Һәр сал бь дәһа һʹәзара әʹрдһәж дьԛәԝьмьн. Рʹаст ә һʹәчʹи зәʹф жь ԝана әʹрдһәжед сьст ьн, ле һәнә йед ԛайим жи, кʹижан кӧ дьбьнә мәʹнийа һьлшандьне, кӧл-дәрда у мьрьне. Щарна жи әԝана тсунами пешда тиньн, кʹижан кӧ територийа незики бәʹре ԝеран дькә, жь бо чь жи гәләк мәрьв дьмьрьн. Гәло Кʹьтеба Пироз дәрһәԛа әʹрдһәжед ӧса ԛайим пʹехәмбәрти кьрийә?

Ве готареда

•  Кʹьтеба Пироз дәрһәԛа әʹрдһәжа пʹехәмбәрти кьрийә?

•  Әʹрдһәжед иройин, избат дькьн кӧ пʹехәмбәртийа Кʹьтеба Пироз те сери?

•  Пʹехәмбәртийа Кʹьтеба Пироз дәрһәԛа әʹрдһәжа, бона мә чь те һʹәсабе?

•  Ньһерʹандьна нәрʹаст һьндава пʹехәмбәртийа Кʹьтеба Пироз дәрһәԛа әʹрдһәжа

 Кʹьтеба Пирозда дәрһәԛа әʹрдһәжа, пʹехәмбәртийа Исада те готьне. Гьлийе ԝи се кʹьтебед Кʹьтеба Пирозда һатьнә ньвисаре:

 «Мьләте рʹабә ль сәр мьләт, пʹадшати ль сәр пʹадшатийе, щи-щийа ԝе хәлайи-щәлайе у әʹрдһʹәже бьбьн» (Мәтта 24:7).

 «Мьләте рʹабә сәр мьләт, пʹадшатийе рʹабә сәр пʹадшатийе, щи-щийа ԝе әʹрдһʹәж у хәлайи-щәлайе бьбьн» (Марԛос 13:8).

 «Щи-щийа әʹрдһʹәжед мәзьн, хәлайи-щәлайе у мина нәхԝәшийа һʹал ԝе бьбьн» (Луԛа 21:11).

 Әм дьвиньн, Иса пʹехәмбәрти кьр, ԝәки ԝе щи-щийа әʹрдһʹәжед ԛайим тʹәви шәрʹа, хәлайи-щәлайе у нәхԝәшийед һʹал бьԛәԝьмьн. Әԝ һʹәму ԛәԝьмандьн тʹәвайи, әʹйан дькьн ԝи ԝәʹдәйи сәр кʹижани Кʹьтеба Пироз дьбежә «рʹожед ахьрийе» йан жи «ахьрийа ве дьнйайе» (Мәтта 24:3; 2 Тимотʹейо 3:1). Чахе әм хроноложийа Кʹьтеба Пироз леколин дькьн, әм дьвиньн ԝәки рʹожед ахьрийе сала 1914-да дәстпебунә у һе хьлаз нәбунә.

 Бәле. Пʹехәмбәрти у гьлийе Иса дәрһәԛа әʹрдһәжа, рʹожед мәда тенә сери. Дәстпебуйи жь сала 1914, 1 950 зедәтьр әʹрдһәжед ԛайим ԛәԝьминә, ле һʹәсабе мәрьвед кӧ мьрьнә, бь тʹәмами гьһиштийә дӧ милйона зедәтьр. a Ԝәрен әм чәнд мәсәла шеԝьр кьн, кʹижан кӧ ԛьрʹна мәда ԛәԝьминә.

 Сала 2004, Окйануса Һьнди. Әрʹдһәжәкә бь 9,1 магнитуда, тсунами пешда ани, кʹижан кӧ зийан да чәнд ԝәлата у ԝәкә 225 000 мәрьв мьрьн.

 Сала 2008, Чин. Әʹрдһәжәкә бь 7,9 магнитуда, гәләк гӧнд у бажар ԝеран кьрьн. Ль гора һьнә һʹәсаба, бь тʹәмами 90 000 мәрьв мьрьн, ԝәкә 375 000 мәрьва зийан стандьн, у бь милйона мәрьв бе щи-сьтʹар ман.

 Сала 2010, Һаит. Паши әʹрдһәжәкә бь 7,0 магнитуда, диса чәнд әʹрдһәжед бьчʹук ԛәԝьмин. Һьнге 300 000 мәрьва зедәтьр мьрьн, у милйонәки зедәтьр мәрьв бе щи-сьтʹар ман.

 Сала 2011, Жапонийа. Жь бо әʹрдһәжәкә бь 9,0 магнитуда, тсунами пешда һат, кʹижане кӧ ԝәкә 18 500 мәрьв кӧшт. Бь сәда һʹәзар мәрьв жи бе щи-сьтʹар ман. Һьм жи електростансийа атоме йа Фукусима, зийанәкә мәзьн станд у ԛәзи ԛәԝьми. Дәһә сал шунда жи, ԝәкә 40 000 мәрьв һәла һе нькарьн ԝәгәрʹьнә малед хԝә, чьмки һʹәта иро ԝедәре радийасийа бьльнд һәйә, чь кӧ гәләк хоф ә.

 Пʹехәмбәртийа Кʹьтеба Пироз дәрһәԛа әʹрдһәжа, мәрʹа дьдә кʹьфше кӧ зутьрәке ԝе чь бьԛәԝьмә. Иса гот: «Гава һун бьбиньн кӧ әв йәк дьԛәԝьмьн, бьзаньбьн кӧ Пʹадшатийа Хԝәде незик ә» (Луԛа 21:31).

 Кʹьтеба Пироз шьровәдькә, кӧ Пʹадшатийа Хԝәде, сәрԝертийа реали йә, сәрԝере кʹижани кӧ Иса Мәсиһ ә. Һәма дәрһәԛа ве Пʹадшатийе Иса пәйчуйед хԝә һин дькьр, кӧ әԝана дӧа бькьн (Мәтта 6:10).

 Чахе Пʹадшатийа Хԝәде сәр әʹрдерʹа сәрԝертийе бькә, ԝе тʹәшԛәлед тʹәбийәте, мәсәлә әʹрдһәже бьдә һьлдане у әԝе ида тʹӧ щар зийане нәдә мәрийа (Ишайа 32:18). Хенщи ԝе йәке әԝ ԝе бьдә һьлдане һʹәму зьраред физики у емосийали, кʹижан кӧ мәрьва жь бо әʹрдһәже стандьнә (Ишайа 65:17; Әʹйанти 21:3, 4). Бона һе зедә әʹламәти бьхуньн готар «Пʹадшатийа Хԝәде ԝе Чь Бькә?».