Иса мьр, сәва кӧ мәрьв бахшандьна гӧна бьстиньн у бькарьбьн һʹәта-һʹәтайе бьжин (Рʹомайи 6:23; Әфәси 1:7). Хенщи ве йәке, Иса бь мьрьна хԝә избат кьр, ԝәки мәрьв һәла һе нава щерʹьбандьнед гьранда жи дькарә Хԝәдерʹа амьн бьминә (Ибрани 4:15).

Ԝәрен әм пебьһʹәсьн, ԝәки мьрьна мәрьвәки чьрʹа ӧса фәрз бу.

1. Иса бона «бахшандьна гӧна» мьр (Колоси 1:14).

   Мәрьве пешьн Адәм беԛьсур у бегӧнә һатьбу әʹфьрандьне. Әԝи бь һʹәмде хԝә сафи кьр гӧрʹа Хԝәде нәкә. Нәгӧһдарийа Адәм, йан жи гӧне ԝи, сәр һʹәму зӧрʹәтед ԝи һʹӧкӧм бу. Кʹьтеба Пирозда те готьне: «Бь нәгӧһдарийа йәки гәләк бунә гӧнәкʹар» (Рʹомайи 5:19).

   Иса жи беԛьсур бу, ле әԝи тʹӧ щар гӧнә нәкьр. Ләма жи әԝи карьбу бьбә «мәщала бахшандьна гӧнед мә» (1 Йуһʹәнна 2:2). Жь бо нәгӧһдарийа Адәм тʹәмамийа инсанәте бу диле гӧна, ле мьрьна Иса гӧне ԝан һʹәму мәрийа тʹәмьз кьр, йед кӧ баԝәрийа хԝә ԝи тиньн.

   Әм дькарьн бежьн, ԝәки Адәм тʹәмамийа инсанәте фьротә гӧнә. Ле Иса бь рʹәзәдьли жийина хԝә бона мә бәрва да, һʹәмушк кʹьрʹин у ньһа әм ԝирʹа дькʹәвьн. Ләма жи «һәгәр йәк гӧнә бькә, ль щәм Баве пьштгьре мә, Иса Мәсиһ, Йе Һәԛ һәйә» (1 Йуһʹәнна 2:1).

2. Иса мьр «ԝәки һәр кәсе кӧ ԝи баԝәр бькә ӧнда нәбә, ле жийина ԝийә һʹәта-һʹәтайе һәбә» (Йуһʹәнна 3:16).

   Рʹаст ә Адәм ӧса һатьбу әʹфьрандьне, ԝәки һʹәта-һʹәтайе бьжи, ле гӧнә ԝи бәрбь мьрьне бьр. Бь сайа Адәм «гӧнә кʹәтә дьне у жь гӧнә жи мьрьн һат, ӧса жи мьрьн сәр һʹәму мәрьва бәла бу, чьмки һʹәмуйа жи гӧнә кьр» (Рʹомайи 5:12).

   Бь сайа мьрьна Иса, мәрьвед кӧ баԝәрийа хԝә ԝи тиньн нә тʹәне жь гӧнә аза дьбьн, ле ӧса жи жь дилтийа мьрьне. Кʹьтеба Пироз әве дәрәще ӧса шьровәдькә: «Ԝәки чаԝа гӧнә бь мьрьне һʹӧкӧм кьр, ӧса жи кʹәрәма Хԝәде бь рʹастһʹәсабкьрьне һʹӧкӧм бькә, мә бьбә бәрбь жийина һʹәта-һʹәтайе бь сайа Хӧдане мә Иса Мәсиһ» (Рʹомайи 5:21).

   Һәмьки рʹожед мәда жийина мәрьва дьреж накʹьшинә, ле диса жи Хԝәде соз дьдә, ԝәки ԝе жийина һʹәта-һʹәтайе бьдә мәрьвед рʹаст. Ӧса жи ԝе мәрьва жь мьрьне рʹакә, ԝәки әԝана жи жь ԛӧрбанбуна Иса кʹаре бьстиньн (Зәбур 37:29; 1 Корьнтʹи 15:22).

3. Иса йәки гӧһдар бу, «әԝи хԝә ньмьз кьр, һʹәта мьрьнерʹа жи ԛайл бу» у ӧса избат кьр, ԝәки мәрьв дькарә амьнийа хԝә Хԝәдерʹа хԝәй кә, фьрԛи тʹӧнә әԝ рʹасти чь щерʹьбандьна жи бе (Филипи 2:8).

   Бәдән у һʹьш-аԛьле Адәм кʹамьл бун, ле диса жи әԝ мьԛабьли Хԝәде чу, чьмки әԝи тьштәки ӧса хԝәст, чь кӧ ԝирʹа нәдькʹәт (Дәстпебун 2:16, 17; 3:6). Ԝәʹдә шунда дьжмьне Хԝәде йе сәрәкә, Мире-щьна, гот ԝәки тʹӧ кәс ԝе Хԝәдерʹа амьн нәминә, илаһи һәрге әʹмьре ԝи бькʹәвә бьн ԛәзийе (Ибо 2:4). Ле мәрьве кʹамьл, Иса, гӧрʹа Хԝәдеда ма у һәла һе жи бәр мьрьна бь сосрәти у щәфа амьнийа хԝә ԝирʹа хԝәй кьр (Ибрани 7:26). Бь ԝе йәке һатә избаткьрьне, ԝәки мәрьв дькарә амьнийа хԝә Хԝәдерʹа хԝәй кә, фьрԛи тʹӧнә рʹасти чь чәтьнайа у щерʹьбандьна жи бе.

Пьрсед дәрһәԛа мьрьна Иса

• Иса чьма гәрәке бь чәрчьрандьн у мьрьне инсанәт хьлаз кьра? Гәло Хԝәде нькарьбу щәзакьрьна бь мьрьне бьда һьлдане?

  Ԛануна Хԝәдеда те готьне, ԝәки «маше гӧнә мьрьн ә» (Рʹомайи 6:23). Адәм әԝ ԛанун заньбу, чьмки Хԝәде ԝирʹа готьбу, кӧ ахьрийа нәгӧһдарикьрьне мьрьн ә (Дәстпебун 3:3). Чахе Адәм гӧнә кьр, Хԝәдейе кӧ «хԝәйе готьна хԝә» йә, созе хԝә ани сери (Тито 1:2). Адәм нә тʹәне гӧнә дәрбази сәр зӧрʹәтед хԝә кьр, ле ӧса жи мьрьн.

  Рʹаст ә инсанәта гӧнәкʹар һежайи мьрьне йә, ле диса жи Хԝәде «жь дәԝләмәндтийа кʹәрәма» хԝә мәрьв кʹәрәм кьрьн (Әфәси 1:7). Әԝи сафи кьр бь сайа ԛӧрбанбуна Иса инсанәте жь гӧнә у мьрьне бькʹьрʹә, у әве йәке һәԛи у рʹәʹмтийа ԝи да кʹьфше.

• Иса кʹәнге мьр?

  Иса рʹожа Щәжьна Дәрбазбуне нивро незики «сьһʹәта сьсийа» мьр, демәк ԝәкә нәһ сьһʹәт паши рʹоһьлате (Марԛос 15:33-37). Әԝ рʹож ль гора салнамәйа мә Ини, 1 Нисане, сала 33 Д.М. бу.

• Иса кʹидәре мьр?

  Иса сәр «ԝи щийе кӧ жерʹа ‹Щийе Ԛаф› дьготьн, бь ибрани ‹Голгота›» кӧшт ьн (Йуһʹәнна 19:17, 18). Ԝәʹде бәре әԝ щи жь Оршәлиме дәр бу (Ибрани 13:12). Дьԛәԝьмә, әв бьльндщи бу, чьмки Кʹьтеба Пирозда те готьне, ԝәки чахе Иса дардадькьрьн, мәрьва «дурва ль ве йәке дьньһерʹин» (Марԛос 15:40). Иро әм сәд сәләфи нькарьн бежьн кӧ Голгота кʹидәре йә.

• Иса чаԝа мьр?

  Гәләк баԝәр дькьн, ԝәки Иса сәр хач дарда кьрьбун. Ле Кʹьтеба Пирозда те готьне: «Әԝи гӧнед мә бәдәна хԝәда рʹакьрьнә сәр даре» (1 Пәтрус 2:24). Ньвискʹаред Кʹьтеба Пироз, бона шьровәкьрьна мьрьна Иса дӧ хәбәред Йунани «стаурос» у «ксилон» данә хәбате. Һьнә зандар дьбежьн, ԝәки әԝ хәбәр тенә һʹәсабе дар йан стун.

• Чаԝа гәрәке мьрьна Иса биньн бира хԝә?

  Евара Щәжьна Дәрбазбуне Иса щәжьнәкә тʹәзә кʹьфш кьр у тʹәми да шагьртед хԝә: «Ве йәке бона биранина мьн бькьн» (1 Корьнтʹи 11:24). Чәнд сьһʹәт шунда Иса кӧшт ьн.

  Ньвискʹаред Кʹьтеба Пироз Иса бәрамбәри бәрха Щәжьна Дәрбазбуне кьрьнә (1 Корьнтʹи 5:7). Щәжьна Дәрбазбуне дьани бира Исраелийа азакьрьна ԝанә жь дилтийе. Һәма ӧса жи Щәжьна Биранина Мьрьна Иса Мәсиһ тинә бира Мәсиһийа, ԝәки әԝана жь гӧнә у мьрьне һатьнә азакьрьне. Щәжьна Дәрбазбуне сале щарәке, ль гора салнәмайа һиве, 14 Нисане дәрбаз дькьрьн. Мина ԝе йәке Мәсиһи жи сале щарәке Биранина Мьрьна Иса дәрбаз дькьн.

  Һәр сал бь милйона мәрьв Биранина Мьрьна Иса ль гора салнамәйа һиве, 14 Нисане дәрбаз дькьн.