Һьнә мәрьв дьфькьрьн кӧ дӧакьрьн бадиһәԝа ԝәʹдә мәрьва дьстинә, у кӧ тʹӧ кәс набьһе. Һьнәка жи дӧа дькьрьн ле тʹәхмин дькьрьн, кӧ щаба дӧайед хԝә настиньн. Атеистәки, да бәр чʹәʹве хԝә кӧ Хԝәде һәйә, у паше жерʹа дӧа кьр у гот: «Һәма тʹәне һеди дәнгәки бьдә мьн». Ле әԝи гот кӧ Хԝәде «дәнг дәрнәдьхьст».

Бәле, Кʹьтеба Пироз избат дькә, кӧ Хԝәде һәйә у әԝ дӧайед мә дьбьһе. Кʹьтеба Пироз әв йәк бәреда готийә мәрьва: «[Хԝәде] ԝе ль сәр дәнге һәԝара тә һьлбәт кӧ хере бь тә бькә, дәма бьбьһизә ԝе бәрсьве бьдә тә» (Ишайа 30:19). Рʹезәкә дьн жи дь Кʹьтеба Пирозда ӧса дьбежә: «Дӧайа рʹастан ԝи дьлхԝәш дькьн» (Мәтʹәлок 15:8).

Дь Кʹьтеба Пирозда ӧса жи те гьликьрьне мәсәлед ԝан мәрьва, дӧайед кʹижана кӧ һатьнә бьһистьне. Дь рʹезәкеда те готьне кӧ Иса ԝирʹа «рʹәща» дькьр, «йе кӧ дькарьбу әԝ . . . хьлаз бькьра». У «ельмийа ԝи һатә бьһистьне» (Ибрани 5:7). Диса мәсәлед майин һәнә дь Данийел 9:21-да у 2 Дирок 7:1-да.

Ле гәло чьрʹа һьнә мәрьв тʹәхмин дькьн кӧ щаба дӧайед ԝан кәс надә? Сәва кӧ дӧайед мә бенә бьһистьне, әм гәрәке дӧа бькьн тʹәне Йаһоԝарʹа, a Хԝәдейе Кʹьтеба Пирозрʹа, нә кӧ хӧданед йан кәсед дьнрʹа. Хԝәде ӧса жи дәʹԝа дькә кӧ әм «ль гора хԝәстьна ԝи же бьхԝазьн», демәк ԝан тьшта чь кӧ әԝ ԛәбул дькә. У Хԝәде мәрʹа дьбежә кӧ һәрге әм ӧса дӧа дькьн, әԝ «дәнге мә дьбьһе» (1 Йуһʹәнна 5:14). Демәк сәва кӧ дӧайед мә бенә бьһистьне, әм гәрәке Хԝәдейе Кʹьтеба Пироз нас кьн у пебьһʹәсьн кӧ ԛьрара ԝи чь йә.

Гәләк мәрьв баԝәр дькьн, кӧ дӧа әԝ тʹәне әʹдәте религийайе нинә, ле Хԝәде дӧа дьбьһе у щаба дӧа дьдә. Исаак жь Кенйайе, дьбежә: «Мьн дӧа кьр бона аликʹарийе, сәва кӧ Кʹьтеба Пироз һе рʹьнд фәʹм кьм. У зутьрәке паши ԝе йәке, кәсәк незики мьн бу у гот кӧ дькарә аликʹарийе бьдә мьн, кʹижан кӧ мьнрʹа лазьм бу». Һилда жь Филипине, дьхԝәст щьхаре бьтʹәркинә. Әԝе чь жи дькьр, ле йәкә нәдьһатә стандьн, у малхе ԝе ширәт да ԝе, кӧ бона аликʹарийе Хԝәдерʹа дӧа бькә. Әԝе әԝ ширәт да хәбате у дьбежә: «Әз әʹщебмайи мам кӧ чаԝа Хԝәде али мьн кьр. Ӧса бу кӧ бал мьн һеди-һеди хԝәстьна кʹьшандьна щьхаре ӧнда бу. У мьн карьбу щьхаре бьтʹәркиньм».

Гәло Хԝәдейе ԛәԝат дьхԝазә али ԝә бькә дь хәмгинед ԝәда, һәрге һун ль гора хԝәстьна ԝи дӧа дькьн?