Gava mirina Îsa Mesîh nêzik bû, wî dixwest Cejna Derbasbûnê tevî şandiyên xwe pîroz bike û bîranîneke nû, yanî Şîva Xudan, nîşanî wan bide. Loma, Îsa Mesîh Petrûs û Yûhenna şand ku ew odeyê hazir bikin (Lq 22:7-13; li resmê li rûyê kovarê binêre). Ev yek rêyî me dide ku gerek em jî ji bo Bîranînê ku li 27ê Adarê derbas bibe, haziriyê bikin. Bi îhtimaleke mezin, civata te ji berê de hin haziriyan dike. Mesela, gotarvan, nan û şerab û tiştên din. Gelo tu çawa dikarî xwe ji bo Bîranînê hazir bikî?

Dilê xwe hazir bike. Ayetên ku ji bo Bîranînê tên hilbijartin, bixwîne û li ser wan kûr bifikire. Bernameya ji bo xwendinê li kitêboka Nivîsarên Pîroz Her Roj Lêkolîn Bike bibîne. Wekî din, tabloya ku di Bernameya Civîna Jiyan û Xizmetê ya Nîsan 2020 de hatibû weşandin nîşan dide ku çar qeydên Încîlê li ser rojên dawîn ên Îsa Mesîh çi dibêjin. Ji xeynî vê, malbat dikarin li îbadeta malbatê hin weşanên ku qîmeta fîdeyeyê zelal dikin, bi hev re lêkolîn bikin.

Kesên din dawet bike. Bi dil û can di kampanyaya belavkirina dawetiyeyan de bixebite. Gelo tu dikarî ziyaretên dubare, xwendekarên berê, hevalkar, hevalders yan merivên xwe dawet bikî? Wekî din, wê baş be ku kalên civatê xwişk û birayên neaktîf jî dawet bikin. Eger tu dixwazî kesên ku li cihekî din dijîn ji bo Bîranînê dawet bikî, ji bo melûmata di heqê saet û cihê Bîranînê de li ser malpera jw.org here DER HEQÊ ME DE û li ser “Bîranîn” bitikîne.

Wekî din, em çawa dikarin ji bo Bîranînê haziriyê bikin?