КʹОМА мәрийа йед кӧ Кʹьтеба Пироз леколин дькьрьн, чьл сал пешда әʹлам кьрьн, кӧ дь сала 1914-да ԛәԝьмандьнед фәрз гәрәке бьԛәԝьмьн. Гәло чь тьштед фәрз дь ве саледа ԛәԝьмин у чьрʹа сала 1914, саләкә гәләк фәрз ә?

Дь кʹьтеба Луԛа 21:24-да, Иса гьлийед ӧса дьбежә: «Оршәлиме жи бәр пʹийед мьләтед пʹутпʹарьст һәрʹә, һʹәта кӧ ԝәхте ԝан  мьләта хьлаз бә». Оршәлим дебажаре (пʹайтʹәхте) Исраеле бу, ль кʹидәре жи Пʹадшед жь мала Даԝьд сәрԝерти дькьрьн (Зәбур 48:1, 2). Әв пʹадшед Оршәлиме, нә мина Пʹадшед дьнена бун. Чьмки әԝана «ль сәр тʹәхта Хӧдан» рʹуньштьбун у бь ве йәке ча ԝәкʹиле Хԝәде дьһатьн һʹәсабе (1 Дирок 29:23). Ләма жи Оршәлим бь симболик сәрԝертийа Йаһоԝа дьһатә һʹәсабе.

Ле гәло, сәрԝертийа Йаһоԝа кʹәнге кʹәтә бьн пʹийед мьләтед пʹутпʹарьста? Әв йәк сала 607-да Б.Д.М. ԛәԝьми. Ԝи чахи Бабилонийа Оршәлим зәфт кьрьн. У жь ԝе сале дәстпебуйи, тʹӧ кәс жь рʹькʹьнйата Даԝьд «ль сәр тәхте Хӧдан» ида рʹунәньшт (2 Пʹадшати 25:1-26). Ле гәло Оршәлим һәр тʹьм гәрәке бьн пʹийед пʹутпʹарьстада буйа? На, чьмки Щьбрайил мьлйакʹәт, дәрһәԛа Иса гьлийед ӧса гот, «Хԝәде ԝе тʹәхте баве ԝи Даԝьд бьдә ԝи» (Луԛа 1:32, 33). Демәк, Оршәлим гәләк ԝәхт «бьн пʹийед» пʹутпʹарьстада ԝе нибуйа, чьмки Иса ԝе бьбуйа Пʹадша.

 Ле әв йәк кʹәнге гәрәке бьԛәԝьмийа? Жь гьлийед Иса те кʹьфше, кӧ сәрԝертийа Пʹутпʹарьста гәрәке ԝәʹде хԝәда хьлазбуйа. Жь кʹьтеба Данийел сәре 4 әме пебьһʹәсьн, кӧ сәрԝертийа пʹутпʹарьста чьԛас ԝәʹдә гәрәке бькʹьшанда. Мәсәлә дь сәре 4-да хәԝна Пʹадше Бабилоне, Нәбукәднәсәр те гьликьрьне. Дь ве хәԝнеда пʹадша бахәки бьльнд дит, йе кӧ һатә бьрʹине. Сәва кӧ кʹока бах тʹәзәда шин нәбә, әԝ бь зьнщира һʹәсьн у сьфьр һатә гьредане. У мьлйакʹәт сәрда фәрманәкә ӧса дабу: «У бьра жь сәр ԝева һʹәфт ԝәхт дәрбаз бьбә» (Данийел 4:10-16).

Щарна дь Кʹьтеба Пирозда бах те һʹәсабе сәрԝерти (Һәзәԛел 17:22-24; 31:2-5). Ләма жи әԝ бах, йе кӧ һатә бьрʹине, бь симболик дьһат һʹәсабе сәрԝертийа пʹадшед Оршәлимейә кӧ ль сәр тʹәхте Хӧдан рʹуньштьбун, у әԝ һатә бьрʹине демәк сәкьнандьне. Ле ча жь дитьноке те кʹьфше, Оршәлим тʹәне «һʹәфт ԝәхта» гәрәке бьн пʹийед Пʹутпʹарьстада бьма. Ле гәло «һʹәфт ԝәхт», әв чьԛас ә?

Жь кʹьтеба Әʹйанти 12:6, 14 те кʹьфше, кӧ «се сал у нив [се у нив ԝәхт, ДТʹ]», те һʹәсабе «һʹәзар дӧсьд шест рʹож». Демәк « һʹәфт ԝәхт» әв һәйә дӧ щара 1 260, чь кӧ 2 520 рʹож дәрдькʹәвә. Ле паши зәфткьрьна Оршәлиме, гава 2 520 рʹож дәрбаз бун, Оршәлим һәла һе «бьн пʹийед» мәрьвед Пʹутпʹарьстада бу. Демәк, ԝәʹде сәрԝертийа пʹутпʹарьста һе гәләк сал гәрәке бькʹьшанда. Жь кʹьтеба Жьмар 14:34 у Һәзәԛел 4:6 те кʹьфше, кӧ саләк жь бәр рʹожәкева йә, ләма жи әм фәʹм дькьн кӧ «һʹәфт ԝәхт» 2 520 сал ьн, нә кӧ 2 520 рʹож.

Ньһа ԝәрә әм жь Щoтмәһа (Октобьре) сала 607 Б.Д.М., чахе кӧ Оршәлим бь дәсте Бабилонийа һатә зәфткьрьне у тʹәхт жь Даԝьд һатә стандьне, 2 520 сала һʹәсаб кьн. Әме бенә незики Щoтмәһа сала 1914. Һәма ԝи чахи «ԝәхте ԝан мьләта хьлаз» бу, у Иса Мәсиһ ча Пʹадшайе әʹзмана кʹьфш бу * (Зәбур 2:1-6; Данийел 7:13, 14).

Ча жи Иса пешда пʹехәмбәрти кьрьбу, пәй «һатьна» ԝирʹа ль сәр тʹәхте Пʹадшатийа әʹзмана, гәрәке гәләк тьштед хьраб  бьԛәԝьмийана: шәрʹ, хәлайи-щәлайи, әʹрдһʹәж у нәхԝәшийед гьран һәбуна (Мәтта 24:3-8; Луԛа 21:11). Ԛәԝьмандьнед ӧса диса щарәке избат дькьн, кӧ дь сала 1914-да ль әʹзмана бь рʹастийе жи Пʹадшатийа Хԝәде һатә кʹьфшкьрьне у жь ԝи чахи дәстпебу «рʹожед ахьрийе», йед кӧ кʹьфш дькьн зәманед хьраб (2 Тимотʹейо 3:1-5).