Хԝәде жьн у мере пешьн әʹфьранд у бь зәԝаще әԝана кьрьнә йәк. Ль гора ԛьрара Хԝәде әв һәвгьредана бь зәԝаще йа ортʹа мер у жьнда, гәрәке бьбуйа һʹиме малбәте, кʹидәре кӧ жьн, мер у ӧса жи зарʹед кӧ ԝанарʹа бьбуна, хԝә рʹьһʹәт у бехоф тʹәхмин кьрана (Дәстпебун 1:27, 28; 2:18).

 Хԝәде дьхԝазә ԝәки мер у жьн бәхтәԝар бьн (Мәтʹәлок 5:18). Ләма жи әԝи Кʹьтеба Пирозда принсип у ԛанунед ӧса да, кʹижан кӧ дькарьн али ԝан бькьн, ԝәки зәԝаща ԝан бәхтәԝар бә.

Ве готареда

•  Кʹижан ьн нормед Хԝәде бона зәԝаще?

•  Кʹьтеба Пироз чь дьбежә дәрһәԛа башԛәжитьн у һәвԛәтандьне?

•  Гәло лазьм ә зәԝаще бь ԛануни дәстур кьн, ԝәки ль Хԝәде ԛәбул бә?

•  Ль гора Кʹьтеба Пироз кʹижан ьн щабдари у ролед жьн у мер?

•  Гәло рʹожед мәда Хԝәде жь жьн у мера дәʹԝа дькә, ԝәки зарʹед ԝан һәбьн?

•  Кʹьтеба Пироз ча дькарә али малбәта мьн бькә?

•  Рʹезед Кʹьтеба Пироз дәрһәԛа зәԝаще

 Сәре-серида ԛьрара Хԝәде әԝ бу, ԝәки мерәк у жьнәк тʹәвайи бькʹәвьнә зәԝаще (Дәстпебун 2:24). Хԝәде ԛәбул накә пʹьрʹәжьнийе, һомосексуалийе у зәԝаща беԛануни (1 Корьнтʹи 6:9; 1 Тʹесалоники 4:3). Иса пәйчуйед хԝә һин дькьр, ԝәки хԝә ль нормед Хԝәдейә дәрһәԛа зәԝаще бьгьрьн, кʹижан кӧ Хԝәде сәре-серида кʹьфш кьр (Марԛос 10:6-8).

 Хԝәде дьхԝәст ԝәки жьн-мер тʹӧ щар һәв нәԛәтьн. Чахе жьн-мер һәв дьстиньн, соз дьдьнә һәв ԝәки һәврʹа амьн бьминьн у тʹәмамийа әʹмьре хԝә тʹәвайи бьн. Хԝәде дьхԝазә ԝәки әԝана ви созе хԝә биньн сери (Марԛос 10:9).

 Щара дәрәщед ӧса чедьбьн, ԝәки жьн у мер мәщбур дьбьн сәр һьнә ԝәʹдә башԛә бьжин. Мәсәлә, әв йәк дькарә лазьм бә, ԝәки бона һʹәԝщәтийа малбәте хәм бькьн. Ле Кʹьтеба Пироз һелан накә, ԝәки жьн-мер жь бо проблемед малбәте жь һәв башԛә бьжин. Дәԝсе Кʹьтеба Пироз һелан дькә, кӧ жьн-мер дәрәщед ӧсада ль һәв бен (1 Корьнтʹи 7:10).

Ль гора Кʹьтеба Пироз мәʹнийа кӧ жь һәв бьԛәтьн, тʹәне  бенамуси йә (Мәтта 19:9). Ле һәрге жьн-мер бе мәʹнийа бенамусийе сафи дькьн ԝәки жь һәв башԛә бьжин, йан жи һәв бьԛәтьн, ль гора Кʹьтеба Пироз изьна ԝан тʹӧнә бьфькьрьн тʹәви кәсәки дьн бькʹәвьнә зәԝаще (Мәтта 5:32; 1 Корьнтʹи 7:11).

 Хԝәде жь Мәсиһийа дәʹԝа дькә, ԝәки ԛанунед дәԝләте дәрһәԛа зәԝаще биньн сери (Тито 3:1). Чахе жьн-мер зәԝаща хԝә бь ԛануни дәстур дькьн, бь ве йәке әԝана ԛәдьр дьдьнә кʹьфше һьндава һʹӧкӧмәтийеда у һьндава нормед Хԝәдейә зәԝащева гьредайи, йа кӧ дәʹԝа дькә ԝәки һәв нәԛәтьн. a

•   Щабдарийа һәрда. Жьн у мер гәрәке һәв һʹьз бькьн у ԛәдьре һәв бьгьрьн (Әфәси 5:33). Әԝана гәрәке һʹәԝщед һәвдӧйә сексуали бь һʹьзкьрьн у ԛәдьр рʹази кьн. Әԝана гәрәке хԝә жь һʹәму щурʹә нәмамийе дур бьгьрьн (1 Корьнтʹи 7:3; Ибрани 13:4). Һәрге жьн-меррʹа зарʹ дьбьн, әԝана борщдар ьн кӧ бона ԝана хәм бькьн, ширәт бькьн у мәзьн кьн (Мәтʹәлок 6:20).

   Кʹьтеба Пирозда һур бь һур найе кʹьфшкьрьне, кӧ малбәтеда кʹи бьхәбьтә у кʹи шьхӧле малева мьжул бә. Жьн-мер гәрәке хԝәха сафи кьн, кӧ борщдарийа малбәте ча пʹарәвәкьн, сәва кӧ малбәта ԝан кʹаре бьстинә.

•   Щабдарийа малхе мале. Кʹьтеба Пирозда те готьне, ԝәки «мер сәре жьне йә» (Әфәси 5:23). Әԝ сәре малбәте йә бь ԝе нете, кӧ бона һʹалхԝәшийа нәфәред хԝә щабдар ә у гәрәке рʹебәрийе малбәте бькә. Демәк сафикьрьнед ӧса бькә, ԝәки бона жьн-зарʹед ԝи керһати бә.

   Мер гәрәке хәм бькә, ԝәки нәфәред ԝи сьһʹәт-ԛәԝат бьн, ша у бәхтәԝар бьн у һәләԛәтийа ԝан тʹәви Хԝәде незик бә (1 Тимотʹейо 5:8). Мер бь ԝе йәке дьдә кʹьфше, ԝәки хәйсәт-һʹӧнӧр у фәрәсәтед жьна хԝә ԛимәт дькә, чахе тʹәви ԝе кʹар дькә у ԝәʹде сафикьрьна, фькьр у һәстед ԝе һьлдьдә һʹәсаб (Мәтʹәлок 31:11, 28). Кʹьтеба Пирозда те готьне, ԝәки мер гәрәке борщдарийед хԝә бь һʹьзкьрьн бинә сери (Колоси 3:19).

•   Рола жьне. Кʹьтеба Пирозда те готьне, ԝәки «жьн жи ԛәдьре мере хԝә бьгьрә» (Әфәси 5:33, ДТʹ). Хԝәде хԝәш те чахе жьн ԛәдьре ве роле дьгьрә, кʹижан кӧ әԝи дайә мере ԝе.

   Рола жьне әԝ ә, ԝәки пьштгьрийа сәритийа мере хԝә бькә у аликʹарийе бьдә ԝи, ԝәки сафикьрьнед рʹаст бькә (Дәстпебун 2:18). Кʹьтеба Пироз пәсьна дьдә ԝе жьне, йа кӧ малбәтеда рола хԝәйә фәрз тинә сери (Мәтʹәлок 31:10).

 На. Ԝәʹде бәре Хԝәде тʹәми да һьнә хьзмәткʹаред хԝә, кӧ һәв зедә бьн (Дәстпебун 1:28; 9:1). Ле әв дәʹԝакьрьн сәр Мәсиһийа иро һʹӧкӧм набә. Иса тʹӧ щар нәдьгот, ԝәки шагьртед ԝи борщдар ьн зарʹа биньн. Пәйчуйед Исайи ԛьрʹна йәке жи әв йәк дәʹԝа нәдькьрьн. Жьн-мер хԝәха сафи дькьн, зарʹа биньн йан на.

 Кʹьтеба Пирозда һәнә принсип, кʹижан кӧ дькарьн али йед тʹәзә зәԝьщи бькьн, ԝәки һʹиме малбәта бәхтәԝар дайньн. Принсипед Кʹьтеба Пироз ӧса жи али жьн-мера дькьн, ԝәки бәр чәтьнайед зәԝащеда тәйах кьн.

 Принсипед Кʹьтеба Пироз али щотед зәԝаще дькьн, ԝәки . . .

•   һʹьзкьрьна рʹаст бьдьнә кʹьфше (1 Корьнтʹи 13:4-7; Колоси 3:14).

•   һәв фәʹм бькьн (1 Корьнтʹи 10:24).

•   бь дьл у щан гӧһ бьдьнә һәв (Аԛуб 1:19).

•   ԛәдьре һәв бьгьрьн (Рʹомайи 12:10).

•   бьбахшиньнә һәв (1 Пәтрус 4:8).

•   һьндава һәвда амьн бьн (Марԛос 10:9).

•   һәв сәбьр кьн (Әфәси 4:2, 3).

•   тʹәвайи шьхӧлкʹарийе бькьн (Ԝаиз 4:9).

•   һәләԛәтийа хԝә зәԝащеда ԛәԝи кьн (Сьтрана Сьлеман 8:7).