Ве готареда

•  Чь йә һәвнаскьрьн?

•  Тӧ бона һәвнаскьрьне һазьр и?

 Һьнә мәрьв һәвнаскьрьне һʹәсаб дькьн ча ԝәʹдәдәрбазкьрьнәкә һʹәԝас. Ве готареда те шьровәкьрьне, ԝәки «һәвнаскьрьн» әԝ ԝәʹдә йә гава ԛиз у хорт тʹәвайи дәрбаз дькьн, сәва бьвиньн һәла әԝана бона зәԝаще лайиԛи һәв ьн йан на. Демәк нета һәвнаскьрьне һәйә у әԝ нә бона ԝе йәке йә, ԝәки ԛиз у хорт жь рʹастһатьна һәв һʹәԝасе бьстиньн.

 Ԝәʹдә шунда һәвнаскьрьн гәрәке али тә бькә сафи ки, кӧ тʹәви ԝи мәрьви бькʹәви зәԝаще, йан һәләԛәтийа романтик бьди сәкьнандьне. Чахе тӧ тʹәзәда дәстпедьки рʹасти ԝи мәрьви бейи, кʹижани дьхԝази нас ки, гәрәке һазьр би бона ԝе йәке, кӧ дьбәкә һун лайиԛи һәв нибьн.

 Фькьра сәрәкә: Һәрге тӧ баԝәр и кӧ бона һәвнаскьрьне һазьр и, демәк тӧ гәрәке ӧса жи баԝәр би ԝәки бона зәԝаще жи һазьр и.

 Һәвнаскьрьн бәрбь зәԝаще дьбә, ләма жи ԝе баш бә бьфькьри һәла хәйсәт-һʹӧнӧред тәйә ӧса һәнә кӧ дькарьн зийане бьдьнә һәләԛәтийа ԝә. Дина хԝә бьдә мәсәлед кӧ жере ньвисар ьн:

•   Һәләԛәти малбәтеда. Әв йәк кӧ тӧ тʹәви де-бав йан хушк-бьред хԝә чаԝа хԝә дьди кʹьфше, илаһи чахе тӧ стреседа ни, нишан дькә кӧ те һьндава һәвалзәԝаще хԝә чаԝа би.

   Принсипа Кʹьтеба Пироз: «Дә бьра һәр тәʹлайи, һерс, бәрзәԛи, ԛарʹә-ԛарʹ у кʹьфьри-зьфьри жь ԝә дур бьн тʹәви һәр щурʹә кʹин-бохийева» (Әфәси 4:31).

   Пьрсе бьдә хԝә: «Де-баве мьн у хушк-бьред мьн дькарьн дәрһәԛа мьн бежьн, ԝәки әз һьндава ԝанда бь ԛәдьр ьм? Чахе әз тьштәкида ԝанрʹа нәԛайил ьм, әз тʹәви ԝан рʹьһʹәт шеԝьр дькьм, йан һерс дькʹәвьм у ԝанрʹа дькʹәвьмә һʹӧщәте?»

•   Кʹара хԝә нәгәрʹә. Зәԝащеда ԝе лазьм бә кӧ бьфькьри һәла һәвалпʹаре тә чь дьхԝазә. Ԝе йәкеда тӧ гәрәке кʹара хԝә нәгәрʹи у щарна тьштәки жь хԝә кем ки.

   Принсипа Кʹьтеба Пироз: «Нәбә кӧ йәк кʹара хԝә бьгәрʹә, ле йа һәвале хԝә» (1 Корьнтʹи 10:24).

   Пьрсе бьдә хԝә: «Әз тʹьме сәр йа хԝә дьсәкьньм, кӧ һәр тьшт ль гора хԝәстьна мьн бә? Мәрьвед дьн дәрһәԛа мьн дькарьн бежьн, кӧ әз йәки сәрԝахт ьм?»

•   Мьлукти. Мер йан жьна баш ԝе шашийед хԝә бинә рʹуйе хԝә у жь дьл бахшандьне бьхԝазә.

   Принсипа Кʹьтеба Пироз: «Әм һʹәму жи гәләки шашийа дькьн» (Аԛуб 3:2).

   Пьрсе бьдә хԝә: «Әз һазьр ьм шашийед хԝә биньм рʹийе хԝә, у бона шашийед хԝә бахшандьне бьхԝазьм? Гава кәсәк ширәте дьдә мьн, әз дьхәйидьм?»

•   Хәрщкьрьна пʹәра. Гәләк щар жь бо пʹәра, зәԝащеда проблем пешда тен. Ләма жи һәрге тӧ пʹәра рʹаст бьди хәбате, те жь гәләк проблема дур би.

   Принсипа Кʹьтеба Пироз: «Жь ԝә кʹижан ә, кӧ бьхԝазә бьльндщикә нобәдара чекә, пешийе рʹунәни нәдә бәр һʹәсеб, гәло ԛәԝата ԝийе бьгьһиже бинә сери йан на?» (Луԛа 14:28).

   Пьрсе бьдә хԝә: «Әз контрол дькьм кӧ чьԛас пʹәра хәрщ дькьм, йан әз һәр гав дькʹәвьмә бьн дәйна? Те кʹьфше ԝәки әз пʹәра рʹаст дьдьмә хәбате?»

•   Рʹӧһʹанийа тә. Һәрге тӧ Шәʹде Йаһоԝа йи, тӧ гәрәке хԝәрʹа бьки хәйсәт ԝәки һәр гав Кʹьтеба Пироз лекʹолин ки у һәрʹи щьвата.

   Принсипа Кʹьтеба Пироз: «Бәхтәԝар ьн әԝ, йед кӧ фәʹм дькьн һʹәԝщәтийа хԝәйә рʹӧһʹани» (Мәтта 5:3, ДТʹ).

   Пьрсе бьдә хԝә: «Әз ԛәԝате дьдьмә хәбате, ԝәки баԝәрийа хԝә ԛәԝи хԝәй кьм? Жийина мьнда шьхӧлед рʹӧһʹани дьһа фәрз ьн, йан әз дьһельм дина мьн һәрʹә сәр тьштед дьн?»

 Фькьра сәрәкә: Әԝ мәрьве кӧ тӧ ле бьстини, һежайи һәвалзәԝащәки баш ә. Һәрге тӧ һәр тьшти дьки сәва кӧ мәрьвәки баш би, те дина ԝи кәси бькʹьшини сәр хԝә, кʹижан кӧ мина тә ӧса дькә.