1. Әм кʹижан ԝәʹдәйида дьжин?

 ӘМ ИРО дьжин дь «зәманед» хьрабда. Чахе сала 1914 «рʹожед ахьрийе» дәстпебун, һʹале дьнйайе һе зедә хьраб бу (2 Тимотʹейо 3:1-5). У әм заньн кӧ дьне ԝе һе хьраб бә, чьмки Кʹьтеба Пироз дьбежә кӧ «мәрьвед хьрабә хԝәйифел ԝе хьрабийеда пешда һәрʹьн» (2 Тимотʹейо 3:13).

2. Иро гәләк мәрьв чь щурʹәйи ԝәʹде хԝә дәрбаз дькьн? (Бьньһерʹә шькьле әʹԝльн.)

² Гәләк мәрьв сәва ԝәʹде хԝә дәрбаз кьн, тьштед ӧса дьньһерʹьн йан жи дькьн, кӧ зорбәти йан бенамуси теда һәйә, йан жи сербазийева у щадубазийева гьредайи нә. Мәсәлә, Интернет, бәрнамед телевисийоне, кʹьтеб, у журнал, гәләк щар зорбәтийе у бенамусийе һʹәсаб дькьн ча тьштәки нормал. У мәрьв хԝәха жи тьштед ӧса дькьн, кʹижан кӧ бәре һʹәсаб дькьрьн гәләк әʹщеб. Ле ньһа ида ӧса нормал һʹәсаб дькьн, кӧ һьнә ԝәлатада әԝ йәк бь ԛануни йә. Ле әԝ найе һʹәсабе кӧ Йаһоԝа тьштед ӧса ԛәбул дькә. (Бьхунә Рʹомайи 1:28-32.)

3. Иро гәләк мәрьв ча дьньһерʹьн сәр ԝан мәрьва, йед кӧ бь принсипед Хԝәде дьжин?

³ Дь ԛьрʹна йәкеда жи, мәрьв тьштед ӧсава мьжул дьбун,  кʹижанада кӧ зорбәти у бенамуси һәбу. Ле пәйчуйед Иса тьштед ӧса нәдькьрьн, чьмки әԝана бь принсипед Хԝәде дьжитьн. Әԝ йәк бона мәрьве дор бәр «әʹщебмайи» бу. Мәрьва ԛәрфе хԝә Мәсиһийа дькьрьн у пәй ԝан дькʹәтьн (1 Пәтрус 4:4). Иро жи ӧса нә. Гәләк мәрьв бь щурʹәки майин дьньһерʹьн сәр ԝан йед кӧ бь принсипед Хԝәде дьжин. У Кʹьтеба Пироз жи мәрʹа пешда дьбежә, кӧ йед пәй мәсәла Иса дьчьн ԝе бенә «зерандьне» (2 Тимотʹейо 3:12).

4. Чьрʹа әм гәрәке ве дьне һʹьз нәкьн?

⁴ Һәрге әм дьхԝазьн ԛьрара Хԝәде бьԛәдиньн, әм гәрәке әве «дьнйайе һʹьз нәкьн, нә жи ԝан тьштед кӧ дьнйайеда нә». (Бьхунә 1 Йуһʹәнна 2:15, 16.) Шәйтʹан «Мире» ве дьнйайе йә, у сәр ве дьнйайе контрол дькә. Әԝ сәва кӧ мәрьва бьхальфинә, дьдә хәбате религийа, сәрԝертийа, тʹәшкиләтед комерси, у медиа демәк телевисийон, радио, рʹожнамә у диса тьштед дьн, бь сайа чь жи информасийа те бәлакьрьне (2 Корьнтʹи 4:4; 1 Йуһʹәнна 5:19). Әм нахԝазьн кӧ бькʹәвьнә бәр байе ве дьнйайе, у ләма әм гәрәке жь һәвалтийа хьраб дур бьн. Чьмки Кʹьтеба Пироз әʹйан мәрʹа дьбежә: «Нәхапьн! Һәвалтийа хьраб мәрьве хԝәйипʹәргал хьраб дькә» (1 Корьнтʹи 15:33).

5, 6. Тʹәви кʹе әм гәрәке һәвалтийе нәкьн, у чьрʹа?

⁵ Сәва кӧ һәләԛәтийа баш тʹәви Йаһоԝа хԝәй кьн, әм һәвалед ӧса хԝәрʹа нажберьн, йед кӧ тьштед нәрʹаст у хьраб дькьн. Дькʹәвә нава ԝан, йед кӧ дьбежьн кӧ әԝана Йаһоԝарʹа ԛӧльх дькьн, ле гӧрʹа ԝи накьн. Һәрге йед ӧса гӧнед гьран дькьн у гӧне хԝә надьнә рʹуйе хԝә, әм һәвалтийа хԝә тʹәви ԝан дьԛәтиньн (Рʹомайи 16:17, 18).

⁶ Чахе мәрьв һәвалтийе дькә, әԝ дьхԝазә һәвалед хԝә рʹази кә у ӧса бькә кӧ ԝи ԛәбул кьн. У ләма һәрге әм һәвалтийе дькьн тʹәви ԝан, йед кӧ гӧрʹа Хԝәде накьн, әм дькарьн бькʹәвьнә тʹәльке у тьштед ӧса бькьн чь кӧ әԝана дькьн. Мәсәлә, һәрге әм незик һәвалтийе дькьн тʹәви мәрьвед бенамус, әм жи дькарьн бьбьнә мина ԝан. Әԝ йәк тʹәви һьнә хушк-бьред мә ԛәԝьмийә. У әԝед кӧ гӧне хԝә нәанин рʹуйе хԝә, жь щьвате һатьнә дәрхьстьне (1 Корьнтʹи 5:11-13). Һʹәта кӧ әԝана гӧне хԝә найньнә рʹуйе хԝә у пʹошман нәбьн, һʹале ԝан дькарә ӧса бә, чаԝа кӧ Паԝлос гот. (Бьхунә 2 Пәтрус 2:20-22.)

7. Әм тʹәви кʹе гәрәке һәвалтийе бькьн?

⁷ Рʹаст ә әм дьхԝазьн һьндава һʹәму мәрьва баш бьн, ле йәкә әм гәрәке незик һәвалтийе нәкьн тʹәви ԝан, кʹижан кӧ бь принсипед Хԝәде нажин. Ӧса жи ԝе нәрʹаст бә һәрге Шәʹде Йаһоԝа бона һәвнаскьрьне рʹасти ԝи мәрьви бе, кʹижан кӧ ԛӧльхкʹаре Хԝәдейи нәньхӧманди у нәамьн ә. Мәрʹа һе фәрз ә кӧ Хԝәде мә ԛәбул кә, нә кӧ мәрьвед кӧ Хԝәде һʹьз накьн. Әм гәрәке һәвалтийе бькьн тʹәне тʹәви ԝан, йед кӧ ԛьрара Хԝәде дьԛәдиньн. Иса гот: «Һәр кәсе кӧ хԝәстьна Хԝәде бинә сери, әԝ ә бьре мьн, хушка мьн у дийа мьн» (Марԛос 3:35).

8. Һәвалтийа хьраб ча һʹӧкӧм бу сәр Исраелийа бәре?

⁸ Һәвалтийа хьраб бәред хьраб тинә. Бьньһерʹьн мәсәла Исраелийа. Пешийа кӧ әԝана бькʹәтана дь Әʹрде Создайи, Йаһоԝа пешда тʹәми да ԝан, дәрһәԛа ԝан мәрьва йед кӧ ида ль ԝе дәре дьжитьн. Йаһоԝа ԝанрʹа гьлийед ӧса гот: «Тӧ хԝәдейед ԝан нәһʹәбинә у хӧламтийа ԝан нәкә, чʹәʹв нәдә кьре ԝан ле ԝан кʹав-кʹун кә у һʹәйкәлед ԝан һурдәхԝәши кә. Һун хӧламтийа Хӧдан Хԝәдайе хԝә бькьн» (Дәркʹәтьн 23:24, 25, ПКʹМ). Ле һʹәчʹи зәʹф жь Исраелийа гӧһ нәданә тʹәмийа Йаһоԝа у ԝирʹа амьн нәман (Зәбур 106:35-39). У ахьрийа ԝе йәке чь бу? Ахьрийеда Йаһоԝа щьмәʹта Исраел инкʹар кьр, у дәԝсе щьвата Мәсиһти жьбарт чаԝа щьмәʹта хԝә (Мәтта 23:38; Кʹаред Шандийа 2:1-4).

9. Чьрʹа медиа ве дьнйайе дькарә хоф бә?

⁹ Һʹәчʹи зәʹф жь медиа ве дьнйайе, мәсәлә бәрнамед телевизийоне, малпәр, у кʹьтеб, дькарьн зийане бьдьнә һәләԛәтийа мә тʹәви Йаһоԝа. Тьштед ԝи щурʹәйи нәһатьнә чекьрьне сәва кӧ али Мәсиһийа бькьн, кӧ баԝәрийа хԝә Йаһоԝа у созед ԝи биньн. Ле дәԝсе, әԝ тьшт мәрьва һелан дькьн кӧ итʹбарийа хԝә ве дьнйа Шәйтʹанә зӧлм биньн. Ләма әм гәрәке фәсал бьн ве йәкеда, кӧ әм чь дьньһерʹьн, дьхуньн, йан жи дьбьһен, чьмки тьштед ӧса дькарьн бьбьнә мәʹни кӧ «дьлһавьжийед дьнйайе» бал мә пешда бен (Тито 2:12).

10. Чь ԝе бьԛәԝьмә тʹәви медиа ве дьнйайе?

¹⁰ Зутьрәке дьнйа Шәйтʹан у медиа ԝе, бенә кʹӧтакьрьне. Кʹьтеба Пироз дьбежә: «Дьнйайе жи дәрбаз бә, һавьжийа ԝе жи, ле әԝе кӧ әʹмьре Хԝәде дьԛәдинә ԝе һʹәта-һʹәтайе бьминә» (1 Йуһʹәнна 2:17). Зәбурбеж жи дьсьтра: «Ԝе хьраб бен бьрʹин у аветьн». У әԝи диса зедә кьр: «Ԝе нәфсбьчʹук мьраз бьстиньн ԝәлат, жь зедәһийа ашьтийе [әʹдьлайе] бьбиньн ләзәт». Ле әԝ йәк ԝе чьԛас ԝәʹдә бькʹьшинә? «Йед рʹаст ԝәлат мьраз дьстиньн, һәр у һәр ль ԝе дәре рʹудьньн [бьжин]» (Зәбур 37:9, 11, 29, ИМ).

11. Хԝәде чаԝа али мә дькә кӧ әм ԝирʹа амьн бьминьн?

¹¹ Тʹәшкиләта Йаһоԝа нә мина дьнйа Шәйтʹан ә, чьмки әԝ али мә дькә кӧ әм бь жийинәкә ӧса бьжин, кʹижан кӧ бәрбь жийина һʹәта-һʹәтайе дьбә. Иса дь дӧакьрьнеда Йаһоԝарʹа гьлийед ӧса гот: «Әв ә жийина һʹәта-һʹәтайе, ԝәки әԝ тә нас кьн, чаԝа Хԝәдейе рʹасти бешьрики-беһәвал у ӧса жи Иса Мәсиһе кӧ тә шандийә» (Йуһʹәнна 17:3). Бь сайа тʹәшкиләта хԝә, Йаһоԝа һʹәму тьшти дьдә мә, сәва кӧ әм ԝи нас кьн. Мәсәлә, журнал, брошур, кʹьтеб, видео, у Малпәр, әԝ һʹәму тьшт аликʹарийе дьдьнә мә сәва кӧ әм бәрдәԝам кьн Хԝәдерʹа ԛӧльх кьн. Тʹәшкиләта Хԝәде ӧса жи тʹьме щьвата дәрбаз дькә, у әԝ щьват нав тʹәмамийа дьнйайе 110 000 зедәтьр һәйә. Әԝ чь кӧ әм педьһʹәсьн жь Кʹьтеба Пироз сәр ԝан щьвата, у щьватед мәзьн, баԝәрийа мә һьндава Йаһоԝа у созед ԝи ԛәԝи дькә (Ибрани 10:24, 25).

12. Шьровәкьн ве тʹәмийа жь Кʹьтеба Пироз, кӧ бьзәԝьщьн тʹәне тʹәви «баԝәрмәнде Хӧдан».

¹² Мәсиһийед азәпрʹа, йед кӧ дьхԝазьн бьзәԝьщьн йан жи мер кьн, лазьм ә фәсал хԝәрʹа һәвала бьжберьн. Кʹьтеба Пироз пешда мәрʹа дьбежә: «Тʹәви нәбаԝәра нәкʹәвьнә бьне нирәки. Чь кʹаре һәԛийе тʹәви нәһәԛийе һәйә? Йан чь һәләԛәтийа рʹонайе тʹәви тәʹрийе?» (2 Корьнтʹи 6:14). Кʹьтеба Пироз ԛӧльхкʹаред Хԝәдерʹа әʹйан дьбежә, кӧ әԝана гәрәке бьзәԝьщьн тʹәне тʹәви «баԝәрмәнде Хӧдан», демәк бьзәԝьщьн тʹәви ԝи йан ԝе йе кӧ хԝә тʹәсмили Хԝәде кьрийә у ньхӧманди йә, у ӧса жи йе кӧ дьжи бь принсипед Йаһоԝа (1 Корьнтʹи 7:39). Чахе тӧ бьзәԝьщи тʹәви ԝе йан жи мер ки тʹәви ԝи кʹе кӧ Йаһоԝа һʹьз дькә, әԝ ԝе тәрʹа әԝ һәвал бә, кʹижан кӧ али тә бькә Хԝәдерʹа амьн бьмини.

13. Хԝәде дәрһәԛа зәԝаще чь тʹәми да Исраелийа?

¹³ Йаһоԝа занә кӧ мәрʹа чь һе баш ә, у тʹәмийа ԝи кӧ бьзәԝьщьн тʹәне тʹәви «баԝәрмәнде Хӧдан», тьштәки тʹәзә нинә. Мәсәлә, ԝәрен әм биньн бира хԝә, кӧ Йаһоԝа чь готә Исраелийа дәрһәԛа ԝан мәрьва, йед кӧ ԝирʹа ԛӧльх нәдькьрьн. Йаһоԝа бь Муса, тʹәми да ԝан: «Пьсмамтийе ԝанʹра нәкә, ԛизед хԝә нәдьнә кӧрʹед ԝан у нә жи ԛизед ԝан кӧрʹед хԝәрʹа бьхԝазьн, чьмки әԝе кӧрʹед тә жь мьн бьхалфиньн у ԝе пʹутед башԛәрʹа ԛӧльх кьн, һьнге һерса Хӧдан, ԝе ль сәр ԝә рʹабә,  әԝе тә зутьрәке ӧнда кә» (Ԛануна Дӧщари 7:3, 4, ПКʹМ).

14, 15. Чь ԛәԝьми тʹәви Сьлеман, чахе әԝи гӧһ нәда тʹәмийа Йаһоԝа?

¹⁴ Зутьрәке, паши ԝе йәке чахе Сьлеман бу пʹадшайе Исраеле, әԝи дӧа кьр бона биланийе, у Йаһоԝа щаба дӧайе ԝи да. Ләма нав у дәнге Сьлеман бәла бу чаԝа сәрԝерәки щьмәʹта пешдачуйи. У әʹщебмайи нинә, кӧ чьрʹа жьн-пʹадшайа Шәбайе гьлийед ӧса ԝирʹа гот: «Һикмәта [биланийа] тә у кʹефхԝәшийа тә жь нучәйа кӧ гьһиштийә гӧһе мьн бьльндтьр ьн» (1 Пʹадшати 10:7). Ле жь мәсәла Сьлеман әм ӧса жи һин дьбьн, кӧ чь дькарә бьԛәԝьмә тʹәви ԝи мәрьви, йе кӧ тʹәмийа Хԝәде инкʹар дькә у дьзәԝьщә тʹәви ԝи мәрьви, кʹе Йаһоԝарʹа ԛӧльх накә (Ԝаиз 4:13).

¹⁵ Рʹаст ә Йаһоԝа Сьлеман кʹәрәм дькьр, ле йәкә Сьлеман гӧһ нәда ве тʹәмийе кӧ Хԝәде зәлал ԝирʹа гот. Сьлеман жьнед хәриб һʹьз кьр, йед кӧ Йаһоԝарʹа ԛӧльх нәдькьрьн, у ахьрийеда 700 жьн у 300 щарийед ԝи һәбун. Ле ахьрийа ԝе йәке чь бу? Чахе Сьлеман кал бу, жьнед ԝи дьле ԝи кʹьшандьн бәрбь Хӧданед ԛәлп, у Сьлеман «тьштед кӧ дь чʹәʹве Хӧданда хьраб ә кьр» (1 Пʹадшати 11:1-6). Һәвалтийа хьраб сәр ԝи һӧкӧм бу у әԝ Йаһоԝарʹа амьн нә ма. Һәрге әԝ йәк тʹәви Сьлеман ԛәԝьми, тʹәви мә һәр кәси жи дькарә бьԛәԝьмә. У ләма, әм гәрәке ԛә нәфькьрьн жи, кӧ бьзәԝьщьн тʹәви ԝан кʹе Йаһоԝа һʹьз накә!

16. Кʹьтеба Пироз чь ширәте дьдә ԝан, кʹе зәԝьщи йә тʹәви кәсәки нәбаԝәр?

¹⁶ Ле чь әм дькарьн бежьн дәрһәԛа ԝан мәрьва, кʹижан кӧ пешийа бьбуна ԛӧльхкʹаред Йаһоԝа, зәԝьщи йан меркьри бун тʹәви нәбаԝәра? Кʹьтеба Пироз дьбежә: «Кʹӧлфәтно, гӧрʹа мере хԝәда бьн, ԝәки жь ԝан һьнәк жи, һәгәр гӧһдарийа хәбәре накьн, бь пʹәргалийа жьнед хԝә,  бе готьн жи бенә сәр баԝәрийе» (1 Пәтрус 3:1). Һьлбәт, әԝ ширәт бона ԝан мера йә жи, жьнед кʹижана кӧ ԛӧльхкʹаре Йаһоԝа ниньн. Демәк Кʹьтеба Пироз ширәте дьдә кӧ Мәсиһи мер йан жьна баш бә, у зәԝащеда принсипед Кʹьтеба Пироз бьдә хәбате. Паше, чахе жьн йан мере ԝе кӧ Мәсиһи нинә, бьвинә кӧ әԝ алийе башда һатийә гӧһастьне, әԝ жи дьбәкә ԝе бьхԝазә Йаһоԝарʹа ԛӧльх кә. Гәләк щотед зәԝащеда әԝ йәк дитьнә.

17, 18. Чь али Нӧһ кьр кӧ әԝ жь селаве хьлаз бу, у чь али Мәсиһийед ԛьрʹна йәкеда кьр кӧ жь кʹӧтакьрьна Оршәлиме хьлаз бун?

¹⁷ Һәвалед хьраб дькарьн тә һелан кьн, кӧ гӧрʹа Йаһоԝа нәки. Ле һәвалед баш дькарьн али тә бькьн кӧ амьн би Йаһоԝарʹа. Нӧһ мәсәләкә баш мәрʹа һиштийә. Әԝ ԝи ԝәʹдәйи дьжит, чахе «хьрабийа мәрьва ль сәр әʹрде зедә» бу у «нет у фькьред дьле ԝан жи һәр рʹож хьраб» дьбун (Дәстпебун 6:5, ПКʹМ). Мәрьв һаԛас хьраб бун, кӧ Хԝәде сафи кьр дьне кʹӧта кә. Ле Нӧһ нә мина ԝан бу. Кʹьтеба Пироз ԝи нав дькә чаԝа «мәрьвәки рʹаст», кʹижан кӧ «рʹийа Хԝәдеда дьчу» (Дәстпебун 6:7-9, ПКʹМ).

¹⁸ Нӧһ тʹәви ԝан мәрьва һәвалти нәдькьр, йед кӧ Йаһоԝа һʹьз нәдькьрьн. Нӧһ у малбәта ԝи, нава шьхӧле авакьрьна гәмийеда бун, у һьн жи Нӧһ «рʹасти даннасин дькьр» (2 Пәтрус 2:5). Нӧһ, жьна ԝи, у кӧрʹед ԝи жьнед хԝәва, тʹәви һәв һәвалтикә баш дькьрьн. Ԝана тʹьме әԝ шьхӧл дькьрьн, чь кӧ Хԝәде хԝәш дьһат, у ахьрийе жи әԝана жь селаве хьлаз бун. Әм гьшк рʹькʹьнйата ԝи нә, у әм гәрәке рʹази бьн кӧ Нӧһ у малбәта ԝи гӧрʹа Хԝәде кьрьнә у жь һәвалед хьраб дур бунә. Мәсиһийед ԛьрʹна йәкеда жи ӧса бун. Ԝана һәвалти нәдькьр тʹәви ԝан, йед кӧ Йаһоԝа һʹьз нәдькьрьн. Ԝана гӧрʹа Йаһоԝа кьр, ләма жи чахе сала 70 Д.М. Оршәлим һатә һьлшандьне, әԝана хьлаз бун (Луԛа 21:20-22).

19. Чь ԝе али мә бькә кӧ Йаһоԝарʹа амьн бьминьн?

¹⁹ Әм жи мина Нӧһ у малбәта ԝи, у Мәсиһийед ԛьрʹна йәкеда, һәвалтийе накьн тʹәви ԝан мәрьва, йед кӧ Йаһоԝа һʹьз накьн. Бь милйона хушк у бьред мә һәнә, тʹәви кʹижана кӧ әм дькарьн һәвалтийе бькьн. Әԝана ԝе али мә бькьн, кӧ ԝәʹде ԝан рʹожед чәтьн, әм «баԝәрийеда һʹимгьрти бьн» (1 Корьнтʹи 16:13; Мәтʹәлок 13:20). Дә тʹәне бьфькьрьн, кӧ ԝе чь кʹәрәмәт бә чахе әм жь кʹӧтакьрьна ве дьнйа зӧлм хьлаз бьн, у бьжин дь дьнйа тʹәзәда! Рʹасти жи чьԛас фәрз ә кӧ әм ида ирода дур бьн жь һәвалтийа хьраб!