зоре дьдә мә, йан тʹәне бона ԝе йәке кӧ жь тәнгасийа мәзьн хьлаз бьн. Чахе һәләԛәтийа мә тʹәви Йаһоԝа рʹьнд ә, жийина мә йа лапә баш ә у әм бәхтәԝар ьн. Нета Йаһоԝа һәма әԝ бу кӧ әм ӧса бьжин. Хԝәде кӧ мә һʹьз дькә у рʹебәрийе дьдә мә, әԝ йәк жийина мәда йа лапә баш ә, нә кӧ тьштәки дьн. (Бьхунә Зәбур 63:1-3.) Һәр кәс жь мә дькарә тʹәхмин кә ԝе шабуне, кʹижан кӧ әм дьстиньн жь ԛӧльхкьрьна хԝәйә бь дьл у щан. Һьнәкед кӧ гәләк сала Йаһоԝарʹа ԛӧльх кьрьнә, дькарьн бежьн кӧ ԛӧльхкьрьн Йаһоԝарʹа, жийинәкә лапә баш ә (Зәбур 1:1-3; Ишайа 58:13, 14).

17. Дьнйа тʹәзәда әме хԝәстьнед хԝә у һесабуне дайньн сәр кʹижан щийи?

¹⁷ Дьнйа тʹәзәда әме гәләк ша бьн чахе һьнә ԝәʹде хԝә хәрщ кьн бона хԝәстьнед хԝә у һесабуне. Чьмки Йаһоԝа мә ӧса әʹфьрандийә кӧ әм хԝәрʹа ша бьн, у әԝ мәрʹа соз дьдә кӧ «дахԝаза һәр жийандари щиһ» бинә (Зәбур 145:16, ИМ; Ԝаиз 2:24). Бәле мәрʹа лазьм ә һесабун у ԝәʹдәдәрбазкьрьн, ле әм һе зедә шабуне дьстиньн, чахе һәләԛәтийа хԝә тʹәви Йаһоԝа датиньн щийе пешьн. У дьнйа тʹәзәда жи ԝе ӧса бә. Ԝе бь билани бә кӧ әм бәрдәԝам кьн «бәре пешьн ль Пʹадшатийа Хԝәде бьгәрʹьн», бьфькьрьн сәр кʹәрәмед хԝә кʹижана дьстиньн жь ԛӧльхкьрьна хԝә Йаһоԝарʹа (Мәтта 6:33).

18. Әм ча дькарьн бьдьнә кʹьфше кӧ һазьр дьбьн бона жийина дьнйа тʹәзәда?

¹⁸ Дьнйа тʹәзәда жийин ԝе һе баш бә, нә кӧ ча әм дьдьнә бәр чʹәʹве хԝә. Ԝәрʹен әм бьдьнә кʹьфше, кӧ әм чьԛас зәʹф дьхԝазьн дьнйа тʹәзәда бьн, демәк ньһа ида һазьр бьн бона «жийина рʹасти». Ԝәрә әм һʹӧнӧред ӧса бьдьнә кʹьфше, кʹижан кӧ Йаһоԝа мә һин дькә, у бь хирәт мьзгинийа хере даннасин кьн. Әме шабуне бьстиньн чахе ԛӧльхкьрьн Йаһоԝарʹа щийе пешьн бьгьрә дь жийина мәда. Әм бь тʹәмами баԝәр ьн, кӧ дьнйа тʹәзәда Йаһоԝа ԝе һʹәму тьшти бькә чь кӧ соз дайә. Дә ԝәрʹен ӧса бьжин, кӧ те бежи әм ида дьнйа тʹәзәда ньн!