СӘВА кӧ әм бькарьбьн Мәсиһ нас кьн, Йаһоԝа хәм кьр ԝәки гәлә пʹехәмбәр дәрһәԛа буйин, ԛӧльхкьрьн у мьрьна Иса, Хьлазкʹаре создайи лекьн. Әв һʹәму пʹехәмбәрти һур бь һур у рʹаст ль сәр Иса Мәсиһ һатьн сери. Сәва кӧ баԝәрийа мә дь  ве йәкеда ԛәԝи бә, ԝәрен әм бьньһерʹьн һьнә жь ԝан пʹехәмбәртийа, йeд кӧ тʹәви буйин у зарʹотийа Иса тʹәвгьредайи нә, чаԝа һатьнә сери.

Ишайа пʹехәмбәр пешда дьгот, кӧ кәсәк жь зӧрʹәте Даԝьд ԝе бьбә Мәсиһ (Ишайа 9:7). У бь рʹастийе жи, Иса жь ньсьла Даԝьд бу (Мәтта 1:1, 6-17).

 Пʹехәмбәрәки дьн Миха, дьгот кӧ зарʹ дь Бәйтләһʹма-Әфратеда (Щьһустанеда) ԝе бе буйине, у хьлазийе ԝе бьбә пʹадша (Миха 5:2). Чахе Иса һатә буйине, дь Оршәлимеда дӧ шәһәр бь наве Бәйтләһʹм һәбун. Йәк ль алийе бакʹуреда незики Ньсрәте бу, йе дӧда жи дь Щьһустанеда бәрбь Оршәлиме бу, ԝирʹа бәре Бәйтләһʹма-Әфрата дьготьн. Һәма дь ви шәһәреда Иса Мәсиһ һатә буйине, у бь ве йәке пʹехәмбәртийа Миха һатә сери (Мәтта 2:1).

Пʹехәмбәрәки жи гот, ԝәки Хԝәде ԝе «жь Мьсьре гази кӧрʹе хԝә» бькә. Рʹасти жи Исайе бьчʹук бьрьбун Мьсьре. Ле паши мьрьна Һеродәс, әԝ пашда вәгәрʹандьн у бь ве йәке диса пʹехәмбәртик ль сәр Иса һатә сери (Һосәйа 11:1; Мәтта 2:15).

Ль сәр рʹупʹела 200 һәйә чаргошә. Дь ве чаргошеда кʹьфшкьри нә сәри у рʹезeд Кʹьтеба Пироз, дь кʹижанада ньвисар ә «Пʹехәмбәрти» дәрһәԛа Иса. Кʹеләке диса сәри у рʹезeд жь Кʹьтеба Пироз тенә кʹьфшкьрьне, кʹидәре ида те гьликьрьне, кӧ ча әв пʹехәмбәрти «һатә сери». Жь кʹәрәма хԝә, ван рʹеза һьмбәри һәв кә. Бь ве йәке баԝәрбуна тә ԝе һе ԛәԝи бә у ԝе тәрʹа зәлал бә, кӧ бь рʹастийе жи Кʹьтеба Пироз һежайи йә, ԝәки әм баԝәрийа хԝә ле биньн.

Һәрге тӧ ван рʹеза бь Кʹьтеба Пироз һьмбәри һәв ки, те тʹәхмин ки кӧ әв һʹәму пʹехәмбәрти ԝәкә сәд сал пешда, пешийа буйина Иса Мәсиһ һатьн ньвисаре. Дәрһәԛа ве йәке хԝәха Иса гот: «Гәрәке һәр тьштeд кӧ бона мьн Ԛануна Муса, ньвисарeд пʹехәмбәра у Зәбурада ньвисар бун бьһатана сери» (Луԛа 24:44). Жь Кʹьтеба Пироз әшкәрә те кʹьфше, кӧ һʹәму пʹехәмбәрти бь рʹастийе жи, һур бь һур һатьн сери.