Һәрге тӧ Кʹьтеба Пироз вәки, тӧйе гәләк текст бьвини. Ле бьра әԝ йәк рʹийа тә нәгьрә, ԝәки нәхуни! Дәԝсе сәр Кʹьтеба Пироз ӧса бьньһерʹә ча сәр сьфрәкә кӧ бь щурʹә-щурʹә хԝарьна тʹьжә йә. Фәʹмдари йә, те нькарьби һʹәму щурʹә хԝарьне кӧ дьвини, бьхԝи, ле тӧ дькари чәнд щурʹә хԝарьн бьжбери, бьхԝи у тʹер би.

 Сәва кӧ жь хԝәндьна Кʹьтеба Пироз бь тʹәмами кʹаре бьстини, тӧ гәрәке һʹьш-аԛьле хԝә бьди сәр хԝәндьне. Әв готар ԝе али тә бькә ве йәке бьки.

Ве готареда

•  Чьрʹа ԝәʹде хԝәндьна Кʹьтеба Пироз гәрәке һʹьш-аԛьле тә сәр хԝәндьне бә?

•  Чаԝа тӧ дькари жь хԝәндьна Кʹьтеба Пироз кʹаре бьстини?

•  Щаһьлед дьн чь дьбежьн

 Чьԛас һе зедә тӧ хирәт бьки ԝәки Кʹьтеба Пироз бьхуни, һаԛас һе зедә тӧйе кʹаре бьстини. Бьдә бәр чʹәʹве хԝә: Һәрге тӧ рʹәнге чайе бьки нав ава кʹәл у дәрберʹа дәрхи, ав ԝе һьнәки рʹәнг у тәʹме бьстинә. Ле һәрге тӧ рʹәнге чай зедә аведа бьһели, һьнге тәʹм у рʹәнге ԝе дьһа ԛайим бә.

 Дәрһәԛа хԝәндьна Кʹьтеба Пироз жи әм дькарьн ӧса бежьн. Дәԝса кӧ сәрʹа-бәрʹа у зу-зу бьхуни, ӧса бькә ԝәки һʹьш-аԛьле тә бь тʹәмами сәр хԝәндьне бә. Ньвискʹаре Зәбура 119 һәма ӧса дькьр. Дәрһәԛа хԝәндьна Ԛануна Хԝәде әԝи ӧса гот: «Тʹәмамийа рʹоже әз сәр ԝе дьфькьрьм» (Зәбур 119:97).

 Һәмьки, әв йәк найе һʹәсабе, ԝәки тӧ гәрәке жь сьбәһе һʹәта еваре Кʹьтеба Пироз бьхуни у сәр бьфькьри. Фькьра сәрәкә әԝ ә: Зәбурбеж ԝәʹдә хԝәрʹа башԛә дькьр, ԝәки сәр Хәбәра Хԝәде бьфькьрә. У әԝе йәке али ԝи кьр, кӧ сафикьрьнед баш бькә (Зәбур 119:98-100).

 «Щарәке дийа мьн мьнрʹа гот: ‘Һʹәфтийеда 7 рʹожед тә һәнә, у нава һʹәфтийеда тӧ гәләк тьшт бона хԝә дьки. Ле гәло Йаһоԝа һежа нинә, ԝәки бона ԝи ԝәʹдә бьвини? Әв йәк гәләк фәрз ә!’»—Мелани.

 Һәрге тӧ дәрһәԛа принсипед Кʹьтеба Пироз бьфькьри, тӧйе сафикьрьнед дьһа баш бьки, мәсәлә, чахе һәвала дьжбери йан жи дькʹәви щерʹьбандьна.

•   Нете хԝәрʹа дайнә. Кәчʹькәкә щаһьл Йулйа, ширәтәкә ӧса дьдә: «Пешда хԝәрʹа бәрнаме чекә у бьньвисә кӧ кʹәнге тӧйе Кʹьтеба Пироз бьхуни. Тӧ гәрәке пешда хԝәрʹа сафи ки, тӧйе чь бьхуни, кʹәнге бьхуни, у кʹидәре бьхуни».

•   Щики лайиԛ бона хԝәндьне бьвинә. Кәчʹькәкә щаһьл Щийана ширәтәкә ӧса дьдә: «Хԝәрʹа щики рʹьһʹәт бьвинә. Бьра нәфәред тә һаш пе һәбьн, кӧ тӧ кʹәнге Кʹьтеба Пироз дьхуни, ԝәки тә әʹщьз нәкьн».

   Ԝе баш бә ԝәки тӧ ӧса жи һащәтед хԝәйә әләктроник весини йан жи дайни сәр режима бедәнг. Тӧ ӧса жи дькари Кʹьтеба Пирозә нәшьркьри бьхуни. Ль гора леколинәке, хԝәндьна әʹдәбйәтед нәшьркьри дьһа али мәрьва дькьн, ԝәки педа һʹьш-аԛьле хԝә бьдьнә сәр хԝәндьне у рʹьнд фәʹм бькьн. Ле хԝәндьна сәр екране һьнәки чәтьн дькә, чьмки мәрьв нькарә рʹьнд дина хԝә бьдә хԝәндьне.

   «Һʹьш-аԛьле мьн дьрʹәвә чахе әз сәр екране дьхуньм. Щарна смс тенә сәр һащәта мьн, щарна батарейа ве рʹудьне, щарна жи Интернет нахәбьтә. Ле сәва кӧ пе кʹьтеба нәшьркьри бьхуни, тʹәне рʹонайа баш лазьм ә»—Елена.

•   Пешийе дӧа бькә. Жь Йаһоԝа һиви кә кӧ али тә бькә ԝәки фәʹм ки, бира хԝәда хԝәй ки у жь хԝәндьне кʹаре бьстини (Аԛуб 1:5).

   Сәва кӧ ль гора дӧайе хԝә бьки, кʹур ве пʹаре леколин кә, йа кӧ тӧ дьхуни. Тӧ ча дькари ве йәке бьки? Һәрге тӧ JW Library дьди хәбате йан жи Кʹьтеба Пирозә онлайн дьхуни, тӧ дькари рʹезәке бьтькини, сәва кӧ леколина зедә бьки у готаред ве рʹезева гьредайи, бьвини.

•   Пьрса бьдә хԝә. Мәсәлә: «Әз жь ве сәрһатийе дәрһәԛа Йаһоԝа чь педьһʹәсьм? Ԝьра кʹижан һʹӧнӧре ԝи те кʹьфше, кӧ әз дькарьм чʹәʹв бьдьме?» (Әфәси 5:1) «Жь ве сәрһатийе әз хԝәрʹа чь дәрсе һин дьбьм, ԝәки әʹмьре хԝәда бьдьмә хәбате?» (Зәбур 119:105) «Чь кӧ мьн хԝәндийә, әз ча дькарьм бона аликʹарийа мәрьвед дьн бьдьмә хәбате?» (Рʹомайи 1:11)

   Жь хԝә бьпьрсә: «Чь кӧ мьн хԝәндийә, ча тʹема Кʹьтеба Пирозва гьредайи йә?» Әԝ пьрсәкә гәләк фәрз ә. Чьрʹа? Чьмки тʹәмамийа Кʹьтеба Пироз, жь Дәстпебуне һʹәта Әʹйанти, тʹема Кʹьтеба Пирозә сәрәкәва гьредайи йә: Демәк, чаԝа Йаһоԝа ԝе бь сайа Пʹадшатийа хԝәйә әʹзмани наве хԝә пироз кә у избат кә, ԝәки изьна ԝи һәйә сәрԝертийе бькә у кӧ сәрԝертийа ԝи йа һәрә баш ә.