Тӧ дькари Хԝәде нас бьки у бьби досте ԝи, һәрге дәрһәԛа ԝи пебьһʹәси у тьштед кӧ ԝи хԝәш тед бьки. Һьнге Хԝәде жи ԝе незики тә бә (Аԛуб 4:8). Кʹьтеба Пироз мәрʹа әшкәрә дькә кӧ «Хԝәде жь мә һәр кәси нә дур ә» (Кʹаред Шандийа 17:27).

•  Тӧ ча дькари Хԝәде нас бьки

•  Ньһерʹандьна нәрʹаст һьндава достийа тʹәви Хԝәде

 Кʹьтеба Пироз бьхунә

•  Кʹьтеба Пироз чь дьбежә: «Тʹәмамийа ньвисаре жь бина бәр Хԝәде йә» (2 Тимотʹейо 3:16).

•  Әԝ йәк чь те һʹәсабе: Авторе Кʹьтеба Пироз Хԝәде йә. Әԝи фькьред хԝә кьрә һʹьше ньвискʹаред Кʹьтеба Пироз. Ләма жи әв кʹьтебәкә гәләк мәхсус ә, чьмки веда Хԝәде ԛьрара хԝә һьндава мә әʹйан дькә. Әԝ ӧса жи мәрʹа әʹйан дькә дәрһәԛа хәйсәт-һʹӧнӧред хԝә, бәʹса хәбәре дәрһәԛа һʹьзкьрьне, һәԛийе у рʹәʹмтийе (Дәркʹәтьн 34:6; Ԛануна Дӧщари 32:4).

•  Тӧ чь дькари бьки: Һәр рʹож Кʹьтеба Пироз бьхунә (Йешу 1:8). У чь дьхуни сәр ве йәке бьфькьрә у пьрсе бьдә хԝә: «Әԝ йәк дәрһәԛа Хԝәде чь мьнрʹа әʹйан дькә?» (Зәбур 77:12).

   Мәсәлә, Йерәмйа 29:11 бьхунә, у паше ве пьрсе бьдә хԝә: «Хԝәде ԛәнщи йан хьрабийа мьн дьхԝазә? Гәло Хԝәде йәки кʹин ә, йан әԝ дьхԝазә әз бәхтәԝар бьм?»

 Дина хԝә бьдә әʹфрина

•  Кʹьтеба Пироз чь дьбежә: «Жь әʹфьрандьна дьнйайеда һʹӧнӧред [Хԝәдейә] нәхӧйа, аԝа готи ԛӧдрәта ԝийә һʹәта-һʹәтайе у Хԝәдетийа ԝи бь әʹфьрина хӧйа дьбьн, зәлал тенә дитьне» (Рʹомайи 1:20).

•  Әԝ йәк чь те һʹәсабе: Чаԝа кӧ нәԛьша бәдәԝ дәрһәԛа нәԛьшкʹар гәләк тьшт әʹйан дькә, йан жи мәкʹинәкә чәтьн чекьри, дәрһәԛа дәстпʹешәтийа һостәки әʹйан дькә, ӧса жи әʹфринед Хԝәде дәрһәԛа хәйсәт-һʹӧнӧред ԝи әʹйан дькьн. Бәʹса хәбәре, мәжуйе мәйи мәхсус биланийа Хԝәде әʹйан дькә, ле енержийа тәʹв у стәйрка ԛәԝата ԝи әʹйан дькьн (Зәбур 104:24; Ишайа 40:26).

•  Тӧ чь дькари бьки: Хԝәрʹа ԝәʹдә бьвинә, ԝәки дина хԝә бьди чекьрьнед дәсте Хԝәде у пьрсе бьдә хԝә: «Әʹфринед тʹәбийәтеда дәрһәԛа Хԝәде чь әʹйан дькьн?» a Һьлбәт диса гәләк тьшт һәнә кӧ тʹәбийәт нькарә дәрһәԛа Әʹфьрандар мәрʹа әʹйан кә. Ләма жи Хԝәде Кʹьтеба Пироз дайә мә.

 Наве Хԝәде һьлдә

•  Кʹьтеба Пироз чь дьбежә: «Әзе пьштоване ԝи бьм, чьмки наве Мьн нас дькә. Әԝе гази Мьн кә, Әзе щаба ԝи бьдьм» (Зәбур 91:14, 15).

•  Әԝ йәк чь те һʹәсабе: Хԝәде, наве кʹижани Йаһоԝа йә, илаһи дина хԝә дьдә ԝан мәрьва, йед кӧ наве ԝи заньн у бь ԛәдьр наве ԝи һьлдьдьн (Зәбур 83:18; Малахи 3:16) b. Хԝәде дәрһәԛа хԝә пе ве йәке жи мәрʹа әʹйан кьрийә, кӧ наве хԝә мәрʹа вәкьрийә. Әԝ дьбежә: «Әз Йаһоԝа мә. Наве мьн әԝ ә» (Ишайа 42:8, ДТʹ).

•  Тӧ чь дькари бьки: Наве Йаһоԝа һьлдә гава дәрһәԛа ԝи хәбәр дьди.

 Дӧада тʹәви Йаһоԝа хәбәр дә

•  Кʹьтеба Пироз чь дьбежә: «Хӧдан незики ԝан һ’әмуйа йә, к’ижан кӧ гази Ԝи дькьн» (Зәбур 145:18).

•  Әԝ йәк чь те һʹәсабе: Йаһоԝа незики ԝан ә йед кӧ бь баԝәрийе жерʹа дӧа дькьн. Дӧа әԝ һәйә пʹара һʹәбандьне кӧ ԛәдьр у һӧрмәте һьндава Хԝәде нишан дькә.

•  Тӧ чь дькари бьки: Тʹьме Хԝәдерʹа дӧа бькә (1 Тʹесалоники 5:17). Дьле хԝә жерʹа вәкә у дәрһәԛа хәмед хԝә жерʹа гьли кә (Зәбур 62:8). c

 Баԝәрийа хԝә Хԝәде бинә

•  Кʹьтеба Пироз чь дьбежә: «Бе баԝәри тʹӧ щар набә кӧ инсан ль Хԝәде хԝәш бе» (Ибрани 11:6).

•  Әԝ йәк чь те һʹәсабе: Сәва кӧ бьбьнә достед Хԝәде, әм гәрәке баԝәрийа хԝә ԝи биньн. Кʹьтеба Пирозда те готьне, кӧ баԝәри тʹәне әԝ нинә кӧ мәрьв баԝәр бькә кӧ Хԝәде һәйә. Ле әԝ ӧса жи те һʹәсабе бь тʹәмами итʹбарийа хԝә ԝи биньн. Итʹбари достийеда гәләк фәрз ә.

•  Тӧ чь дькари бьки: Баԝәри сәр һʹиме занәбуне йә (Рʹомайи 10:17). Ләма жи Кʹьтеба Пироз леколин бькә у хԝә бьщерʹьбинә һәла тӧ итʹбарийа хԝә Хԝәде у ширәтед ԝи тини йан на. Шәʹдед Йаһоԝа ԝе ша бьн кӧ али тә бькьн ԝәки Кʹьтеба Пироз леколин бьки. d

 Ԝан тьшта бькә йед кӧ ль Хԝәде хԝәш тен

•  Кʹьтеба Пироз чь дьбежә: «Бь ве йәке әм һʹьзкьрьна хԝә һьндава Хԝәдеда дьдьнә кʹьфше, гава әм тʹәмийед ԝи дьԛәдиньн» (1 Йуһʹәнна 5:3).

•  Әԝ йәк чь те һʹәсабе: Йаһоԝа досте ԝан ә, йед кӧ ԝи һʹьз дькьн у һәр тьшти дькьн, ԝәки гӧрʹа тʹәмийед ԝи бькьн.

•  Тӧ чь дькари бьки: Ԝәʹде леколина Кʹьтеба Пироз, дина хԝә бьдә кӧ чь Хԝәде хԝәш те у чь хԝәш жи найе. Пьрсе бьдә хԝә: «Әз чь гӧһастьна дькарьм бькьм, ԝәки дьле Әʹфьрандаре хԝә ша бькьм?» (1 Тʹесалоники 4:1).

 Ширәтед Хԝәде ԛәбул кә у тӧйе һʹьзкьрьна ԝи тʹәхмин ки

•  Кʹьтеба Пироз чь дьбежә: «Тәʹм кьн у бьзаньбьн кӧ Хӧдан ча ԛәнщ ә!» (Зәбур 34:8).

•  Әԝ йәк чь те һʹәсабе: Хԝәде тә һелан дькә ԝәки бьщерʹьбини кӧ әԝ чьԛас ԛәнщ ә. Гава тӧ һʹьзкьрьн у аликʹарийа ԝи бьвини, тӧйе бьхԝази дьһа незики ԝи би.

•  Тӧ чь дькари бьки: Гава тӧ Кʹьтеба Пироз дьхуни, ширәтед ԝи ԛәбул бькә у тӧйе бьвини кӧ әԝ чьԛас тәрʹа кʹаре тиньн (Ишайа 48:17, 18). Ӧса жи дина хԝә бьдә мәсәлед ԝан мәрьва, йед кӧ пе аликʹарийа Хԝәде нава тәнгасийада сәбьр кьрьнә, әʹмьре хԝә у әʹмьре нәфәред хԝә алийе башда гӧһастьнә у бь рʹасти бәхтәԝар бунә. e

 Ньһерʹандьна нәрʹаст: Әм нькарьн Хԝәде нас бькьн, чьмки әм нькарьн дәрһәԛа ԝи пебьһʹәсьн.

 Избати: Һьнә тьшт дәрһәԛа Хԝәде чәтьн ә фәʹм кьн, мәсәлә кӧ әԝ Кәсе рʹӧһʹани йә у найе дитьне. Йәкә әм дькарьн Хԝәде нас бькьн. Кʹьтеба Пироз дьбежә, кӧ әм гәрәке дәрһәԛа ԝи бьзаньбьн, ԝәки жийина һʹәта-һʹәтайе ԛазанщ кьн (Йуһʹәнна 17:3). Бь сайа Кʹьтеба Пироз, әм дькарьн дәрһәԛа Әʹфьрандаре хԝә, хәйсәт-һʹӧнӧред ԝи, ԛьрара ԝи һьндава инсанәте у әʹрде, у ӧса жи дәрһәԛа ԛанун у принсипед ԝи пебьһʹәсьн (Ишайа 45:18, 19; 1 Тимотʹейо 2:4). Хенщи ве йәке, ча мә жоре гот, Кʹьтеба Пироз ӧса жи наве Хԝәде мәрʹа әʹйан дькә (Зәбур 83:18). Бь ԝи щурʹәйи әме нә тʹәне Хԝәде нас бькьн, ле ӧса жи незики ԝи бьн (Аԛуб 4:8).