“Loma hişyar bimînin, çimkî hûn ne wê rojê û ne jî wê saetê dizanin” (METTA 25:13).

“Hay ji xwe hebin! Hişyar bin! Çimkî hûn nizanin kengê ew wext wê bê” (MARQOS 13:33).

Li ser erdê tu kes nizane ku dawiya vê dinyaya xerab wê kengê were. Lê belê, Xwedê dizane ku “ew roj û ew saet” wê kengê were (Metta 24:36). Gelo em dikarin pê derxin ka dawiya dinyayê nêzîk e? Belê! Îsa Pêxember ji dostên xwe re gotibû ku bila ew bala xwe bidin hin tiştên ku wê berî dawiya dinyayê çêbin.

Îsa Pêxember gotibû ku nîşana “dawiya dinyayê” çi ye. Wî got: “Milet wê li hember miletan, padîşahî li hember padîşahiyan rabin. Û wê li cih cihan xela û erdhejîn çêbin” (Metta 24:3, 7). Wekî din, Îsa Pêxember gotibû ku “êşa zirav” yanî nexweşiyên giran wê belav bibin (Lûqa 21:11). Ma em bi çavên xwe nabînin ku gotinên Îsa Pêxember îro çawa tên cih?

Di rojên me de, însan ji ber şer û herban, xela, zelzele û nexweşiyên giran pir êşê dikişînin. Mesela, di sala 2004an de zelzeleyeke mezin Behra Hindistanê hejand, tsûnamî çêbû û 225.000 kes mirin. Di nav sê salan de, ji ber pandemiya COVID-19 li seranserê dinyayê teqrîbên 6,9 milyon kes mirin. Îsa Pêxember gotibû ku emê ji çêbûna van tiştan fehm bikin ku dawiya vê dinyaya xerab êdî pir nêzîk bûye.

Kitêba Pîroz wexta berî dawiya dinyayê wek “rojên dawîn” bi nav dike (2. Petrûs 3:3, 4). 2. Tîmotêyos 3:1-5 dibêje ku di rojên dawîn de bêexlaqiya însanan wê zêde bibe. (Li çarçoveya “ Berî Dawiya Dinyayê” binêre.) Ma îro gelek însan xwehez, tima, dîn û har û bê dil nînin? Ev jî îsbat dike ku dawiya dinyayê pir nêzîk bûye.

Gelo rojên dawîn wê çi qas wext dewam bikin? Kitêba Pîroz dibêje ku ev wexteke kin e. Paşê, Xwedê wê qira însanên ku “rûyê erdê wêran dikin” bîne (Peyxam 11:15-18, 12:12, KP).

Xwedê dizane ku ewê di kîjan roj û saetê de vê dinyaya xerab tune bike (Metta 24:36). Lê dîsa jî, ji bo me xebereke xweş heye. Xwedê “naxwaze ku kesek helak bibe” (2. Petrûs 3:9). Ew fersendê dide her kesî ku ew wî nas bikin û bi ya wî bikin. Xwedê çima vêya dixwaze? Çimkî ew dixwaze ku em di dawiya dinyayê de sax bimînin, û bikevin dinyaya nû, yanî li ser erdê di cenetê de bijîn.

Xwedê bi destê bernameyeke perwerdeya Kitêba Pîroz ji hemû însanan re nîşan dide ku ew çawa dikarin bikevin dinyaya nû û li bin hikmê Padîşahiya wî bijîn. Îsa Pêxember gotibû ku “ev Mizgîniya Padîşahiyê wê li seranserê dinyayê bê dayîn” (Metta 24:14). Li seranserê dinyayê Şahidên Yehowa bi milyaran saet ji bo belavkirina mizgînê û hînkirina Kitêba Pîroz xerc kirine. Îsa Pêxember gotibû ku ev “Mizgîniya Padîşahiyê” wê berî hatina dawiya dinyayê li her derê were belavkirin.

Ji bo hikûmetên însanan êdî pir wext nemaye. Lê ji bo me xebereke xweş heye. Di dawiya dinyayê de, tu dikarî sax bimînî û bikevî ceneta ku Xwedê soz daye. Meqaleya bê zelal dike ku tu çawa dikarî bikevî dinyaya nû.