Чахе һун дьзәԝьщьн у дәстпедькьн тʹәвайи бьжин, һьнге щурʹә-щурʹә проблем дькарьн щәм ԝә пешда бен. Мәʹнийа ван проблема дькарә әв бә, ԝәки ньһерʹандьна ԝә жь һәв щӧдә дьбә. Йан һун ӧса һин бунә ль сәр тьшта бьньһерʹьн, чаԝа кӧ ԝә һин кьрьнә у мәзьн кьрьнә. Хенщи ве йәке әв проблем дькарьн жь бо тьштед дьне жи пешда бен.

Дькарә ӧса бьԛәԝьмә, ԝәки һун бьхԝазьн жь ван проблема бьрʹәвьн у бьһельн ӧса чаԝа кӧ һәйә. Ле Кʹьтеба Пироз мә ширәт дькә, кӧ ван проблема ӧса нәһельн (Мәтта 5:23, 24). Һуне бькарьбьн проблемед хԝә рʹьнд сафи кьн, һәрге принсипед Кʹьтеба Пироз бьдьнә хәбате.

КʹЬТЕБА ПИРОЗ ЧЬ ДЬБЕЖӘ: «Ԝәхта готьне һәйә» (Ԝаиз 3:1, 7). Дьшьрмиш бьн, һәла һун ԝәʹдә дьвиньн, сәва кӧ дәрһәԛа ван проблема хәбәр дьн. Бь һʹәлали бежьн мер йан жьна хԝә кӧ чаԝа әв йәк ль сәр ԝә һʹӧкӧм дькә, у чь һун дәрһәԛа ве йәке дьшьрмиш дьбьн. Һәр гав тʹәви мер йан жьна хԝә «рʹаст хәбәр дә» (Әфәси 4:25). Һәла һе ԝи чахи жи гава һун бьн емосийада ньн, фәсал бьн кӧ шәрʹа нәкьн. Чахе һун нәрм щаба һәв дьдьн, шеԝьркьрьна ԝә жи тʹәв һәв ԝе бь әʹдьлайи бә. У әԝе ԝә хԝәй кә, кӧ шәрʹа нәкьн (Мәтʹәлок 15:4; 26:20).

Һәрге һун һәврʹа тьштәкида ԛайил ниньн жи, йәкә мәʹрифәт бьн. У тʹӧ щар бир нәкьн, ԝәки һьндава мер йан жьна хԝә гәрәке һʹьзкьрьн у ԛәдьр нишан кьн (Колоси 4:6). Жь алийе хԝәда һʹәму тьшти бькьн, ԝәки чьԛас кӧ дькарьн ван проблема зу сафи кьн. Мәдәкьри нибьн у һәврʹа хәбәр дьн (Әфәси 4:26).

ЧЬ ҺУН ДЬКАРЬН БЬКЬН:

• Ԝәʹдәки баш бьжберьн, сәва кӧ дәрһәԛа проблеме хәбәр дьн

• Чахе ньһа ԝәʹде ԝә йә кӧ гӧһ бьдьн, һьнге бь ләзкʹәтьне нәкʹәвьнә нав хәбәрдана мер йан жьна хԝә у әԝе нәдьнә сәкьнандьне. Чьмки ԝәʹде ԝә жи ԝе бе кӧ хәбәр дьн

КʹЬТЕБА ПИРОЗ ЧЬ ДЬБЕЖӘ: «Һʹьзкьрьнеда чаԝа хушк-бьра сәр һәв шәԝат бьн, ԛәдьркьрьнеда жь һәвдӧ дәрбазтьр бьн» (Рʹомайи 12:10). Гәләк фәрз ә әв йәк, һәла чаԝа һун гӧһ дьдьн. Бьхәбьтьн кӧ бькарьбьн ньһерʹандьна мер йан жьна хԝә фәʹм бькьн. «Сәр һәв шәԝат бьн ... у шкәсти бьн» (1 Пәтрус 3:8; Аԛуб 1:19). Хԝә ӧса нәдьнә кʹьфше, йан чь һун гӧһ дьдьнә һәв, ле бь рʹастийе гӧһ надьнә һәв. Һәрге дькарьн, шьхӧле хԝә бьһельн у бь тʹәмамийе дина хԝә бьдьнә һәв, йан жи бежьн кӧ дәрһәԛа ве проблеме паше хәбәр дьн. Һәрге һун һʹәсаб дькьн кӧ мер йан жьна ԝә, һәвале ԝә йә, нә кӧ нәйаре ԝә, һьнге әв йәк ԝе али ԝә бькә, кӧ «дь хәйдеда рʹӧһʹе» ԝә «нә бь ләз бә» (Ԝаиз 7:9).

ЧЬ ҺУН ДЬКАРЬН БЬКЬН:

• Һәла һе ԝи чахи жи, гава чь кӧ һун дьбьһен ԝә хԝәш найе, бьхәбьтьн кӧ рʹаст ль сәр ве йәке бьньһерʹьн

• Һʹәму тьшти бькьн кӧ бькарьбьн фәʹм бькьн, һәла мер йан жьна ԝә чь дьхԝазә бежә. Дина хԝә бьдьн ве йәке, кӧ чаԝа әԝ хԝә дьгьрә у бь чь дәнги хәбәр дьдә

КʹЬТЕБА ПИРОЗ ЧЬ ДЬБЕЖӘ: «Һәр кʹәд ԛәзәнще тинә, ле бәле галәгала вала» бе кер ә у пʹучʹ ә (Мәтʹәлок 14:23). Тʹәне бәс нинә кӧ сафикьрьна баш ԛәбул кьн. Ле чь кӧ ԝә сафи кьрийә, һун гәрәке ль гора ве йәке бькьн. Сәва ве йәке дьбәкә лазьм бе кӧ ль сәр хԝә зәʹф бьхәбьтьн, у ԛәԝате жи бьдьнә хәбате. Ле чь жи һәбә, һежа йә ԝәки һун ӧса бькьн (Мәтʹәлок 10:4). Һәрге һун тʹәви һәв ча һәвал шьхӧлкʹарийе дькьн, һуне бенә хәлаткьрьне (Ԝаиз 4:9).

ЧЬ ҺУН ДЬКАРЬН БЬКЬН:

• Сафи кьн, һәла һәр кәс жь ԝә чь дькарә жь алийе хԝәда бькә, сәва кӧ проблемед хԝә сафи кьн

• Чьԛас ԝәʹдә жи дәрбаз бә, һәртʹьм дьшьрмиш бьн дәрһәԛа ԝе йәке, һәла һун гьһиштьнә чь у пешдачуйина хԝә жи ԛимәт кьн