Әз шәһәре Монреалда, мьһаләкә кʹәсибда мәзьн бумә. Чахе әз шәш мәйи бум баве мьн мьр, у хԝәйкьрьна мә һʹәйшт зарʹа кʹәтә стуйе дийа мьн. Йе лапи бьчʹук әз бум.

Жь бьчʹуктайе әʹмьре мьн дьзьвьри дора наркотикайе, хӧмарбазийе у ԛачахийе. Дәһә салийа хԝәда мьн дәстпекьр шьхӧл бькьм бона мәрьвед бенамус у йед кӧ пʹәра бь сәләфа дьдан. Мьн гәләк щара дәрәԝ дькьрьн. Һʹәԝаса мьн дьһат чахе мьн мәрьв бь щурʹә-щурʹә дьхальфандьн. Әв йәк бона мьн тебежи наркотик бу.

Чардәһ салийа хԝәда мьн ида бь һостәти мәрьв дьхапандьн. Мәсәлә, мьн гәләк сьһʹәт, базьн, гостилкед авзерʹкьри дькʹьрʹи у мора зерʹе тʹәмьз ле дьхьст. Паше кʹучʹада у бәр дькʹанед мәзьн, щийе автосәкьнандьнада дьфьрот. Бона мьн пʹәрәчекьрьне һесатьр тьштәк тʹӧнә бу. Щарәке мьн нава рʹожәкеда, дәһә һʹәзар долар ԛазанч кьр!

Чахе 15 салийа хԝәда әз жь мәкʹтәба рʹасткьрьне дәрхьстьм, щийе мьни житьне тʹӧнә бу. Әз кʹучʹада, мешәда йан жи мале насе хԝәда рʹадьзам.

Жь бо ԛәлпийа хԝә әз гәләк щар дькʹәтьмә дәсте полиса, ле әз нәдькьрмә кәле, чьмки мьн тьштед дьзи нәдьфьрот. Ле мьн щьрмед мәзьн дьда жь бо ԛәлпийе, хапандьне у фьротана бе дәстур. Әз тʹӧ кәси нәдьтьрсийам. Мьн һәла һе жи жь мәрьва дәʹԝа дькьр әԝ пʹәрә, кʹижан кӧ ԝана һьлдабу жь ԝан мәрийа, йед кӧ пʹәрә бь сәләфа дьдан. Әв йәк гәләк хоф бу. Мьн щарна тʹәви хԝә ԛьрмә жи һьлдьда у ӧса дьбу, кӧ әз тʹәви кʹома ԛачаха жи дьчумә сәр ԛачахийе.

Дәрһәԛа рʹастийа Кʹьтеба Пироз щара пешийе әз 17 салийа хԝәда пеһʹәсийам. Кәчʹька кӧ мьн тʹәв дьжит һинбуна Кʹьтеба Пироз дәстпекьр тʹәви Шәʹдед Йаһоԝа. Ле принсипед Кʹьтеба Пирозә нав-намусийе, мьн хԝәш нәдьһатьн, ләма жи мьн әв кәчʹьк һишт у дәстпекьр тʹәви йәкә дьн бьжим.

Ле чахе әве һәвала мьнә дӧда жи дәстпекьр тʹәви Шәʹдед Йаһоԝа Кʹьтеба Пироз һин бә, әз гәләк әʹщебмайи мам. Әԝ гәләк һатә гӧһастьне. Бу йәкә дьһа нәрм, бь сәбьр, чь кӧ гәләк мьн хԝәш һат. Ләма жи әз рʹази бум һәрʹьм Ода Щьватен Шәʹдед Йаһоԝа, кʹидәре мәрьв гәләк һʹәйф у маԛул бун. Мьн фьрԛикә мәзьн дит ортʹа ԝан у мәрьвед ве дьнйайеда! Әз чахе бьчʹук бум, тʹӧ кәси гӧһ нәдьда мьн. Мьн һʹьзкьрьна де тʹәхмин нәдькьр, нә жи хәмкьрьн һьндава хԝәда. Ле нав Шәʹдед Йаһоԝада мьн дәрберʹа һʹьзкьрьн у дьлгәрми дит, чь кӧ әз бьчʹуктайа хԝәда һʹьзрәт бум. Чахе мьнрʹа готьн, кӧ әз Кʹьтеба Пироз һин бьм, әз бь дьл у щан рʹази бум.

Һинбуна Кʹьтеба Пироз әʹмьре мьн хьлаз кьр. Әз тʹәви дӧ һәвалед хԝә һазьр дьбум һәрʹьм дьзийе, сәва кӧ дәйне хԝәйә хӧмарбазийе, кʹижан кӧ пенщи һʹәзар долара зедәтьр бу, дадьм. Әз чьԛас ша мә, ԝәки мьн ԝәʹдәда хԝә ве йәке пашда гьрт. Ле һәвалед мьн әв дьзи кьрьн у жь ԝана йәк һатә гьртьне, дә йе дьн жи һатә кӧштьне.

Ԝәʹде һинбуна Кʹьтеба Пироз мьн фәʹм кьр, ԝәки әз гәрәке гәләк гӧһастьна бькьм. Мәсәлә, чахе мьн 1 Корьнтʹи 6:10 хԝәнд, һесьр жь чʹәʹвед мьн бари. Ԝедәре те готьне: «Нә дьз, нә тьмакʹар, нә сәрхԝәш, нә бӧхданбеж, нә жи тʹаланкьр Пʹадшатийа Хԝәде ԝе ԝар нәбә». Мьн фәʹм кьр, ԝәки әз гәрәке әʹмьре хԝә бь тʹәмами бьгӧһезьм (Рʹомайи 12:2). Әз йәке һерс у зӧлм бум, әʹмьре мьн жи сәр һʹиме дәрәԝийе бу.

Ле әз жь Кʹьтеба Пироз пеһʹәсийам, ԝәки Йаһоԝа мәрʹд ә у дьбахшинә (Ишайа 1:18). Мьн бь дьл у щан ԝирʹа дӧа дькьр у лавайа дькьр, ԝәки али мьн бькә әз хԝә жь әʹмьре нәрʹаст дур бьгьрьм. Әз бь аликʹарийа Йаһоԝа һеди-һеди һатьмә гӧһастьне. Ле гавәкә фәрз жи әԝ бу, ԝәки мьн у һәвала хԝә зәԝаща хԝә ԛануни кьр.

Әз 24 салийа хԝәда зәԝьщи бум, ида се зарʹед мьн жи һәбун. Ньһа ида гәрәке мьн хԝәрʹа хәбат бьдита. Ле нә хԝәндьна мьн һәбу, нә жи наве мьни баш бона хәбате. Мьн диса бь дьл у щан Йаһоԝарʹа дӧа кьр у дәстпекьр хәбате бьгәрʹьм. Мьн мәзьнед хәбатарʹа дьгот, ԝәки мьн әʹмьре хԝә гӧһастийә у әзе хәбатчики һʹәлал бьм. Щарна мьн ԝанарʹа шьровәдькьр, ԝәки һинбуна Кʹьтеба Пироз али мьн дькә, кӧ әʹмьре хԝә бьгӧһезьм у дьхԝазьм бьбьмә бажарванәки гӧһдар. Ле гәләк мәзьнед хәбате әз һьлнәдам. Щарәке чахе мьн щаба пьрса дьда бона хәбате, мьн бь һʹәлали дәрһәԛа әʹмьре хԝәйи бәре гьли кьр. Йе кӧ пьрс дьданә мьн гот: «Ньзаньм чьрʹа, ле дьле мьн мьнрʹа дьбежә, ԝәки әз тә һьлдьмә хәбате». Мьн заньбу ԝәки әв йәк щаба дӧайе мьн ә. Ԝәʹдә шунда әз у жьна хԝә һатьнә ньхӧмандьне у бунә Шәʹдед Йаһоԝа.

Иро әз сах ьм, чьмки пе принсипед Кʹьтеба Пироз дьжим у сәр рʹийа рʹаст ьм. Малбәта мьнә баш һәйә, исафа мьн жи тʹәмьз ә, чьмки баԝәр ьм, ԝәки Йаһоԝа бахшандийә мьн.

Чардәһ сал ә кӧ әз хьзмәт дькьм ча хьзмәткʹаре һәртʹьм у али мәрьва дькьм кӧ рʹастийа Кʹьтеба Пироз пебьһʹәсьн. Әз гәләк ша мә, кӧ нава си сали зедәтьрда мьн али 22 һәвал-хәбаткʹаред хԝә кьр, кӧ бьбьнә Шәʹдед Йаһоԝа. Ԝан пашԝәхтийа жьна мьн жи дәстпекьр хьзмәт кә ча хьзмәткʹара һәртʹьм. Әз диса жи дьчьмә дькʹанед мәзьн, ле нә бь ԝе нете кӧ мәрьва бьхапиньм, чаԝа мьн бәре дькьр. Ньһа ида ԝедәре тʹьме дәрһәԛа баԝәрийа хԝә гьли дькьм. Әз дьхԝазьм али мәрьва бькьм, ԝәки баԝәр кьн, кӧ әʹмьрәки хԝәш дьнйа тʹәзәда пешийа мә йә, кʹидәре нә ԛачах ԝе һәбьн, нә жи дьз (Зәбур 37:10, 11).